1. Anto ray pakanengnengan ya say sakey et napantiwalaan?

 SAY too ya napantiwalaan et lanang ton totooren so ibabaga to tan agmantitila. (Sal. 15:4) Amta na totoo ya sikatoy napampiyaan. Kasin ontan so reputasyon mo ed kongregasyon? Antoy gawaen mo pian pantiwalaan ka na saray agagi?

2. Antoy gawaen tayo pian pantiwalaan itayo na arum?

² Agtayo nayarin bagaan o piliten so arum ya dapat iran mantiwala ed sikatayo. Dapat nanengneng da ya talagan napantiwalaan itayo. Say tiwala et singa kuarta—mair-irap mon almoen pero main-inomay ya naandi. Diad interon uniberso, si Jehova so napantiwalaan tayo ta “amin a gagawaen to et napanmatalkan.” (Sal. 33:4) Tan labay to ya aligen tayo itan ya kualidad to. (Efe. 5:1) Pantongtongan tayo natan so pigaran lingkor nen Jehova ya angalig ed sikato tan impanengneng da ya napantiwalaan ira. Aralen tayo met so limaran kualidad ya makatulong pian pantiwalaan itayo na arum.

3-4. Akin et nibagan napantiwalaan si propetan Daniel, tan anto ray itepet tayod sarili tayo?

³ Say sakey ed saray napantiwalaan ya lingkor na Dios et si propetan Daniel. Sikatoy kabataan ni nen inawit ed Babilonia, pero anggan saray aliwan lingkor nen Jehova et walay tiwala dad sikato. Lalon binmaleg so tiwala ed sikato na arum nen diad tulong nen Jehova et impatalos to so kugip nen Nabucodonosor  ya ari na Babilonia. Aminsan ingen, imbaki nen Jehova si Daniel ed sayan ari pian ipaamta ya nadusa lapud inkamapaatagey to. Makpel itan ya ginawa nen Daniel anggano amta to ya sikatoy posiblin ipapatey nen Nabucodonosor, ta kabkabat ya maruksan ari! (Dan. 2:12; 4:20-22, 25) Kalabas na dakel ya taon, impanengneng lamet nen Daniel ya sikatoy napantiwalaan nen makpel ton impatalos so misteryoson mensahe ya akasulat ed padir na palasyo ed Babilonia. (Dan. 5:5, 25-29) Ag-abayag, nen gobierno na Medo-Persia la so pantratrabahoan to, naimano nen Arin Dario tan arum nin opisyal ya si Daniel et talagan marunong, “napanmatalekan tan anggapoy nanengneng ed sikaton panamaulyan odino kaugsan.” (Dan. 6:3, 4) On, anggan saray paganon arari tan opisyal et anengneng da ya napantiwalaan iyan lingkor nen Jehova!

⁴ Legan mon iisipen so alimbawa nen Daniel, maabig no itepet mo iraya ed sarilim: ‘Siak ey, kasin pantitiwalaan ak na anggan saray aliwan Tasi? Kasin kabkabat ak ya napampiyaan tan agak mapaulyan ed trabahok?’ Akin et kaukolan tayon itepet iratan ed sarili tayo? On ta napapagalangan tayoy Aman Jehova no nanenengneng na arum ya napantiwalaan tayo.

5. Akin et imbaga na Biblia ya si Hananias et napanmatalkan?

⁵ Nen 455 B.C.E., nen asumpal lan naapiger so padir na Jerusalem, nananap si Gobernador Nehemias na napantiwalaan iran lalaki ya mangasikaso ed satan ya syudad. Kaiba ed saray pinili to et si Hananias, say pangulo na  Panag-amotan. Ibabaga na Biblia ya si Hananias et “talagan napanmatalkan a laki tan walay takot tod tuan Dios.” (Neh. 7:2) On, inar-aro tan tatakotan nen Hananias si Aman Jehova kanian makulikuli ton sinumpal so responsabilidad to. No inaro tayoy Dios tan walay takot tayod sikato, napampiyaan itayo met ed anggan anton asainmin.

6. Akin et nibagan napanmatalekan so kaaro nen apostol Pablo ya si Tiquico?

⁶ Imanoen met so alimbawa nen Tiquico, ya kaaro nen apostol Pablo. Nen akapriso si Pablo diad rerentaan ton abung, baleg so nitulong ed sikato nen Tiquico, kanian indeskribe to ya “matoor a lingkor.” (Efe. 6:21, 22) Si Tiquico so imbaki nen Pablo ya mangiyakar na sulat to ed saray agagi diad Efeso tan Colosas. Baleg so tiwala to ya pasesegen tan ligliwaen nen Tiquico iray agagi diman. Nanonotan tayo ed alimbawa nen Tiquico iray matoor tan napampiyaan ya brother natan ya mangaasikaso ed espiritual ya pankaukolan tayo.—Col. 4:7-9.

7. Antoy naaralan mo ed saray napantiwalaan ya elder tan ministeryal ya lingkor ed kongregasyon yo?

⁷ Misatsalamat tayo ed saray napantiwalaan ya elder tan ministeryal a lingkor ed kongregasyon tayo. Singa si Daniel, Hananias, tan Tiquico, makulikuli dan susumpalen iray responsabilidad da. Singa bilang, no onatendi tayo ed midweek ya aral, agtayo aburido ya ompan agniyasain so arum ya parte na programa. Tan seguradon makakaliket iray elder no iparaan tayon maong tan mamasya tayo ed parte tayo! Ontan met no weekend ya aral. Agtayo manaalangan ya imbitaan iray Bible study tayo ta segurado tayo ya walan-walay man-public talk. Tan matalek tayo met ya walan-walay usaren tayon literatura diad ministeryo. Misatsalamat tayo ed si Aman Jehova ta wala irayan matoor tan makukulin brother ya mangaasikaso ed sikatayo! Sikatayo balet ey, panon tayon naipanengneng ya napantiwalaan tayo?

8. Anggano labalabay tayon kumustaen iray agagi, akin et importantin balanse tayo? (Proverbio 11:13)

⁸ Inar-aro tayo ray agagi, tan labalabay tayon kumustaen no antoy nagagawad bilay da. Pero kaukolan tayoy magmaliw ya balanse tan agtayo pibabalian so personal ya bilay da. Wala ray Kristiano nen inmunan siglo ya “matsismis ira tan mibabali rad bilay na arum a totoo, ya itotongtong da ray bengatlan agda nepeg ya itongtong.” (1 Tim. 5:13) Agtayo ra labay ya aligen. Balet panon to no walay imbaga ed sika na sakey ya agi tungkol ed bilay to, tan impuppurek to ya agmo itan ibabaga ed arum? Singa bilang, ompan ibaga to ya walay graben sakit to o walay dadalanen ton subok. No imbaga to ya sekreto yo labat iman, agmo iistoryaen ed anggan siopa. * (Basaen so Proverbio 11:13.) Pantongtongan tayo natan iray nanduruman situasyon ya importantin agtayo dapat ibabaga ed arum so personal o kompidensyal iran impormasyon.

9. Panon ya naipanengneng na kada membro na pamilya ya napantiwalaan ira?

⁹ Diad pamilya. Agdapat ilabir na saray membro na pamilya iray personal ya impormasyon ya agla dapat naamtaan na arum. Singa bilang, no walay makapalek ya kagagawa o kalareker na asawan bii, kasin duga ya istoryaen itan na mister to ed arum? Andi. Inar-aro toy asawa to kanian agto labay ya nasakitan tan panelekan na arum ya  too. (Efe. 5:33) Anggan saray ananak et labay da met ya nalikna so respeto, lalo lad saray tinedyer. Kanian atateng, agyo iistoryaen ed arum so lingo na ananak yo. Ta no ontan so gawaen yo, iiyan yo rad kababaingan. (Col. 3:21) Sikayo ran ananak, manalwar kayo met. Agyo iistoryaen iray nagagawa ed abung ya pakaderalan na reputasyon na arum ya membro na pamilya yo. (Deu. 5:16) No manalwar so kada membro na pamilya tan agda ilabir iray personal ya impormasyon ya agla nepeg ya naamtaan na arum, walay aroan tan deen ed loob na pamilya.

10. Antoy aggawaen na tuan kaaro? (Proverbio 17:17)

¹⁰ Diad saray sankakaaro. Wala ray situasyon ya kaukolan tayon walay ondengel ed sikatayo. Kanian mananap tayoy kaaro ya napangibagaan tayoy nalilikna tayo. Diad tua, mairap iya lalo la no agtayo apasal ya ibaga ed arum no antoy nalilikna tayo. Kanian makapadismaya no naamtaan mon inistorya na kaarom ed arum ya too imay imbagam ed sikato. Misatsalamat tayo balet no say kaaro tayo et amta toy mangiyamot na sekreto. Say ontan ya too et “tuan kaaro.”—Basaen so Proverbio 17:17.

11. (a) Antoy gawaen na saray elder tan say asawa ra pian pantiwalaan ira na agagi? (b) Antoy naaralan tayo ed sayan elder ya nan-shepherding kasempet tod abung? (Nengnengen so litrato.)

¹¹ Diad loob na kongregasyon. Ibabaga na Biblia ya saray napantiwalaan ya elder et “singa amotan ed dagem” tan “pansaniban no bagyo.” (Isa. 32:2) Tua itan ta sikaray batikan tayo no walay problema, tan matalek tayo ya agda ibaga ed arum iray kompidensyal ya bengatla. Diad biang tayo met, agtayo pipiliten iray elder ya ibaga ed sikatayo iray kompidensyal ya impormasyon. Baleg so respeto tayo met ed kaasawaan na saray elder ya agda tepet-tepetan so asawa ra pian makala ray sandaraiset ya impormasyon. Diad tua, parad pankaabigan lanlamang na asawa na elder no agto amta iray kompidensyal ya impormasyon tungkol ed saray agagi. Oniay  imbaga na sakey ya asawa na elder: “Misatsalamat ak ed si asawak ta agto iistoryaen ed siak iray ishe-shepherding da tan no siopa ray agagin onkakapuy ed espiritual. Ag-anggan manbitla na ngaran. Diad tua, mas maong lan agko naamtaan iray problema ta anggapo met lanlamang so nagawaan ko. Sakey ni, no katongtong ko ray agagi, agak naiilang ed sikara. Tan no ibagak met ed si asawak so naliliknak o problemak, segurado ak ya agto istoryaen ed arum.” On, labay tayo ya pantiwalaan itayo na arum. Pantongtongan tayo natan so limaran kualidad ya makatulong pian magmaliw tayon napantiwalaan.

12. Akin et mantiwala ed sikatayo so arum no amta ran inaro tayo ra? Mangiter na alimbawa.

¹² Panangaro. Pantiwalaan ka na arum no amta ra ya inarom ira. Imbaga nen Jesus ya say duaran sankaimportantian ya ganggan et say pangaro ed si Jehova tan pangaro ed kaparan too. (Mat. 22:37-39) Diad interon uniberso, si Jehova so manunan napantiwalaan tayo. Inaro tayoy Jehova kanian labay tayon aligen itan ya kualidad to. Singa bilang, no inaro tayo ray agagi, agtayo ibabaga ed arum so sekreto da o personal ya impormasyon tungkol ed bilay da. Ta no ibaga tayo itan ed arum, ompan nabaingan, nasakitan, o napahamak ni ra ingen.—Juan 15:12.

13. Akin et makatulong so inkamapaabeba pian magmaliw tayon napantiwalaan?

¹³ Inkamapaabeba. No mapaabeba tayo, agtayo labay ya papawayen ya singa sikatayoy una-unaan ya nanlapuan na balita o impormasyon pian pabiliben so arum. (Fil. 2:3) Agtayo labay ya ipalikna ed saray agagi ya mas maong tayo nen say sikara ta walay amta tayon impormasyon ya agda amta. No mapaabeba tayo, agtayo met mangikakayat na saray espikulasyon ya anggapoy direktan ibabaga na Biblia tan agnabasa ed saray publikasyon tayo.

14. Panon ya makatulong so pakatalos pian pantiwalaan itayo na arum?

¹⁴ Pakatalos. No say sakey et malaknab so pakatalos to, amta to no kapigan so “panaon na ag-iyesel tan panaon na pansalita.” (Ecl. 3:7) Walay kasabihan ya, “Speech is silver, silence is gold.” Labay ton ibaga, wala ray panaon ya mas maabig lay ag-onesel nen say mansalita. Duga imay bilin na Proverbio 11:12: “Say toon walaan na suston pakatalos et marendeen labat.” Imanoen so alimbawa na abaybayag lan elder ya mabetbet ya kekerewan na tulong na arum ya kongregasyon no walay mairap ya problema ra. Oniay kuan na kapara ton elder: “Maal-alwar ira, agdan balot iistoryaen ed sikami iray kompidensyal ya impormasyon tungkol ed arum ya kongregasyon.” Lapud napampiyaan iyan elder, baleg so respeto ed sikato na saray kaiba ton elder ed kongregasyon da. Segurado ira ya agto ibaga o istoryaen ed arum iray kompidensyal ya impormasyon ed kongregasyon.

15. Akin et pantiwalaan itayo na arum no matua tayo? Mangiter na alimbawa.

¹⁵ Inkamatua. Baleg so tiwala tayo ed toon matua ta amta tayo ya agto tayo tilaan o larog-larogan. (Efe. 4:25; Heb. 13:18) Singa bilang, labay mon man-improve ka ed paraan na panagbangat mo. Kanian imbagam ed sakey ya agi ya imanoen ton maong so part mo ed aral, insan mangiter na suggestion no anto ni ray papaaligwasen mo. Siopay pilien mo ya mangobserba ed sika? Kasin samay say ibaga to labat et no antoy labay mon narengel, o amay ibaga to no anton talagay tua? Siempre amay komadua. Oniay ibabaga na Biblia:  “Mas maong ni parungtalan a panametek nen say akaamot a panangaro. Saray sugat a ginawa na sakey a kaaro et katooran.” (Pro. 27:5, 6) Ompan walay ibaga na kaaro tayo ya diad unaan et mairap ya awaten pero parad pankaabigan tayo lanlamang.

16. Base ed Proverbio 10:19, akin et importante so kontrol ed sarili?

¹⁶ Kontrol ed sarili. No labay tayon pantiwalaan itayo na arum, dapat kontrolen tayoy dila tayo, lalo la no natutukso tayon ibaga ed arum iray agda nepeg ya naamtaan. (Basaen so Proverbio 10:19.) Nasubok so kontrol tayod sarili diad panguusar tayoy social media. No agtayo manalwar, ompan walay nai-post, nai-send o nai-comment tayo ya kompidensyal manaya. No naamtaan la itan na arum, agmo la nababawi. Ompan ipasa da met itan kanian posiblin manresulta itan ed problema. Importante met ya kontrolen tayoy dila tayo no piliten itayo na saray onsusumpa ya mangibaga na saray impormasyon ya mangipeligro ed bilay na agagi tayo. Posiblin nagawa iya ed saray lugar ya ibabawal na gobierno so kimey tayo. Ompan imbestigaan o tepet-tepetan itayo na saray pulis ta labay dan naamtaan no iner so kawalaan na saray agagi tayo. Diad ontan ya situasyon tan ed arum ni, iyaplika tayo imay prinsipyo na Biblia ya “balungosan” o alwaran tayoy sangi tayo. (Sal. 39:1) Importante ya napantiwalaan itayo na amin—saray kapamilya, kakaaro, agagi, tan anggan saray aliwan Tasi. Pian pantiwalaan da tayo, dapat walay kontrol tayod sarili tayo.

17. Antoy gawaen tayo pian pantiwalaan tayo na saray agagi tan pantiwalaan da tayo met?

¹⁷ Misatsalamat tayod si Jehova ta inyasingger to tayo ed organisasyon to ya bubuoen na saray maar-aro tan napantiwalaan ya totoo. Gawaen tayo sirin so anggaay nayarian tayon ipanengneng so panangaro, inkamapaabeba, pakatalos, inkamatua, tan kontrol ed sarili pian pantiwalaan itayo na saray agagi. Responsabilidad tayo itan. No ontan so gawaen tayo, walay nitutulong tayo pian walay tiwala ed sakey tan sakey diad loob na kongregasyon. Manalwar tayon lanang pian agnaderal so tiwala na arum ed sikatayo. Komon ta tuloytuloy tayon aligen si Jehova ya Dios tan ipanengneng tayo ya napantiwalaan itayo.