1. Akin ya saray totoo et mairap da lay mantiwala ed arum?

 SARAY totoo natan ed sayan mundo et mairap da lay mantiwala ed arum. Seguro, asali da lay aloko tan asaol na saray negosyante, nanenengneng day kurapsion ed gobierno, tan nababalitaan day mauges ya gagawaen na saray lider na relihyon. Ngalngali anggapo met lay tiwala rad kakaaro, kakaabay, tan anggan ed mismon kapamilya ra. Agtayo la itan pankelawan ta oniay impasakbay na Biblia: “Diad kaunoran iran agew . . . , saray totoo et . . . aliwa ran matoor, . . . managpauges ira, . . . traidor ira.” Aaligen day agnapantiwalaan ya dios na sayan mundo, si Satanas.—2 Tim. 3:1-4; 2 Cor. 4:4.

2. (a) Siopa ray pantitiwalaan tayo? (b) Antoy iisipen na arum?

² Pero sikatayo ran Kristiano, baleg so tiwala tayod si Aman Jehova. (Jer. 17:7, 8) Kombinsido tayo ya talagan inar-aro to tayo tan ‘agton balot taynan’ iray kakaaro to. (Sal. 9:10) Tan baleg met so tiwala tayod si Kristo Jesus ta inter toy bilay to parad sikatayo. (1 Ped. 3:18) Apatunayan tayo met ya mismo ya napantiwalaan iray bilin ed Biblia. (2 Tim. 3:16, 17) On, mantitiwala tayod si Jehova, si Jesus, tan ed Biblia. Pero ompan naisip na arum, ‘Saray agagi ey, lanang met ira kasin napantiwalaan?’ No on, akin et makapantiwala tayod sikara?

3. Anton espisyal ya pribilehyo so inter nen Jehova ed sikatayo? (Marcos 10:29, 30)

³ Kada sakey ed sikatayo et pinili nen Jehova ya magmaliw ya parte na pamilya to ed interon mundo. Talagan espisyal itan ya pribilehyo tan balbaleg ya bendisyon! (Basaen so Marcos 10:29, 30.) Isip mo pa: Anggan iner so laen mo, wala ray agagim ya  mangaaro tan manguunor ed si Jehova. Anggano dumay lenguahe, kultura, tan estilo na kawes da, asingsingger so liknaan tayod sikara anggano first time tayo ni labat iran nanengneng o nakabat. Labalabay tayo ran kaiba, lalo la diad pandadayew tayo ed maar-aron Ama tayo.—Sal. 133:1.

4. Akin et kakkaukolan tayo ray agagi?

⁴ Diad sayan panaon na anggaan, kakkaukolan tayo iray agagi. Sikara so nailaloan tayon ontulong no wala ray problema tayo. (Roma 15:1; Gal. 6:2) Papabiskegen da tayo met pian makapantultuloy tayon maseseg ya manlingkor ed si Jehova. (1 Tes. 5:11; Heb. 10:23-25) Isip mo pa no anto la kasi agawad sikatayo no anggapoy kongregasyon ya manproprotekta ed sikatayo ed saray kalaban tayo—si Satanas ya Diablo tan sayay mundo ya uuleyan to. Asingsingger itayo lan atakien nen Satanas tan saray alipores to. No nagawa la itan, agtayo mapaga ta kaiba tayo ray agagi tayo!

5. Akin et wala ray agagi ya nanairapan ya mantiwala ed arum?

⁵ Wala balet iray nanairapan ya mantiwala ed saray agagi lapud nanduruman rason. Ompan walay sekreto dan imbaga ra ed sakey ya agi pero naamtaan na arum. Nayarin walay im-promise na sakey ya agi pero agto tinoor. Odino asakitan ira ed imbaga o ginawa na kakongregasyon da. No ontan so nagawad sikatayo, ompan nairapan tayo lan mantiwala ed arum. No bilang ta asalim la itan, antoy makatulong pian pantiwalaan mo nin siansia iray agagi?

6. Akin ya makatulong so aro pian pantiwalaan tayo ray agagi? (1 Corinto 13:4-8)

⁶ No inarom so sakey ya too, siempre pantiwalaan mo. Abitla ed 1 Corinto kapitulo 13 iray pigaran paraan ya nipanengneng tayoy panangaro. Makatulong itan pian pantiwalaan tayoy arum odino pian napapawil tayoy tiwala  tayod sikara. (Basaen so 1 Corinto 13:4-8.) Singa bilang, nabasa ed bersikulo 4 ya “say aro et maanos tan maomaong.” Diad tua, maan-anos si Jehova ed sikatayo anggano lanang tayon makakagaway lingo. Kanian duga labat ya anosan tayo met iray agagi anggano asakitan tayo ed imbaga o ginawa ra. Nabasa met ed bersikulo 5 ya say aro et ‘agmainomay a manpasnok tan agmanbibilang na impakasakitan.’ Lingwanan tayo la sirin iray lingo na agagi tan agtayo la iratan uungkaten. Ibabaga na Eclesiastes 7:9 ya ‘agtayo komon mainomay a nasakitan.’ Mas maong no iyaplika tayo imay bilin ed Efeso 4:26: “Agyo aabuloyan ya onselek so agew a wala ni pasnok yo.”

7. Panon ya makatulong so Mateo 7:1-5 pian pantiwalaan tayo ray agagi?

⁷ Say sakey nin makatulong pian pantiwalaan tayo ray agagi et no tandaan tayo ya inar-aro ira nen Jehova tan aliwan saray lingo ra so pampopokusan to. (Sal. 130:3) Aligen tayoy Aman Jehova. Imbes ya manpokus tayod lingo na saray agagi, say imanoen tayo et saray maong ya ugali ra tan no anto ni ray nagawaan da no man-improve ira. (Basaen so Mateo 7:1-5.) Agtayo ra pansususpetsaan, lapud say aro et “manisia ed amin ya bengatla.” (1 Cor. 13:7) Siempre, agto labay ya ibaga ya basta tayo labat pantiwalaan iray agagi ya anggapoy rason, imbes pantitiwalaan tayo ra ta apatunayan da ya talagan napantiwalaan ira. *

8. Anto ray sarag mon gawaen pian naaralan moy mantiwala ed saray agagi?

⁸ Kaukolan ya palabasen so panaon pian nanengneng no talaga kasin napantiwalaan so sakey. Anto sirin so gawaen mo pian pantiwalaan mo ray agagi? Maabig no kabaten mo ran maong. Miistoryaan kad sikara antis tan kayari na aral. Mi-partner kad sikara diad ministeryo. Anosan mo ra tan ikdan mo ray tsansa pian napatunayan da ya napantiwalaan ira. Natural labat ya diad unaan et nababaingan ka nin mangistorya na tungkol ed personal ya bilay mo. Pero legan ya oneelet so pankakaaro yo, ompan komportable ka lan mangibaga na problemam o arum ya nagagawad bilay mo. (Luc. 16:10) Panon to balet no aderal so tiwalam ed sakey ya agi? Imbes ya pultoten mon tampol so pankakaaro yo, mamalabas ka ni panaon. Tan agmo iisipen ya lapud ginawa na sakey ya agi et onman met lay amin ya agagi ed kongregasyon. Pantongtongan tayo natan so alimbawa na pigaran matoor ya lingkor nen Jehova ya anggano adismaya ira ed ginawa na arum et aga nakal so tiwala ra ed arum ya lingkor nen Jehova.

9. (a) Antoy prueba ya nantiwala nin siansia si Hana ed uksoyan nen Jehova anggano anengneng toy lingo na saray mangidadaulo? (b) No tungkol ed panagtiwala, antoy naaralan mo ed si Hana? (Nengnengen so litrato.)

⁹ Kasin asalim lay asakitan lapud ginawa na sakey ya elder? No asalim la, makaaral kad alimbawa nen Hana. Diad saman ya panaon, say mangidadaulo ed panagdayew ed Israel et say Atagey ya Saserdote ya si Eli. Pero aliwan maong ya alimbawa so pamilya nen Eli. Saserdote iray ananak to, pero makapabaing so gagawaen dad tabernakulo tan imoral ira. Balet ag-ira tanton impetek nen ama ra. Anggano agtampol ya inekal nen Jehova si Eli ed pribilehyo to bilang atagey ya saserdote, siansia nin sinuportaan nen Hana so uksoyan na Dios. Sikatoy agtinmundan nandayew ed tabernakulo anggano si Eli nin siansia so atagey ya saserdote. Aminsan, nen agaylay ermen nen Hana  legan ton manpipikasi ed tabernakulo, sikatoy basta labat hinusgaan nen Eli ya abuek kuno. Anta maer-ermen la lanti Hana, onman ni imbaga nen Eli. (1 Sam. 1:12-16) Walay sipan nen Hana ed si Jehova ya no sikatoy nawalaan na anak ya laki et iter to ya manlingkor ed tabernakulo. Akaparaan si Hana ya sumpalen no antoy insipan to, anggano amta to ya si Eli so mangasikaso ed anak to. (1 Sam. 1:11) Aramay anak nen Eli ey, kailangan ira kasin disiplinaen? On, tan atan so ginawa nen Jehova. (1 Sam. 4:17) Abendisyonan balet si Hana na anak ya laki, si Samuel.—1 Sam. 1:17-20.

10. Akin et nantiwala nin siansia si Arin David ed arum ya kakaaro to anggano wala ray nantraidor ed sikato?

¹⁰ Kasin walay kaarom ya trinaidor to ka? No wala, makaaral kad eksperiensya nen Arin David. Say sakey ed saray kaaro to et si Ahitopel. Balet nen labay ya samsamen na anak nen David ya si Absalom so inkaari, say sinuportaan nen Ahitopel et si Absalom. Seguradon asakitan ya maong si David ta say mismon anak to tan maapit ya kaaro to so nanrebelde ed sikato. Pero anggan onman so agawa, nantiwala nin siansia ed arum ya kakaaro to. Agnakal so tiwala tod matoor ya kaaro ton si Husai lapud agsinmuporta ed saramay nanrebelde. Ag-alingoy David ed impantiwala tod si Husai. Pinatunayan nen Husai ya sikatoy tuan kaaro tan akaparaan ya ompatey parad si David.—2 Sam. 17:1-16.

11. Panon ya impanengneng na sakey ya aripen nen Nabal ya walay tiwala tod si Abigail?

¹¹ Nengnengen tayo met so alimbawa na sakey ya aripen nen Nabal. Prinotektaan nen David tan saray sundalo to iray aripen na mayaman ya Israelitan si Nabal. Aminsan, imbaki nen David ed si Nabal iray bataan to ya mikerew na anggan anto ya niiter tod sikara ya naakan da. Pero masiblet si Nabal, agto ran balot inikdan tan pinantamian to ni ra. Lapud satan ya ginawa to, sinmaboy dala nen David tan implano ton pateyen so amin ya laki ed sankaabungan nen Nabal. Maong labat ta walay aripen ya angipaamta na satan ed si Abigail, ya asawa nen Nabal. Amta na sayan aripen ya napepeligroy bilay to, pero inisip to ya walay nagawaan nen Abigail. Kanian imbes ya ontakas, nantiwala ya onaksion si Abigail pian nasolusyonan iman ya problema. Baleg so tiwala tod si  Abigail ta kabkabat ya makatalos a bii. Kasin duga so impantiwala na sayan aripen? On, ta makpel ya akikasi tan akitongtong si Abigail ed si David pian agto ituloy so plano to. (1 Sam. 25:2-35) Nantiwala si Abigail ya gawaen nen David no antoy duga.

12. Panon ya impanengneng nen Jesus ya walay tiwala tod saray disipulo to anggano wala ray lingo ra?

¹² Nantiwala si Jesus ed saray disipulo to anggano wala ray lingo ra. (Juan 15:15, 16) Nen imbaga nen Santiago tan Juan ed si Jesus ya labay day nawalaan na espisyal ya posisyon ed Panarian, aga kinuestion nen Jesus so panlilingkor dad si Jehova tan agto ra inekal bilang apostol to. (Mar. 10:35-40) Diad mismon labi ya inarestoy Jesus, sikatoy tinaynan na amin ya disipulo to. (Mat. 26:56) Pero aga nakal so tiwala nen Jesus ed sikara. Anggano wala ray lingo ra, “intultuloy ton impanengneng so panangaro tod sikara anggad kasampotan.” (Juan 13:1) Kayari na inkioli nen Jesus, inikdan to ni ingen na ambelat ya responsabilidad imay 11 ya matoor ya apostol to. Sikara so inyasain ton mangidaulo ed kimey ya panagpulong tan panagbangat, tan mangasikaso ed saray inar-aro ton karnero. (Mat. 28:19, 20; Juan 21:15-17) Kasin duga so desisyon to ya mantiwala ed sarayan agperpekton lalaki? On, ta amin da et matoor dan ginaway asainmin da anggad impatey da. Singa si Hana, David, samay aripen nen Nabal, Abigail, tan Jesus, mantiwala tayo met ed arum.

13. Anto so sakey ya rason ya posiblin naekal so tiwala tayod arum?

¹³ Kasin asalim la ya walay imbagam ed sakey ya agi tan impuppurek mon agto ibabagad arum, pero naamtaan mo ya walay angistoryaan to? Seguro mansyodot tan adismaya kad sikato. Ontan so agawad sakey ya sister ya walay kompidensyal ya imbaga tod sakey ya elder. Diad tinmumbok ya agew, sikatoy tinawagan na samay asawa na elder ta labay ton pasesegen. Mapatpatnag ya inistorya na samay elder ed asawa to imay nantongtongan da. Lapud sayan agawa, nakal laingen so tiwala na sister ed samay elder. Maong labat ta nampatulong imay sister ed sakey nin elder, kanian apapawil toy tiwala to ed saray elder.

14. Antoy akatulong ed sakey ya brother pian napapawil toy tiwala tod saray agagi?

¹⁴ Walay brother ya abaybayag lan mansyodot ed duaran elder tan say pakalikna to et agto la ran balot napantiwalaan. Pero apaisip ed arengel ton imbaga na sakey ya rerespetoen ton brother: “Si Satanas so kalaban tayo, aliwan saray agagi.” Sankanonot na samay brother no panon ton niyaplika itan. Nampikasi parad tulong nen Jehova, insan nanggawa na paraan pian makapikareenan ed samay duaran elder.

15. Akin ya no maminsan et mabayag ni antis tayon napapawil so tiwala tayod arum? Mangiter na alimbawa.

¹⁵ Kasin asalim lay nakal ed pribilehyo? Natural labat ya naermenan tan nasakitan ka. Ontan so naeksperiensya nen Sister Grete tan say nanay to ya taga Germany. Nanmatoor iyan sanina anggano imbawal na saray Nazi so kimey tayo nen 1930’s. Sakey si Grete ed saray manta-type na The Watchtower ya iter ed saray agagi. Balet nen naamtaan na saray brother ya si tatay to et kontra ed katuaan, inekal da iman ya pribilehyo to ta natatakot ira ya ompan ipaamta nen tatay to so impormasyon na kongregasyon ed saray autoridad. Pero aliwan saman labat so subok ya inarap nen Grete. Legan na World War II, si Grete tan say nanay to et ag-inikdan na saray brother na saray magasin tayo tan agda ra labay ya katongtongen no nasabat da rad dalan. Ansakisakit iman! Araldalem  so sugat ed puso nen Grete kanian abaybayag ni antis ton aperdona tan apapawil so tiwala to ed saraman ya agagi. Pero diad inlabas na panaon, atalosan to ya pinerdona la ra nen Jehova kanian dapat to met iran perdonaen. *

16. Akin et gawaen tayoy anggaay nayarian tayon napapawil so tiwala tayo ed saray agagi?

¹⁶ No ontan met so agawad sika, gawam so anggaay nayarian mon napapawil so tiwalam ed saray agagi. Tua, aliwa itan ya mainomay tan kaukolan ya palabasey panaon. Pero seguradon bendisyonan nen Jehova so amin ya sagpot mo. Bilang ilustrasyon, no aderal so eges mo lapud inakan mo, natural labat ya manalwar ka la ed saray kakanen mo. Pero, aliwan lapud saman ya agawa et agka lan balot mangan. Mipadpara, no asakitan tayo ed imbaga o ginawa na sakey ya agi tan nakal so tiwala tayod sikato, agto labay ya ibaga ya agtayo la pantiwalaan so amin ya agagi. Tandaan tayo ya amin tayo et aliwan perpekto. No perdonaen tayo ray agagi tan ipawil tayoy tiwala tayod sikara, mas maliket tayo tan makakatulong tayo pian agnaderal so tiwala na saray agagi ed kada sakey.

17. Akin et importante so tiwala, tan antoy pantongtongan tayod ontumbok ya artikulo?

¹⁷ Diad mundo nen Satanas, ngalngali anggapo lay napantiwalaan. Pero diad espiritual ya pamilya tayo ed interon mundo, walay tiwala tayo ed saray agagi ta inar-aro tayo ra tan inar-aro da tayo met. Lapud satan, malikeliket tayo, walay pankakasakey tayo, tan akaparaan tayo ed saray onsabin subok. Pero panon to no asakitan ka na sakey ya agi kanian mairap mo lay mantiwala ed arum? Maabig no isipen mo no antoy labay nen Jehova ya gawaen mo, iyaplikam iray prinsipyo na Biblia, pabiskeg moy panangarom ed saray agagi, tan alig mo ray alimbawa ed Biblia. Anggano asakitan ka, tandaan mo ya onabig lanlamang so asugatan ya pusom tan sarag mon napapawil so tiwalam ed saray agagi. No ontan so gawaen mo, nawalaan ka na dakel ya tuan kakaaro. (Pro. 18:24) On, importante ya mantiwala tayod arum. Pero dapat, napantiwalaan da tayo met. Diad ontumbok ya artikulo, pantongtongan tayo no anto ray gawaen tayo pian pantiwalaan itayo na saray agagi.