1. Antoy nalikna na sakey no walay inar-aro to ya nadispelo?

KASIN walay kapamilyam o kaarom ya adispelo? Makapaermen tan ansaki-sakit itan. Oniay imbaga nen Sister Hilda: “Nen inatey si asawak kayari na 41 taon ya impaniba mi, say amtak aman lay sankasakitan ya nagawa ed bilay ko. * Pero mas ansaki-sakit nen adispelo may ana’kon laki, tan tinaynan toy asawa tan ananak to.”

2-3. Base ed Salmo 78:40, 41, antoy nalilikna nen Jehova no sikatoy taynan na lingkor to?

² Imadyin mo pay sakit ya alikna nen Aman Jehova nen wala ray anghel ya nanrebelde ed sikato tan tinaynan da! (Jud. 6) Isip mo pa met so alikna to nen aminpiga-pigan nanrebelde iray Israelita anta inar-aro to ra. (Basaen so Salmo 78:40, 41.) Kanian no walay inar-arom ya adispelo, makaseguro ka ya natatalosan nen Aman Jehova so naliliknam tan nasasakitan met. Seguradon manggawa na paraan pian napaseseg tan natulongan to ka.

³ Pantongtongan tayo ed sayan artikulo no antoy gawaen tayo pian naawat tayoy tulong nen Jehova no walay inar-aro tayon adispelo. Amtaen tayo met no antoy nitulong tayo ed saray kakongregasyon tayo ya ontan so situasyon da. Pero pantongtongan tayo nin unona no antoy agnepeg ya isipen na saray kapamilya na adispelo.

4. Antoy nalilikna na maslak ya ateng no walay anak da ya tinaynan toy Jehova?

⁴ No say adispelo et anak, say maslak ya isipen na ateng et kinmulang ira kanian onman so agawa ed anak da. Alikna itan nen Brother Luke nen adispelo so anak ton laki. Imbaga to: “Tinetel koy sarilik. No maminsan et aliwliwa ray kugip ko. Agko napigilay  akis ko tan ambelbelat so pagew ko.” Oniay imbaga met nen Sister Elizabeth ya adispelo met so anak ton laki: “Lanang kon tetepetan so sarilik no iner ak kasi kinmulang. Singa agko amo nipurek so katuaan ed ana’ko.”

5. Siopa so natetel no say sakey et taynan toy Jehova?

⁵ Tandaan tayo ya inikdan itayo nen Jehova na kalayaan ya mandesisyon parad sarili tayo. Labay ton ibaga, sikatayon mismoy manpili no kasin unoren tayoy Dios odino andi. Wala ray kabataan ya anggano makapuy so alimbawa na atateng da et pinili day manlingkor ed si Jehova, tan manmamatoor ira. Pero wala met iray kabataan ya anggano impurek ed sikara na atateng da iray prinsipyo na Biblia, tinaynan da lanlamang si Jehova nen baleg la ra. Nia ay so punto: Personal ya desisyon na sakey a too no kasin pilien toy manlingkor ed si Jehova. (Jos. 24:15) Kanian sikayo ran atateng, no bilang ta adispelo so anak yo, agyon balot komon iisipen ya kasalanan yo.

6. Antoy epekto ed anak no tinaynan na ateng to si Jehova?

⁶ No maminsan, ompan say mismon ateng so nadispelo, tan taynan to ni ingen so pamilya to. (Sal. 27:10) Ansaki-sakit iya ed saray ananak, ta siempre, baleg so respeto da ed ateng da. Oniay reaksion nen Esther nen adispelo so tatay to: “Akis ak lan akis nen tinaynan nen tatay ko so katuaan. Pero say talagan ansaki-sakit, amay desisyon da ya agda lan talaga labay so manlingkor ed si Jehova. Inar-arok si tatay ko. Kanian nen adispelo ra, aburido ak ya lanang ta sankanonot ko no kumusta la ra kasi. Mabetbet ak ingen ya man-panic attack.”

7. Antoy nalilikna nen Jehova ed saray ananak ya adispelo so ateng da?

⁷ Sikayo ran ananak, no adispelo so ateng yo, amta mi ya mair-irap tan ansaki-sakit so dadalanen yo. Pero mas amta nen Aman Jehova so situasyon yo. Inar-aro to kayo tan papablien toy panmamatoor yo. Diad tua, anggan sikami ran agagi yo et proud ed sikayo! Tandaan yo ya aliwan sikayo so natetel ed desisyon na ateng yo. Singa abitla ed parapo 5, inikdan nen Aman Jehova so kada too na kalayaan ya mandesisyon. Kada sakey ya dedikado tan bautismadon lingkor nen Jehova et “nepeg ton sakbaten so dilin responsabilidad to.”—Gal. 6:5.

8. Antoy gawaen na saray kapamilya na adispelo legan dan aalagaren so ipawil to ed si Jehova? (Nengnengen met so kahon ya “ Pawil Ka Lad si Jehova.”)

⁸ No walay inar-arom ya tinaynan toy Jehova, siempre natural labat ya labay mon makapawil ed kongregasyon. Anto balet so gawaen mo legan mon aalagaren so ipawil to? Maabig no pabiskegen moy espiritualidad mo. No ontan so gawaen mo, makaaral iray kapamilyam ed alimbawam, tan ompan pati samay mismon adispelo! Sakey ni, mas nalabanan mo met so ermen ya naliliknam. Anto sirin so gawaen mo pian mansiansian mabiskeg so espiritualidad mo?

9. Anto ray gawaen mo pian mansiansian mabiskeg so pananisiam? (Nengnengen met so kahon ya “ Saray Teksto ya Mamabiskeg ed Sika no Walay Inar-arom ya Tinaynan Toy Jehova.”)

⁹ Itultuloy mon pabiskegen so pananisiam tan tulongan mo ray kapamilyam ya ontan met so gawaen da. Nagawaan mo itan no walay regular ya eskedyul mo parad panagbasa na Biblia tan  pandalepdep, tan no lanang kan miaral. Oniay imbaga nen Sister Joanna ya say tatay tan atsi to et tinaynan day katuaan: “Onkakalma ak kada no basaen ko ray salaysay ed Biblia tungkol ed si Abigail, Ester, Job, Jose, tan Jesus. No dadalepdepen koy alimbawa ra, onlelemew so liknaan ko tan natatambal so sugat ed pusok. Labalabay ko met so ondengel na saray original songs tayo ta napapaseseg ak.”

10. Base ed Salmo 32:6-8, antoy gawaen mo no maer-ermen ka?

¹⁰ Ibagam ed si Jehova so amin ya naliliknam tan pakakaaburidoan mo. Agka onsasawan manpikasi ed sikato, lalo la no maer-ermen ka. Kerew mod sikato ya naalig mo komoy panagnonot to tan “ikdan [to] kay pakatalos tan ibangat [tod] sika so dalan a nepeg mon laen.” (Basaen so Salmo 32:6-8.) Panon to balet no nanairapan kan mangibaga ed si Jehova na naliliknam ta ansaki-sakit? Tandaan mo ya natatalosan to ka, ta amta toy irap ya dadalanen mo. Inar-aro to kan maong tan labay to ya ibagam ed sikato so amin ya naliliknam.—Exo. 34:6; Sal. 62:7, 8.

11. Base ed Hebreo 12:11, akin et nepeg tayon suportaan so uksoyan na panagdisiplina nen Jehova? (Nengnengen met so kahon ya “ Panagdispelo—Maaron Disiplina ya Nanlapud si Jehova.”)

¹¹ Suportaan mo so desisyon na saray elder. Say panagdispelo et kaiba ed uksoyan na panagdisiplina nen Jehova tan prueba itan na panangaro to. Parad pankaabigan lanlamang itan na interon kongregasyon, tan anggan samay mismon nankasalanan. (Basaen so Hebreo 12:11.) No bilang ta wala ray mankuestion ed desisyon na saray elder, agtayo basta-basta manpapaimpluensya. Tandaan tayo ya agtayo amta so amin ya agawa. Sakey ni, ompan sarayan agagi ya mankukuestion et amta da met ya walan talagay makapuy ya ginawa to may adispelo, pero agda iistoryaen ed sikatayo. Mas maabig sirin no suportaan tayo so desisyon na  saray elder, ta matalek tayo ya imbase da itan ed saray prinsipyo ed Biblia tan angukom ira “parad si Jehova.”—2 Awa. 19:6.

12. Antoy maong ya resulta nen sinuportaan na saray agagi so uksoyan na panagdisiplina nen Jehova?

¹² No suportaan mo so desisyon na saray elder, diad tua et tutulongan mon makapawil ed si Jehova imay kapamilyam ya adispelo. Oniay inamin nen Elizabeth ya abitla ed parapo 4: “Ansaki-sakit ed siak ya agko katongtongen so ana’ko. Pero nen akapawil la ed si Jehova, imbaga tod siak ya duga labat may desisyon ya sikatoy nadispelo. Imbaga to ingen ya dakel so naaralan to ed impandisiplina nen Jehova ed sikato. Apatunayan ko ya lanang ya duga so disiplina nen Jehova.” Onia met so imbaga na asawa nen Elizabeth ya si Mark: “Imbaga ed siak na ana’ko ya say sakey a rason no akin ya apakiwas ya ompawil et lapud inunor mi so uksoyan nen Jehova. Maong labat ta tinulongan kami nen Jehova ya suportaan so panagdisiplina to.”

13. Antoy makatulong pian onlemew so liknaan mo?

¹³ Mitongtong ka ed saray kakaarom ya natatalosan day naliliknam. Maabig no say lanang mon kaiba et saray maespiritual ya agagi pian napaseseg da ka. (Pro. 12:25; 17:17) Oniay imbaga nen Joanna ya abitla ed parapo 9: “Say pakaliknak et bukbukor ko. Balet no ibabagak so naliliknak ed saray pantitiwalaan kon kakaaro, onlelemew so liknaan ko.” Panon to balet no walay ibaga na saray kakongregasyon mo ya mamakapuy laingen ed liknaan mo?

14. Akin et kaukolan tayon ‘itultuloy ya itepel tan mabulos ya perdonaen so sakey tan sakey’?

¹⁴ Itepel mo ray agagi. Diad tua, amin tayo et nalilingo. (Sant. 3:2) Kanian agka komon ombabarong no bilang ta wala ray agagi ya agda amtay ibaga ra odino agda nalikas ya makapangibaga ray ansakit. Tandaan mo iyan bilin nen apostol Pablo: “Itultuloy yon itepel . . . tan mabulos a perdonaen so sakey tan sakey anggano walay rason na sakey ya ireklamo imay sakey.” (Col. 3:13) Oniay imbaga na sakey ya sister ya walay adispelon kapamilya to: “Wala ray agagi ya labay da ak ya pasesegen, pero nasasakitan da ak laingen. Maong labat ta tutulongan to ak nen Aman Jehova ya perdonaen ira.” Antoy nitulong na interon kongregasyon pian napaseseg iray matoor ya kapamilya na saray adispelo?

15. Antoy gawaen tayo pian natulongan tayo iray kakongregasyon tayo ya walay kapamilya dan adispelo?

¹⁵ Kaaroen tayo iray matoor ya kapamilya na saray adispelo. Nen adispelo so agi nen Sister Miriam, inamin to ya ngalngali agto labay so miaral ta nababaingan ya maong. Imbaga to: “Sankanonot ko no antoy ibaga na saray agagi. Pero maong labat ta wala ray kakongregasyon ko ya impalikna dad siak ya maermen met irad agawa, tan anggapon balot so arengel kon negatibo ya imbaga ra tungkol ed agik. Lapud sarayan kakaarok, agko aliknan bukbukor ko.” Onia met so imbaga na sakey nin sister: “Nen adispelo so anak mi, pinasyar tan niligliwa kami na saray kakaaro mi. Inamin na arum  ed sikara ya agda amtay ibaga ra, pero akiakis irad siak, tan say arum et sinulatan da ak. Talagan balbaleg so nitulong dad siak.”

16. Antoy gawaen tayo pian tuloytuloy tayon nipalikna ed saray kapamilya na adispelo ya akaparaan tayon ontulong ed sikara?

¹⁶ Itultuloy tayon ipalikna ed saray kapamilya na adispelo ya akaparaan tayon ontulong ed sikara. Seguradon kakkaukolan day panangaro tan panamaseseg tayo. (Heb. 10:24, 25) Pero no maminsan, wala ray agagi ya agda met la kakatongtongen iray kapamilya na adispelo, ya singa met la adispelo so turing dad sikara. Agtayon balot komon itan gagawaen! Singa bilang, no say adispelo et ateng, pasesegen tayo iray anak to tan komendaan tayoy panmamatoor da. Oniay nanonotan nen Sister Maria ya ginawa na saray kakongregasyon to nen adispelo so asawa to insan tinaynan toy pamilya ra: “Pinasyar kami na saray kakaarok tan inlutoan da kami. Tinulongan da ak met pian naiyaralan ko ray ananak ko. Akiermen tan akiakis irad siak. Nen wala ray angi-tsismis ed siak, indepensa da ak. Agda ak balot pinaulyanan.”—Roma 12:13, 15.

17. Antoy gawaen na saray elder pian napabiskeg da iray matoor ya kapamilya na adispelo?

¹⁷ Sikayo ran elder, sambot yo ray pagkakataon ya napabiskeg yo ray matoor ya kapamilya na saray adispelo. Sikayo so manunan inikdan nen Jehova na responsabilidad ya mamabiskeg ed sarayan agagi. (1 Tes. 5:14) Kanian antis tan kayari na aral, miistoryaan kayod sikara tan paseseg yo ra. Pasyar yo rad abung da tan manpikasi kayon kaiba ra. Itagar yo met iran manpulong tan man-Bible study, odino ipila yo ra no maminsan diad panagdayew na pamilya yo. Lapud sikayo so tinuro nen Jehova ya manpastol ed kongregasyon, iilaloan to ya asikasoen yo ray maneermen ya karnero to tan ipalikna yoy panangabagey tan panangaro tod sikara.—1 Tes. 2:7, 8.

18. Base ed 2 Pedro 3:9, antoy labay nen Jehova ya gawaen na saray akagawa na ambelat ya kasalanan?

¹⁸ Aglabay nen Aman Jehova ya “walay siopaman a naderal noagta labay to ya amin et naikday  pankanawnawan magbabawi.” (Basaen so 2 Pedro 3:9.) Kanian anggano akagawa na ambelat ya kasalanan so sakey ya too, mabmabli nin siansia ed Dios so bilay to. Imbayar nen Aman Jehova so mabmablin dala na inar-aro ton Anak pian nadondon so kada sakey ed sikatayo. Akaparaan si Jehova ya tulongan iramay tinaynan day katuaan ta labay ton makapawil irad sikato. Tatalaranan to ingen so ipawil da, ya singa nanengneng tayod samay ilustrasyon nen Jesus tungkol ed managdarak ya anak. (Luc. 15:11-32) Diad tua, dakel ed saray agagi tayo ya tinaynan day katuaan so pinmawil lanlamang ed si Aman Jehova, tan malikeliket iran in-welcome na kongregasyon. Si Sister Elizabeth ya abitla nen niman et malikeliket nen akapawil imay anak to. Imbaga to: “Misalsalamat ak ed saray agagi ta lanang dan impanonot ed sikami ya agkami dapat nanaekalan na ilalo.”

19. Akin ya makapanmatalek tayod si Jehova?

¹⁹ Manmatalek tayon lanang ed si Aman Jehova tan ed uksoyan to. Tandaan tayo ya agbalot mangiter si Jehova na ganggan ya pankaugsan tayo. Inar-aro na Ama tayo so amin ya mangaaro tan mandadayew ed sikato tan anggapon balot so isiblet tod sikara. Kanian agto kan balot taynanan, lalo la no amta ton kakkaukolan moy tulong. (Heb. 13:5, 6) “Agkamin balot pinaulyanan nen Aman Jehova,” so kuan nen Mark ya abitla nen niman. “No bilang ta ondalan tayod subok, wadtan ya lanang ya ontulong ed sikatayo.” Makapanmatalek ka ya ikdan to ka na pakayari ya “mas mabiskeg nen say pakayari na too.” (2 Cor. 4:7) On, no walay inar-arom ya tinaynan toy Jehova, gawam so anggaay nayarian mo ya mansiansian matoor tan agka komon nanaekalan na ilalo!