1-2. Anton simbolikon yegyeg so abayag lan impropesiya nen Aggeo ya nagawa ed panaon tayo?

“DIAD loob labat na pigaran minuto, nan-collapse iray abung tan saray daan ya bilding.” “Manpa-panic iray totoo . . . Manga duaran minuto kuno may yegyeg. Say amtak ingen agla ontunda.” Ontan so nanonotan na saramay akaligtas ed agawan yegyeg diad Nepal nen 2015. Makapa-trauma itan ya eksperiensya, tan seguradon agdan balot nalingwanan.

² Pero walay duman klase na yegyeg ya nagagawa natan, tan aliwan saksakey a bansa o syudad so apektado, noagta interon mundo, tan pigaran dekada la iyan nagagawa. Sayan yegyeg et abaybayag lan impropesiya nen propetan Aggeo. Insulat to: “Oniay inkuan nen Jehova na saray armada, ‘Maminsan ni—agla manbayag—yegyegen koy tawen tan dalin tan dayat tan amagan dalin.’”—Ag. 2:6.

3. Akin ya samay yegyeg ya binitla nen Aggeo et duma ed literal ya yegyeg?

³ Say literal ya yegyeg et aliwliway epekto to. Pero duma so simbolikon yegyeg ya binitla nen Aggeo ta maabig so resulta to. Diad tua et oniay mismon imbaga nen Jehova: “Yegyegen koy amin a nasyon, tan onloob iray ankabli a bengatla na amin a nasyon; tan panoen koy gloria iyan abung.” (Ag. 2:7) Panon ya asumpal iyan propesiya diad panaon nen Aggeo? Tan panon met iyan nagagawa natan? Pantongtongan tayoy ebat ed saratan ya tepet, tan pantongtongan tayo met no antoy gawaen tayo pian makatulong tayo ed kimey ya panagyegyeg ed saray nasyon natan.

4. Akin et imbaki nen Jehova si Aggeo ya manpropesiya ed saray Judio?

⁴ Imbaki nen Jehova si Aggeo ya manpropesiya ed saray Judio. Amtaen tayo pay agawa antis to ’tan. Posiblin kaiba si Aggeo  ed saramay Judio ed Babilonia ya pinmawil ed Jerusalem nen 537 B.C.E. Ag-abayag manlapud samay insabi dad Jerusalem, ginapoan dan impaalagey so pundasyon na abung nen Jehova, say templo. (Esd. 3:8, 10) Pero ag-abayag, wala ray kinmontra ed pampapaalagey da. Kanian adismaya ra tan intunda day kimey. (Esd. 4:4; Ag. 1:1, 2) Kanian nen 520 B.C.E., imbaki nen Jehova si Aggeo pian pabiskegen so liknaan na saray Judio tan pasesegen iran ituloy so pangipapaalagey da ed templo. *—Esd. 6:14, 15.

5. Akin et seguradon binmiskeg so liknaan na saray Judio ed mensahe nen Aggeo?

⁵ Makapabiskeg na pananisia so mensahe nen Aggeo. Oniay mensahe to ed saray Judio: “‘Manpabiskeg kayo, amin yon totoo ed sayan dalin,’ so imbaga nen Jehova, ‘tan mankimey kayo. Ta wala ak ed sikayo,’ so imbaga nen Jehova na saray armada.” (Ag. 2:4) Seguradon apaseseg iray Judio nen inusar nen Aggeo so deskripsion ya “Jehova na saray armada.” Impanonot na satan ed sikara ya sarag nen Jehova ya usaren so balbaleg ya armada na saray anghel pian ontulong ed sikara. Kanian anggapoy nepeg dan takotan. Nasumpal da so kimey basta manmatalek ira ed si Jehova.

6. Antoy resulta na simbolikon yegyeg ya impropesiya nen Aggeo?

⁶ Impaibaga met nen Jehova ed si Aggeo ya walay nagawan simbolikon yegyeg diad amin a nasyon. Makapaseseg iya ed saray Judio ta atalosan da ya yegyegen nen Jehova so Persia, say sankamakapanyarian ya gobierno diad saman ya panaon tan dakel so sakop ton nasyon. Antoy resulta na sayan simbolikon yegyeg? Unona, nasumpal na saray Judio so pampapaalagey dad templo. Komadua, onsabi so panaon ya anggan saray aliwan Judio et kaiba da lan mandayew ed si Jehova diad templo. Talagan makapaseseg itan ya mensahe!—Zac. 8:9.

7. Anton simbolikon yegyeg so nagagawa natan, tan panon tayon makapitulongan ed satan?

⁷ Kasin nagagawa met diad panaon tayo imay propesiya nen Aggeo? On, ta yeyegyegen lamet nen Jehova natan so amin a nasyon! Tan diad tua et walay nitulong tayo ed pakasumpal na sayan propesiya. Nen 1914, introno nen Jehova si Jesu-Kristo bilang Ari ed Panarian To diad tawen. (Sal. 2:6) Mauges itan ya balita parad saray lider na mundo. Akin ey? On ta wala lay Ari ya mangirerepresenta ed si Jehova tan manuuley lay Panarian To! Asumpal la so “aturon panaon na saray nasyon”! (Luc. 21:24) Lapud satan, manlapu la nen 1919, mamapasya iray lingkor nen Jehova pian ipulong ed interon mundo ya say Panarian na Dios labat so solusyon ed amin ya problema na totoo. On, say pangipupulong tayo na “maong a balita na Panarian” so manyeyegyeg ed interon mundo natan!—Mat. 24:14.

8. Base ed Salmo 2:1-3, antoy reaksion na maslak ya bansa ed mensahe na Panarian?

⁸ Antoy reaksion na totoo ed mensahe na Panarian? Maslak ed sikara et agda itan agustoan. (Basaen so Salmo 2:1-3.) Agonigon tan agulo iray nasyon. Agda natanggap so Ari ya tinuro nen Jehova. Agda ipapasen ya “maong a balita” so mensahe na Panarian ya ipupulong tayo. Diad tua, wala ra ingey gobierno ya imbawal day panagpulong ed bansa ra! Ibabaga na sarayan lider na bansa ya manlilingkor ira kuno ed Dios, pero agda labay ya ikbanan so posisyon da. Singa saramay lider ed  panaon nen Jesus, saray lider na bansa met natan et onsusumpa ed “samay nilanaan” nen Jehova lapud papairapen da iray matoor ya papatumbok to.—Gawa 4:25-28.

9. Anton pagkakataon so iiter nen Jehova ed saramay onsusumpa ed Panarian to?

⁹ Antoy reaksion nen Jehova ed isusumpa na saray bansa? Oniay ebat na Salmo 2:10-12: “Kanian natan, sikayo ran arari, magmaliw kayon makabat; sikayo ran ukom ed dalin, awat yoy panametek. Manlingkor kayo a walaay takot ed si Jehova, tan manliket kayo a walaay aralem a respeto. Igalang yo so anak, ta no andi, say Dios et onsanok. Tan naderal kayo, lapud ondalang a tampol so sanok To. Maliket iramay pasasalimbengan ed Sikato.” On, iikdan nen Jehova na pagkakataon iray onsusumpa ed sikato ya manguman tan manpasakop ira ed Panarian to. Pero siempre, antiktikey lay nakekeran panaon ta manbibilay tayo lad “kaunoran iran agew” na sayan sistema na mundo. (2 Tim. 3:1; Isa. 61:2) Kanian importante ya samboten da lan amtaen so katuaan natan tan mandesisyon iran manlingkor ed si Jehova.

10. Base ed Aggeo 2:7-9, antoy maabig ya resulta na simbolikon yegyeg?

¹⁰ Wala balet so balibalin resulta na simbolikon yegyeg ya impropesiya nen Aggeo. Imbaga to ya lapud satan, saray “ankabli a bengatla [saray mauyamon totoo] na amin a nasyon” et onloob ed abung nen Jehova tan mandayew irad sikato. * (Basaen so Aggeo 2:7-9.) Walay onia met ya impropesiya nen Isaias tan Miqueas ya nagawa ed “kaunoran iran agew.”—Isa. 2:2-4, paimanod leksab; Miq. 4:1, 2, paimanod leksab.

11. Antoy reaksion na sakey ya brother nen first time ton arengel so mensahe na Panarian?

¹¹ Imanoen pa so eksperiensya nen Brother Ken ya manlilingkor la natan ed world headquarters. Agton balot nalingwanan may alikna to nen first time ton arengel so mensahe na Panarian manga 40 taon lay apalabas. Oniay imbaga nen Brother Ken: “Malikeliket  ak nen naamtaan ko ed Biblia ya manbibilay tayo la manaya ed kaunoran iran agew. Atalosan ko ya pian napaliket koy Dios tan naawat koy bilay ya andi-anggaan, kaukolan kon pilien si Jehova tan kaukolan kon taynan iyan mundo ya asingsingger lan naderal. Kinerew koy tulong to tan kinmiwas ak ya tampol. Tinaynan koy mundo tan nampasakop ak ed Panarian na Dios ta amtak ya ag-itan balot naderal.”

12. Panon ya napapano na gloria so espiritual ya templo nen Jehova diad sayan kaunoran iran agew?

¹² Diad sayan kaunoran iran agew, malinlinew ya bebendisyonan nen Jehova iray lingkor to ta lalo iran ondarakel. Nen 1914, pigpigaran libo tayo ni labat. Pero natan, masulok lan waloran milyon so aktibon manlilingkor ed Dios! Tan seguradon ondakel tayo ni, ta kada Memoryal et milyon-milyon so naiimbitaan tayon onatendi. Kanian nibaga tayon say sular na espiritual a templo nen Jehova diad dalin—say uksoyan to parad dugan panagdayew—et napapano na saray “ankabli a bengatla na amin a nasyon.” Niglogloria met so ngaran nen Jehova ed marakdakep ya ugali na saray lingkor to lapud isusulong da so balon personalidad.—Efe. 4:22-24.

13. Anto ni ran propesiya so nasusumpal lapud idarakel na saray lingkor nen Jehova natan? (Nengnengen so litrato ed apis.)

¹³ Lapud idarakel na saray lingkor nen Jehova natan, wala ni ray propesiya ed Biblia ya nasusumpal, singa saramay nabasa ed Isaias kapitulo 60. Oniay ibabaga na bersikulo 22: “Say daiset et magmaliw a sanlibo tan say melag et magmaliw a mabiskeg a nasyon. Siak a mismo, si Jehova, so mamapeles ed saya diad mismon panaon to.” Lapud maples ya ondarakel iray lingkor nen Jehova natan, walay balibalin nagagawa! Saramay ondadagsa ed dugan panagdayew et walay nanduruman talento, dunong, tan abilidad da ya uusaren da pian lalon onlaknab so panagpulong na “maong a balita na Panarian.” Saratan ya dunong tan abilidad da et indeskribe nen Isaias ya singa “gatas na saray nasyon.” (Isa. 60:5, 16) Diad tulong na sarayan mauyamon totoo ya ondadagsa ed organisasyon nen Jehova, nipupulong la so mensahe na Panarian natan ed 240 ya bansa tan makakapawala tayo  ray publikasyon diad masulok ya 1,000 ya lenguahe.

14. Anton seryoson desisyon so nepeg lan gawaen na kada too natan?

¹⁴ Legan ya yeyegyegen nen Jehova iray nasyon diad sayan panaon na anggaan, kaukolan lan mandesisyon iray totoo. Kasin suportaan day Panarian na Dios odino manmatalek irad gobierno na too? Seryoso iyan desisyon ya nepeg ya gawaen na kada sakey. Sikatayo ran Tasi nen Jehova et uunoren tayo ray batas na gobierno, pero agtayon balot mibabali ed politika. (Roma 13:1-7) Kombinsido tayo ya say Panarian na Dios labat so solusyon ed amin ya problema na totoo, tan sayan Panarian et agkabiangan na sayan mundo.—Juan 18:36, 37.

15. Anto ray nabasa ed libro na Apocalipsis ya pakanengnengan ya nasubok so katooran na saray lingkor na Dios?

¹⁵ Nabasa ed libro na Apocalipsis ya nasubok so katooran na saray lingkor na Dios legan na kaunoran iran agew. Kontraen itayo na saray gobierno na sayan mundo tan ompan pairapen da tayo ni ingen lapud agtayo ra labay ya ‘dayewen’ o suportaan. (Apo. 13:12, 15) Oniay gagawaen na saray gobierno: “Papasooten [da] so amin a totoo—abeba man odino atagey so kipapasen da, mayaman man odino pobri, bulos man odino aripen—pian namarkaan iraya diad kawanan a lima ra odino diad moling da.” (Apo. 13:16) Nensaman, saray aripen et walay permanentin tatak o marka ed laman da ya pakabidbiran no siopay akan-aripen ed sikara. Ontan met natan, labay na saray gobierno ya amin ya walad sakop da et walaan na simbolikon marka diad lima o moling da. Labay ton ibaga, napatnagan ed ibabaga o iisipen da ya susuportaan da iray gobierno na sayan mundo.

16. Akin et importantin ipanengneng tayo la natan ya si Jehova so panmamatooran tayo?

¹⁶ Sika ey, kasin ompayag ka ya sakey ka ed saray namarkaan? Kasin gobierno na too so suportaan mo? Amta na saray lingkor na Dios ya no agda awaten itan ya marka, napairap ira tan ompan nipeligro ni ingen so bilay da. Oniay ibabaga na Apocalipsis 13:17: “Anggapo so makapangaliw odino makapanlako nilikud ed samay toon walaan na marka.” Anggaman ontan, amta tayo met ya saramay mangawat na marka et inumen da so “sanok na Dios,” ya singa ibabaga na Apocalipsis 14:9, 10. Kanian imbes ya awaten tayo itan ya marka, say labay tayon akasulat ed simbolikon lima tayo et, “Kayarian nen Jehova.” (Isa. 44:5) Ipanengneng tayo la sirin natan diad amin ya iisipen tan gagawaen tayo ya si Jehova labat so panmamatooran tayo. No ontan so gawaen tayo, seguradon bidbiren itayo nen Jehova ya kayarian to tayo.

17. Antoy nepeg tayon tandaan ed panaanos nen Jehova?

¹⁷ Maan-anos si Aman Jehova tan agto labay ya walay anggan sakey ya naderal. (2 Ped. 3:9) Legan na sayan kaunoran iran agew, iikdan to na pagkakataon ya magbabawi iray totoo tan mandesisyon iran manlingkor ed sikato. Pero walay anggaan na pasensia to. Saramay agda labay so manpasakop ed Panarian to et naalig da imay agawa ed samay Faraon diad panaon nen Moises. Imbaga nen Jehova ed Faraon: “Inyunat ko la komon so limak pian sakitan ta ka tan saray totoom diad panamegley na makapatey a salot, tan naandi ka la komon diad dalin. Balet impansiansia ta kan mabilay lapud saya: pian nipanengneng kod sika so pakayarik tan niyabawag so ngaran ko ed interon dalin.” (Exo. 9:15, 16) On, onsabi so panaon ya bidbiren lanlamang na  amin a nasyon ya si Jehova labat so tuan Dios. (Eze. 38:23) Pero panon iyan nagawa?

18. (a) Anton duman klase na yegyeg so adeskribe ed Aggeo 2:6, 20-22? (b) Panon tayon amta ya nagawa itan ed arapen?

¹⁸ Kalabas na dakdakel ya taon manlapud impanpropesiya nen Aggeo, sinulatan nen apostol Pablo iray Hebreon Kristiano tan impaimano tod sikara ya samay walad Aggeo 2:6, 20-22 et nagawa diad arapen. (Basaen.) Insulat nen Pablo: “Natan et oniay insipan to: ‘Maminsan ni et aliwan say dalin labat so yegyegen ko noag pati say tawen.’ Natan say salitan ‘maminsan ni’ et ontutukoy ed pakaandi na saray bengatlan nayegyeg, saramay agginawa na Dios, pian saramay bengatlan agnayegyeg et mansiansia.” (Heb. 12:26, 27) Sayan simbolikon yegyeg et duma ed samay walad Aggeo 2:7, ta sayan sampot ya yegyeg et manresulta ed permanentin kadederal na saramay agdan talaga labay ya bidbiren so karapatan nen Jehova ya manuley, ya singa agawad Faraon.

19. Antoy agbalot nayegyeg, tan panon tayon amta?

¹⁹ Antoy tutukoyen nen Pablo ya agnayegyeg o agnaderal? Oniay intuloy to: “Awaten tayo so Panarian ya agnayegyeg, [kanian] itultuloy tayo komon ya awaten so agnaparaan a kaabigan, a diad panamegley na satan et abobonan na Dios so sagradon panaglingkor tayo tekep na takot tan respeto.” (Heb. 12:28) Kayari na sampot ya yegyeg, saksakey labat ya gobierno so natilak, say Panarian na Dios. Mansiansia itan ed andi-anggaan!—Sal. 110:5, 6; Dan. 2:44.

20. Antoy duaran pampilian na totoo, tan panon tayo ran natulongan ya mandesisyon?

²⁰ Natan lay panaon pian mandesisyon iray totoo. Duara labat so pampilian da: No itultuloy dan suportaan so gobierno na mundo, naderal ira. Balet no pilien day manlingkor ed si Jehova tan umanen day kabibilay da pian nagawaan day panlabayan to, manbilay ira ed andi-angga. (Heb. 12:25) Baleg so nagagawaan na pampupulong tayo ta natutulongan tayo ray totoo ya mandesisyon. Komon ta dakel nin totoo so natulongan tayon manpasakop ed Panarian na Dios. Lanang tayon nonoten iyan imbaga nen Jesus: “Sayan maong a balita na Panarian et nipulong ed interon dalin bilang pantasi ed amin a nasyon, insan onsabi so anggaan.”—Mat. 24:14.