1-2. Antoy koneksion na Eclesiastes 11:6 ed kimey ya panagpulong?

DIAD arum ya bansa, labalabay na totoo ya dengelen so nipaakar ed maong a balita. Interesado ran maong ed ipupulong tayo! Balet diad arum ya lugar, aglabay na totoo ya pantongtongan so nipaakar ed Dios odino say Biblia. Diad lugar yo ey? Ondengel man ira odino andi, iilaloan nen Jehova ya itultuloy tayoy manpulong anggad ibaga to ya asumpal la iyan kimey.

² Walay panaon ya inggeter nen Jehova ya itunda tayo lay manpulong insan “onsabi so anggaan.” (Mat. 24:14, 36) Legan tayon aalagaren itan, antoy gawaen tayo pian naunor tayo so bilin ya “agmo pampapainawaen so limam”? *​—Basaen so Eclesiastes 11:6.

3. Anto ray aralen tayo ed sayan artikulo?

³ Inaral tayo ed akaunan artikulo so apatira ya nepeg tayon gawaen pian magmaliw tayon marundunong ya “sumisigay na totoo.” (Mat. 4:19) Diad sayan artikulo et pantongtongan tayo so taloran paraan no panon tayon napabiskeg so determinasyon tayon manpulong antokaman so situasyon tayo. Aralen tayo no akin ya importantin (1) manpokus tayo ed panagpulong, (2) magmaliw tayon maanos, tan (3) pabiskegen tayoy pananisia tayo.

4. Akin ya kaukolan tayoy manpokus ed kimey ya ipapagawa nen Jehova ed sikatayo?

⁴ Imbaga nen Jesus ed saray disipulo to no anto ray nagawa diad kaunoran iran agew. Amta to ya lapud saratan et nayarin  nabalang so pokus na saray papatumbok to ed panagpulong a kimey. Kanian pinaseseg to ra ya ‘mantultuloy iran manbantay.’ (Mat. 24:42) Sanen panaon nen Noe, dakel so nan-abalaan na saray totoo kanian ag-ira nanimano ed pasakbay nen Noe. Dakel met natan so nayarin mangala na imano tayo. (Mat. 24:37-39; 2 Ped. 2:5) Atan so rason no akin ya kaukolan tayoy manpokus ed kimey ya ipapagawa nen Jehova ed sikatayo.

5. Base ed Gawa 1:6-8, panon kalaknab so pakagawa na kimey ya panagpulong?

⁵ Kakkaukolan tayoy manpokus natan ed pangipulong ed Panarian. Impasakbay nen Jesus ya kayari na ipatey to et ituloy na saray papatumbok to so panagpulong tan mas dakel so nagawaan da. (Juan 14:12) Nen inatey si Jesus, wala ray disipulo to ya pinmawil ed anapan da ya panagsigay. Kayari na inkioli to, nampanengneng si Jesus ed sikara tan nanggawa na milagro, kanian amayamay so narel dan sira. Balet kayari to man et indanet to ya mas importante so panagsigay na totoo nen say anggan anton kimey. (Juan 21:15-17) Antis ya pinmawil si Jesus ed tawen, imbaga tod saray disipulo to ya aliwa labat ya diad Israel so pampulongan da, noagta anggad sankaarawian ya pasen na dalin. (Basaen so Gawa 1:6-8.) Kalabas na dakel a taon, impanengneng nen Jesus ed si apostol Juan no anto ray nagawa diad “agew na Katawan.” * Say sakey ya anengneng nen Juan et nipupulong so “andi-anggaan a maong a balita . . . diad kada nasyon tan tribu tan lenguahe tan rasa” diad panangigiya na anghel. (Apo. 1:10; 14:6) Malinlinew sirin ya talagan labay nen Jehova ya ipulong tayo natan so maong a balita anggad ibaga to ya asumpal la iyan kimey.

6. Antoy sakey a paraan pian makapampokus tayo ed panagpulong a kimey?

⁶ Say sakey a paraan ya makapampokus tayo ed panagpulong et no isipen tayo no panon  itayon tutulongan nen Jehova. Singa bilang, tataryaan to tayo na dakdakel ya espiritual a naakan panamegley na inimprinta tan digital iran publikasyon, audio tan video recording, tan saray programa diad JW Broadcasting. Isipen pa, saray impormasyon ed official website tayo et available ed masulok ya 1,000 a lenguahe! (Mat. 24:45-47) Anggapoy pankakasakey na saray totoo ed mundo lapud politika, nandurumay relihyon da, wala ray mayaman tan wala ray mairap so bilay da. Sikatayo balet ya masulok a waloran milyon ya lingkor nen Jehova diad interon mundo et walay pankakasakey tayo tan amin tayo et sanaagi. Singa bilang nen Biernes, Abril 19, 2019, saray Tasi diad interon mundo et nankakasakey ya nambantay na paliwawa nipaakar ed teksto diad saman ya agew. Insan diad saman ya labi, walay 20,919,041 ya nantitipon pian nodnonoten so Memoryal na impatey nen Jesus. On, makapampokus tayo ed kimey ya panagpulong no isipen tayo ya talagan baleg a pribilehyo ya nanengneng iyan milagro diad panaon tayo tan walay nitutulong tayo ed satan.

7. Panon ya makatulong so alimbawa nen Jesus pian makapampokus tayo ed panagpulong?

⁷ Say sakey nin paraan pian makapampokus tayo ed panagpulong et no aligen tayoy alimbawa nen Jesus. Agton balot inabuloyan ya nabalang so pokus to ed pangipulong to ed katuaan. (Juan 18:37) Sikatoy ag-atukso nen inyopresi ed sikato nen Satanas so “amin a panarian na mundo tan say karakpan na saratan.” Tan agmet atukso nen wala ray malabay ya sikato so magmaliw ya ari da. (Mat. 4:8, 9; Juan 6:15) Ag-atukson manpayaman tan agtinmundan nampulong anggano dakdakel so onsusumpa ed sikato. (Luc. 9:58; Juan 8:59) No nasusubok so pananisia tayo, makapampokus tayo no tandaan tayo so bilin nen apostol Pablo ya aligen tayoy alimbawa nen Jesus pian ‘agtayo onkesaw tan onsuko.’​—Heb. 12:3.

8. Antoy sarag ya gawaen na toon maanos, tan akin ya importante itan?

⁸ Say toon maanos et kalmado ton alagaren so panguman na sakey ya situasyon. Kaukolan tayoy mananos balanglan iilaloan tayo ya manguman la so sakey ya aliwliwan situasyon, odino aalagaren tayon nagawa so papangarapen tayo. Si propetan Habacuc et labalabay to lan manampot so kaugsan diad Juda nensaman. (Hab. 1:2) Inilaloan na saray disipulo nen Jesus ya say Panarian et “ompatnag a tampol” pian nibulos la ra ed panamairap na saray Romano. (Luc. 19:11) Diad sikatayo natan et labalabay tayo met lan ekalen la na Panarian na Dios so amin ya kaugsan diad mundo tan magmaliw lan Paraiso so dalin. (2 Ped. 3:13) Pero kaukolan tayoy mananos tan alagaren tayoy panaon ya inggeter nen Jehova. Aralen tayo natan no panon itayon ibabangat nen Jehova ya mananos.

9. Anto ray prueba ya maanos si Jehova?

⁹ Si Jehova so sankaanosan ed amin. Inikdan toy Noe na malaem ya panaon pian nipaalagey to so biong tan napasakbayan to ray totoo. (1 Ped. 3:20; 2 Ped. 2:5) Dinengel nen Jehova si Abraham nen aminpigapiga ya nantepet nipaakar ed desisyon To ya deralen iray mauges ya totoo ed syudad na Sodoma tan Gomorra. (Gen. 18:20-33) Tan nilasus a taon ya inanosan nen Jehova so agmatoor ya bansan Israel. (Neh. 9:30, 31) Anggad natan et nanenengneng tayo so inkaanos nen Jehova ta iikdan to na panaon so amin a totoo pian ‘walay pankanawnawa ran magbabawi.’ (2 Ped. 3:9; Juan 6:44; 1 Tim. 2:3, 4) No si Jehova et agaylay anos to, nepeg sirin ya mananos tayo met ed panagpulong tan panagbangat ya kimey. Walay ilustrasyon ya impaisulat nen Jehova diad Biblia pian nibangat to itayon mananos.

10. Base ed Santiago 5:7, 8, antoy naaralan tayo ed saray dumaralos?

 ¹⁰ Basaen so Santiago 5:7, 8. Makaaral tayo ed inkaanos na saray dumaralos. Tua, wala ray tanaman ya maples ya ombaleg, balet maslak ed saray tanaman et mabayag ni antis iran manbunga tan ontatken so bunga ra. Kanian manalagar ni ray dumaralos antis iran manani. Diad Israel et manga anem bulan so alagaren na saray dumaralos. Mantanem ira no kagapo na mamauran diad kapegleyan na Oktubre, tan say panani ra et no manampot lay mamauran diad kapegleyan na Abril. (Mar. 4:28) Komon ta aligen tayo so inkaanos na saray dumaralos. Balet, nayarin aliwa itan ya mainomay.

11. Akin ya importante so inkaanos diad ministeryo tayo?

¹¹ Lapud agtayo perpekto, ompan no maminsan et labay tayon nanengneng ya tampol so bunga na saray sagpot tayo. Balet isipen tayo pa imay alimbawa na dumaralos. Kaukolan ya sikatoy tuloytuloy ya mansagpot pian walay anien to​—manbukalkal na dalin, mantanem, manbagot na dika, tan mansalog. Ontan met so kimey ya panagbangat—​kaukolan so tuloytuloy ya pansagpot. Kaukolan nin palabasen so panaon antis ya onkiwas iray iyaaralan tayo ya bagoten ed puso ra so panangidumaduma tan aralen da so magmaliw ya maaro. No maanos itayo, agtayo basta-basta nadismaya anggano anggapoy ondengel ed mensahe tayo. Tan anggano wala ray marakep ya resulta ed ministeryo tayo, kaukolan nin siansia so anos. Agtayo nayarin pasooten iray iyaaralan tayo na Biblia ya iyaplikay nanaaralan da. Anggan saray disipulo nen Jesus nensaman et agda atalosan ya tampol iray ibabangat tod sikara. (Juan 14:9) Tandaan tayo ya anggano sikatayo so mantatanem tan mansasalog, si Jehova so mamapabaleg.​—1 Cor. 3:6.

12. Panon tayon nipanengneng so inkaanos no pupulongan tayo ray kanayon tan kapamilya tayo?

¹² Ompan nairapan tayon ipanengneng so  inkaanos no say pupulongan tayo et saray kanayon tan kapamilya tayo. Makatulong iyan prinsipyo ya nabasad Eclesiastes 3:1, 7: “Walay panaon . . . na ag-iyesel tan panaon na pansalita.” Anggano agtayo onesel no maong so ugali tayo, ompan magmaliw iran interesado ed mensahe na Biblia. Balet siempre, nepeg ya akaparaan tayon mansalita pian nipaamta tayod sikara so katuaan. (1 Ped. 3:1, 2) Kaukolan tayon anosan ya pulongan tan bangatan so amin ya totoo, kaiba la ray kapamilya tayo.

13-14. Mangiter na pigaran alimbawa na saray lingkor nen Jehova ya balibalin aligen so inkaanos da.

¹³ Makaaral tayo ed inkaanos na saray matoor ya lingkor na Dios nensaman tan natan. Anggano labalabay nen propetan Habacuc ya naandi la so kaugsan, sikatoy nananos tan imbaga to: “Mantultuloy ak a manbantay.” (Hab. 2:1) Imbaga met nen apostol Pablo ya labalabay ton “nasumpal” so ministeryo to, balet maan-anos ton intuloy ya impulong so maong a balita.​—Gawa 20:24.

¹⁴ Imanoen so eksperiensya na sanasawa ya nan-graduate ed Gilead tan niyasain ed bansa ya dagdaiset so Tasi tan maslak ed saray totoo et aliwan Kristiano. Pigpigara labat so malabay ya manaral na Biblia. Pero nababalitaan da ed saray kaklase da ed Gilead ya dakdakel so niyaaralan day Biblia tan natutulongan dan magmaliw ya Tasi. Anggano singa anawet so teritorya na sayan sanasawa, maan-anos dan intuloy so nampulong. Kalabas na waloran taon, malikeliket ira ta walan siansiay nampabautismo ya iyaaralan da na Biblia. Antoy naaralan tayo ed sarayan matoor ya lingkor nen Jehova nensaman tan natan? Ag-ira nginmiras tan agda impanpainawa so lima ra, kanian benendisyonan nen Jehova so inkaanos da. Komon ta aligen tayo “iramay angawat na saray sipan lapud pananisia tan inkaanos da.”​—Heb. 6:10-12.

15. Akin ya no mabiskeg so pananisia tayo et mas determinado tayon manpulong?

¹⁵ Mas napakiwas itayon pulongan so mas dakel ya totoo anggad posible no kombinsido tayo ya tua so mensahe ya ipupulong tayo. Matalek tayo ya talagan ontua iray sipan ya nabasa ed Salita na Dios. (Sal. 119:42; Isa. 40:8) Sankanengneng tayo la ya nasusumpal iray propesiya ed Biblia. Naoobserbaan tayo met no panon ya manguuman so bilay na totoo lapud pangiyaaplika da ed saray prinsipyo na Biblia. Saraya so rason no akin ya manisia tayo ya importantin narengelan na amin so maong a balita na Panarian.

16. Base ed prinsipyo ya walad Salmo 46:1-3, akin ya mas determinado itayon manpulong no mabiskeg so pananisia tayo ed si Jehova tan Jesus?

¹⁶ Mas determinado tayo met ya manpulong no mabiskeg so pananisia tayo ed si Jehova, say Lapuan na mensahen ipupulong tayo, tan ed si Jesus, say introno to ya Ari ed Panarian. (Juan 14:1) Antokaman so situasyon tayo, lanang ya wadtan si Jehova ya manprotekta tan mamabiskeg ed sikatayo. (Basaen so Salmo 46:1-3.) Sakey ni, matalek tayo ya si Jesus so mangidadaulo ed kimey ya panagpulong tan uusaren to so pakayari tan autoridad ya inter nen Jehova ed sikato pian tulongan itayo.​—Mat. 28:18-20.

17. Mangiter na alimbawa no akin ya nepeg tayon itultuloy so manpulong.

¹⁷ No mabiskeg so pananisia tayo, matalek tayo ya bendisyonan nen Jehova iray sagpot tayo, ya no maminsan et diad paraan ya agtayo iilaloan. (Ecl. 11:6) Singa bilang, diad kada agew et nilibon totoo so makakanengneng ed saray cart tan literature display tayo. Kasin walay maong ya resulta na sayan paraan na panagpulong? On wala! Diad Nobyembre 2014 ya Ministeryo Tayo ed Panarian, nabasa tayo so eksperiensya na sakey ya estudyante ed unibersidad  ya labay toy manggawa na report nipaakar ed Saray Tasi nen Jehova. Anggapoy naromog ton Kingdom Hall, balet walay anengneng ton literature display na saray Tasi diad eskuelaan da, tan diman to nalmo iray impormasyon ya kaukolan to parad report to. Kalabas na panaon, sikatoy abautismoan bilang Tasi tan natan et regular payunir la. Ipapanengneng na onia ran eksperiensya ya wala ni ran siansiay totoo ya malabay a makarengel ed mensahe na Panarian. Kanian determinado tayon ituloy so manpulong.

18. Akin ya segurado tayon say panagpulong a kimey et nasumpal diad panaon ya inggeter nen Jehova?

¹⁸ Segurado tayo ya say kimey ya panagpulong et nasumpal diad panaon ya inggeter nen Jehova. Isipen pa iramay agawa diad panaon nen Noe. Kinmiwas si Jehova diad eksakton panaon. Manga 120 ya taon ni antis na Delap et nandesisyon lay Jehova no kapigan itan nagawa. Kayari na dakel ya taon, ingganggan nen Jehova si Noe ya manpaalagey na biong. Nayarin manga 40 odino 50 taon itan ya ginawa nen Noe. Tan anggano ag-ondengel iray totoo, intultuloy to ran pinasakbayan anggad imbaga nen Jehova ya iloob to la ray ayayep diad biong. Tan diad dugarugan panaon et “inkapot nen Jehova so puerta” na biong.​—Gen. 6:3; 7:1, 2, 16.

19. Antoy awaten tayon bendisyon no agtayo pampainawaen so lima tayo?

¹⁹ Asingsingger lan ibaga nen Jehova ya asumpal la so panagpulong a kimey. Deralen to la iyan mundo nen Satanas tan onggapo la so balon mundo ya panayaman na saray totoon maunor ed Dios. Legan tayon tatalaranan itan, komon ta aligen tayoy Noe, Habacuc, tan arum ni ya agda pinampainawa so lima ra. Komon ta mansiansia tayon akapokus ed panagpulong a kimey, magmaliw tayon maanos, tan pansiansiaen tayon mabiskeg so pananisia tayo ed si Jehova tan ed saray sipan to.