1. Antoy nayarin itawag tayo ed si Jehova?

KAIBA ed pamilya nen Jehova si Jesus, ya “panguloan [ed] amin a pinalsa,” ontan met ed saray dakdakel ya anghel. (Col. 1:15; Sal. 103:20) Nen wadiad dalin si Jesus, imbangat to ya si Jehova et Ama met na saray totoo ya matoor ya manlilingkor ed Sikato. Singa bilang, nen katongtong to ray disipulo to, tinawag toy Jehova ya “Amak tan Ama yo.” (Juan 20:17) Tan nen indedika tayoy sarili tayo ed si Jehova tan nampabautismo tayo, nagmaliw tayon parte na maar-aron pamilya ya bubuoen na agagi tayod interon mundo.—Mar. 10:29, 30.

2. Antoy pantongtongan tayo ed sayan artikulo?

² Wala ray agagi tayo ya nanairapan ya ituring si Jehova bilang maar-aron Ama. Say arum balet et nanairapan ya ipanengneng so panangaro ed saray agagi tayo. Diad sayan artikulo, pantongtongan tayo no panon ya makatulong so alimbawa nen Jesus pian naaralan tayon ituring si Jehova bilang maar-aron Ama tayo. Pantongtongan tayo met no panon tayon naalig si Jehova diad panagtrato tayo ed saray agagi.

3. Akin et nibaga tayo ya labay nen Jesus ya asingger so liknaan tayo ed Dios ya Jehova?

³ Maar-aron Ama si Jehova. Labay nen Jesus ya say turing tayo ed si Jehova et singa tatay ya mainomay ya asinggeran, aliwan singa sakey ya opisyal ya istrikto tan ganggan lan ganggan. Nen imbangat nen Jesus iray disipulo to no anto ray ipikasi da, diad gapo ni labat na pikakasi to et tinawag toy Jehova ya: “Ama mi.” (Mat. 6:9) Nayari pa met ya say ibangat nen Jesus ya itawag tayod si Jehova et “Makapanyarin-amin,” “Manamalsa,” odino “andi-anggaan ya Ari,” ta saratan ya titulo et nabasa met ed Biblia. (Gen. 49:25; Isa. 40:28; 1 Tim. 1:17) Pero diad amin ya titulo na Dios, say imbangat nen Jesus ya itawag tayod si Jehova et “Ama.”

4. Akin et nibaga tayo ya labay nen Jehova ya asingger so liknaan tayo ed sikato?

 ⁴ Kasin nanairapan kan ituring si Jehova bilang sakey ya maar-aron Ama? Ontan so nalilikna na arum ya agagi. Ompan mairap dan imadyinen ya maar-aron tatay si Jehova ta say mismon tatay da et aliwan maaro. No ontan so situasyon mo, agka mapaga ta natatalosan nen Jehova so naliliknam. Diad tua, iyaasingger toy sarili tod sika. Onia ingen so ibabaga na Salita to: “Onapit kayo ed Dios, tan sikatoy onapit ed sikayo.” (Sant. 4:8) Inar-aro itayo nen Jehova, tan labay ton ipalikna ed sikatayo so panangasikaso na sankamaaroan ya Ama.

5. Base ed Lucas 10:22, panon ya makatulong so alimbawa nen Jesus pian lalon onasingger so liknaan tayo ed si Jehova?

⁵ Makatulong so alimbawa nen Jesus pian lalon onasingger so liknaan tayo ed si Jehova. Talagan kabkabat nen Jesus si Jehova tan inalig toy ugali tan kualidad nen Ama to, kanian imbaga ton: “Siopaman ya akanengneng ed siak et anengneng to met lay Ama.” (Juan 14:9) Si Jesus et singa panguloan ya kuya tayo. Ibabangat to tayo no panon tayon naunor, narespeto, tan napaliket so Ama tayo. Imbangat to met no anto ray iwasan tayo pian agtayo napaermen si Aman Jehova tan naala tayoy pabor To. Tan diad tua, no aralen tayoy impanbilay nen Jesus diad dalin, diman tayo nanengneng ya talagan maar-aro tan maasikason Ama si Jehova. (Basaen so Lucas 10:22.) Nengnengen tayo pay pigaran alimbawa.

6. Mangiter na alimbawa ya dinengel nen Jehova si Jesus.

⁶ Labalabay nen Jehova ya dengelen iray ibabaga na ananak to. Imanoen tayo pay indengel to ed panguloan ya Anak to. Dinengel toy dakel ya pikakasi nen Jesus legan ya wadiad dalin. (Luc. 5:16) Dinengel nen Jehova iray pikakasi nen Jesus kada no manggawa na ambelat ya desisyon, singa bilang, nen pinili toy 12 apostol to. (Luc. 6:12, 13) Dinengel to met iray pikakasi to kada no ibabalikas toy pakakaaburido to. Singa bilang, antis ya traidoren nen Judas, agtinmundan nampikasi si Jesus tan imbaga tod Ama to ya nagogonigon ya maong, ta sankanonot toy asingger lan nagawa ed  sikato. Mapatnag ya dinengel itan nen Jehova ta angibaki na anghel pian pabiskegen so liknaan na inar-aro Ton Anak.—Luc. 22:41-44.

7. Antoy naliliknam ta antam ya dedengelen nen Jehova iray pikakasim?

⁷ Dedengelen met nen Jehova iray pikakasi na saray lingkor to natan, tan eebatan to iratan diad dugan panaon tan diad sankaabigan ya paraan. (Sal. 116:1, 2) Naeksperiensyan mismo itan na sakey ya sister diad India. Sayan sister et walay graben problema to ed emosyon—lanang ya aburido tan sobsobra so panagpaga to. Kanian impapuson nampikasi ed si Jehova tungkol ed sayan dadalanen to. Oniay insulat to: “Dugaruga ed siak may Mayo 2019 ya JW Broadcasting^® ta say topic et no panon ya nasarag so sobran panaburido. Ebat iman nen Aman Jehova ed pikakasik.”

8. Panon ya impanengneng nen Jehova so panangaro tod si Jesus?

⁸ Legan na mair-irap ya asainmin nen Jesus diad dalin, sikatoy inasikaso nen Jehova tan impalikna ton inar-aro to. Makaseguro tayo ya ontan met so pangasikaso tod sikatayo natan. (Juan 5:20) Intarya toy espiritual, emosyonal, tan materyal ya pankaukolan nen Jesus. Tan manlapud tawen et imbaga ni ingen nen Jehova ya sikatoy naliliketan ed Anak to tan inar-aro to. (Mat. 3:16, 17) Lapud amta nen Jesus ya sikatoy inar-aro nen Ama to tan agton balot paulyanan, agto aliknan bukbukor to.—Juan 8:16.

9. Anto ray ebidensya ya talagan inar-aro itayo nen Jehova?

⁹ Singa si Jesus, amin tayo et nalilikna tayon mismo so panangaro nen Jehova. Isip mo pa: Inyasingger ka nen Jehova diad organisasyon to tan inikdan to ka na maar-aron espiritual ya pamilya ya mamapabiskeg tan mamapaliket ed sika no onkakapuy ka. (Juan 6:44) Ontan met, agnasabaan so espiritual ya naakan ya itatarya nen Jehova tan seseguroen to met ya agnapapaulyanan so inagew-agew ya pankaukolan tayo. (Mat. 6:31, 32) No isipen tayo so amin ya pangaasikaso nen Aman Jehova ed sikatayo, mas naar-aro tayo.

10. Antoy makatulong pian nipalikna tayoy panangaro ed saray agagi?

¹⁰ Inar-aro nen Jehova iray agagi tayo. Pero lapud nanduruma so kultura tan paraan na impamabaleg ed sikatayo, ompan nanairapan tayon ipalikna so panangaro ed agagi. Sakey ni, lapud agtayo perpekto, ompan napabarong o napasyodot tayo ra no maminsan. Pero no aligen tayoy panangaro nen Aman Jehova, walan walay nagawaan tayo pian onelet so aroan tayon sanaagi. (Efe. 5:1, 2; 1 Juan 4:19) Nengnengen tayo no panon tayon naalig so alimbawa nen Aman Jehova.

11. Panon ya inalig nen Jesus so “maaron panangabagey” nen Jehova?

¹¹ Ipapanengneng nen Jehova so “maaron panangabagey.” (Luc. 1:78) No say sakey et maabagey, agto labat nakasian iray maniirap; manggawa met na paraan pian natulongan to ra. Nen wadiad dalin si Jesus, inalig toy panangabagey nen Jehova. (Juan 5:19) Aminsan, nen anengneng nen Jesus so dakdakel ya totoo ya tinmumbok ed sikato, “akasian to ra, lapud singa ra kinatatan tan pinaulyanan a karnero ya andiay managpastol.” (Mat. 9:36) Pero agto labat ira akasian. Nanggawa met na paraan pian natulongan to ra. Pinaabig to ray mansasakit tan tinulongan to iramay “nabebelatan” lapud labay to ran nainawaan.—Mat. 11:28-30; 14:14.

12. Panon tayon nipanengneng so panangabagey? Mangiter na alimbawa.

¹² Pian nipanengneng tayoy panangabagey ed saray agagi tayo, dapat amta tayoy dadalanen  da tan isipen tayon maong so situasyon da. Singa bilang, abalitaan mo ya walay graben sakit na sakey ya sister. Anggano agto iistoryaen ed arum so irap ya dadalanen to, seguradon naapresya to so antokaman ya nitulong tayo. Ompan agto la nanaasikaso so pamilya to. Sarag mo ra kasin ilutoan odino tulongan mo ra ed panlinis na abung da? Panon to met no naamtaan mo ya nakal ed trabaho so sakey ya brother? Ompan makatulong ka no mangiter kay anggan melag pian walay nagastos da anggad makalmo lay trabaho. Tan agmo la ibabaga ya nanlapu itan ed sika.

13-14. Panon tayon naalig so inkamaiter nen Jehova?

¹³ Sankamaiteran si Aman Jehova. (Mat. 5:45) Singa si Jehova, agtayo la aalagaren ya onasingger ni ed sikatayo iray agagi antis tayo ran tulongan. Papasinagen nen Aman Jehova so agew anggano agtayo kekerewen. Tan aliwan saray lingkor to labat so nasisinagan, noagta amin! On, iiter nen Jehova iray nakaukolan tayo ta labay ton ipalikna so panangaro tod sikatayo. Maar-aro tan maiter si Aman Jehova, kanian inar-aro tayo met.

¹⁴ Dakdakel met ya agagi tayo so mangaalig ed inkamaiter nen Aman Jehova. Singa bilang nen 2013, dakel ya agagi ed Pilipinas so naapektoan na makmaksil ya bagyon Yolanda. Aderal so kaabungan da tan anggapoy akeran gamit da. Pero kinmiwas ya tampol so espiritual ya pamilya tayo! Dakel ya agagi ed interon mundo so angiter na donasyon. Dakel so namboluntaryo ya mangapiger tan mangipaalagey na abung na agagi, kanian diad loob labat na ngalngali sakey taon et asumpal da so manga 750 ya abung na agagi! Ontan met, legan na COVID-19 pandemic, dakel ya agagi so makulikulin tinmulong ed saray agagi tayon mankaukolan. No onkikiwas tayon tampol pian tulongan so espiritual ya pamilya tayo, nalikna da ya inar-aro tayo ra.

15-16. Base ed Lucas 6:36, antoy gawaen tayo pian naalig tayoy Ama tayo ed tawen?

¹⁵ Si Jehova et mapangasin Ama tan mabulos ya mamerdona. (Basaen so Lucas 6:36.) Kada agew et nalilingo tayo pero peperdonaen to tayo. (Sal. 103:10-14) Nen wadiad dalin si Jesus, saray disipulo to et dakel met so lingon  agawaan da pero pinerdona tan kinasian to ra. Mabulos to ingen ya inter so bilay to pian naperdona iray kasalanan tayo. (1 Juan 2:1, 2) No isipen tayoy panangasi tan inkamabulos nen Jehova tan Jesus ya mamerdona, lalon onasingger so liknaan tayod sikara.

¹⁶ Lalon onelet so aroan tayon sanaagi no “mabulos [tayon] manpeperdonaan.” (Efe. 4:32) Tua, mairap no maminsan so mamerdona, pero pansagpotan tayon gawaen itan ta atan so labay nen Jehova. Imbaga na sakey ya sister ya akatulong ed sikato so artikulo na Panag-bantayan ya “Mabulos a Perdonaen so Balang Sakey.” * Oniay insulat na sayan sister: “Nen inaral ko yan artikulo, atalosan kon parad pankaabigan ko lanlamang no mamerdona ak. Impaliwawa na saman ya artikulo ya no mabulos tayon perdonaen so arum, agto labay ya ibaga ya ibabaliwala odino kokonsintien tayo so lingo ra. Andi, aliwan onman. Say labay ya ibaga na pamerdona et lingwanan mo lay sakit na linawam, ta diad tua, atan met so paraan pian ondeen so nonot mo.” No mabulos tayon perdonaen iray agagi, ipapanengneng tayo ya inar-aro tayo ra tan aaligen tayoy Aman Jehova.

17. Base ed Mateo 5:16, antoy gawaen tayo pian nigloria si Aman Jehova?

¹⁷ Baleg ya pribilehyo ya parte itayo na maar-aron espiritual ya pamilya. Labay tayo ya dakel nin totoo so mandayew ed si Aman Jehova. Manalwar tayo sirin pian agtayo makagawa na bengatlan maneral ed reputasyon to tan na saray lingkor to. Lanang tayon ipanengneng so maong ya ugali pian magmaliw ya interesado iray totoo ed maong a balita.—Basaen so Mateo 5:16.

18. Antoy nepeg mon tandaan pian agka natatakot ya ibagad arum so papanisiaan mo?

¹⁸ No maminsan, ompan balawen odino pairapen itayo ni ingen na arum ya totoo lapud uunoren tayoy Ama tayod tawen. Panon to no nanenerbiyos ka tan natatakot kan ibaga iray papanisiaan mo? Tandaan mo ya tulongan ka  nen Jehova tan si Jesus. Imbaga nen Jesus ed saray disipulo to ya ag-ira mapaga no antoy ibaga ra tan no panon da itan ya ibaga. Akin ey? Ta oniay impaseguro to: “Say ibaga yo et niiter ed sikayo diad satan a bekta; ta aliwan sikayo labat so mansalita, noagta say espiritu na Ama yo so mansalita ed panamegley yo.”—Mat. 10:19, 20.

19. Mangiter na alimbawa na sakey ya Bible study ya makmakpel ton indepensa so katuaan.

¹⁹ Imanoen so alimbawa nen Robert ya taga South Africa. Nen balo ni labat ya Bible study tan daiset ni amta to ed Biblia, sikatoy nilitis ed korte ta agto labay so mansundalo. Makpel ton imbaga ed korte ya ontan so desisyon to lapud inaro to iray agagi to. Anggano Bible study ni labat si Robert, inar-aro to lay espiritual ya pamilya to! “Siopa iratay agagim?” so biglan intepet na sakey ya judge. Ag-atalaranan nen Robert iman ya tepet. Pero anonotan ton tampol imay teksto ed saman ya agew, amay walad Mateo 12:50: “Siopaman a manggagaway linawa nen Amak a walad tawen, sikato so agik a laki tan agik a bii tan inak.” Anggano balo ni labat ya Bible study si Robert, sikatoy tinulongan na masanton espiritu nen Jehova pian naebatan to iman ya tepet tan arum ni ran agto ilaloan ya intepet na saray judge. Seguradon proud ya maong si Aman Jehova ed si Robert. Tan seguradon proud met ed sikatayo no nanenengneng ton mantitiwala tayo ed sikato, tan no makmakpel tayon idedepensa so katuaan anggano mair-irap so situasyon.

20. Antoy itultuloy tayon gawaen? (Juan 17:11, 15)

²⁰ Komon ta itultuloy tayon pablien so espiritual ya pamilya tayo. Sankamaaroan so Ama tayo. Tan maar-aro met iray agagi tayo. Balbaleg ya pribilehyo ya kapamilya tayo ra. Kanian agtayo komon ibabaliwala so panangaro da. Kabkabusol itayo nen Satanas tan saray alipores to, kanian labay dan isipen tayo ya ag-itayo inaro na Ama tayod tawen. Tan labay da met ya deralen so pankakasakey tayo. Pero nen wadiad dalin si Jesus, impikasi to la ya bantayan itayo komon na Ama tayo pian lanang ya nankakasakey so pamilya tayo. (Basaen so Juan 17:11, 15.) Anggad natan et eebatan nin siansia nen Jehova itan ya pikakasi na Anak to. Singa si Jesus, komon ta kombinsido tayon inar-aro itayo nen Aman Jehova tan agto tayon balot paulyanan. Itultuloy tayo sirin ya pabiskegen so panangaro tayo ed espiritual ya pamilya tayo!