Inyanak ak nen 1934. Taga Switzerland iray atateng ko, pero inmalis irad Timmins, sakey ya baley ed Ontario, Canada ya walay minaan to. Nen manga 1939, manbabasa lay nanay ko na magasin ya Watchtower tan ginapoan da met lay miaral ed Saray Tasi nen Jehova. Kada no mimiaral si nanay, aawiten da kamin sanaagi. Ag-abayag, nagmaliw ya Tasi nen Jehova si nanay ko.

Ag-agustoan nen tatay ko iman ya desisyon da. Pero inar-aro nen nanay ko so katuaan tan desidido iran manmatoor ed si Jehova. Ontan so ginawa ra anggano imbawal na gobierno na Canada so kimey na Saray Tasi nen Jehova diad gapo na 1940. Tan anggano ansasakit so ibabaga nen tatay ed si nanay, maomaong tan marespeto ni ran siansia ed sikara. Lapud maong ya alimbawa ra, apakiwas kamin sanaagi ya manlingkor met ed si Jehova. Makapalikliket ta kalkalnan linmemek so puso nen tatay ko tan balibali lay panagtrato dad sikami.

Nen Agosto 1950, inmatendi ak ed Theocracy’s Increase Assembly diad New York City. Apaseseg ak ya maong ed saray agagin akabat ko ya nanlapud nanduruman bansa, ontan met ed saray interbyu ed saray nan-graduate ed Gilead. Lapud satan, lalo ak ya apakiwas ya manlingkor ya full-time. Kanian kasempet kod sikami, nan-apply ak ya tampol bilang regular payunir. Pero sinulatan ak na branch tan say kuan da et manpabautismo ak ni. Kanian nen Oktubre 1, 1950, nampabautismo ak. Kayari labat na sakey bulan, naaprubaan ak bilang regular payunir. Say sankaunaan ya asainmin ko et diad baley na Kapuskasing. Arawrawi itan ed panaayaman ko.

 Nen 1951, inimbitaan na branch iray agagin makasalitay French ya ontulong ed teritorya diad Quebec ya saray totoo et mansasalitay French. Dagdaiset so Tasi ditan kanian kakkaukolan day tulong. Amtak so mansalitay French tan English kanian inawat ko may imbitasyon, tan niyasain ak ed Rouyn. Anggapon balot so kabat ko diman. Basta linma ak diman ya awi-awit ko may address ya inter dad siak, ya singa imbagak nen niman. Pero balibali nansumpalan to ta nagmaliw kamin malet ya sankaaro nen kuya Marcel tan malikeliket ak ya nanlingkor ed loob na apat taon diad Quebec. Insan ak nagmaliw ya espisyal payunir.

Legan ya wala ak ed Quebec, akaawat ak na imbitasyon ya manaral ed koma-26 ya klase na Gilead School diad South Lansing, New York. Nan-graduate ak nen Pebrero 12, 1956, tan niyasain ak ed Ghana, b West Africa. Pero antis ak ya onla diman, pinmawil ak nid Canada pian ayosen iray papeles parad pambiahek. Say amtak, manga duara odino taloran simba ak labat ed Canada.

Pero asabik so pitoran bulan ed Toronto lapud panaalagar ko ed saray papeles ko. Legan na panaalagar ko, pinatuloy ak na pamilyan Cripps tan ditan ko akabat so anak da, si Sheila. Agustoan mi sakey tan sakey. Nen man-propose ak la komon ed sikato, sinmabi may visa’k. Impikasi min maong iya nen Sheila, tan nandesisyon kami ya ontuloy ak ed asainmin ko. Pero apantongtongan mi ya sulatan mi nin siansiay sakey tan sakey, tan alagaren mi no kapigan so dugan panaon na pankasal mi. Aliwa itan ya mainomay, pero anengneng mi lanlamang ya aman so duga.

Kayari na sakey bulan ya impanbiahek ed tren, barko, tan eroplano, akasabi ak ed Accra, Ghana. Aturo ak ditan ya manlingkor bilang district overseer. Kanian kaukolan koy ombiahe ed interon Ghana, ontan met ed Ivory Coast (ya natan et Côte d’Ivoire) tan Togoland (ya natan et Togo). No manbiabiahe ak, say maslak ya uusaren ko et amay luganan ya gaway branch. Na-enjoy ko man ya asainmin ko!

 No Sabado tan Simba, naiikdan ak na betang ed saray circuit assembly. Anggapo ni ray Assembly Hall ed saman. Kanian nanggawa iray agagi na napan-asemblean mi ya gawad kawayan tan say tarong to et gawad pinaor. Baleg so nitulong to ’tan pian agnaagew iray inmatendi. Ontan met, lapud anggapoy ref, wala ray aka-ready ya mabilay ya ayayep ya pakgeran tan iluto labat no pakanen la ray inmatendi.

Wala ray makapalek tan agmi nalingwanan ya agawa ed sarayan assembly. Say sakey et amay nen manpapaliwawa si Brother Herb Jennings, c sakey met ya misionero. Legan ya manpapaliwawa, walay nablos ya baka tan batik ed arap na stage! Tinmunday Brother Herb ed pampapaliwawa to. Agto amtay arapen to may baka. Pero maong labat ta walay apatiran mabiskeg ya brother ya angerel ed samay baka. Kanian mantipak iray agagi!

Legan ya anggapoy assembly, oonla kamid saray asingger ya baryo pian ipabantay may video tayo ya The New World Society in Action. Walay awit kon projector tan amputin abel. Itataker ko may abel ed duaran poste odino duaran kiew. Labalabay na saray tagad man imay video. Maslak ed sikara et diad saman labat akabantay na video. Maksil so tipak da kada no walay nanengneng dad video ya nababautismoan. Baleg so nitulong to man pian natalosan da ya walay pankakasakey tayo ran lingkor nen Jehova anggano nanduruman bansa so kulaan tayo.

Kayari na ngalngali duay taon kod Africa, eksayted ak ya onatendi ed 1958 ya internasyonal ya kombension diad New York City. Malikeliket ak ta anengneng ko lamet si Sheila, ya nanlapu nid Quebec ta manlilingkor diman bilay espisyal payunir. Abayag ya diad sulat kami labat mantotongtong. Pero natan ya akapannengneng kami lamet, imbagak ya mankasal kami la. Pinmayag si Sheila! Sinulatan koy Brother Knorr, d tan tinepet ko no sarag nen Sheila so manaral ed Gilead pian naibaan to ak ya manlingkor ed Africa. “Sarag to,” kuan nen Brother Knorr. Akasabin siansiay Sheila ed Ghana. Kanian nen Oktubre 3, 1959, nankasal kami ed Accra. Aliklikna mi ya benendisyonan kami nen Jehova lapud inyuna mid bilay mi so panaglingkor ed sikato.

Nen 1961, niyasain kami nen Sheila ed bansan Cameroon. Kinerew da ya ontulong kami pian wala met lay branch office tayo ditan, kanian bip-busy ak. Lapud siak so branch servant, dakel so kaukolan kon aralen. Insan nen 1965, nanlukon si Sheila. Diad tua, aminen mi ya agmi naimadyin ya magmaliw kamin ateng. Pero nen niparaan mi lay sarili mi parad sayan balon responsabilidad tan nen wala lay plano min ompawil ed Canada, walay ansakisakit ya agawa.

Nakalan si Sheila. Imbaga to may doktor ya laki may lukon to. Anggano masulok lan 50 taon so linmabas, agmi iman nalingwanan. Apektado kamin maong ed saman ya agawa, pero agmi tinaynan so asainmin mi ta inar-aro mi itan.

Diad Cameroon, mabetbet ya napasegsegang iray agagi lapud neutralidad da. Mas onggragrabe itan no panaoy eleksion. Nen Mayo 13, 1970, agawa may tatakotan mi. Imbawal na gobierno so amin ya kimey na Saray Tasi nen Jehova. Amay balibalin branch office tayo ya limaran bulan ni labat ya nausar et kinompiska na gobierno. Anggapo ni sakey simba, amin kamin misionero et impa-deport da. Mair-irap ya taynan iray agagi ta naar-aro mi la ra tan agmi amta no antoy nagawa ed sikara diad ontutumbok iran agew.

Imbaki da kami ed France, tan anem bulan mi diad branch office. Anggano wala ak lad France, gagawaen ko nin siansiay anggaay nayarian ko pian natulongan iray agagi ed Cameroon. Nen Disyembre, diad saman lanlamang ya taon, imbaki da kami ed branch na Nigeria. Diad saman et say branch la ed Nigeria so mangaasikaso ed kimey diad Cameroon, kanian mas natulongan ko la ray agagi ditan. Malikeliket kamin inawat na saray agagid Nigeria tan na-enjoy mi impanlingkor mi ditan ed pigaran taon.

Nen 1973, walay kaukolan min desisyonan nen Sheila. Walay graben sakit to. Legan ya wala kamid kombension diad New York, manakis si Sheila tan kuan tod siak, “Agko la sarag. Makapkapuy lay laman ko.” Saniba kami nen Sheila ya nanlingkor ed West Africa diad masulok ya 14 ya taon. Pap-proud ak ed matoor ya impanlingkor to. Pero lapud kipapasen to, wala ray kaukolan min gawaen ya pananguman. Kayari min nantongtong tan nampikasi ya masimsimoon, nandesisyon kami ya ompawil ed Canada ta ditan et mas naasikasoy Sheila. Amay taynan mi asainmin mi bilang misionero tan agla manlingkor ya full-time, aman la so sankairapan tan sankasakitan ya desisyon ya ginawa mi.

Kasabi mid Canada, nantrabaho ak ed samay abaybayag lan kaarok ya walay lakoan toy luganan diad sakey ya baley ed Toronto. Nanrenta kami panayaman mi tan angaliw kami ray second-hand ya gamit, kanian agkami akautang ed inlipat mi. Labay min pansiansiaen ya simpli labat so bilay mi ta maniilalo kami ya makapawil kami nin siansia ed full-time ya panaglingkor. Abigla kami ta ontan ya tua so agawa!

Ginmapo ak ya man-volunteer kada Sabado ed pangipapaalagey na balon Assembly Hall diad  Norval, Ontario. Insan nen nipaalagey la itan, aturo ak bilang Assembly Hall overseer. Diad saman et kalkalna lan onkakasil so laman nen Sheila tan pakalikna mi et sarag to ak lan suportaan ed sayan balon asainmin. Kanian inmalis kami ed apartment na Assembly Hall nen Hunyo 1974. Malikeliket kami ta akapawil kami lamet ed full-time ya panaglingkor!

Misatsalamat kamid si Jehova ta tuloytuloy lan onaabig si Sheila. Kayari duay taon, akaawat kami na asainmin ya manlingkor ed sirkito diad Manitoba, sakey ya probinsya ed Canada ya grabe so betel no winter. Anggano ambetebetel ditan, sankalikna mi ampetapetang ya panangaro na saray agagi. Naaralan mi ya ag-importante no iner so panlilingkoran tayo, say importante et amay iiter tayoy sankaabigan tayo ed si Jehova anggano iner so kulaan tayo.

Kayari pigaran taon ya impankimey mid sirkito, naimbitaan kamin manlingkor ed Bethel diad Canada nen 1978. Wala may inkagawa ya asakisakitan ak ya maong, pero walay naaralan kon leksion ed satan. Nen walay special meeting ed Montreal, niyasain ak ya manpaliwawa ed sakey tan kapalduan oras ed lenguahen French. Adismaya ak ta ag-iimanoen na saray agagi so paliwawak. Tan kayari to man, walay brother ed Service Department ya nankonseho ed siak. Diad tua, aminen ko ya aliwa ak ya marundunong ya manpaliwawa. Pero imbes ya awaten ko may konseho to may brother, binmarong ak. Akapan-alaan kami salita. Mansyodot ak ta puro lingok so impaimano to, agto ak labat anggan kinomendaan. Say lingok balet, nansinti ak ed samay brother ya nankonseho ed siak tan nampokus ak ed paraan na impankonseho to.

Kayari na pigaran agew, kinatongtong ak na sakey ya membro na Branch Committee nipaakar ed saman ya agawa. Imbagak ya aliwa may inkiwas ko tan pagbabawian ko man ya ginawak. Insan ak linmad samay brother ya nankonseho ed siak pian onkerew na perdona ed sikato. Maar-aro ton inawat so inkerew koy perdona. Lapud sayan agawa, naaralan ko ya importantin maong so inkamapaabeba, tan agko man balot nalingwanan! (Pro. 16:18) Aminpigak ya impikasid si Jehova iyan agawad siak, tan desidido ak ya agko lan balot uliten iman no bilang ta wala lamet so mankonseho ed siak.

Masulok lan 40 taon ko diad Bethel ed Canada. Manlapu la nen 1985, manlilingkor ak bilang membro na Branch Committee. Nen Pebrero 2021, nampainawa lay inad-arok ya asawa ya si Sheila. Naiiliw kon maong! Natan et wala met la ray sakit ko. Pero lapud busy ak tan maliket ak ya manlilingkor ed si Jehova, ‘agko nalilikas so ilalabas na saray agew.’ (Ecl. 5:20) Anggano dakel so subok ya dinalan ko, anggapo iratan no ikomparad liket ya impalikna nen Jehova ed siak. Lapud inyunak si Jehova ed bilay ko tan 70 ya taon ak lan manlilingkor ed sikato ya full-time, dakdakel ya bendisyon so naawat ko. Ipipikasik ya iyuna met komon na saray kabataan si Jehova ed bilay da. Ta no ontan so gawaen da, seguradon dakdakel met ya bendisyon so naawat da tan nalikna da met so tuan liket ya posible labat no manlingkor ira ed si Jehova.