AARALEN YA ARTIKULO 40
“Saramay Ontutulong ed Dakerakel Pian Magmaliw a Matunong”
“Saramay ontutulong ed dakerakel pian magmaliw a matunong et [onsinag ya] singa saray bitewen ed anggad angga.”—DAN. 12:3.
KANSION 151 Sikatoy Ontawag
DIAD SAYAN ARTIKULO *
1. Anto ray tatalaranan tayon nagawa legan na Sanlibon Taon ya Uley nen Kristo?
EKSAYTED tayo lan amin ed agew ya igapon bilayen iray inaatey diad dalin legan na Sanlibon Taon ya Uley nen Kristo! Tatalaranan tayon nanengneng lamet iray inar-aro tayod bilay. Tan anggan si Jehova et mantatalaran met. (Job 14:15) Imadyin mo pay liket na amin ya totoo sano nakaiba da lamet iray kakaaro tan kapamilya da. Naaralan tayod apalabas ya artikulo ya “saray matunong” et akasulat so ngaran da ed libro na bilay tan sikaray “napaoli pian manbilay.” (Gawa 24:15; Juan 5:29) Kayari na Armagedon, posiblin saray inar-aro tayod bilay so unonan napaoli diad dalin. * Ontan met, “saray agmatunong,” singa saramay agnaikdan na tsansan kabaten tan manlingkor ed si Jehova antis iran inatey et “napaoli pian naukom.”
2-3. (a) Base ed Isaias 11:9, 10, anton kimey ya panagbangat so nagawa ed interon dalin? (b) Antoy pantongtongan tayo ed sayan artikulo?
2 Amin ya napaoli et kaukolan ya bangatan. (Isa. 26:9; 61:11) Kanian walay nagawan kimey ya panagbangat ed interon dalin. (Basaen so Isaias 11:9, 10.) Importante ya nibangat ed saray napaolin agmatunong so tungkol ed si Jesu-Kristo, say uksoyan na Panarian, say dondon, say panrespeto ed ngaran na Dios, tan no akin ya si Jehova labat so makanepegan ya manuley. Tan anggan saray matunong et kaukolan dan naaralan iray impaamta nen Jehova tungkol ed gagala to ya agda la asabian. Diad tua, dakel ed sarayan matunong so inatey antis ya akompleto so Biblia. On, dakdakel so kaukolan ya aralen na saray matunong tan agmatunong!
3 Ebatan tayo ed sayan artikulo irayan tepet: Panon ya nagawa so kimey ya panagbangat diad interon dalin? Antoy nitulong na satan pian permanentin nisulat so ngaran na saray totoo diad libro na bilay? Importante ya amta tayoy ebat ed sarayan tepet. Pian mas natalosan tayo no antoy nagawa ed saray inaatey no nabilay la ra, makatulong iray propesiya ed libron Daniel tan Apocalipsis. Amtaen tayo nin unona no anto ray akapropesiyan nagawa ya walad Daniel 12:1, 2.
“OMBANGON SO DAKEL ED SARAMAY NAUGIP ED DABOK”
4-5. Base ed Daniel 12:1, anto ray nagawa legan na panaon na anggaan?
4 Basaen so Daniel 12:1. Ipapaamta na libron Daniel iray mantutumbokan ya nagawa legan na panaon na anggaan. Singa bilang, ibabaga na Daniel 12:1 ya si Miguel odino si Jesu-Kristo et ‘akaalagey parad totoo na Dios.’ Sayan propesiya et agawa nen 1914 nen nagmaliw ya ari si Jesus ed Panarian na Dios diman ed tawen.
5 Balet nipaamta met ed si Daniel ya si Jesus et “ontalindeg” legan na “panaon na gonigon ya agnin balot agawa manlapud samay panaon ya impangiletneg ed inmunan nasyon.” Sayan “panaon na gonigon” et ontutukoy ed “baleg a kairapan” ya abitlad Mateo 24:21. Manampot itan ya kairapan diad Armagedon. Diad satan ya panaon, “ontalindeg” si Jesus pian idepensa iray totoo na Dios. Saramay makaliktar ed baleg a kairapan et indeskribe na Apocalipsis ya “baleg ya ulop.”—Apo. 7:9, 14.
6. Antoy onsublay ya nagawa no akaliktar lay baleg ya ulop ed nagawan baleg a kairapan? Ipaliwawa. (Nengnengen met ed sayan isyu so “Tepetepet na Saray Manbabasa” tungkol ed kioli diad dalin.)
6 Basaen so Daniel 12:2. Antoy onsublay ya nagawa no akaliktar lay baleg ya ulop ed nagawan baleg a kairapan? Dati, say amta tayon tutukoyen na sayan propesiya et say simbolikon kioli o say impangituloy ed kimey ya panagpulong kayarin apatunda lawari na saray onkokontra nen 1918. * Pero anguman so pakatalos tayo ed saya lapud ontutukoy iyan propesiya ed kioli na saray inaatey diad balon mundo. Akin et nibaga tayon ontan? Say salitan “dabok” ya inusar ed sayan bersikulo tan nabasa met diad Job 17:16 et parehon ontutukoy ed “Lubok.” Kanian say tutukoyen sirin na Daniel 12:2 et say literal ya ibilay na saray inaatey diad dalin no asumpal lay kaunoran iran agew tan say Armagedon.
7. (a) Akin ya nibagan wala ray napaoli “parad andi-anggaan a bilay”? (b) Akin et “mas maabig a kioli” iya?
7 Nabasa met ed Daniel 12:2 ya wala ray napaoli “parad andi-anggaan a bilay.” Labay ton ibaga, sarayan napaoli et tuloytuloy dan kabaten tan unoren si Jehova tan si Jesus, kanian kayari na Sanlibon Taon et awaten da lay andi-anggaan a bilay. (Juan 17:3) Saya et “mas maabig a kioli” kompara ed samay kioli ya agawad pigaran totoo nensaman. (Heb. 11:35) Akin ey? Lapud inatey met lanlamang iray apaoli nensaman.
8. Akin et nibagan wala ray napaoli “parad kababaingan tan parad andi-anggaan a kabalawan”?
8 Balet aliwan amin ya napaoli et awaten day panangibangat nen Jehova. Nabasa ed propesiya nen Daniel ya wala ray napaoli “parad kababaingan tan parad andi-anggaan a kabalawan.” Manrebelde irad Dios kanian say ngaran da et ag-isulat ed libro na bilay tan agda naawat so bilay ya andi-anggaan. Say pansumpalan da et “andi-anggaan a kabalawan” o kadederal. Say tutukoyen sirin na Daniel 12:2 et say pansumpalan na amin ya bilayen diad balon mundo, depende ed no antoy pilien dan kabibilay kayari na kioli ra. * (Apo. 20:12) Kanian say arum ya napaoli et manbilay na andi-anggaan tan say arum et andi.
“SARAMAY ONTUTULONG ED DAKERAKEL PIAN MAGMALIW A MATUNONG”
9-10. Anto ni nagawa kayari na baleg ya kairapan, tan siopa ray “onsinag a singa kaliwawa na tawen”?
9 Basaen so Daniel 12:3. Anto ni nagawa kayari na “panaon na gonigon” o baleg a kairapan? Nilikud ed Daniel 12:2, wala ni abitla ed bersikulo 3 ya nagawa kayari na baleg ya kairapan.
10 Siopa ray “onsinag a singa kaliwawa na tawen”? Makala tayoy ideya ed samay imbaga nen Jesus diad Mateo 13:43: “Diad satan a panaon, saray matunong et onsinag a singa kaliwawa na agew diad Panarian na Ama ra.” Diad akadkauna iran bersikulo, say tutukoyen nen Jesus et “saray ananak na Panarian” o saray alanaan ya agagi to ya kaiba ton manuley diad Panarian ed tawen. (Mat. 13:38) Kanian ontutukoy sirin so Daniel 12:3 ed saray alanaan tan say kimey ya gawaen da legan na Sanlibon Taon ya Uley nen Kristo.
Legan na Sanlibon Taon, suportaan na 144,000 so pangidaulo nen Jesu-Kristo ed kimey ya panagbangat diad interon dalin (Nengnengen so parapo 11)
11-12. Antoy gawaen na 144,000 legan na Sanlibon Taon?
11 Panon ya ontulong iray alanaan “pian magmaliw a matunong” iray totoo? Legan na Sanlibon Taon, suportaan na saray alanaan so pangidaulo nen Jesu-Kristo ed kimey ya panagbangat diad interon dalin. Aglabat manuley bilang arari so 144,000, manlingkor met ira bilang saserdote. (Apo. 1:6; 5:10; 20:6) Kanian ontulong ira ya “mamaabig ed saray nasyon” pian kalkalnan magmaliw ya perpekto iray totoo. (Apo. 22:1, 2; Eze. 47:12) Seguradon panliketan na saray alanaan iratan ya kimey da!
12 Siopa iramay “dakerakel” ya magmaliw ya matunong? Kaiba ed satan iray napaoli, saray makaliktar ed Armagedon, tan saray iyanak diad balon mundo. Kayari na Sanlibon Taon, perpekto la so amin ya totoo diad dalin. Kapigan balet ya permanente lan nisulat so ngaran da ed libro na bilay panamegley na tinta, tan aliwan panamegley na lapis labat?
SAY UNOR YA SUBOK
13-14. Diad arapen, anto dapat so napatunayan na amin ya perpekton totoo antis iran naikdan na andi-anggaan a bilay?
13 Agto labay ya ibaga ya no perpekto lay sakey ya too et segurado lan manbilay na andi-anggaan. Makaaral tayod samay agawa ed si Adan tan Eva. Perpekto iran tua, pero dapat napatunayan da ni ya talagan maunor ira ed Dios antis to ran ikdan na andi-anggaan a bilay. Makapaermen balet ta pinili dan ag-unoren so Dios.—Roma 5:12.
14 Antoy kipapasen na saray totoo diad dalin kayari na Sanlibon Taon? Perpekto la ran amin. Pero say tepet, kasin amin da et tuloytuloy dan suportaan so uley nen Jehova? Odino singa met ira si Adan tan Eva ya anggano perpekto la ra et pilien day agmanmatoor ed Dios? Importantin naebatan iratan ya tepet, balet panon?
15-16. (a) Kapigan naikdan na tsansa so amin ya perpekton totoo pian ipanengneng ya matoor irad si Jehova? (b) Antoy nagawa kayari na unor a subok?
15 Ipriso si Satanas diad loob na Sanlibon Taon. Legan na satan, anggapon balot so naibalang to. Balet kayari na Sanlibon Taon, sikatoy ibulos tan salien ton ibalang iray perpekton totoo. Diad satan ya unor ya subok, walay tsansa na amin ya perpekton totoo pian ipanengneng ya rerespetoen day ngaran na Dios tan susuportaan day uley to. (Apo. 20:7-10) Atan so pangibasian no kasin say sakey ya too et permanente lan nisulat so ngaran to ed libro na bilay.
16 Ibabaga na Biblia ya wala ray manrebelde ed uley nen Jehova ya singa ginawa nen Adan ta Eva. Antoy nagawa ed sikara? Ibabaga na Apocalipsis 20:15: “Siopaman ya ag-akasulat ed libro na bilay et imbantak ed dayat na apoy.” Malinew ed satan ya permanente la ran naderal. Balet makapasa ed unor a subok so dakel ya perpekton totoo, tan say ngaran da et permanente lan nisulat diad libro na bilay.
ANTOY NAGAWA ED “PANAON NA ANGGAAN”?
17. Antoy imbaga na anghel ed si Daniel ya nagawa ed panaon tayo? (Daniel 12:4, 8-10)
17 Eksayted tayo la ed sarayan nagawa ed arapen! Pero walay importantin impormasyon ya imbaga na sakey ya anghel ed si Daniel ya nagawa ed “panaon na anggaan,” say panaon ya pambibilayan tayo. (Basaen so Daniel 12:4, 8-10; 2 Tim. 3:1-5) Imbaga na anghel ed si Daniel: “Ondakel so tuan kakabatan.” Labay ton ibaga, mas natalosan na saray lingkor na Dios iray propesiya ed libron insulat to. Imbaga met na anghel ya legan na sayan panaon, “saray mauges et manggaway mauges, tan anggapo ed saray mauges so makatalos ed sarayan salita.”
18. Antoy asingsingger lan nagawa ed saray mauges?
18 Diad panaon tayo, singa agnadudusa iray manggagawa na mauges. (Mal. 3:14, 15) Balet magano lan ukomen nen Jesus iray singa “kanding” tan ibiig to ra ed saray singa “karnero.” (Mat. 25:31-33) Agmakaliktar ed baleg ya kairapan iray mauges tan agla ra napaoli pian manbilay ed balon mundo. Agmet nisulat so ngaran da ed “libro na pakanodnonotan” ya abitlad Malaquias 3:16.
19. Antoy dapat ya gawaen tayo la natan, tan akin? (Malaquias 3:16-18)
19 Dapat ipanengneng tayo la natan ed kabibilay tayo ya ag-itayo kaiba ed saray mauges. (Basaen so Malaquias 3:16-18.) Titiponen la natan nen Jehova iray ipapasen ton “espisyal a kayarian.” Siempre, labay tayon ipasen itayo nen Jehova ya espisyal.
Eksayted tayo lan nanengneng si Daniel, saray kapamilya, kakaaro, tan dakdakel nin totoo ya “onalagey” o nabilay lamet diad balon mundo! (Nengnengen so parapo 20)
20. Antoy insipan nen Jehova ed si Daniel, tan akin ya tatalaranan moy pakagawa na satan ya sipan?
20 On, manbibilay tayo la ed panaon na anggaan. Tan dakel ni ray tatalaranan tayon nagawa. Magano tayo lan nanengneng so pakaderal na amin ya mauges. Kayari na satan, nanengneng tayo met lay pakagawa na sayan sipan nen Jehova ed si Daniel: “Onalagey ka pian awaten moy apag mo diad kasampotan na saray agew.” (Dan. 12:13) Kasin tatalaranan moy agew sano si Daniel, pati saray inar-arom ed bilay et “onalagey” odino ombilay lamet? No on, gawam sirin so anggaay nayarian mo pian makapanmatoor ka ed si Jehova, tan naseguradom ya say ngaran mo et mansiansian akasulat ed libro na bilay!
KANSION 80 “Tawayan Yo tan Nengneng Yo a si Jehova et Maong”
^ Pantongtongan tayo ed sayan artikulo so pananguman ed pakatalos tayo tungkol ed nagawan kimey ya panagbangat diad interon dalin ya adeskribe ed Daniel 12:2, 3. Amtaen tayo no kapigan itan nagawa, no siopa ray bangatan, tan no siopa ray mangibangat. Amtaen tayo met no panon ya makatulong iyan panagbangat ed saramay napaoli diad dalin pian makapasa rad unor a subok kayari na Sanlibon Taon ya Uley nen Kristo.
^ Aliwan maminpinsan ya nagawa so kioli. Posible ya say unonan bilayen na Dios et saramay inatey ya matoor legan na kaunoran iran agew. Insan paatras ya mansusublayan so kada henerasyon. No onia so pantutumbokan na kioli, say mangabet ed saramay ombilay et saramay personal ya makankabat ed sikara. Pero anggan siopa ni so unona, segurado tayo ya say pakagawa na kioli diad dalin et organisado, ta ibabaga na Biblia ya say kioli ed tawen et “unong ed dugan pasen” o dugan pantutumbokan.—1 Cor. 14:33; 15:23.
^ Sayan eksplinasyon et pananguman ed pakatalos tayo ya walad publikasyon ya Imanoen so Propesiya nen Daniel! kapitulo 17, tan Say Panag-bantayan ya Hulyo 1, 1987, p. 19-23.
^ Saramay abitlan “matunong” tan “agmatunong” diad Gawa 24:15 tan “saramay nanggaway maong” tan “saramay nanggaway mauges” diad Juan 5:29 et ontutukoy ed impanbilay o ginawgawa na saray apaoli antis na impatey da.
