1. Antoy reaksion nen Pedro nen akarel ira na dakdakel ya sira lapud ginawan milagro nen Jesus?

 SANLABI la ya mansisigay si Pedro tan saray kaiba to, pero anggapon balot so narel dan sira. Abiglay Pedro nen imbaga nen Jesus ya: “Iyakar mo diman ed aralem, tan ipelag yo iray iket yo pian makarel kayo.” (Luc. 5:4) Manaalangan si Pedro pero inunor toy imbaga nen Jesus. Nen impelag da may iket, ngalngali napilat ed karakel na sira! Nen a-realize nen Pedro tan saray kaiba to ya milagro iman, “nikelawan [iran] maong.” Oniay imbaga nen Pedro ed si Jesus: “Katawan, arawian mo ak, ta sakey ak a toon makasalanan.” (Luc. 5:​6-9) Ompan say pakalikna nen Pedro et agto kanepegan so anggan onabay ed si Jesus kanian ontan so imbaga to.

2. Akin et marakep no aralen tayoy alimbawa nen Pedro?

² Duga may imbaga nen Pedro ya sikatoy “toon makasalanan.” Nabasa tayod Biblia ya wala ray imbaga tan ginawa to ya pagbabawian to lanlamang. Seguro, maka-relate ka ed si Pedro. Kasin walay aliwliwan ugalim ya labalabay mo la komon ya naekal? Kasin walay kakapuyan mo ya abaybayag mo lan lalabanan? No on, marakep no aralen moy alimbawa nen Pedro ta seguradon napaseseg ka. Isip mo pa: Akin kasi et impaisulat nen Aman Jehova diad Biblia iray lingon agawaan nen Pedro? Sarag to pan agla iratan ipila ed Biblia, pero impairekord to ta amta ton pakaaralan tayo. (2 Tim. 3:​16, 17) Wala ray kakapuyan ya nilabanan nen Pedro, pero agsinmuko kanian inar-aro nen Aman Jehova. Ar-aroen itayo met nen Aman Jehova anggano wala ray kakapuyan tayo, basta ag-itayo onsuko ya gawaen so duga.

3. Akin et importante ya agtayo onsusuko?

³ Akin et agtayo onsuko ya gawaen so duga? Walay kasabihan ya, “Practice makes perfect.” Singa bilang, say sakey ya marundunong  ya gitarista et pigaran taon ton inaral so man-gitara. Nen kakkagapo to ni manaral, seguradon dakdakel so lingo to. Pero lapud nan-practice lan nan-practice, nan-improve ya anggad nagmaliw ya marundunong. Nen marundunong la, kasin aglan balot nalingo? Andi. Nalingo met ni no maminsan, pero ag-onsuko. Itultuloy toy man-gitara ta labay toy man-improve ni. Singa ontan met ed sikatayo ran Kristiano. Anggano alabanan tayo la so sakey ya kakapuyan, agto labay ya ibagan agtayo lan balot naulit. No nalingo tayo lamet, itultuloy tayo labat so milaban ed kakapuyan tayo. Amin tayo pa et nalilingo. Wala ray ibabaga o gagawaen tayo ya pagbabawian tayo lanlamang. Pero no agtayo onsuko ya gawaen so duga, tulongan itayo nen Jehova pian tuloytuloy tayon onaligwas. (1 Ped. 5:10) Pantongtongan tayo sirin so alimbawa nen Pedro tan no panon ya agsinukoan nen Jesus pian napakilos tayo ya mansiansian aktibo ed panaglingkor anggano wala ray lalabanan tayon kakapuyan.   

4. Base ed Lucas 5:​5-10, antoy pakanengneng nen Pedro ed sarili to, pero antoy imbaga nen Jesus ed sikato?

⁴ Agla indetalye nen Pedro no akin ya imbaga ton sikatoy “toon makasalanan” tan no anto iratay kasalanan to. (Basaen so Lucas 5:​5-10.) Seguro wala ray agawaan ton seryoson lingo. Alikas nen Jesus ya natatakot si Pedro ta say pakalikna to et agkarapat-dapat ya magmaliw ya disipulo to. Pero walay tiwala nen Jesus ya sarag nen Pedro so manmatoor. Kanian oniay imbaga nen Jesus: “Agka la natatakot.” Simpli labat so imbaga to pero balbaleg so epekto tod si Pedro. Ag-abayag, tinaynan nen Pedro tan say agi ton si Andres so negosyo dan panagsigay tan akila rad si Jesus diad pampupulong to. Dakel ya bendisyon so naawat da lapud satan ya desisyon da.—Mar. 1:​16-18.

5. Anto ray bendisyon ed si Pedro ta nandesisyon ya magmaliw ya disipulo nen Jesus?

⁵ Dakdakel so makapakelaw tan maliket ya eksperiensya nen Pedro nen nagmaliw ya disipulo nen Jesus. Anengneng ton mismo ya pinaabig nen Jesus iray mansasakit tan saray aselepan na demonyo, tan binilay to ni ingen iray inatey. b (Mat. 8:​14-17; Mar. 5:​37, 41, 42) Diad sakey met ya pasingawey, patiuna lan anengneng nen Pedro so gloria nen Jesus no magmaliw lan Ari ed Panarian na Dios. Sakey itan ed saray agnalinglingwanan nen Pedro ya agawad bilay to. (Mar. 9:​1-8; 2 Ped. 1:​16-18) Agto iratan anengneng no agto pinili so  magmaliw ya disipulo. Maong labat ta nilabanan to iray iisipen ton negatibo! No andi, asayang to iratan ya amin.

6. Kasin aminpinsan ya alabanan nen Pedro iray kakapuyan to? Ipaliwawa.

⁶ Kasin nakal ya aminpinsan iray kakapuyan nen Pedro nen anengneng to irayan amin? Andi. Anggano abayag to lan kaiba si Jesus, mapatpatnag ya wala ni ran siansiay nilabanan ton kakapuyan. Singa bilang, nen imbaga nen Jesus ed saray apostol ya sikatoy manirap tan ompatey ta atan so akapropesiya ed Biblia, kinmontra si Pedro tan imbaga ton ag-itan nagawa. (Mar. 8:​31-33) Paulit-ulit met ya nankolkolan nen Pedro tan arum nin apostol no siopay sankaimportantian ed sikaran amin. (Mar. 9:​33, 34) Tan diad samay labi antis ya pateyen si Jesus, basta labat sinigbat nen Pedro so layag na sakey ya aripen. (Juan 18:10) Diad saman met lanlamang ya labi, adaeg na takot si Pedro, kanian amitlo ton imburi ya kaaro toy Jesus. (Mar. 14:​66-72) Pagbabawian ton maong so ginawa to kanian inmakis ya ampaipait.—Mat. 26:75.

7. Nen inmoli lay Jesus, anton tsansa so inter tod si Pedro?

⁷ Anggano makapadismaya so ginawa nen Pedro, inaro nin siansia nen Jesus. Nen inmoli lay Jesus, inikdan toy Pedro na tsansa ya paneknekan toy panangaro tod Katawan to. Inikdan to ni ingen si Pedro na asainmin ya pastolan iray karnero to. (Juan 21:​15-17) Mabulos itan ya ginawa nen Pedro. Diad samay agew na Pentecostes, sakey si Pedro ed saray sankaunaan ya alanaan na masanton espiritu diad Jerusalem.

8. Antoy aliwliwan ginawa nen Pedro nen walad Antioquia?

⁸ Anggano alanaan la na masanton espiritu si Pedro, wala ni ran siansiay kakapuyan to. Nen 36 C.E., anengneng ya mismo nen Pedro ya alanaan na masanton espiritu si Cornelio anggano aliwan Judio. Ebidensya iman ya “anggapoy lalabien na Dios” tan nayari lan magmaliw ya Kristiano so amin ya lahi. (Gawa 10:​34, 44, 45) Manlapu lad saman, midudungo lay Pedro ed saray aliwan Judio. Agto ’tan balot ginawa nensaman. (Gal. 2:12) Pero wala ni ran siansiay agagin Judio ya mangibabaga ya agnayarin maniba ya mangan iray Judio tan arum ya lahi. Nen binmisita ed Antioquia so arum ed sarayan agagin Judio, iniwasan nen Pedro so midungo ed saray agagin dumay lahi ra, ta natatakot ed no antoy ibaga na saray bisita. Anengneng nen apostol Pablo iyan agawa tan agto nitepel so “pankunkunwari” nen Pedro, kanian impetek to diad arapan na agagi. (Gal. 2:​13, 14) Pero anggano walay onian agawa, nansiansian aktibo ed panaglingkor si Pedro. Antoy akatulong ed sikato?

9. Base ed Juan 6:​68, 69, akin et nibaga tayon matoor si Pedro?

⁹ Matoor si Pedro, kanian anggan antoy nagawa, desidido ya agbalot ontunda ed itutumbok tod si Jesus. Walay agawa ya asubok so katooran nen Pedro. Aminsan, walay imbaga nen Jesus ya ag-atalosan na saray disipulo. (Basaen so Juan 6:​68, 69.) Imbes ya tepetan day Jesus no antoy labay ton ibaga, adismaya so dakel ya disipulo tan agla ran balot akiulop ed sikato. Si Pedro balet ey? Sikatoy nanmatoor ta amta to ya “walad [si Jesus] iray salita a mangitonton ed bilay ya andi-anggaan.”

10. Panon ya impanengneng nen Jesus ya walay tiwala tod si Pedro? (Nengnengen met so litrato.)

¹⁰ Maan-anos si Jesus ed si Pedro. Diad samay labi antis ya ompatey si Jesus, amta to pa ya sikatoy taynanan nen Pedro tan arum nin apostol. Pero anggano amta nen Jesus ya onman so nagawa, imbaga to ya ombiskeg lamet  ed espiritual si Pedro tan mansiansian matoor. (Luc. 22:​31, 32) Natatalosan nen Jesus ya “magunaet so espiritu, balet maletey so laman.” (Mar. 14:38) Kanian anggano sikatoy imburi nen Pedro, agto sinukoan. Nen inmoli lay Jesus, nampanengneng ed si Pedro. Mapatnag ya kinatongtong toy Pedro ya sikaran dua labat. (Mar. 16:7; Luc. 24:34; 1 Cor. 15:5) Seguradon atambal so ermen nen Pedro tan binmiskeg so liknaan to!

11. Antoy ginawa nen Jesus pian ipaseguro ed si Pedro ya sikatoy agbalot paulyanan nen Jehova?

¹¹ Nen inmoli si Jesus, walay ginawa to pian ipaseguro ed si Pedro ya sikatoy agbalot paulyanan nen Jehova. Nanmilagro lamet si Jesus pian makarel na dakel ya sira si Pedro tan saray kaiba ton apostol. (Juan 21:​4-6) Lapud sayan milagro, tinmatak ed isip nen Pedro ya main-inomay nen Jehova ya iter iray materyal ya pankaukolan to. Seguro anonotan to may imbaga nen Jesus ya taryaan nen Jehova iramay iyuuna da so Panarian. (Mat. 6:33) Akatulong iratan ya panamaseguro pian tuloytuloy ya iyuna nen Pedro so panagpulong ya kimey, aliwan say panagsigay. Nen Pentecostes 33 C.E., makmakpel ya nansalita si Pedro tungkol ed Kristo, kanian manga 3,000 so angawat ed maong a balita tan abautismoan. (Gawa 2:​14, 37-41) Tan ag-abayag, tinulongan to met iray Samaritano tan arum ni ran lahi pian magmaliw iran Kristiano. (Gawa 8:​14-17; 10:​44-48) On, inusar nen Jehova si Pedro pian naamtaan na amin a klase na totoo so katuaan tan magmaliw iran parte na Kristianon kongregasyon. Balbaleg iyan pribilehyo!

12. Panon ya makatulong so alimbawa nen Pedro no walay kakapuyan tayo ya abaybayag tayo lan lalabanan?

¹² Si Jehova ya mismo so ontulong ed sikatayo pian agtayo onsuko. Amta to ya aliwan mainomay ya labanan iray kakapuyan tayo, lalo la no pawil-pawil itan. No maminsan, wala ra ingey kakapuyan tayo ya mas mairap ya labanan no ikompara ed saray kakapuyan nen Pedro. Pero tandaan tayo ya ikdan itayo nen Jehova na biskeg pian ag-itayo onsawan milaban. (Sal. 94:​17-19) Singa bilang, walay brother ya datin homoseksual. Nen naamtaan toy katuaan, inuman toy bilay to tan intunda to la so amin ya imoral ya kagagawa to. Pero inamin to ya no maminsan et ompapawil nin siansia iray makalaman ya pilalek to. Anto balet so akatulong ed sikato pian ag-onsukon milaban  ed kakapuyan to? Oniay imbaga to: “Papabiskegen ak nen Jehova . . . Apaneknekan kon mismo ya diad tulong na espiritu nen Jehova . . . , sarag tayoy manmatoor. Misatsalamat ak ta anggano wala ray lalabanan kon kakapuyan, uusaren ak nin siansia nen Jehova tan tuloytuloy to ak ya papabiskegen.”

13. Panon tayon naalig so alimbawa nen Pedro ya singa nabasa ed Gawa 4:​13, 29, 31? (Nengnengen met so litrato.)

¹³ Singa apantongtongan tayo nen niman, aminpigan adaeg si Pedro na takot ed too. Pero nen impikasi tod si Jehova ya naipanengneng to komon so pakpel, alabanan toy takot to. (Basaen so Gawa 4:​13, 29, 31.) Singa si Pedro, sarag tayo met ya labanan so takot ed too. Ontan so agawa ed si Brother Horst Henschel legan na uley na Nazi Germany nen World War II. Nen ugaw ni, aminpiga kunon a-pressure diad eskuelaan kanian apilitan ya ibaga so, “Heil Hitler!” Pero imbes ya pantamian na atateng to, nampikasi ra tan kinerew dad si Jehova ya ikdan to komon na pakpel si Horst. Diad tulong nen Aman Jehova tan saray atateng to, alabanan lanlamang nen Horst so takot tod too. Oniay imbaga to: “Aliknak ya agak pinaulyanan nen Jehova.” c

14. Antoy gawaen na saray maaron pastol pian napaseseg da iray agagin onkakapuy so liknaan da?

¹⁴ Ag-itayo sukoan nen Jehova tan Jesus. Nen imburi nen Pedro si Jesus, walay duara ya pampilian to: Kasin ontunda la bilang disipulo nen Jesus, odino ipetek toy lingo to tan ag-onsuko? Antis ni man ya agawa, ‘masimsimoon lan impikasi nen Jesus ya agkomon onkapuy so pananisia nen Pedro.’ Imbaga nen Jesus ed si Pedro itan ya pikakasi to. Onia ingen so bilin tod si Pedro: “Sano akapawil ka la, pabiskeg mo iray agagim.” (Luc. 22:​31, 32) Lapud satan ya imbaga nen Jesus, aliklikna nen Pedro ya walay  tiwala nen Jesus ed sikato. No wala tayo met ed situasyon ya singa labay tayo lay ontundan manlingkor, sarag ya usaren nen Jehova iray maaron pastol pian napaseseg tayon manmatoor. (Efe. 4:​8, 11) Ontan so gagawaen na sakey ya abayag lan elder, si Brother Paul. No naamtaan to kuno ya say sakey et ngalngali la onsuko, papasesegen to ’tan ya agi ya isipen to no panon ya inyasingger nen Jehova ed katuaan. Insan to ipanonot ya matoor so panangaro nen Jehova, kanian agton balot sukoan iyan agi. Oniay imbaga to: “Dakel lay anengneng kon agagi ya kinmapuy so liknaan da, pero diad tulong nen Jehova, ag-ira sinmuko.”

15. Panon ya nanengneng ed alimbawa nen Pedro tan Horst Henschel ya tua so ibabaga na Mateo 6:33?

¹⁵ Inter nen Aman Jehova iray materyal ya pankaukolan nen Pedro tan arum ya apostol. Seguradon iter to met iray materyal ya pankaukolan tayo no iyuna tayod bilay tayo so Panarian. (Mat. 6:33) Si Brother Horst Henschel ya abitla nen niman et labay to komoy manpayunir kayari World War II. Pero lapud mair-irap so bilay da, inisip to ya ompan agto nasuportaan so sarili to tan makatunda lanlamang. Sinubok to balet si Aman Jehova kanian sakey simban pinmaway legan na bisita na manangasikaso na sirkito. Kayari na bisita, abigla si Brother Henschel ta walay sobre ya inderew ed sikato na manangasikaso na sirkito. Anggapoy akaiyan no siopay nanlapuan to. Baleg ya kantidad so karga to may sobre. Pigaran bulan ya allowance to la itan no bilang ta manpayunir. Inisip to kuno ya regalo itan nen Jehova ed sikato tan singa ibabaga nen Jehova ya agton balot paulyanan. Lapud saman ya agawa, apaseseg si Brother Henschel ya lanang ya iyuna so Panarian ed bilay to.—Mal. 3:10.

16. Akin et pakaaralan tayo so alimbawa nen Pedro tan samay duaran sulat to ya akarekord ed Biblia?

¹⁶ Nanonotan yo may imbaga nen Pedro ed si Jesus ya, “Katawan, arawian mo ak”? Seguradon misatsalamat si Pedro ta ag-itan ginawa nen Jesus. Inanosan nen Jesus ya impasal si Pedro, kanian nagmaliw ya matoor ya apostol tan maong ya alimbawa ed saray Kristiano. Say impangi-train nen Jesus ed sikato et impairekord nen Aman Jehova ed Biblia ta pakaaralan tayo. Dakel so naaralan nen Pedro legan ton kaiba si Jesus. Sarayan naaralan to et impila to diad samay duaran sulat to ed saray kongregasyon nen inmunan siglo, tan natan et kabiangan la na Biblia. Diad ontumbok ya artikulo, pantongtongan tayo so pigaran bilin ya nabasa ditan tan no panon tayon naiyaplika iratan natan.