Imanoen iray teksto ed Biblia ya makatulong pian naebatan iratan ya tepet.

Ibabaga na Gawa 24:15 ya “walay kioli na saray matunong tan saray agmatunong.” Saray matunong et ontutukoy ed saramay matoor ya nanlingkor ed Dios anggad impatey da, kanian akasulat so ngaran da ed libro na bilay. (Mal. 3:16) Kaiba ed saray agmatunong iramay agnaikdan na tsansa ya nakabat si Jehova antis na impatey da, kanian ag-akasulat so ngaran da ed libro na bilay.

Amay nabasad Juan 5:28, 29 et ontutukoy met lanlamang ed samay duaran grupo ya abitlad Gawa 24:15. Imbaga nen Jesus ya “saramay nanggaway maong et napaoli pian manbilay,” tan “saramay nanggaway mauges et napaoli pian naukom.” Saray matunong et nanggawa ray maong antis iran inatey. Sikaray “napaoli pian manbilay” lapud akasulat so ngaran da ed libro na bilay. Saray agmatunong balet et nanggawa ray mauges antis iran inatey. Sikaray “napaoli pian naukom.” Agni akasulat so ngaran da ed libro na bilay, kanian ‘ukomen’ odino obserbaan ira kayari na inkioli da. Legan na satan ya panaon, walay tsansa ran kabaten si Jehova tan walay posibilidad ya naisulat so ngaran da ed libro na bilay.

Ibabaga na Apocalipsis 20:12, 13 ya amin ya bilayen et kaukolan dan unoren iray “akasulat ed saray lukot”—saray balon ganggan ya iter na Dios diad balon mundo. Deralen nen Jehova so siopaman ya ag-onunor.—Isa. 65:20.

Impropesiya na Daniel 12:2 ya wala ray paolien “parad andi-anggaan a bilay tan say arum et parad kababaingan tan parad andi-anggaan a kabalawan.” Tutukoyen na sayan bersikulo so hatol ed saray pinaoli—balanglan “andi-anggaan a bilay” odino “andi-anggaan a kabalawan.” Kanian kayari na Sanlibon Taon, say arum ed saray pinaoli et naikdan na andi-anggaan a bilay. Say arum balet et permanente lan deralen.—Apo. 20:15; 21:3, 4.

Imanoen iyan ilustrasyon. Say situasyon na duaran grupo ya paolien et singa saray foreigner ya labay day manayam ed arum ya bansa. Saray matunong et singa ra foreigner ya naaprubaan so work o resident visa da kanian anggan panon et walay kalayaan tan naawat dan benepisyo. Saray agmatunong balet et singa ra foreigner ya say niiter ed sikara et temporary o visitor’s visa. Wala ray kaukolan dan gawaen pian abuloyan ira na gobierno ya tuloytuloy ya manayam ed bansa ya kawalaan da. Singa ontan so situasyon na saray agmatunong diad balon mundo, kaukolan dan unoren iray ganggan nen Jehova tan pruebaan da ya matunong ira pian tuloytuloy iran manbilay diad Paraiso. Tan diad tua, antokaman ya klase na visa so naaprubaan parad saray foreigner kaloob dad sakey ya bansa, kaukolan dan respetoen tan unoren so batas no labay day magmaliw ya citizen, ta no andi et ipa-deport ira na gobierno. Ontan met so nagawa diad balon mundo. Say hatol ed amin ya pinaoli et akadepende ed no kasin manmatoor ira ed Dios tan unoren day ganggan to.

Mapangasi ya Dios si Jehova, pero sikatoy patas tan akabase ed hustisya so amin ya gagawaen to. (Deu. 32:4; Sal. 33:5) Lapud panangaro to, paolien to iray matunong tan agmatunong. Pero siempre, labay to ya unoren da iray ganggan to. No sikatoy aroen tan unoren da, abuloyan to ran manbilay na andi-anggaan diad balon mundo.