AARALEN YA ARTIKULO 39
Kasin Akasulat so Ngaran Mo ed “Libro na Bilay”?
“Sakey a libro na pakanodnonotan so nisulat diad arapan to parad saramay ontatakot ed si Jehova.”—MAL. 3:16.
KANSION 61 Onla Kayo Iran Tasi!
DIAD SAYAN ARTIKULO *
Diad inlabas na panaon, naaruman lan naaruman iray ngaran ya isusulat nen Jehova ed “libro na bilay” (Nengnengen so parapo 1-2)
1. Base ed Malaquias 3:16, anton libro so susulatan nen Jehova, tan antoy isusulat to ditan?
DIAD apalabas ya nilibo lan taon, walay espisyal ya libro nen Jehova ya pangisusulatan toy ngaran na saray matoor ya tasi to. Say sankaunaan ya akasulat ditan et say ngaran nen Abel. * (Luc. 11:50, 51) Diad inlabas na panaon, naaruman lan naaruman iray ngaran ya akasulat ed satan ya libro, tan natan et minilyon lan ngaran so akasulat ditan. Diad Biblia, tinawag itan ya “libro na pakanodnonotan,” “libro na bilay,” tan “lukot na bilay.” Diad sayan artikulo, usaren tayo so terminon “libro na bilay.”—Basaen so Malaquias 3:16; Apo. 3:5; 17:8.
2. Siopa ray akasulat so ngaran da ed libro na bilay, tan antoy gawaen tayo pian nisulat met ed satan so ngaran tayo?
2 Walad sayan espisyal ya libro so ngaran na saramay mandadayew, ontatakot, tan manrerespeto ed si Jehova tan mangaaro ed ngaran to. Ikdan to ra na tsansan manbilay na andi-anggaan. No ar-aroen tayoy Aman Jehova tan ipanengneng tayoy pananisia ed dondon bagat na Anak to, si Jesu-Kristo, isulat to met so ngaran tayo ed satan ya libro. (Juan 3:16, 36) Siempre, labay tayon akasulat ed satan ya libro so ngaran tayo, balanglan say ilalo tayo et manbilay ed tawen o diad dalin.
3-4. (a) No akasulat la natan so ngaran tayo ed libro na bilay, kasin segurado la ya manbilay tayoy andi-anggaan? Ipaliwawa. (b) Antoy pantongtongan tayod sayan artikulo tan diad onsublay?
3 Kasin segurado lan manbilay na andi-anggaan so amin ya akasulat so ngaran da ed libro na bilay? Naamtaan tayoy ebat diad sayan imbaga nen Jehova ed si Moises ya nabasa ed Exodo 32:33: “Siopaman a nankasalanan ed siak, ekalen koy ngaran tod librok.” Kanian saray ngaran ya akasulat natan ed satan ya libro et nayari nin ekalen o “buralen.” (Apo. 3:5) Singa panamegley na lapis ni labat so inusar nen Jehova diad impangisulat tod saray ngaran. Kaukolan tayon seguradoen sirin ya mansiansia so ngaran tayo ed satan ya libro, ya anggad isulat la itan nen Jehova panamegley na tinta. Labay ton ibaga, permanente la.
4 Pero ompan wala ray tepet tayo. Singa bilang, siopa ray ibabaga na Biblia ya nisulat so ngaran da ed libro na bilay, tan siopa ray agnisulat so ngaran da ditan? Kapigan ikdan nen Jehova na bilay ya andi-anggaan iramay akasulat so ngaran da ed libro na bilay? Panon to balet iramay inatey ya agnaikdan na tsansa ya nakabat si Jehova? Posible ni kasi ya nisulat so ngaran da ed libro na bilay? Naebatan iratan ed sayan artikulo tan diad onsublay.
SIOPA RAY AKASULAT SO NGARAN DA ED LIBRO NA BILAY?
5-6. (a) Base ed Filipos 4:3, siopa ray akasulat la so ngaran da ed libro na bilay? (b) Kapigan ya permanentin nisulat so ngaran da ed libro na bilay?
5 Siopa ray akasulat so ngaran da ed libro na bilay? Pian naebatan itan ya tepet, pantongtongan tayo so limaran grupo na totoo. Say arum ed sikara et akasulat so ngaran da ed libro na bilay, say arum balet et andi.
6 Say unonan grupo et saramay apili ya nakaiba nen Jesus ya manuley ed tawen. Kasin akasulat la natan so ngaran da ed libro na bilay? On. Nen sinulatan nen apostol Pablo iray “kakimeyan” tod Filipos, imbaga to ya “say kangaranan [na saray alanaan]” ya naimbitaan ya manuley ed tawen ya kaiba nen Jesus et wala lad libro na bilay. (Basaen so Filipos 4:3.) Pero pian agnabural so ngaran da, kaukolan ya mansiansia ran matoor. Diad unor ya pantatak ed sikara, permanente lan nisulat so ngaran da ed libro na bilay. (Apo. 7:3) Nagawa itan balanglan antis na ipatey da odino antis ya onggapo so baleg a kairapan.
7. Base ed Apocalipsis 7:16, 17, kapigan permanentin nisulat ed libro na bilay so ngaran na saray kabiangan na baleg ya ulop?
7 Say komaduan grupo et say baleg ya ulop na arum a karnero. Kasin akasulat la natan so ngaran da ed libro na bilay? On. Kasin mansiansia so ngaran da ed libro na bilay kayari na Armagedon? On. (Apo. 7:14) Imbaga nen Jesus ya ‘awaten da so bilay ya andi-anggaan.’ (Mat. 25:46) Pero anggano akaliktar irad Armagedon, agni ran tampol naikdan na bilay ya andi-anggaan. Say ngaran da et singa ni labat nisulat panamegley na lapis. Legan na Sanlibon Taon ya Uley na Panarian, si Jesus so “manpastol ed sikara tan itonton to ra diad saray subol na danum na bilay.” Saramay ontumbok ed panangigiya nen Kristo tan napatunayan ya matoor ed si Jehova diad unor ya subok et permanente lan nisulat so ngaran da ed libro na bilay.—Basaen so Apocalipsis 7:16, 17.
8. Siopa ray ag-akasulat so ngaran da ed libro na bilay, tan antoy pansumpalan da?
8 Say komatlon grupo et saray kanding—saray naderal diad Armagedon. Ag-akasulat so ngaran da ed libro na bilay. Imbaga nen Jesus ya “ompatey [ira] ed andi-anggaan.” (Mat. 25:46) Insulat met nen Pablo ya “sikaray naukom tan say dusa ra et andi-anggaan a kadederal.” (2 Tes. 1:9; 2 Ped. 2:9) Ontan met so pansumpalan na amin ya ginagala day mankasalanan sumpad masanton espiritu. Andi-anggaan ya kadederal met so pansumpalan da, kanian agla ran balot napaoli. (Mat. 12:32; Mar. 3:28, 29; Heb. 6:4-6) Pantongtongan tayo natan so duaran grupo na totoo ya napaoli diad dalin.
SIOPA RAY NAPAOLI?
9. Base ed Gawa 24:15, anton duaran grupo na totoo so napaoli diad dalin, tan antoy pandumaan da?
9 Nabasa ed Biblia ya walay duaran grupo na totoo ya napaoli, “saray matunong” tan “saray agmatunong.” (Basaen so Gawa 24:15.) Walay ilalo ran manbilay na andi-anggaan diad dalin. “Saray matunong” et saramay matoor ya nanlingkor ed si Jehova nen mabilay ni ra. Balet “saray agmatunong” et saramay ag-akapanlingkor ed si Jehova antis iran inatey. Ontan so impanawag ed sikara ta aliwan matunong so impanbilay da. Lapud napaoli iyan duaran grupo, labay to kasin ibaga et akasulat so ngaran da ed libro na bilay? Pian naebatan itan ya tepet, pantongtongan tayoy ibabaga na Biblia tungkol ed sayan duaran grupo.
10. Akin et paolien ‘iray matunong,’ tan anton pribilehyo so niiter ed arum ed sikara? (Nengnengen met ed sayan isyu so “Tepetepet na Saray Manbabasa” tungkol ed kioli diad dalin.)
10 Say komapat ya grupo et “saray matunong.” Antis iran ompatey, akasulat lay ngaran da ed libro na bilay. Kasin binural itan nen Jehova nen inatey ira? Andi, ta diad memorya to et siansia nin “mabilay” ira. Si Jehova et “Dios na saray mabilay, aliwan saray inaatey, lapud parad sikato et mabilay iran amin.” (Luc. 20:38) Labay ton ibaga, no napaoli ed dalin iray matunong, akasulat nin siansia ed libro na bilay so ngaran da, pero aliwa nin permanente. (Luc. 14:14) Say arum ed sikara et naikdan na pribilehyon manlingkor bilang “priprinsipe ed interon dalin.”—Sal. 45:16.
11. Antoy dapat naaralan na “saray agmatunong” ta pian nisulat so ngaran da ed libro na bilay?
11 Say komaliman grupo et “saray agmatunong.” Nayarin agda amta iray ganggan nen Jehova kanian aliwan matunong so impanbilay da. Lapud satan, ag-akasulat so ngaran da ed libro na bilay. Pero paolien ira na Dios pian naikdan ira na tsansa ya nisulat so ngaran da ed satan ya libro. Siempre, kaukolan day tulong ta ompan say arum ed sikara et datin mauges so kagagawa ra. Kaukolan iran ibangat no panon so pambilay base ed saray matunong ya estandarte nen Jehova. Pian nagawa itan, idaulo na Panarian na Dios so pambangat ed saray agmatunong diad interon mundo.
12. (a) Siopay mangibangat ed saray agmatunong? (b) Antoy nagawa ed saramay agda iyaplikay naaralan da?
12 Siopay mangibangat ed saray agmatunong? Say baleg ya ulop ya makaliktar ed Armagedon tan saray matunong ya napaoli ed balon mundo. Pian naisulat ed libro na bilay so ngaran na saray agmatunong, kaukolan dan aroen si Jehova tan idedika day sarili da ed sikato. Subaybayan nen Jesu-Kristo tan saray kaiba ton manuley so iyaligwas na amin ya agmatunong. (Apo. 20:4) Siopaman ya agmangiyaplika ed naaralan to et agla naabuloyan ya manbilay, anggano 100 lay taon to. (Isa. 65:20) Makabasa na puso si Jehova tan Jesus tan agda abuloyan ya walay siopaman ya manggaway mauges o manderal ed balon mundo.—Isa. 11:9; 60:18; 65:25; Juan 2:25.
“NAPAOLI PIAN MANBILAY” TAN “NAPAOLI PIAN NAUKOM”
13-14. (a) Nensaman, antoy pakatalos tayo ed samay imbaga nen Jesus diad Juan 5:29? (b) No imanoen tayon maong iray salitan inusar nen Jesus, antoy mas malinew ya eksplinasyon ed sayan teksto?
13 Wala met so imbaga nen Jesus tungkol ed saray napaoli diad dalin. Kuan to: “Onsabi so oras a saray amin a walad pakanodnonotan iran lubok et narengel day boses to tan ompaway ira, saramay nanggaway maong et napaoli pian manbilay, tan saramay nanggaway mauges et napaoli pian naukom.” (Juan 5:28, 29) Antoy labay ya ibaga nen Jesus?
14 Nensaman, say amta tayon tutukoyen nen Jesus ed sayan teksto et saray gawaen na saray napaoli kayari na kioli ra, say arum et manggaway maong tan say arum et manggaway mauges. Pero, imanoen ya ag-imbaga nen Jesus ya saramay napaoli et manggawa ni ra labat na maong o manggawa ni ra labat na mauges. Imbes, say imbaga to ya napaoli et saramay “nanggaway maong” tan saramay “nanggaway mauges.” Kanian say tutukoyen to et say impanbilay o saray ginawgawa ra antis na impatey da. Mas malinew itan ya eksplinasyon, anto? Ta diad balon mundo, anggapo lay naabuloyan ya manggawa na mauges. Kanian saramay abitla dia ya agmatunong et nanggawa ray mauges antis na impatey da. No ontan sirin, antoy labay ya ibaga nen Jesus nen imbaga ton wala ray “napaoli pian manbilay” tan wala ray “napaoli pian naukom”?
15. Siopa ray “napaoli pian manbilay,” tan akin?
15 Saray matunong odino saramay nanggaway maong antis na impatey da et “napaoli pian manbilay” lapud akasulat lay ngaran da ed libro na bilay. Labay ton ibaga, saramay napaoli ya “nanggaway maong” ya abitlad Juan 5:29 et pareho ed “saray matunong” ya abitlad Gawa 24:15. Sayan eksplinasyon et suportaan na samay nabasad Roma 6:7: “Say sakey ya inatey la et nibulos [o aperdona] la ed kasalanan to.” Nen inatey irayan matunong, nilingwanan tan pinerdona la nen Jehova iray kasalanan da, pero agto nilingwanay katooran da. (Heb. 6:10) Pero siempre, kayari na kioli da, kaukolan da nin siansiay manmatoor pian agnaekal so ngaran da ed libro na bilay.
16. Siopa ray “napaoli pian naukom,” tan diad anton pantalos ya “naukom” ira?
16 Panon to balet iramay nanggaway mauges antis na impatey da? Tua ya aperdona met so kasalanan da nen inatey ira. Balet lapud ag-ira nanlingkor ed si Jehova, ag-akasulat so ngaran da ed libro na bilay. Kanian saramay napaoli ya “nanggaway mauges” ya abitlad Juan 5:29 et pareho ed “saray agmatunong” ya abitla ed Gawa 24:15. Sikaray “napaoli pian naukom.” * Labay ton ibaga, obserbaan ni ra nen Jesus. (Luc. 22:30) Kaukolan nin palabasen so panaon pian nanengneng no kasin karapat-dapat ya nisulat so ngaran da ed libro na bilay. Isulat nen Jehova so ngaran da no nanengneng ed kabibilay da ya talagan anguman la ra tan idedika ray sarili da ed sikato.
17-18. Antoy nepeg ya gawaen na amin ya napaoli ed dalin, tan antoy labay ya ibaga na samay abitla ed Apocalipsis 20:12, 13 ya naukom ira “unong ed saray gawa ra”?
17 Amin ya napaoli—balanglan matunong odino agmatunong—et nepeg dan unoren iray ganggan ya akasulat ed saray balon lukot ya nalukasan legan na Sanlibon Taon. Oniay imbaga nen apostol Juan ya anengneng to ed pasingawey: “Anengneng ko ray inaatey, saray ordinaryo tan saray prominente, ya akaalagey ed arap na trono, tan wala ray alukasan a lukot. Balet wala ni sananey a lukot ya alukasan; satan so lukot na bilay. Diad panamegley na saray akasulat ed saray lukot, saray inaatey et inukom unong ed saray gawa ra.”—Apo. 20:12, 13.
18 Antoy labay ya ibaga na samay abitla ditan ya naukom iray napaoli “unong ed saray gawa ra”? Kasin ontutukoy itan ed saray ginawa ra antis na impatey da? Andi! Tandaan ya aperdona la iray kasalanan da nen inatey ira. Kanian ag-itan ontutukoy ed saray ginawgawa ra nensaman. Imbes, ontutukoy itan ed no kasin iyaplika da iray naaralan da diad balon mundo. Anggan saray matoor ya lalakin singa si Noe, Samuel, David, tan Daniel et kaukolan dan aralen so tungkol ed si Jesu-Kristo tan kaukolan dan ipanengneng so pananisia ra ed dondon. No sarayan matoor ya lalaki et kaukolan dan pansagpotan ya gawaen itan, di mas lalo la ed saray agmatunong!
19. Antoy nagawad sakey no sayangen toy balibalin tsansa ya iter nen Jehova?
19 Antoy nagawad sakey ya too no sayangen toy balibalin tsansa ya iter nen Jehova? Oniay ibabaga na Apocalipsis 20:15: “Siopaman ya ag-akasulat ed libro na bilay et imbantak ed dayat na apoy.” On, andi-anggaan ya kadederal so pansumpalan na saramay ag-onunor ed si Jehova. Importante sirin ya seguradoen tayon akasulat so ngaran tayo ed libro na bilay tan magmaliw ya permanente itan!
Walay nagawan kimey ya panagbangat diad interon dalin legan na Sanlibon Taon ya Uley nen Kristo (Nengnengen so parapo 20)
20. Anton eksayting ya kimey so nagawa legan na Sanlibon Taon ya Uley nen Kristo? (Nengnengen so litrato ed apis.)
20 Talagan eksayting iray nagawa diad Sanlibon Taon ya Uley nen Kristo! Walay nagawan kimey ya panagbangat diad interon dalin, tan obserbaan no kasin iyaplika na saray matunong tan agmatunong iray naaralan da. (Isa. 26:9; Gawa 17:31) Panon itan ya nagawa? Atan so pantongtongan tayo diad onsublay ya artikulo.
KANSION 147 Insipan so Andi-anggaan a Bilay
^ Aralen tayod sayan artikulo so pananguman ed pakatalos tayo tungkol ed samay imbaga nen Jesus ya nabasa ed Juan 5:28, 29 ya wala ray “napaoli pian manbilay” tan wala ray “napaoli pian naukom.” Amtaen tayo no antoy tutukoyen na sayan duaran kioli tan no siopay kaiba ed saratan.
^ Inggapo nen Jehova ya sulatan iyan libro “manlapu lad inkiletneg na mundo,” ya ontutukoy ed saray totoo ya karapat-dapat ya dondonen nen Jesus. (Mat. 25:34; Apo. 17:8) Kanian mapatnag ya say ngaran nen Abel so sankaunaan ya akasulat ed libro na bilay.
^ Nensaman, say pakatalos tayod samay abitla ed Juan 5:29 ya “naukom” et mankabaliksan na nasentensiaan. Diad tua, nayarin ontan met so kabaliksan na salitan “naukom.” Balet nen inusar itan nen Jesus, mapatnag ya say tutukoyen to et say pan-obserba ed sakey ya too. Ibabaga met na sakey ya Bible dictionary ya ontutukoy itan ed pan-eksamin o “pan-usisa ed ugali tan kagagawa na sakey.”
