1. Kapigan ya nayarin mas mairap so manlingkor ed si Jehova?

PARAD sika, kapigan mas mairap so manlingkor ed si Jehova—no dakdakel so problemam, odino no mareen so bilay mo? No wala ray problema tayo, nanonotan tayon tampol so onasingger ed si Jehova. Balet panon to no marereen so bilay tayo, anggapoy problema tayo? Ompan nalingwanan tayo lay manlingkor ed si Jehova. Pinasakbayan nen Jehova iray Israelita nensaman ya posiblin ontan so nagawa ed sikara.​—Deu. 6:10-12.

2. Akin et maong ya alimbawa si Arin Asa?

² Maabig ya alimbawa si Arin Asa ta sigpot ya nanmatalek ed si Jehova. Sikatoy nanmatalek ed si Jehova aliwa labat ya no mairap iray kipapasen, noagta anggano diad panaon na kareenan. Anggano nen kabataan ni et “matoor [la] so puso to ed si Jehova.” (1 Ara. 15:14) Impanengneng toy katooran to ed si Jehova nen inekal toy palson panagdayew ed Juda. Ibabaga na Biblia ya “ineekal to ray altar na sananey a dirios tan saray atagey a pasen, minemekmek to ray sagradon lusek, tan intutumba to ray sagradon poste.” (2 Awa. 14:3, 5) Inekal to ni ingen ya reyna si Maaca ya bai to ta nampagawa na idolo ya dayewen na totoo.​—1 Ara. 15:11-13.

3. Anto ray aralen tayo ed sayan artikulo?

³ Aglabat inekal nen Asa so palson panagdayew. Nansagpotan to met ya ipawil so dugan panagdayew, tan tinulongan to ray walad sakop na panarian na Juda ya ompawil ed si Jehova. Benendisyonan nen Aman Jehova si Asa tan saray Israelita —inikdan to ra na panaon na kareenan. * Diad loob na samploran taon legan na uley nen Arin Asa, “say dalin et walay kaligenan.” (2 Awa. 14:1, 4, 6) Diad sayan artikulo, pantongtongan tayo no antoy ginawa nen Asa legay panaon na kareenan. Insan tayo pantongtongan so alimbawa na saray Kristiano nen inmunan siglo ya sinambot da met so panaon na kareenan. Insan tayo ebatan iyan tepet: No wala kad bansa ya aliwan sebel so panagdayew tayo, panon mon samboten itan ya panaon na kareenan?

4. Base ed 2 Awaran 14:2, 6, 7, panon ya sinambot nen Asa so panaon na kareenan?

⁴ Basaen so 2 Awaran 14:2, 6, 7. Imbaga nen Asa ed saray totoo ya ‘impanpainawa ira nen Jehova manlapud amin ya akapaliber a kalaban.’ Ag-inisip nen Asa ya pankanawnawa day manrelaks ta anggapo ray kalaban. Amayamay so ginawa da​—angipaalagey ira na saray syudad, padir, ataragey ya tori, tan matibay iran puerta. Imbaga to ed saray taga Juda: “Say dalin et wala nin siansia ed sikatayo.” Akin et imbaga to itan? Labay ton natalosan na saray totoo ya diad satan ya panaon et anggapo ray kalaban da ya mamatunda ed nanduruman proyekto ra. Kanian pinaseseg to ra ya samboten da iman ya panaon na kareenan.

5. Akin ya pinabiskeg nen Asa so puersa militar to?

⁵ Sinambot met nen Asa so panaon na kareenan pian pabiskegen so puersa militar to. (2 Awa. 14:8) Kasin diad satan ya ginawa to et nibaga tayon anggapoy talek to ed si Jehova? Andi. Amta nen Asa ya responsabilidad to bilang ari ya protektaan iray totoo ed saray posiblin onlusob ed sikara diad arapen. Amta nen Asa ya manampot lanlamang so panaon na kareenan diad Juda, tan ontan so agawa.

6. Panon ya sinambot na saray Kristiano nen inmunan siglo so panaon na kareenan?

⁶ Anggano apairap iray Kristiano nen inmunan siglo, asali da met so nambilay ed panaon na kareenan. Antoy ginawa na saraman ya disipulo legan na saman ya panaon? Makulikuli dan impulong so maong a balita. Nabasa tayo ed libro na Gawa ya “manbibilay iran walaay takot ed si Jehova.” Tuloytuloy dan impulong so maong a balita kanian “nantultuloy iran dinmakel.” Mapatnag ya benendisyonan nen Jehova so maseseg ya impanpulong da legan na panaon na kareenan.​—Gawa 9:26-31.

7-8. Antoy sinambot ya ginawa nen Pablo tan saray arum ya Kristiano nen walay pankanawnawa da? Ipaliwawa.

⁷ Sinambot na saray disipulo nen inmunan siglo so amin ya pankanawnawa pian ipulong so maong a balita. Singa bilang, nen walay pankanawnawa nen apostol Pablo ya manpulong tan manbangat ed syudad na Efeso, sinambot to iman.​—1 Cor. 16:8, 9.

⁸ Say sakey nin pankanawnawa nen apostol Pablo tan saray arum a Kristiano ya ipulong so maong a balita et nen 49 C.E., sanen aresolbe so isyu nipaakar ed panagsegat. (Gawa 15:23-29) Nen nipawit la ed saray kongregasyon so desisyon, ginawa na saray disipulo so anggaay nayarian da pian iyabawag so “maong a balita nipaakar ed salita nen Jehova.” (Gawa 15:30-35) Antoy resulta? ‘Nantultuloy a binmiskeg ed pananisia iray kongregasyon tan dinmakel so bilang da ed kada agew.’​—Gawa 16:4, 5.

9. Antoy situasyon ed dakel ya bansa natan, tan antoy maabig ya itepet tayod sarili tayo?

⁹ Diad dakel ya bansa natan, aliwan sebel so panagpulong ya kimey. No ontan so situasyon ed lugar yo, maabig no tepetan moy sarilim, ‘Kasin sasamboten ko iyan panaon?’ Diad sayan kaunoran iran agew, lalon papepelesen na organisasyon nen Jehova so kimey ya panagpulong tan panagbangat diad interon mundo. (Mar. 13:10) Dakdakel so sarag ya gawaen na saray totoo nen Jehova pian makapibiang ira ed sayan kimey.

10. Antoy ipapaseseg ed sikatayo na 2 Timoteo 4:2?

¹⁰ Panon mo sirin ya samboten so panaon na kareenan? (Basaen so 2 Timoteo 4:2.) Maabig no usisaen moy kipapasen mo tan say kipapasen na pamilyam no kasin sarag yo nin palaknaben so nagagawaan yo ed kimey ya panagpulong. Ompan sarag yoy manpayunir. Aliwa iyan panaon pian manpayaman odino mantipon na materyal ya kaykayarian. Agda tayo iratan natulongan diad baleg ya irap.​—Pro. 11:4; Mat. 6:31-33; 1 Juan 2:15-17.

11. Antoy ginawa na arum ya agagi pian mas dakel ni so napulongan da?

¹¹ Dakel ya agagi so nanaral na sananey a lenguahe pian mas dakel ni so napulongan da tan natulongan dan manaral nipaakar ed si Jehova. Pian walay usaren da, mangitatarya so organisasyon nen Jehova na saray nibase ed Biblia ya publikasyon diad dakel iran lenguahe. Nen 2010, saray publikasyon tayo et available ed manga 500 ya lenguahe, balet natan et ni-translate la iratan ed masulok ya 1,000 ya lenguahe!

12. Antoy reaksion na totoo no narengel day mensahe na Biblia diad mismon lenguahe ra? Mangiter na alimbawa.

¹² Antoy reaksion na totoo no narengel day katuaan diad mismon lenguahe ra? Nengnengen tayo so eksperiensya na sakey a sister ya inmatendi ed regional a kombension diad Memphis, Tennessee, U.S.A. Say lenguahe ed satan ya kombension et Kinyarwanda, say lenguahe a maslak ya uusaren na totoo ed Rwanda, Congo (Kinshasa), tan Uganda. Kayari na  kombension, oniay imbaga na samay sister ya say salita to et Kinyarwanda: “Diad 17 taon ya panaayam ko ed Amerika, natan ko labat atalosan so interon programa na kombension.” On, asabi so puso to nen nadngel toy interon programa ed mismon salita to. Kanian no iyabuloy na kipapasen mo, kasin sarag moy manaral na sananey a lenguahe pian natulongan mo ray arum ya totoo ed teritorya yo? Agta balibali so manaral na sananey a lenguahe lalo la no diad teritorya na kongregasyon yo et antam ya wala ray mas ondengel ed maong a balita no usaren moy mismon lenguahe ra? Seguradon nabawbawim so sagpot mo!

13. Panon ya sinambot na saray agagi ed Russia so panaon na kareenan?

¹³ Wala ray agagi tayo ya nasesebelan ya manpulong. Ibabawal na gobierno so kimey tayo ed arum ya bansa. Singa bilang, nengnengen tayo so situasyon na saray agagi ed Russia. Pigaran dekada ya imbawal so kimey da, balet nen Marso 1991 et inabuloyan lamet ira na gobierno ya manpulong. Diad saman ya taon et wala labat so manga 16,000 ya Tasi ed Russia. Kayari na 20 taon, inmabot ira ed masulok ya 160,000! Talagan sinambot na saray agagi tayo ed Russia iman ya panaon pian makapanpulong ira. Balet saman ya panaon na kareenan et anampot lanlamang. Anggaman ontan, agkinmapuy so seseg na saray agagi. Gagawaen da nin siansiay anggaay nayarian da pian makapanlingkor ira ed si Jehova.

14-15. Panon ya impanengneng nen Jehova so pakapanyari to diad intulong to ed si Asa?

¹⁴ Diad panaon nen Asa, anampot lanlamang so panaon na kareenan. Walay balbaleg ya puersa militar ya linmusob ed sikara​—sakey milyon ya sundalon nanlapud Etiopia  ya idadaulo nen Zera. Matalek iran natalo da so Juda. Balet nanmatalek si Arin Asa ed Dios to ya si Jehova. Impikasi to: “Tulongan mo kami, O Jehova a Dios mi, ta manmamatalek kami ed sika, tan diad ngaran mo et linma kami a milaban ed sayan dakdakel a totoo.”​—2 Awa. 14:11.

¹⁵ Anggano say sundalo na Juda et kapaldua labat na karakel na sundalo na Etiopia, amta nen Asa ya mas makapanyari si Jehova tan seguradon tulongan to iray totoo to. Tan onman so ginawa nen Aman Jehova. Atalo so armada na Etiopia tan inatey iran amin!​—2 Awa. 14:8-13.

16. Akin ya segurado tayon manampot lanlamang so panaon na kareenan?

¹⁶ Anggano agtayo ni amta no antoy nagawa ed kada sakey ed sikatayo diad arapen, amta tayo ya temporaryo labat so kareenan ya panliliketan na arum a lingkor na Dios natan. Diad tua, impasakbay nen Jesus ya diad kaunoran iran agew, saray disipulo to et ‘busolen na amin a nasyon.’ (Mat. 24:9) Tan imbaga nen apostol Pablo ya “amin a malabay a manbilay a walaay debosyon ed Dios bilang disipulo nen Kristo Jesus et napasegsegang met.” (2 Tim. 3:12) “Agaylay pasnok” nen Satanas, tan imposible ya natakasan tayoy pasnok to.​—Apo. 12:12.

17. Panon ya nasubok so katooran tayo diad arapen?

¹⁷ Asingsingger lan nasubok so katooran na kada sakey ed sikatayo. Magano lan nagawa so “baleg a kairapan ya agni agawa manlapud inggapo na mundo anggad natan.” (Mat. 24:21) Diad satan ya panaon, ompan saray mismon kapamilya tayo so mantraidor ed sikatayo tan sebelan na gobierno so kimey tayon panagpulong. (Mat. 10:35, 36) Kasin aligen moy Asa, ya manmatalek kan tulongan tan protektaan ka nen Jehova?

18. Base ed Hebreo 10:38, 39, antoy makatulong ed sikatayo pian akaparaan tayo no manampot lay panaon na kareenan?

¹⁸ Natan ni labat et ipaparaan itayo la nen Jehova pian nasarag tayo ray subok ed arapen. Uusaren to so “matoor tan makabat ya aripen” ya mangitarya na dakel ya espiritual a ‘naakan diad dugan panaon’ pian mansiansia tayon mabiskeg ed espiritual. (Mat. 24:45) Balet kaukolan tayon gawaen so betang tayo​—nepeg tayon pansagpotan ya pabiskegen so pananisia  tayo ed si Jehova.​—Basaen so Hebreo 10:38, 39.

19-20. Base ed prinsipyo ya walad 1 Awaran 28:9, anto ray kaukolan tayon itepet ed sarili tayo, tan akin ya importantin itepet tayo iratan?

¹⁹ Singa si Arin Asa, kaukolan tayon itultuloy ya ‘anapen si Jehova.’ (2 Awa. 14:4; 15:1, 2) Inggapo tayon inanap si Jehova nen nanaral tayoy Biblia anggad nampabautismo tayo. Balet kaukolan tayon itultuloy ya pansagpotan ya pabiskegen so panangaro tayo ed si Jehova. Pian nanengneng tayo no kasin nagagawaan tayo itan, maabig no itepet tayo ed sarili tayo: ‘Kasin aatendian kon amin so aral na kongregasyon?’ No aatendian tayo so amin ya pantitipon ya ipaparaan na organisasyon nen Jehova, ombibiskeg so pananisia tayo tan napapaseseg itayo na saray agagi. (Mat. 11:28) Nia ni balibalin itepet tayo ed sarili tayo, ‘Kasin tutumboken kon talaga so eskedyul ko parad personal ya panagaral na Biblia?’ No kaibam so pamilyam, kasin walay sinimban eskedyul yo parad panagdayew na pamilya? Odino no bilang agmo kaiba so pamilyam, kasin wala nin siansiay eskedyul mo pian mandayew ya singa no kaibam so pamilyam? Tan kasin gagawaen moy anggaay nayarian mon mibiang ed kimey ya panagpulong tan panagbangat?

²⁰ Akin et importantin itepet tayo iratan ed sarili tayo? Ibabaga na Biblia ya uusisaen nen Jehova iray kanonotan tayo tan no antoy walad puso tayo. Kanian nepeg tayo met sirin ya usisaen so sarili tayo. (Basaen so 1 Awaran 28:9.) No nanengneng tayo ya wala ray kaukolan tayon umanen ed saray plano, ugali, odino kanonotan tayo, kerewen tayoy tulong nen Jehova pian nagawaan tayo iratan ya pananguman. Natan la so panaon pian manparaan parad saray subok ed arapen. Komon ta gawaen moy anggaay nayarian mon samboten so panaon na kareenan!