1-2. Akin et importantin aralen tayoy salaysay ed Biblia tungkol ed si Samson?

 ANTOY onlad isip mo no nabitlay ngaran ya Samson? Seguro say naisip mon tampol et amay lingkor na Dios ya mabisbiskeg. Duga met, ta kabkabat si Samson lapud ekstraordinaryon biskeg to. Pero walay desisyon nen Samson ya aliwliway nansumpalan to. Anggano onman balet, nampokus si Jehova ed saray maabig ya agawaan to tan say matoor ya impanlingkor to. Impaisulat iratan nen Jehova diad Biblia pian pakaaralan tayo.

² Dakdakel so makapakelaw ya agawaan nen Samson diad tulong nen Jehova. Sikatoy inusar na Dios pian natulongan iray Israelita. Anggano abaybayag lan inatey si Samson, impaipila nen Jehova ed si apostol Pablo so ngaran nen Samson ed listaan na saray lingkor na Dios ya mabisbiskeg so pananisia ra. (Heb. 11:​32-34) Napaseseg tayo ed alimbawa nen Samson. Sikatoy nantiwala ed si Jehova anggano mair-irap so situasyon. Pantongtongan tayo ed sayan artikulo no anto ray naaralan tayod sikato tan no akin ya makapaseseg so alimbawa to.

3. Anton asainmin so inter nen Jehova ed si Samson?

³ Nen inyanak si Samson, saray Filisteo so manuuley ed bansan Israel. (Ukom 13:1) Maruksa iray Filisteo kanian agaylay irap na bilay na saray Israelita. Si Samson so pinili nen Jehova ya “mangidaulo ed pangiliktar ed Israel ed lima na saray Filisteo.” (Ukom 13:5) Mair-irap itan ya asainmin. Kaukolan nen  Samson so mantiwala ed si Jehova pian nagawaan to itan.

4. Panon ya tinulongan nen Jehova si Samson pian agnaerel na saray Filisteo? (Ukom 15:​14-16)

⁴ Imanoen tayo pay sakey ya alimbawa ya nantiwala si Samson ed tulong nen Jehova. Aminsan, wala ray sundalon Filisteo ya linmusob pian erelen si Samson diad Lehi, sakey ya lugar ya posiblin sakop na Juda. Lapud takot na saray taga Juda, implano da ya iyawat si Samson ed saray kalaban. “Binalor day duaran balon lubir,” insan da inawit ed saray Filisteo. (Ukom 15:​9-13) Pero “sikatoy pinabiskeg na espiritu nen Jehova” kanian akablos. Insan “akaromog na sakey a panga na kalakian ya asno ya agano nin inatey.” Atan so inusar to pian pateyen so 1,000 ya lalakin Filisteo.—Basaen so Ukom 15:​14-16.

5. Akin ya say impangusar nen Samson ed panga na asno et pakapatnagan na tiwala to ed si Jehova?

⁵ Akin et panga na asno so inusar nen Samson diad impilaban to? Siopan too so makaisip ya usaren ton armas so panga na ayep? Amta nen Samson ya say panalo to et akadepende ed si Jehova, aliwan diad usaren ton armas. No antoy wala, aman so inusar to! Basta say importante, nagawaan to no antoy ipapagawa nen Jehova. Lapud nantiwala ed si Jehova, atalo to ray kalaban, anggano singa imposible!

6. Antoy sakey ya naaralan tayo ed si Samson?

⁶ Tulongan itayo met nen Jehova pian nagawaan tayo iray asainmin tan responsabilidad tayo ed organisasyon, anggan saramay singa imposible. No maminsan ingen, nabibigla tayo labat la ta tinulongan itayo nen Jehova diad paraan ya agtayon balot naisip! On, no panon ya tinulongan nen Jehova si Samson, tulongan to ka met basta mantiwala ka ed sikato.—Pro. 16:3.

7. Mangiter na alimbawa ya importante so manpaigiya ed si Jehova.

⁷ Maong ya alimbawa iray agagi ya ontutulong ed construction project na organisasyon tayo ta baleg so tiwala da ed si Jehova. Nensaman, sikatayon mismo so mande-design tan mangipapaalagey na saray balon Kingdom Hall tan arum nin pasilidad tayo. Pero  lapud maples ya ondarakel so bilang na publisher, wala ray ginawan pananguman ed uksoyan na panagpaalagey. Saray brother ya mangidadaulo ed sarayan proyekto et nampaigiya ed si Jehova tan sinali day arum ya paraan. Singa bilang, imbes ya mangipaalagey tayoy balon pasilidad, wala ray situasyon ya mas praktikal no mangaliw lay property insan i-renovate. Oniay imbaga nen Robert, ya pigaran taon lan mitutulongan ed saray construction project tayo diad interon mundo: “Nen primero, wala ray agmalabay ed sayan balon uksoyan. Siempre, duman maong iya ed samay apasalan mi. Pero anggano wala ray manaalangan ed gapo, mabulos iran sinmuporta. Tan mapatpatnag ya bebendisyonan nen Jehova irayan pananguman.” Sakey iyan alimbawa ya igigiya nen Jehova iray lingkor to pian nasumpal so panlabayan to. Maabig sirin no tepetan tayoy sarili tayo, ‘Siak ey, kasin manpapaigiya ak ed si Jehova tan akaparaan ak ya man-adjust no wala ray pananguman ed organisasyon?’

8. Nen aminsan ya apaet lan maong si Samson, antoy ginawa to?

⁸ Seguro pamilyar ka ed arum ni ran makapabilib ya ginawa nen Samson. Singa bilang, anggapoy inusar ton armas nen pinatey toy sakey ya leon tan 30 ya lalakin Filisteo diad syudad na Askelon. (Ukom 14:​5, 6, 19) Amta nen Samson ya agton balot nagawaan itan no anggapoy tulong nen Jehova. Mapatpatnag ya sikatoy mandedepende ya lanang ed Dios ta nen apaet ya maong kayari ton pinatey so 1,000 ya Filisteo, agto inisip ya sikato lay akauley ya mananap na danum. Antoy ginawa to? Imbes ya mandepende ed sarili to, kinerew toy tulong nen Jehova.—Ukom 15:18.

9. Antoy ginawa nen Jehova nen kinmerew na tulong si Samson? (Ukom 15:19 tan paimanod leksab)

⁹ Nen kinmerew na tulong si Samson, nanggawa na milagro si Jehova pian niwala so sakey ya subol ya nainuman nen Samson. Kayari ton inminum, “pinmawil ed sikato so biskeg to tan kinmasil lamet.” (Basaen so Ukom 15:19 tan paimanod leksab.) Kalabas na dakel ya taon, mapatnag ya wala nin siansia iyan subol nen impaisulat nen Jehova ed si propetan Samuel so libron Ukom. Seguro, kada no nanengneng na saray Israelita iyan subol, nanonotan da ya akaparaan si Jehova ya ontulong ed saray matoor ya lingkor to basta mantiwala ira ed sikato.

10. Antoy gawaen tayo pian naawat tayoy tulong nen Jehova? (Nengnengen met so litrato.)

¹⁰ Singa si Samson, anggano wala ray abilidad tayo o dakdakel lay agawaan tayo ed panlilingkor tayo ed si Jehova, agtayo lilingwanan so onkerew na tulong ed sikato. Agtayo mandedepende ed sarili tayo. Tandaan tayo ya nagawaan tayo labat so ipapagawa nen Jehova no mantiwala tayo ed sikato. Binmiskeg si Samson nen ininum to imay danum ya nanlapud si Jehova. Ombiskeg tayo met ed espiritual no awaten tan usaren tayo so amin ya probisyon ya manlalapud si Jehova.—Mat. 11:28.

11. Panon tayon naipanengneng ed si Jehova ya labay tayoy manpatulong ed sikato? Mangiter na alimbawa.

¹¹ Imanoen so alimbawa nen Aleksey, sakey ya brother ed Russia ya apriso lapud katooran to. Antoy akatulong ed sikato pian mansiansian mabiskeg ed espiritual? Antis nin apriso, apasalan da lan sanasawa ya iyuna ed bilay da so panaral na Biblia tan panlingkor ed si Jehova. Oniay imbaga to: “Talagan tutumboken koy eskedyul ko ed panag-personal study tan inagew-agew ak ya manbabasa na Biblia. Kada kabuasan, pantotongtongan  mi nen asawak so inagew-agew ya teksto tan saniba kamin manpipikasi ed si Jehova.” Antoy naaralan tayo ed si Brother Aleksey? Agtayo mandedepende ed sarili tayo. Naipanengneng tayo ed si Jehova ya mantitiwala tayod sikato no walay eskedyul tayon man-personal study tan manpikasi. Tan agtayo papaulyanan so pipiaral tan panagpulong. Saratan so mamabiskeg na pananisia tayo. No gawaen tayo iratan, bendisyonan itayo nen Jehova tan tulongan to itayon manmatoor. Pinabiskeg toy Samson, tan seguradon pabiskegen to tayo met.

12. Anton desisyon so ginawa nen Samson ya aliwliway nansumpalan to, tan akin et duma iya ed saray akadkauna ya ginawa to?

¹² Aliwan perpekto si Samson ya singa sikatayo, kanian wala met iray pagkakataon ya aliway desisyon to. Walay ginawa ton desisyon ya aliwliway nansumpalan to ta agto ninonot so asainmin ya inter nen Jehova ed sikato. Nen medyo abayag met lan manlilingkor si Samson bilang ukom, ginmusto ed “sakey a bii diad Lawak na Sorek, a say ngaran to et Delila.” (Ukom 16:4) Antis ya ginmusto ed si Delila, walay nobya to dati ya biin Filisteo ya labay to lan asawaen. Pero sayan desisyon to et “nanlapu . . . ed si Jehova, ta Sikatoy manaanap na pankanawnawan onsumpad saray Filisteo.” Ag-abayag, linmoob si Samson ed abung na sakey ya paabang ya bii diad Gaza, ya syudad na saray Filisteo. Diad saman, sikatoy pinabiskeg nen Jehova kanian abagot to iray balbaleg ya puerta ya manproprotekta ed satan ya syudad. (Ukom 14:​1-4; 16:​1-3) Duma balet iyay impanggusto tod si Delila ta posible ya sayan bii et Israelita.

13. Antoy ginawa nen Delila ed si Samson?

¹³ Imbaga na saray Filisteo ed si Delila ya  ikdan day balbaleg ya kuarta no traidoren toy Samson. Tinanggap toy suhol da tan pinmayag ed labay dan nagawa. Akin et aglabat alikas nen Samson ya walay mauges ya plano to yan bii? Kasin abulag na panangaro tod si Delila kanian agla akapan-isip na duga? Aminpigan pinilit nen Delila si Samson ya ibaga toy sekreto na biskeg to, ya anggad agla akaanos kanian imbaga to. Agto la ninonot so pansumpalan na sayan ginawa to. Makapaermen ta aliwa labat ya biskeg to so abalang to, noagta pati say pabor nen Jehova.—Ukom 16:​16-20.

14. Antoy agawa ed si Samson lapud nantiwala ed si Delila?

¹⁴ Ansakisakit so agawa ed si Samson lapud nantiwala ed si Delila imbes ya diad si Jehova. Sikatoy inerel na saray Filisteo tan “sinukit da iray mata to.” Impriso da ed Gaza, amay syudad ya inekalan toy puerta, tan ginawa ran managgiling na ilik diad prisoan. Ag-abayag, nantitipon iray Filisteo tan nanliliket ira. Dakdakel so inyapay dan bagat ed si Dagon ya dios da. Panisiaan da ya ayan palson dios so tinmulong pian naerel day Samson. Inawit day Samson ed saman ya selebrasyon pian “walay panliketan” tan panelekan da.—Ukom 16:​21-25.

15. Antoy pakanengnengan ya nantiwala lamet si Samson ed si Jehova? (Ukom 16:​28-30) (Nengnengen so litrato ed apis.)

¹⁵ Tua, alingo-lingo si Samson ed desisyon to, pero agsinmuko. Sankanonot to nin siansia si Jehova tan no panon ton nasumpal so asainmin ya inter nen Jehova ed sikato. (Basaen so Ukom 16:​28-30.) Oniay impikasi to: “Jehova, ipangasim, . . . abuloyan mo ak ya ombales ed saray Filisteo.” Inebatan nen Jehova so kerew nen Samson, tan impawil To so ekstraordinaryon biskeg to. Kanian mas dakel ya Filisteo so apatey nen Samson ed sayan selebrasyon nen say karakel na apatey to antis to ’ya.

16. Antoy naaralan tayo ed ginawa nen Samson anggano alingo ed desisyon to?

¹⁶ Anggano alingo si Samson ed desisyon to tan inani toy resulta, ginawa to nin siansia so panlabayan nen Jehova. Kanian no makagawa tayo met na lingo ya lapud satan et kaukolan tayoy panangipetek o naekal tayod pribilehyo, agtayo komon ontatabang ed panlilingkor tayo ed si Jehova. Tandaan ya ag-itayo sukoan nen Aman Jehova. (Sal 103:​8-10) Anggano akagawa tayoy lingo, posible ya usaren itayo nin siansia nen Jehova ya singa ginawa to ed si Samson.

17-18. Diad eksperiensya nen Michael, antoy naaralan mo ya akapaseseg ed sika? (Nengnengen met so litrato.)

 ¹⁷ Imanoen so eksperiensya na kabataan ya brother, si Michael. Sikatoy maseseg ya payunir tan ministeryal a lingkor. Makapaermen balet ta akagaway lingo kanian nakal ed pribilehyo. Oniay imbaga to: “Mangapoy-apoy so seseg ko ed saman, pero aminpinsan ya asebseban nen akagawa ak na lingo. Amtak ya agto ak met itakwil nen Aman Jehova, pero naisip ko ya imposible lan ompawil ni may maap-apit ya relasyon kod sikato tan ompan agto ak lan balot usaren ed kongregasyon ya singa dati.”

¹⁸ Maong labat ta agsinmuko si Michael. Kuan to: “Ginawak so anggaay nayarian ko pian naapiger koy relasyon ko ed si Jehova. Lanang ak ya manpipikasi, manaaral, tan mandadalepdep.” Diad inlabas na panaon, awalaan lamet si Michael na pribilehyo ed kongregasyon. Akapawil ya payunir tan natan et elder la. Oniay intuloy to: “Amay suporta tan panamaseseg na saray agagi—lalo lad saray elder—aman so akatulong pian na-realize ko ya inar-aro ak nin siansia nen Jehova. Malinis la natan so konsiensiak. Apatunayan kon mismo ya peperdonaen nen Jehova iramay talagan magbabawi.” Makapantiwala tayo met ya no akagawa tayoy lingo, usaren itayo nin siansia nen Jehova. Tan bendisyonan to tayo basta pansagpotan tayon ipetek iray lingo tayo tan tuloytuloy tayon manmatalek ed sikato.—Sal. 86:5; Pro. 28:13.

19. Akin et apabiskeg ka ed alimbawa nen Samson?

¹⁹ Pigara labat so apantongtongan tayo ed sayan artikulo tungkol ed bilay nen Samson. Tua, aliwan perpekto si Samson tan wala ray agawaan ton lingo, singa samay inggusto to ed si Delila. Pero agsinmuko. Sankanonot to nin siansiay panlabayan nen Jehova, kanian agmet sinukoan nen Jehova. Inusar to lamet si Samson diad makapakelkelaw ya paraan. Diad pakanengneng nen Jehova, mabisbiskeg so pananisia nen Samson kanian impaipila to ed saray listaan na saray matoor ya lingkor ya nabasa ed Hebreo kapitulo 11. Maong labat ta maar-aroy Aman Jehova. Labalabay to tayon pabiskegen, lalo la no makapkapuy tayo. Singa si Samson, komon ta onia met so ipikasi tayo: “Jehova, ipangasim, nonot mo ak, tan pabiskeg mo ak.”—Ukom 16:28.