1. Antoy imbitasyon nen Jesus ed apatiran managsigay, tan antoy ginawa ra?

SAY anapan na disipulon si Pedro, Andres, Santiago, tan Juan et panagsigay. Isip mo pa labat so alikna ra nen arengel da iyan imbaga nen Jesus: “Tumbok kayod siak, tan gawaen ta kayon sumisigay na totoo.” * Antoy ginawa ra nen nadngel da itan? Ibabaga na Biblia: “Tinaynan dan tampol iray iket tan tinmumbok irad sikato.” (Mat. 4:18-22) Anguma-uman so bilay da lapud satan ya desisyon da. Agla ra mansigay na sira, noagta ‘mansigay la ra na totoon mabilay.’ (Luc. 5:10) Natan et iimbitaan nin siansia nen Jesus iray mapaabeban totoo ya mangaaro ed katuaan pian magmaliw met iran managsigay na totoo. (Mat. 28:19, 20) Kasin inawat mo la itan ya imbitasyon nen Jesus?

2. Siopa ray nepeg ya mandesisyon no kasin magmaliw iran managsigay na totoo, tan antoy makatulong ed sikara diad pandesisyon da?

² Ompan abayag ka met lan manaaral na Biblia tan dakel lan pananguman so ginawam ed bilay mo. Ompan iisipen mo met lay mila ya manpulong. No agka ni makadesisyon no kasin awaten mo so imbitasyon nen Jesus, agka nadidismaya. Ompan say rason no akin ya manaalangan ka et lapud antam ya talagan seryoson desisyon so magmaliw ya disipulo nen Jesus. Tua, ibabaga na Biblia ya “tampol” ya tinaynan di Pedro tan saray kakaiba to iray iket da, pero agto labay ya ibagan agda la nannonotan  iman ya desisyon da. Anem bulan da lan kabat si Jesus tan kombinsido ira ya sikato so Mesias. (Juan 1:35-42) Nayarin dakel met lay antam nipaakar ed si Jehova tan Jesus, tan labay mo ya tuloytuloy kan onaligwas ed espiritual. Balet agto labay ya ibagan no labay mo lay milan manpulong et agmo la itan pan-isipan. Antoy akatulong ed si Pedro, Andres, tan arum ni ed impandesisyon da?

3. Anto ran kualidad so makatulong pian maliket mon awaten so imbitasyon nen Jesus?

³ Marundunong ya managsigay na sira iray inmuunan disipulo nen Jesus. Labalabay da itan ya gawaen, kabisado da itan, makpel ira, tan walay disiplina dad sarili da. Seguradon akatulong iratan ya kualidad da pian magmaliw met iran marundunong ed panagsigay na totoo. Aralen ed sayan artikulo no panon ya niwala ed sika iratan ya kualidad pian magmaliw kan marunong ya disipulo nen Kristo.

4. Akin et labalabay nen Pedro so mansigay?

⁴ Panagsigay so anapan nen Pedro tan satan so mamibilay ed pamilya to. Balet aliwan satan labat so rason no akin ya labalabay ton gawaen itan. Talagan inaro to itan ya kimey. (Juan 21:3, 9-15) Diad inlabas na panaon et naaralan met nen Pedro ya aroen so panagsigay na totoo. Tan diad tulong nen Jehova, nagmaliw ya marundunong si Pedro ed satan ya kimey.​—Gawa 2:14, 41.

5. Base ed Lucas 5:8-11, antoy tatakotan nen Pedro, tan antoy makatulong no wala met iray pakatatakotan tayo?

⁵ Say manunan rason no akin ya manpupulong tayo et lapud inaro tayoy Jehova. No inarom si Jehova, napakiwas kan manpulong anggano say pakaliknam et agmo sarag. Sanen tinawag nen Jesus si Pedro pian magmaliw ya managsigay na totoo, imbaga to: “Agka la natatakot.” (Basaen so Lucas 5:8-11.) Diad tua et  agpa natatakot si Pedro ed no antoy pansumpalan to no magmaliw ya disipulo. Mankelaw si Pedro ed karakel na sira ya narel da lapud milagro ya ginawa nen Jesus. Kanian say pakalikna to et agmakanepegan ya mikimeyan ed si Jesus. Atan so tatakotan to. Ompan iisipen mo ya agmo nasumpal so responsabilidad na sakey ya disipulo nen Kristo. No ontan so naliliknam, pabiskeg moy panangarom ed si Jehova, si Jesus, tan ed kaparam ya too pian napakiwas ka ya awaten so imbitasyon nen Jesus ya magmaliw a managsigay na totoo.​—Mat. 22:37, 39; Juan 14:15.

6. Anto ni ray arum ya rason no akin ya manpupulong tayo?

⁶ Wala ni ray arum ya rason no akin ya manpupulong tayo. Labay tayon unoren iyan ganggan nen Jesus: “Onla kayo . . . tan ibangat yo iray totoo . . . pian magmaliw iran disipulok.” (Mat. 28:19, 20) Manpupulong tayo met ta saray totoo et “singa ra kinatatan tan pinaulyanan” tan kakkaukolan dan naamtaan so katuaan nipaakar ed Panarian. (Mat. 9:36) Labalabay nen Jehova ya amin a klase na totoo et nawalaan na suston kakabatan ed katuaan pian niliktar ira.​—1 Tim. 2:4.

7. Base ed Roma 10:13-15, akin et importante so kimey ya panagpulong?

⁷ Napakiwas tayon manpulong no isipen tayo ya lapud sayan kimey et niliktar so bilay na totoo. Saramay say anapan da et panagsigay et ilako odino kanen da iray sira ya narel da. Sikatayo balet, mansisigay itayo na totoo pian niliktar so bilay da.​—Basaen so Roma 10:13-15; 1 Tim. 4:16.

8-9. Anto ray nepeg ya amta na sakey ya managsigay, tan akin?

⁸ Diad panaon nen Jesus, say sakey ya Israelitan managsigay et kaukolan ton amtaen no anton klase na sira so posiblin naerel to. (Lev. 11:9-12) Dapat amta to met no iner so kawalaan na saray sira. Maslak et oonla iray sira diad pasen ya labalabay day danum tan dakel so naakan da. Importante met ya amta na managsigay so oras ya kapapaway na saray sira. Inistorya na sakey a Tasi ya tagad isla ed Pasipiko ya aminsan et intagar ton mansigay so sakey a misionero. Say kuan to may misionero: “Sige sirin manbana ta nabuas na alas-9 ed kabuasan.” Say kuan na brother: “Ay, andi a. Mansigay ta diad oras ya kapapaway na sira, aliwan diad oras ya labay ta.”

⁹ Ontan so ginawa na saray managsigay na totoo nen inmunan siglo. Linma rad saray lugar ya kawalaan na totoo tan diad oras ya nasabi da ra. Alimbawa, nampulong iray papatumbok nen Jesus diad templo tan diad saray sinagoga, diad kabkaabungan, tan diad tindaan. (Gawa 5:42; 17:17; 18:4) Ontan met so gawaen tayo. Dapat amta tayo no kapigan tayo nasabi iray totoo ed abung da, tan no iner so lalaen da pian diman tayo ra pulongan. No amta tayon ibagay so eskedyul tayo, mas dakel so napulongan tayo.​—1 Cor. 9:19-23.

10. Anto ran kagawaan so itatarya na organisasyon nen Jehova ya nausar tayo ed panagpulong?

¹⁰ Nepeg ya mangusar so managsigay na dugan kagawaan, tan dapat amta to no panon itan ya usaren. Ontan met ed sikatayo. Dapat awit tayo ray dugan kagawaan diad panagpulong tan amta tayo no panon iratan ya usaren. Malinew so instruksion nen Jesus ed saray disipulo to no panon iran mansigay na totoo. Imbaga tod sikara no antoy awiten da, iner so pampulongan da, tan no antoy ibaga ra. (Mat. 10:5-7; Luc. 10:1-11) Tataryaan itayo na organisasyon nen Jehova natan na Uusaren ed Panagbangat (Teaching Toolbox) ya talagan mausa-usar ed panagpulong tayo. * Tan ipapasal itayo na organisasyon nen Jehova no panon iratan ya usaren pian walay kompiyansa tayon manpulong tan magmaliw tayon marunong ed satan.​—2 Tim. 2:15.

11. Akin ya saray managsigay na totoo et kaukolan ya makpel ira?

¹¹ Saray managsigay et kaukolan ya makpel ira ta no maminsan et biglan manguman so panaon diad dayat. Maslak et labi so pansisigay da tan bigla labat ya walay onsabin bagyo. Saray managsigay na totoo et kaukolan met ya makpel ira. No ipaamta tayo lad arum ya Tasi itayo nen Jehova tan onggapo tayo lan manpulong, wala ray onsabin singa bagyo ya subok. Singa bilang, ompan kontraen itayo na saray kapamilya tayo, balawen itayo na saray kakaaro tayo, tan ag-awaten na totoo so mensahe tayo. Pero agtayo la itan pankelawan. Impasakbay la nen Jesus ya saray papatumbok to et nipaarap ed saray onsusumpa.​—Mat. 10:16.

12. Base ed prinsipyo ya walad Josue 1:7-9, antoy makatulong pian magmaliw tayon makpel?

¹² Antoy gawaen mo pian magmaliw kan makpel? Unona, dapat kombinsido ka ya si Jesus so mangidadaulo ed kimey ya panagpulong. (Juan 16:33; Apo. 14:14-16) Insan pabiskeg moy pananisiam ed sipan nen Jehova ya itarya to ray pankaukolan mo. (Mat. 6:32-34) No diman ombibiskeg so pananisiam, diman ka met magmaliw ya mas makpel. Impanengneng nen Pedro tan saray kakaiba to ya mabisbiskeg so pananisia ra nen tinaynan day anapan da pian natumbok day Jesus. Impanengneng mo met ya mabiskeg so pananisiam nen impaamtam ed saray kakaarom tan kapamilyam ya iyaaralan ka na saray Tasi nen Jehova tan onaatendi ka la ed saray aral da. Seguradon dakel met lan pananguman so ginawam diad bilay mo pati diad ugalim ta labay mon unoren si  Jehova. Agawaan mo itan lapud mabiskeg so pananisiam tan lapud makpel ka. No itultuloy moy manpakpel, makapanmatalek ka ya “walad sika si Jehova a Dios mo ed inerman ya laen mo.”​—Basaen so Josue 1:7-9.

13. Panon ya makatulong so pandalepdep tan pikakasi pian magmaliw kan makpel?

¹³ Anto ni ray nagawaan mo pian magmaliw kan makpel? Ipikasim ed si Jehova ya ikdan to ka na pakpel. (Gawa 4:29, 31) Seguradon ebatan nen Jehova iratan ya pikakasim tan agto kan balot paulyanan. Sikatoy akaparaan a lanang ya ontulong ed sika. Dalepdep mo met no panon ya inliktar nen Jehova iray lingkor to nensaman. Isip mo no panon to kan tinulongan pian nasarag mo ray subok tan no panon to kan pinabiskeg pian nauman moy kabibilay mo. No asarag nen Jehova ya palduaen so Ambalangan Dayat pian niliktar iray totoo to, seguradon sarasarag to ka met ya tulongan pian magmaliw kan disipulo nen Kristo. (Exo. 14:13) Kanian manmatalek ka ya singa samay salmista ya angibagan: “Si Jehova et walad abay ko; agak ontakot. Antoy nagawaan na too ed siak?”​—Sal. 118:6.

14. Antoy naaralan mo ed eksperiensya nen Masae tan Tomoyo?

¹⁴ Say sakey nin paraan pian magmaliw kan makpel et no isipen mo no panon ya tutulongan nen Jehova iramay lingkor to ya datin mabaing, balet naaralan day manpakpel. Say sakey ya alimbawa et si Sister Masae. Sikatoy mabaing tan say pakalikna to et agton balot nasarag so manpulong. Inisip to ya mair-irap so mitongtong ed agmo kabat. Singa kuno walay atagtagey a padir ya agto sarag a kalaben. Kanian nanggawa na paraan pian onaralem so panangaro to ed Dios tan ed kapara ton too. Dinalepdep to ya talagan apuraan la so panagpulong natan. Tan impikasi tod si Jehova ya tulongan To pian nalikna ton kakkaukolan toy manpulong. Alabanan to iray pakakatakotan to tan nan-regular payunir ni ingen. Sarag met ya tulongan nen Jehova iray balon manangipalapag pian manpakpel ira. Naeksperiensya itan nen Sister Tomoyo. Nen first time toy mila ya manpulong ed kaabungan, ineyagan na samay unonan unabung ya nakar da. Say kuan to: “Agko labay so mitongtong ed sikayo ran Tasi nen Jehova!” Insan to imbasig so puerta. Pero ag-adismaya si Tomoyo. Imbaga to ni ingen ed samay kaiba to: “Grabe! Anta agak ni nansalita, abirbir to ak la ya Tasi ak nen Jehova. Malikeliket ak!” Si Tomoyo et manlilingkor la natan bilang regular payunir.

15. Anto so disiplina ed sarili, tan akin et importante itan ed saray Kristiano?

¹⁵ Saray marundunong ya managsigay et disiplinado ira. Say disiplina ed sarili et ontutukoy ed “abilidad ya puersaen so sarilim pian nasumpal mo ray nepeg mon gawaen.” Saray managsigay et kaukolan ya walay disiplina dad sarili da pian makabangon iray masakbay, ag-ira onsempet anggad agni ra makarel na sira, tan itultuloy day mansigay anggano aliwliway panaon. Kaukolan tayo met so disiplina ed sarili pian nitultuloy tayoy manpulong.​—Mat. 10:22.

16. Antoy nepeg tayon gawaen pian magmaliw tayon disiplinado?

¹⁶ Say disiplina ed sarili et agnisipor ed sikatayo. Diad tua lapud agtayo perpekto, say labay tayon gawaen et amay agtayo panirapan. Importante so kontrol ed sarili pian magmaliw tayon disiplinado. Kaukolan tayo sirin so tulong pian nipasal tayoy sarili tayo ya gawaen iray kimey ya singa mairap a gawaen. Ipapaseguro nen Jehova ya tulongan to tayo panamegley na masanton espiritu to.​—Gal. 5:22, 23.

17. Base ed 1 Corinto 9:25-27, antoy imbaga nen Pablo ya kaukolan ton gawaen pian nadisiplina toy sarili to?

¹⁷ Si apostol Pablo et disiplinado. Balet inamin to ya kaukolan ton ‘pekpeken’ so laman to  pian nagawaan toy duga. (Basaen so 1 Corinto 9:25-27.) Bibilinen itayo nen Pablo ya kaukolan tayo met ya disiplinaen so sarili tayo pian nagawaan tayo ray nepeg tayon gawaen diad “masimpit tan mauksoy” ya paraan. (1 Cor. 14:40) Kaukolan tayon disiplinaen so sarili tayo pian nitultuloy tayon nagawaan iray responsabilidad tayo bilang lingkor nen Jehova, kaiba lad satan so kimey ya panagpulong tan panagbangat.​—Gawa 2:46.

18. Antoy importante tan makapaliket ed si Jehova?

¹⁸ Saray managsigay et maliket ira no dakel so sira ya narel da. Balet duma so panagpulong ya kimey. Say liket tayo et ag-akabase ed karakel na totoo ya natutulongan tayon magmaliw ya Tasi nen Jehova. (Luc. 8:11-15) Say importante ed si Jehova et basta itultuloy tayon ipulong so maong ya balita tan bangatan tayo so arum. Atan so makapaliket ed sikato. Akin? On ta no ontan so gagawaen tayo, ipapanengneng tayon maunor tayo ed sikato tan ed Anak to.​—Mar 13:10; Gawa 5:28, 29.

19-20. Anto ni importantin rason no akin ya kakkaukolan tayo lay manpulong natan?

¹⁹ Diad arum ya bansa, wala labat iray bulan ya nayari mansigay. Kanian no asingger lan manampot iratan ya bulan, lalon pasyaen na saray managsigay so pansigay da. Lapud managsigay itayo na totoo, nia so sakey nin rason no akin ya kakkaukolan tayon samboten so manpulong natan: Asingsingger lan manampot iyan mundo nen Satanas. Antiktikey lay nakekeran panaon pian nagawaan tayo iyan kimey ya makapangiliktar na bilay. Kanian agmo la pababayagen so desisyon mo tan agmo iisipen ya kaukolan mo nin alagaren so dugarugan panaon ya pibiang mo ed sayan importantin kimey.​—Ecl. 11:4.

²⁰ Kanian pabiskeg mo la natan so panangarom ed si Jehova tan ed kaparam ya too, seryosom so panaaral moy Biblia, itultuloy moy manpakpel, tan aral mon disiplinaen so sarilim. No mila ka ed masulok ya waloran milyon a managsigay na totoo, naliknam so liket ya iiter nen Jehova. (Neh. 8:10) Komon ta gawam so anggaay nayarian mo ya mibiang ed sayan kimey tan itultuloy mon gawaen itan anggad ibaga nen Jehova ya asumpal la so panagpulong. Pantongtongan tayo ed ontumbok ya artikulo so taloran paraan ya napabiskeg tayo so determinasyon tayo ya itultuloy ya ipulong so Panarian.