Nen 1940’s, nampaiyaral na Biblia iray atateng ko ed saray Tasi nen Jehova. Anggano akatunda ra ed study da, mangaawat nin siansia si nanay ko na magasin ya Watchtower tan Awake! Nen 1950, walay internasyonal a kombension na saray Tasi diad New York, tan inmatendi kamin pamilya.

Ag-abayag kayari na kombension, mabetbet lan oonlad abung mi si Brother Lawrence Jeffries. Sikara so tinmulong ed siak pian naamtaan koy katuaan. Diad gapo, kukuestionen ko ra no akin ya agmansusundalo iray Tasi tan ag-ira mibabali ed politika. Imbagak ya no amin ya taga Amerika et agda labay so miguerra, di matmainomay lan nasakop na saray kalaban so interon bansa. Pero oniay balibalin ebat nen Brother Jeffries: “Isip mo pa, no amin ya totoo ed Amerika et manlilingkor ed si Jehova, anto kasi gawaen to no atakien ira na kalaban?” Agko nalingwanan iman ya imbaga ra, pati saray ebat da ed arum nin tepet ko, kanian nagmaliw ak ya mas interesado ed Biblia.

Binasak iray daan ya Watchtower tan Awake! ya insinop nen nanay ko diad basement mi. A-realize ko ya nalmok lay katuaan, kanian pinmayag ak ya manpa-Bible study ed si Brother Jeffries. Lanang ak met lan mimiaral. Naar-arok ya maong so katuaan, kanian nandesisyon ak ya magmaliw ya publisher pian makapila ak lan manpulong. Anguman so planok ed bilay nen atalosan ko may ibabaga na Biblia ya “asingger lay baleg ya agew nen Jehova.” (Sof. 1:14) No dati et pangarap koy man-kolehyo, natan et labay ko lan usaren so bilay ko diad itulong ed arum pian naamtaan da met so katuaan.

Nan-graduate ak ed high school nen Hunyo 13, 1956, tan kayari taloran agew, abautismoan  ak diad sirkiton asemblea. Manlapu lad saman, amayamay so bendisyon nen Jehova ed siak lapud inusar koy bilay ko diad panaral tan pambangat tungkol ed sikato.

Anem bulan kayari bautismok, nan-regular payunir ak. Diad samay Disyembre 1956 ya Kingdom Ministry, apaisip ak ed artikulon “Can You Serve Where the Need Is Great?” Parad siak iya! Sarasarag tan labalabay koy manboluntaryo ed lugar ya agni masyadon napupulongan.—Mat. 24:14.

Kanian inmalis ak ed kongregasyon diad Edgefield, South Carolina. Apatpatira labat so publisher, kanian siak so komalima. Diad abung na sakey ya agi so panaaralan na kongregasyon mi. Kada bulan, 100 ya oras so uusaren kod panagpulong. Busy ak ya maong ed pangidadaulo na panagpulong tan panagparaan na paliwawa. Pero ayos labat ta mas nakakabat koy Jehova.

Walay study’k ya bii ya walay punerarya to diad Johnston, manga pigaran kilometro so kaarawi tod Edgefield. Maomaong ira. Inikdan da ak na part-time ya trabaho, tan impausar da met so melag ya bilding da bilang Kingdom Hall.

Ag-abayag, nagmaliw ya partner kod panagpayunir si Brother Jolly, anak nen Brother Lawrence Jeffries, amay nan-study ed siak. Manaayam si Jolly ed Brooklyn, New York pero nandesisyon ya manboluntaryo met ed Edgefield. Say nanayaman mi et melag ya trailer ya impabayes na sakey ya brother.

Melmelag so sueldo diad South Carolina, manga duara anggad taloran dolyar labat so sueldo mid sanagew. Aminsan, naupot lay kuartak ta insaliw koy naakan diad grocery. Kapaway ko, walay laki ya inmasingger ed siak tan tinepetan to ak: “Labay moy trabaho? Sakey dolyar kada oras so sueldo.” Taloy agew to ak ya pinanlinis na construction site. Alikas ko ya labay nen Aman Jehova ya mansiansia ak ed Edgefield. Anggano melmelag so sueldok, akaatendi ak nin siansia ed internasyonal a kombension diad New York nen 1958.

Diad komaduan agew na kombension, walay espisyal ya agawa. Akabat koy Ruby Wadlington ya payunir met diad Gallatin, Tennessee. Parehoy goal mi—labay min dua so man-missionary. Kanian diad saman ya kombension et inmatendi kami ed miting parad saramay labay day man-Gilead. Intuloy mi komunikasyon mi panamegley na sulat. Nen naimbitaan ak ya man-public talk ed Gallatin, sinambot ko iman ya tsansa ya man-propose ed sikato. Inmalis ak ed kongregasyon nen Ruby, tan nankasal kami nen 1959.

Wala ak ed Gallatin nen 23 so edad ko tan aturo ak bilang congregation servant (say tawag la natan et coordinator na ulop na mamatatken). Say kongregasyon mi so sankaunaan ya binisita nen Brother Charles Thompson nen nagmaliw iran circuit overseer. Dakel lay eksperiensya ra,  pero tinepetan da ak nin siansia no anto ray kaukolan na agagi, tan no antoy gagawaen na arum ya circuit overseer pian naasikaso iray kongregasyon. Naaralan kod sikara ya talagan maabig so mantepet ed arum tan amtaen ni so amin ya detalye antis ya mandesisyon.

Nen Mayo 1964, naimbitaan ak ya manaral ed Kingdom Ministry School diad South Lansing, New York ed loob na sakey simba. Akaaral ak ya maong ed panagbangat tan alimbawa na saray instructor mi, kanian apaseseg ak ya mas kabaten tan mas onapit ni ed si Jehova.

Nen Enero 1965, naimbitaan kami nen Ruby ya manlingkor ed kimey diad sirkito. Niyasain kami ed sirkito ya sakop toy Knoxville, Tennessee, ya anggad asingger ed Richmond, Virginia. Kaiba met iray kongregasyon diad North Carolina, Kentucky, tan West Virginia. Say bibisitaen ko labat et saray kongregasyon ya andeket iray agagi, ta diad saman et bawal ya maniba iray andeket tan amputi diad bandad south na Amerika. Mairap so bilay na agagi diman, kanian no antoy walad sikami, inanabang mid sikara. Oniay advice ed siak na sakey ya abayag lan circuit overseer: “No ombisita kad kongregasyon, agmo ipapalikna ed agagi ya boss da ka. Natulongan mo labat ira no nalilikna da ya agi da ka.”

Nen binisita mi so sakey ya melag ya kongregasyon, walay naigapon iyaralan nen Ruby ya tinedyer ya bii ya wala lay sakey taon ya baby to. Nen anggapoy available ya man-study ed sikato, si Ruby so angiyaral panamegley na sulat. Diad sinmublay ya imbisita mi, inatendian ton amin so aral. Nen wala lay duaran espisyal payunir ed saman ya kongregasyon, sikara la so angiyaral ed sikato, tan ag-abayag et nampabautismo. Kalabas na 30 ya taon, nen 1995, walay sakey ya bii diad Patterson Bethel ya inkabat toy sarili to ed si Ruby. Imbaga to ya sikato imay anak na tinedyer ya Bible study nen Ruby nensaman, tan kaiba toy asawa to ya manaral diad koma-100 ya klase na Gilead School.

Say komaduan asainmin mi et diad sirkito ya sakop toy central Florida. Kaukolan mi lay luganan kanian angaliw kami na kotse. Mamura so impangaliw mi, pero sakey simba ni labat, aderal so water pump to. Anggapoy kuarta mid saman ya pampaapiger mi. Tinawagan koy sakey a brother tan imbagak ya aderal so luganan mi. Angibaki na mekaniko to ya mangapiger tan imbaga ton anggapoy bayaran mi. Say kuan to, “Agka mapaga, abayaran la.” Inikdan to kami ni ingen na kuarta! Apaneknekan mi ya talagan agmamapaulyan si Jehova. Naaralan mi met so magmaliw ya maiter.

No ombibisita kami ed saray kongregasyon, diad abung na agagi so pampupundoan mi. Kanian dakdakel so akaaro mi. Aminsan, kabkabuasan kon ginapoan ya i-type so congregation report pero intilak ko ni ed typewriter. Kasempet kod saman ya labi, naamtaan ko ya amay anak na agi ya pampupundoan mi ya taloy taon to ni labat et “intuloy” to manayan in-type may report ya gagawaen ko. Agko man nalingwanan, tan kada no nanengneng ko man ya ugaw, ipapanonot kod sikato man ya ginawa to.

Nen 1971, akaawat ak na sulat tan niyasain ak ya district overseer diad New York. Abigbigla kami! Diad saman et 34 ko ni labat. Siak so sankaunaan ya andeket ya district overseer diman, tan maar-aro kamin in-welcome na agagi.

Bilang district overseer, labalabay kon ipaliwawa so tungkol ed si Jehova kada weekend diad sirkiton asemblea. Diad satan ya distrito, mas eksperiensyado so maslak ya circuit overseer nen say siak. Diad tua, amay sakey ed sikara so nampaliwawa nen abautismoan ak. Say sakey et si Brother Theodore Jaracz, ya nagmaliw a membro na Mananguley ya Ulop. Dakel met ed saray bibisitaen ko et Bethelite ed Brooklyn. Misatsalamat ak ta maomaong tan makaaro irayan circuit overseer tan Bethelite kanian agak natatakot. Anengneng ko ya maar-aro iran pastol, lanang iran onkokonsulta ed Biblia, tan matoor irad organisasyon. Mapaabeba ira, kanian agak nairapan ed asainmin ko bilang district overseer.

Nen 1974, duman grupo la na circuit overseer so inyasain na Mananguley ya Ulop diad kimey ed distrito. Kanian niyasain ak lamet bilang circuit overseer, tan imbaki da kami diad South Carolina. Malikeliket kamid saman ta nayari lan maniba diad kongregasyon tan sirkito iray andeket tan amputin agagi.

Nen 1976, niyasain kami ed sirkito diad Georgia, ya walad pegley na Atlanta tan Columbus. Agkon balot nalingwanan imay nan-funeral talk ak ed tulor na limaran andeket ya ugugaw ya inatey nen walay nampool ed abung da. Imbatik met ed ospital so nanay da lapud injury. Dakdakel ya agagin andeket tan amputi so binmisita ed ospital pian ligliwaen iray atateng. Pandinayewan koy panangaro na agagi. Anengneng ko ya no nalikna tayoy ontan ya panangaro, nasarag tayoy anggan anton subok.

Nen 1977, tinawag da kamid Bethel parad project ya gawaen labat na pigaran bulan. Nen magano la itan ya nasumpal, kinatongtong ak na duaran membro na Mananguley ya Ulop. Tinepet da no labay mi nen Ruby ya permanente kami lan manlingkor ed Bethel. Inawat mi itan ya asainmin.

Niyasain ak ed Service Department diad loob na 24 ya taon. Saray brother ed sayan department so ontutulong ya manresolbe ed saray mairap tan komplikado iran tepet tan problema. Diad inlabas na taon, angitarya so Mananguley ya Ulop na saray guidelines tan training materials ya akabase ed saray prinsipyo na Biblia. Makakatulong itan ed Service Department diad pan-ebat da ed saray tepet, tan diad pangipasal ed saray circuit overseer, elder, tan payunir. Dakel so inmaligwas ed espiritual lapud satan, tan lalon binmiskeg so organisasyon nen Jehova.

Manlapu nen 1995 anggad 2018, niyasain ak bilang headquarters representative, ya say datin tawag et zone overseer. Bibisitaen ko ray nanduruman branch pian pasesegen iray membro na Branch Committee, Bethelite, tan saray missionary. Aamtaen ko met iray aarapen dan subok tan problema pian natulongan ira. Pero diad tua, napapaseseg kami met nen Ruby ed saray eksperiensya ra. Singa bilang, nen binisita mi so branch diad Rwanda nen taon 2000, a-touch kamin maong ed istorya na saray agagi tan say pamilyan Bethel no panon dan alampasan imay agawan pateyan na saray tribu diad Rwanda nen 1994. Dakel ed sikara so inateyan na kapamilya tan kakaaro. Anggano onman so dinalan da, mabisbiskeg so pananisia ra, malinlinew ed nonot da so ilalo ed arapen, tan malikeliket iran manlilingkor.

Masulok lan 80 so edad mi natan. Diad apalabas ya 20 ya taon, nanlingkor ak bilang membro na United States Branch Committee. Anggano aga ak akapan-kolehyo, inter ed siak nen Jehova tan say organisasyon to so sankatageyan ya klase na edukasyon. Lapud satan, nagmaliw ak ya kualipikado ya ibangat met ed arum so katuaan ed Biblia, say katuaan ya mangiter ed sikara na andi-anggaan ya bilay. (2 Cor. 3:5; 2 Tim. 2:2) Talagan uumanen na Biblia so bilay na totoo, tan atan so mangiyaapit ed sikara ed Amalsa. (Sant. 4:8) Kanian sikami nen Ruby, lanang min papasesegen so arum ya kabaten da nin maong si Jehova tan ibangat da iray katuaan ed Biblia. Atan so sankabalegan ya pribilehyo tayo!