1. Antis ya ompatey si apostol Pedro, anto ni impagawa nen Jehova ed sikato?

 MATOOR ya nanlingkor si apostol Pedro diad loob na pigaran dekada. Inibaan toy Jesus ed ministeryo to, inggapo toy panagpulong ed saray aliwan Judio, tan nanlingkor bilang membro na mananguley ya ulop. Tan nen asingger lan manampot so bilay to, wala ni impagawa nen Jehova ed sikato. Nen manga 62-64 C.E., inusar nen Jehova si Pedro pian manggawa na duaran sulat ya natan et parte la na Biblia—say 1 tan 2 Pedro. Imbaga to ya makatulong komon irayan sulat to ed saray Kristiano anggano inatey la.—2 Ped. 1:​12-15.

2. Nen inmunan siglo, akin et kakkaukolan na saray Kristiano imay duaran sulat nen Pedro?

² Nen sinulatan nen Pedro iray Kristiano nen inmunan siglo, “nanduruman subok” so dadalanen da. (1 Ped. 1:6) Wala ray mauges ya totoo ya akaloob ed kongregasyon tan mangikakayat iray palson bangat. Iingganyoen da ni ingen iray agagi ya manggawa na imoral. (2 Ped. 2:​1, 2, 14) Sakey ni, saray Kristiano ya manaayam ed Jerusalem et asingger da lan nanengneng so “anggaan na amin a bengatla”—say pakaderal na satan ya syudad tan say mismon templo. (1 Ped. 4:7) Seguradon baleg so nitulong na saray sulat nen Pedro pian makapanmatoor iray Kristiano tan makapanparaan la ra parad saray mas mairap nin subok ya onsabi. b

3. Akin et importante ya aralen tayo iray sulat nen Pedro?

³ Anggano parad saray Kristiano nen inmunan siglo iray sulat nen Pedro, impila iratan nen Jehova ed Biblia pian pakaaralan tayo. (Roma 15:4) Nasusubok met natan so katooran tayo ran Kristiano. Normal labat ed saray totoo so manggawa na imoral.  Sakey ni, asingsingger tayo lan naeksperiensya so baleg ya kairapan—mas grabe ni itan nen say agawa nen inmunan siglo. Dakel so nabasan bilin tan panonot ed duaran sulat nen Pedro. Makatulong iratan pian maanos tayon talaranan so isabi na agew nen Jehova, nalabanan tayoy takot ed too, tan naipanengneng tayoy aralem a panangaro ed sakey tan sakey. Makatulong met irayan panonot ed saray elder pian epektibo dan nagampanan so responsabilidad da bilang pastol ed kongregasyon.

4. Base ed 2 Pedro 3:​3, 4, antoy nayarin mamakapuy na pananisia tayo?

⁴ Amayamay ya totoo natan so agmanisia ed saray propesiya ed Biblia. Wala ray mamabalaw ed sikatayo lapud abaybayag tayo la kunon ipupulong so isabi na anggaan pero anggapo met ni anggad natan. Ibabaga ni ingen na arum ya ag-itan nagawa. (Basaen so 2 Pedro 3:​3, 4.) No ibaga itan na sakey ya apulongan tayo, katrabaho, o kapamilya, ompan pandudaan tayo met la iray propesiya ed Biblia ya anggad onkapuy lay pananisia tayo. Pero walay imbaga nen Pedro ya makatulong pian agtayo naapektoan anggano ontan so ibaga na arum.

5. Antoy makatulong pian agtayo isipen ya mabaybayag ya onkilos si Jehova? (2 Pedro 3:​8, 9)

⁵ Iisipen na arum ya singa mabaybayag ya onkilos si Jehova, ta anggad natan et anggapo ni anggaan. Pian agtayo isipen ya matantan si Jehova, makatulong imay imbaga nen Pedro ya nabasa ed 2 Pedro 3:​8, 9. (Basaen.) Impanonot to ya say sanlibon taon et singa sakey agew labat ed si Aman Jehova. Maan-anos si Jehova. Agto labay ya walay anggan sakey ya naderal. Pero no onsabi la may inyeskedyul ton agew ya deralen iyan sistema, agto la itan i-postpone. Samboten tayo sirin ya ipulong so maong a balita ed interon dalin legan ya wala ni panaon.

6. Antoy gawaen tayo pian “sankanonot [tayon] lanang so isabi na agew nen Jehova”? (2 Pedro 3:​11, 12)

⁶ Imbaga nen Pedro ya importantin “sankanonot [tayon] lanang so isabi na agew nen Jehova.” (Basaen so 2 Pedro 3:​11, 12.) Antoy makatulong pian mabilabilay itan ed isip tayo? Inagew-agew tayon isipen iray bendisyon nen Jehova diad balon mundo. Imadyin mo pay sarilim ya mamangan na masustansia iran naakan. Nai-enjoy moy kaliberliber ta malinlinis tan preskoy dagem. Aabeten mo la ray kapamilyam tan kakaarom ya inmoli. Tan ibabangat mo ray totoo ya nambilay ed nanduruman panaon no panon ya agawa iray propesiya ed Biblia. No inagew-agew mo iratan ya imadyinen, agka onsawa ya mantalaran tan agmo isipen ya mabaybayag ni Armagedon. Sakey ni, “lapud amta [tayo] la” iray nagawa ed arapen, ag-itayo naibalang na saray palson managbangat.—2 Ped. 3:17.

7. Antoy epekto no ontakot tayo ed too?

⁷ No sankanonot tayoy agew nen Jehova, napakilos tayo met ya ipaamta ed arum so maong a balita. Pero no maminsan, ompan natatakot tayon manpulong ta iisipen tayoy ibaga o reaksion na arum. Agawa met itan ed si Pedro. Diad samay labi ya lilitisen si Jesus, amitlo ton imburi ya kabat toy Jesus lapud takot tod too. (Mat. 26:​69-75) Pero diad inlabas na panaon, alabanan toy takot to kanian oniay makpel ton imbaga: “Agyo nepeg a takotan imay tatakotan da, tan agkayo napapagaan.” (1 Ped. 3:14) On, kombinsido si Pedro ya sarag tayo met ya labanan so takot tayo ed too.

8. Antoy makatulong pian nalabanan tayoy takot ed too? (1 Pedro 3:15)

⁸ Pian nalabanan tayoy takot ed too, oniay  imbaga nen Pedro ya gawaen tayo: “Awat yod puso yo a say Kristo so Katawan tan sikatoy masanto.” (Basaen so 1 Pedro 3:15.) Antoy labay ton ibaga? Lanang tayon isipen ya si Jesu-Kristo so Katawan tan Ari tayo, tan anggapoy makatalo ed pakapanyari to. Kanian no nanenerbiyos o natatakot kan man-informal witnessing, imadyin moy Jesus ya walad trono to diad tawen tan apaliberan na milyon-milyon ya anghel. Tandaan mo imay imbaga nen Jesus ya walad sikato so “amin a pakauley ed tawen tan diad dalin” tan sikatoy kaiba tayo ed “amin ya agew anggad kaunoran a parte na sistema na mundo.” (Mat. 28:​18-20) Imbaga met nen Pedro ya dapat et “naynay [tayon] akaparaan” ya idepensa so pananisia tayo. Kasin labay moy man-informal witnessing diad eskuelaan, trabaho, o diad arum nin pagkakataon? Maabig no isip mo la ray situasyon ya posiblin nagawaan mo itan, tan iparaan mo la no antoy ibagam. Ipikasim ed si Jehova ya tulongan to ka ya nalabanan moy takot ed too.—Gawa 4:29.

9. Anto may agawa ya agnipanengneng nen Pedro so panangaro? (Nengnengen met so litrato.)

⁹ Tuloytuloy ya inaral nen Pedro ya ipanengneng so panangaro. Arengel ton mismo imay imbaga nen Jesus ya: “Iter kod sikayo so sakey a balon ganggan, a manaaroan kayo; no panon so impangarok ed sikayo, ontan met so panaaroan  yo.” (Juan 13:34) Pero wala may agawa ya iniwasan to iray agagi ya aliwan Judio tan agto labay so midungo ed sikara. Ontan so ginawa to ta mas ninonot toy ibaga na arum. Binano laingen nen apostol Pablo tan imbaga to ya amay ginawa nen Pedro et “pankunkunwari” o pansimpisimpitan. (Gal. 2:​11-14) Inawat nen Pedro so panangipetek tan akaaral ed lingo to. Diad tua, diad samay duaran sulat to, impurek to ya aliwan sapat ya nalikna tayon inaro tayo ray agagi. Dapat ipanengneng tayo met ya inar-aro tayo ra.

10. Antoy sekreto pian naipanengneng tayoy “masimoon ya aroan na sanaagi”? (1 Pedro 1:22)

¹⁰ Imbaga nen Pedro ya ipanengneng tayoy “masimoon ya aroan na sanaagi.” Aya may klase na panangaro ya agmankunkunwari. (Basaen so 1 Pedro 1:22.) Antoy sekreto pian naipanengneng tayo itan? Dapat et ‘matulok tayo ed katuaan.’ Labay ton ibaga, unoren tayo iray katuaan ya nanaaralan tayo ed Biblia. Singa bilang, ibabaga na Biblia ya “anggapoy lalabien na Dios.” (Gawa 10:​34, 35) Agtayo naunor imay ganggan nen Jesus ya manaaroan tayo no pipilien tayo labat no siopay panengnengan tayoy panangaro diad kongregasyon. Normal met labat ya wala ray mas ka-close tayo. Diad tua, anggan si Jesus et wala met iray apostol ya mas ka-close to. (Juan 13:23; 20:2) Anggaman ontan, bibilinen itayo nen Pedro ya say panangaro tayo komon et singa “aroan na sanaagi”—aya may liknaan ya ituturing tayon kapamilya so amin ya agagi tayo.—1 Ped. 2:17.

11. Antoy labay ya ibaga nen Pedro nen imbaga ton “manaaroan kayon maong manlapud puso”?

¹¹ Imbaga met nen Pedro ya “manaaroan [tayon] maong manlapud puso.” Say salitan inusar dia nen Pedro et ipapasabi toy ideya ya aroen tayo ray agagi anggano aliwan mainomay. Singa bilang, panon to no asakitan ka ed imbaga o ginawa na sakey ya agi? Ompan say unonan reaksion mo et labay moy ombawi. Pero naaralan nen Pedro ed si Jesus ya aglabay na Dios ya ombawi tayo. (Juan 18:​10, 11) Kanian oniay insulat to: “Agyo babalesen na mauges so mauges a ginawad sikayo odino iinsultoen imay mangiinsulto ed sikayo. Imbes, manggawa kayoy maabig ed sikato.” (1 Ped. 3:9) On, no talagan inaro tayo ray agagi, ipanengneng tayo nin siansia so kaabigan anggano asakitan tayo.

12. (a) No aralem so panangaro tayod saray agagi, antoy gawaen tayo? (b) Antoy naaralan mo ed video ya Pansiansiaen so Mabmablin Pankakasakey Tayo?

¹² Diad unonan sulat nen Pedro, inusar to met so ekspresyon ya “aralem a panangaro.” Say ontan ya panangaro et sasakoban to so “dakel a kasalanan.” (1 Ped. 4:8) Seguro, sankanonot nen Pedro imay impantongtong da nen Jesus tungkol ed panamerdona. Say amta nen Pedro, sikato lay sankamaongan ya too nen imbaga tod si Jesus ya perdonaen toy agi to ya “anggad maminpito.” Pero oniay kuan nen Jesus: “Aliwan anggad maminpito, noagta, anggad mamin-77.” (Mat. 18:​21, 22) Labay ton ibaga, anggapo dapat so limitasyon na pamerdona tayo. Sika ey, kasin no maminsan et nanairapan kan mamerdona? No on, agka komon nadidismaya. Nasasali tayon amin itan. Pero anggano nanairapan ka, gawam so anggaay nayarian mo ya mikareenan ed agim tan perdonam manlapud puso. c

13. Akin et subok no maminsan ed saray elder so pan-shepherding ed saray agagi?

¹³ Nen inmoli lay Jesus, oniay bilin to ed si Pedro: “Pastolan mo iray angkekelag a karnerok.” (Juan 21:16) Seguradon ag-iman alingwanan nen Pedro! No sakey kan elder, antam  ya parad sika met iyan bilin, tan sakey itan ed saray importantin asainmin mo. Pero diad tua, no maminsan et subok ed saray elder so man-shepherding ta dakdakel so responsabilidad da. Kaukolan dan asikasoen so pisikal, emosyonal, tan espiritual ya pankaukolan na pamilya ra. Idadaulo da so kimey a panagpulong. Ipaparaan da ray parte tan paliwawa da ed aral, asemblea, tan kombension. Say arum ya elder et membro na Hospital Liaison Committee odino ontutulong ira ed Local Design/Construction Department. Talagan busy iray elder!

14. Antoy manpakilos ed saray elder ya “pastolan [so] pulok na Dios”? (1 Pedro 5:​1-4)

¹⁴ Oniay bilin nen Pedro ed saray kapara ton elder: “Pastolan yoy pulok na Dios.” (Basaen so 1 Pedro 5:​1-4.) No sakey kan elder, amta mi ya inar-arom iray agagi tan labalabay mo ran i-shepherding. Pero no maminsan, ompan iisipen mo ya agmo la itan nagawaan ta busy kan maong o naksawan ka la. Antoy makatulong? Manpikasi kad si Jehova tan ibagam ed sikato ya labalabay mon i-shepherding iray agagi. Oniay insulat nen Pedro: “No walay manlilingkor, manlingkor komon ya akadepende ed biskeg ya iiter na Dios.” (1 Ped. 4:11) Siempre, wala ray problema na agagi ya aglan talagan nasolusyonan ed sayan sistema. Pero agmo komon lilingwanan ya anggano limitado labat so nagawaan mo, sarasarag iran tulongan na “manunan managpastol,” si Jesu-Kristo, natan tan anggad balon mundo. Say kekerewen met labat nen Jehova ed saray elder et aroen da iray agagi, i-shepherding da ra, tan “magmaliw [iran] alimbawa ed pulok.”

15. Antoy ginawa na sakey ya elder pian na-shepherding to iray agagi? (Nengnengen met so litrato.)

¹⁵ Si Brother William et abaybayag lan elder, tan gagawaen toy anggaay nayarian to ya i-shepherding iray agagi. Nen kagagapo na COVID-19 pandemic, nantongtongan na ulop na mamatatken ed kongregasyon da ya sinimba dan kontaken so kada agi ed grupo ra. Oniay imbaga nen Brother William ya rason no akin ya ginawa da itan: “Maslak ya agagi et wala labat ed abung tan nambabangil so naiisip dan negatibo.” No onkakapuy tan naproproblema kuno so sakey ya agi, ondedengel ya maong si Brother William pian naamtaan to no anto ray pakakaaburidoan to yan agi tan no  panon ton natulongan. Insan mananap na artikulo o video ed website tayo ya nausar to pian napaseseg to itan ya agi. Oniay imbaga to: “Talagan importante so man-shepherding, lalo la natan. Di ba, mamapasya tayo ed ministeryo pian natulongan tayo ray totoo ya nakabat day Jehova? Kaukolan tayo met sirin so mamasya ed panag-shepherding pian natulongan tayo ray agagi ya mansiansia ed katuaan.”

16. Diad saray leksion ya naaralan tayo ed duaran sulat nen Pedro, dinan so labay mon iyaplika?

¹⁶ Pigara labat ya leksion so apantongtongan tayo ed duaran sulat nen Pedro. Legan tayon pantotongtongan iraya, seguro a-realize mo ya wala ray kailangan mon i-improve ed sarilim. Singa bilang, kasin labay mon i-goal ya mas mabetbet mon dalepdepen iray bendisyon ed balon mundo? Kasin goal mo met so man-informal witnessing diad eskuelaan, trabaho, o diad arum ni ran pagkakataon? Kasin wala ni ray naiisip mon paraan ya mas naipanengneng moy aralem ya panangaro ed saray agagi? Sikayo ran elder, kasin apakilos kayo ya iprayuridad so pan-shepherding tan gawaen yo itan ya mabulbulos tan agnapapasootan? No alikas mo ed sayan impanaral tayo ya wala ra manayay kakapuyan mo, agka komon nadidismaya. Tandaan mo ya agaylay “kaabigan na Katawan [a Jesus]” kanian tulongan to ka. (1 Ped. 2:3) Oniay impaseguro nen Pedro: “Say Dios . . . et sumpalen toy pangipapasal tod sikayo. Gawaen to kayon mapekder, gawaen to kayon mabiskeg, iletneg to kayon malet.”—1 Ped. 5:10.

17. Antoy resulta no agtayo onsuko tan paipasal tayo ed si Jehova?

¹⁷ Diad primero, say pakalikna nen Pedro et agto kanepegan so anggan onabay ed Anak na Dios. (Luc. 5:8) Pero diad tulong nen Jehova tan Jesus, akapanmatoor si Pedro bilang disipulo nen Kristo. Kanian sikatoy akaloob ed “andi-anggaan a Panarian na Katawan tan Manangiliktar tayo a si Jesu-Kristo.” (2 Ped. 1:11) Balbaleg itan ya premyo! No agka met onsuko ya singa si Pedro, tan paipasal kad si Jehova, awaten mo met so premyon bilay ya andi-anggaan. On, manmatoor tayo labat ta ‘amta tayon say pananisia tayo et manresulta ed kililiktar.’—1 Ped. 1:9.