1. No ontatatken tayo la, antoy balibalin isipen tayo ya nitulong tayod kongregasyon?

NO ONTATATKEN tayo la, agtayo naiwasan ya isipen ya ompan aliwa tayo lan mausar ed si Jehova ta kinmapuy lay laman tayo. Pero diad tua, sarag tayon usaren so atipon tayon karunongan tan eksperiensya pian tulongan iray mas ugaw ni diad kongregasyon. Sarag tayo ran ibangat tan ipasal pian niparaan ira ed saray nanduruman pribilehyo tan responsabilidad. Oniay imbaga na sakey ya elder: “Maong labat ta nen naliliknak lay epekto na itatatken, wala la ray kualipikadon brother ya mas ugaw ni ya akaparaan lan mangawat na saray responsabilidad.”

2. Antoy pantongtongan tayo ed sayan artikulo?

² Diad imbeneg ya artikulo, inaral tayo no antoy maabig ya epekto ed saray mas ugaw nin agagi no kaaroen da iray maedad la ed kongregasyon. Diad sayan artikulo, pantongtongan tayo no akin ya importantin saray maedad la et mapaabeba, maapresya, tan maiter legan dan tutulongan tan ipapasal iray mas ugaw nin agagi, pian diad ontan et nabendisyonan so interon kongregasyon.

3. Base ed Filipos 2:3, 4, antoy gawaen na toon mapaabeba, tan akin et importante itan ya ugali?

³ Saray maedad la et nepeg ya manpaabeba no labay dan tulongan iray mas ugaw ni. Say toon mapaabeba et ipapasen ton mas atagey so arum nen say sikato. (Basaen so Filipos 2:3, 4.) Saray maedad la ya mapaabeba et bibirbiren da ya aliwa labat ya saksakey so paraan pian nasumpal so kimey. Kanian agda ipilit ed arum so paraan ya apasalan da, no anggapo met so nakokontran prinsipyo na Biblia. (Ecl. 7:10) Anggano dakel so  eksperiensya ra, natatalosan da ya ‘sayan mundo et manguuman’ kanian kaukolan day onadapta ed saray pananguman.—1 Cor. 7:31.

4. Panon ya aaligen na saray manangasikaso na sirkito iray Levita nensaman?

⁴ Saray maedad lan agagi ya mapaabeba et bibirbiren da ya agda la nagawaan so arum ya gagawaen da nensaman. Isipen pa iray manangasikaso na sirkito. No nasabi da lay edad ya 70, makaawat la ray balon asainmin. Siempre, ompan diad unaan et mairap ta inar-aro day pribilehyo dan ombisita ed saray agagi tan anggad nayari et agda itan labay ya ikbanan. Pero natatalosan da ya mas maabig no ipasa da la itan ya kimey ed mas ugaw nin brother. Aaligen da iray Levita diad Israel nensaman ya no nasabi da lay edad ya 50, nepeg la ran “manretiro ed panaglingkor” diad tabernakulo. Pero maliket ni ran siansia anggano anggapo lad sikara itan ya pribilehyo, ta sarag da nin tulongan iray mas ugaw nin Levita diad arum ya paraan. (Num. 8:25, 26) Ontan met natan. Anggano agla ombibisita ed nanduruman kongregasyon iray datin manangasikaso na sirkito, bendisyon ni ran siansia ed kongregasyon ya kawalaan da.

5. Antoy naaralan tayo ed alimbawa nen Brother Dan tan Sister Katie?

⁵ Imanoen so alimbawa nen Brother Dan, ya nanlingkor bilang manangasikaso na sirkito diad loob na 23 taon. Nen 70 la nen Brother Dan, sikato tan say asawa ton si Sister Katie et niyasain bilang espisyal payunir. Panon iran akapan-adjust ed balon asainmin da?  Imbaga nen Brother Dan ya nansiansia ran busy. Singa bilang, makulikuli ton aasikasoen iray responsabilidad to ed kongregasyon, tutulongan to ray brother ya onkualipika bilang ministeryal a lingkor, tan ipapasal to ray kakongregasyon to ya man-metropolitan witnessing tan manpulong ed prisoan. Sikayo ran agagi min maedad la, tandaan yo ya walan-walay nitulong yo ed saray agagi, balanglan manlilingkor kayon full-time odino andi. Nagawaan yo itan no akaparaan kayon man-adjust ed saray pananguman, no manisip kayo na saray sarag yo nin i-goal, tan no manpokus kayo ed saray nagawaan yo ni, aliwan diad saray agyo la nagawaan.

6. Antoy birbiren na toon mapaabeba, tan akin et importante itan? Iyilustra.

⁶ Say toon mapaabeba et bibirbiren to ya wala ray limitasyon to. (Pro. 11:2) Tanggap to ya wala ran talagay agto nagawaan kanian ompan kaukolan toy man-adjust. Pero gawaen to nin siansia no antoy nasarag to, tan panliketan to itan. Singa itan driver ya manmamaneho ed lugar ya patatdang. Kaukolan toy man-menor pian makasapat so luganan to tan ag-ontirik. Tua, medyo ontantan so batik to, pero ayos labat ta say importante et onaabante nin siansia. Ontan met iray maedad lan agagi ya mapaabeba. Tanggap da ya kaukolan da lay “man-menor,” pero say importante et tuloytuloy ni ran onaabante ed panlilingkor dad si Jehova.—Fil. 4:5.

7. Akin et nibaga tayon mapaabeba si Barzilai?

⁷ Imanoen so alimbawa nen Barzilai. Sikatoy mantaon la na 80 nen inimbitaan nen Arin David ya magmaliw ya opisyal to. Pero lapud mapaabeba si Barzilai, agto la itan tinanggap. Imbaga to ya masiken la, kanian inrekomenda ton si Kimham la so mila ed ari ta ugaw ni. (2 Sam. 19:35-37) Singa si Barzilai, saray maedad lan brother natan et iikdan da na pagkakataon iray mas ugaw nin brother ya mansakbat na saray pribilehyo tan responsabilidad ed kongregasyon.

8. Panon ya impanengneng nen Arin David so inkamapaabeba nen aliwan sikato so pinili nen Jehova ya mangipaalagey ed templo?

⁸ Anggan si Arin David et mapaabeba met. Nen sikato so ari, talagan labalabay toy mangipaalagey na abung parad si Jehova. Balet imbaga nen Jehova ed sikato ya say anak ton si Solomon so pinili Ton manggawa ed satan. Antoy reaksion nen David? Agto kinuestion so desisyon nen Jehova. Diad tua, imparaan to ni ingen iray materyales parad pangipaalagey na templo. (1 Awa. 17:4; 22:5) Ag-inisip nen David ya sikato dapat so pangiteran nen Jehova ed satan ya pribilehyo ta si Solomon et “ugaw ni tan anggapo ni eksperiensya to.” (1 Awa. 29:1) Amta nen David ya say pakasumpal na satan ya proyekto et ag-akadepende ed edad o eksperiensya na mangidaulo, noagta akadepende ed panamendisyon nen Jehova. Singa si David, maseseg ya susuportaan na saray maedad lan agagi natan so organisasyon nen Jehova anggano anguman lay pribilehyo da. Amta ra ya bendisyonan met nen Jehova iray ugaw nin agagi ya manggagawa la natan ed saray datin responsabilidad da.

9. Panon ya impanengneng na sakey a membro na Branch Committee so inkamapaabeba?

⁹ Dakel met so mapaabeban brother natan, singa si Brother Shigeo. Nen 1976, nen 30 so taon to, sikatoy aturon membro na Branch Committee. Tan nen 2004, sikato so nagmaliw ya Branch Committee coordinator. Pero asabi panaon, alikas to ya aliwa lan singa dati so biskeg tan peles ton mantrabaho. Impikasi ton maong itan ed si Aman Jehova tan inisip to iray maabig ya resulta no ipasa to la iray responsabilidad to ed mas ugaw nin brother. Anggano aliwa lan si Brother Shigeo  so coordinator natan, mitutulongan nin siansia ed arum ya membro na Branch Committee. Makaaral iray maedad lan agagi natan ed alimbawa nen Barzillai, Arin David, tan Brother Shigeo. Importante ya mapaabeba ira tan agda nepeg ya isipen ya agni kualipikado iray mas ugaw nin agagi lapu labat ta kulang ni eksperiensya ra. Walay tiwala da ya makaaral met ira lanlamang. Ipapasen da ran kakimeyan, aliwan kakompetensia o kalaban.—Pro. 20:29.

10. Antoy pangipapasen na saray maedad lan agagi ed saray mas ugaw ni diad kongregasyon?

¹⁰ Ipapasen na saray maedad lan agagi ya regalo nen Jehova iray mas ugaw ni. Lapud onkakapuy lay laman da, misalsalamat ira ta wala ray mabiskeg tan mas ugaw nin agagi ya akaparaan ya mangawat na saray responsabilidad ed kongregasyon.

11. Singa naaralan ed Ruth 4:13-16, antoy resulta no saray maedad la et awaten day tulong na saray mas ugaw ni?

¹¹ Diad Biblia, say sakey ya maabig ya alimbawa na maedad la ya inapresya toy tulong na mas ugaw ni et si Noemi ya katulangan nen Ruth. Nen paarap ira ed Betlehem, papapawilen la nen Noemi si Ruth diad pamilya to ed Moab. Pero, agpinmayag si Ruth. Mapilit ya milad si Noemi pian naasikaso to. Kanian agla tinanggian nen Noemi so tulong nen Ruth. Naapresya ton maong so matoor ya panangaro na manugang to. (Ruth 1:7, 8, 18) Tan abendisyonan iran dua lapud satan! (Basaen so Ruth 4:13-16.) Singa si Noemi, mapaabeban aawaten na saray maedad lan agagi natan so tulong na arum.

12. Akin et nibaga tayon maapresya si apostol Pablo?

¹² Say sakey nin alimbawa ya inapresya toy tulong na agagi et si apostol Pablo. Singa bilang, sikatoy akisalamat ed saray agagi ed  Filipos ta impawitan day materyal ya tulong. (Fil. 4:16) Inapresya to met so intulong nen Timoteo ed sikato. (Fil. 2:19-22) Tan nen paarap si Pablo ed Roma bilang sakey ya priso, sikatoy akisalamat ed Aman Jehova ta wala ray agagi ya akinengnengan ed sikato tan pinaseseg da. (Gawa 28:15) Apasal si Pablo ya sikato so ontutulong ed arum, tan ararawi ni ingen so biniahe to pian makapanpulong tan natulongan to ray kongregasyon. Pero nen sikato lay mankaukolan, mapaabeba ton inawat so tulong na agagi.

13. Panon ya nipanengneng na saray maedad lan agagi ya aapresyaen da iray mas ugaw nin kakongregasyon da?

¹³ Sikayo ran agagi mi ya maedad la, dakel so paraan pian nipanengneng yon aapresyaen yo iray mas ugaw nin kakongregasyon yo. Singa bilang, awat yoy tulong da no labay da kayon itindaanan, ibaan da kayon manpa-check up, odino arum ni. Tandaan yo ya uusaren ira nen Jehova pian nipalikna toy panangaro tod sikayo. No agyo tanggian so tulong na arum, ompan atan manaya so paraan pian nakaaro yo iray mas ugaw nin kakongregasyon yo. Lanang yon ipanengneng so personal ya interes ed sikara, tan tulongan yo ran onaligwas ed espiritual. Tan ibaga yo ya naliliketan kayo no nanenengneng yo ran ondadampot na pribilehyo. Istorya yo met ed sikara iray nanduruman eksperiensya yod bilay. No gawaen yo iratan, ‘ipapanengneng yon misalsalamat kayo’ ed si Jehova ta inyasingger to irayan mas ugaw nin agagi diad organisasyon to.—Col. 3:15; Juan 6:44; 1 Tes. 5:18.

14. Antoy sakey ya pakapatnagan ya maiter si Arin David?

¹⁴ Wala ni balibalin ugali nen Arin David ya maabig ya aligen na saray maedad lan agagi natan—say inkamaiter. Balbaleg so indonasyon to parad pangipaalagey na templo. (1 Awa. 22:11-16; 29:3, 4) Ginawa to itan anggano amta to ya si Solomon so birbiren na totoo ya angipaalagey ed satan. Singa si David, nasuportaan tayo met iray construction project na organisasyon anggano makapuy lay laman tayo no mangiter tayoy donasyon, amay sarag tayon iter. Say sakey met ya paraan ya makapangiter tayo et no mabulos tayon inabang ed saray mas ugaw ni iray eksperiensya tayo.

15. Antoy mabulbulos ya inter nen apostol Pablo ed si Timoteo?

¹⁵ Say sakey ya maabig ya alimbawa ya mabulos ton innabang ed arum so eksperiensya to et si apostol Pablo. Intagar toy Timoteo ya milad sikato diad panmi-misionero to, tan imbangat to ed sayan kabataan ya Kristiano iray epektibon paraan na panagpulong tan panagbangat. (Gawa 16:1-3) Akaaral ya maong si Timoteo tan nagmaliw ya maong ya ministro. (1 Cor. 4:17) Asabi panaon, impasal met nen Timoteo iray agagi tan imbangat tod sikara iramay naaralan tod si Pablo.

16. Akin et angipasal si Brother Shigeo na mas ugaw ni ran brother?

¹⁶ Saray maedad lan agagi natan et labalabay da met ya ipasal iray mas ugaw nin agagi. Agda iisipen ya naandian iray pribilehyo no gawaen da itan. Singa bilang, si Brother Shigeo ya abitlad parapo 9 et impasal to iray mas ugaw nin membro na Branch Committee. Ginawa to itan ta sankanonot toy ilalaknab na kimey na Panarian ed bansa ra. Kanian nen asabi panaon ya kaukolan to lan ipasa so responsabilidad to bilang coordinator, wala lay nipasal ya brother ya onsalat ed sikato. Anggad natan et inanabang nin siansia nen Brother Shigeo ed saray mas ugaw nin brother so masulok ya 45 a taon ya eksperiensya to bilang membro na Branch Committee. Saray maedad lan agagi ya singa si  Brother Shigeo et talagan bendisyon ed organisasyon nen Jehova!

17. Antoy niiter na saray maedad lan agagi ed saray mas ugaw ni, ya singa ipapaseseg na Lucas 6:38?

¹⁷ Sikayo ran maedad lan brother tan sister, say alimbawa yo et prueba ya say matoor ya panlingkor ed si Jehova so sankaabigan ya desisyon ya gawaen na sakey a too. Nanenengneng mid bilay yo ya talagan maong so resulta no aralen tan iyaplika mi ray prinsipyo ed Biblia. Anggano dakdakel lay atipon yon eksperiensya, akaparaan kayon onadapta pian makapibansag kayo ed saray pananguman ed organisasyon. Sikayo ran agagi min maedad la ya agano nin abautismoan, dakel met so nitulong yod organisasyon. Istorya yod agagi no panon ya anguman tan nagmaliw ya maliket so bilay yo nen akabat yoy Jehova. Seguradon napaseseg yo iray mas ugaw nin agagi no narengel da iray eksperiensya yo tan saray dinadalan yod bilay. No “iyugali yo so mangiter” diad mabulos yon pangibangat tan pangipasal ed arum, seguradon bendisyonan kayo nen Aman Jehova.—Basaen so Lucas 6:38.

18. Panon ya makapantutulongan iray maedad la tan mas ugaw ni diad kongregasyon?

¹⁸ No sikayo ran maedad la et kaaroen yo iray mas ugaw ni ed kongregasyon, napaseseg yoy sakey tan sakey. (Roma 1:12) Diad tua, walay walad sikayo ya anggapod sikara. Tan wala met so walad sikara ya anggapod sikayo. Sikayo ran maedad la et dakel lay atipon yon kakabatan tan eksperiensya diad inlabas na dakel ya taon. Saray mas ugaw balet et mabisbiskeg ni ra. Kanian no saray agagin maedad la tan mas ugaw ni diad kongregasyon et sankakaaro tan saniba ran manlingkor, nirayew so maar-aron Ama tayo diad tawen tan seguradon bendisyonan to so interon kongregasyon.