1-2. Antoy sakey ya rason akin et maliket iray lingkor na Dios? (Santiago 1:​22-25)

 LABAY nen Jehova tan Jesus ya maliket tayo. Oniay nabasad Salmo 119:2: “Maliket iramay manguunor ed saray panonot [nen Jehova], saramay manaanap ed sikato diad interon puso ra.” Onia met so imbaga nen Jesus: “Maliket iramay onderengel tan manusumpal ed salita na Dios!”—Luc. 11:28.

² Dakel so rason no akin ya maliket tayo ran lingkor nen Jehova. Tan say sakey ed saratan ya rason et lapud inagew-agew tayon babasaen so Salita na Dios, say Biblia. Tan pansasagpotan tayon iyaplika iray nababasa tayo.—Basaen so Santiago 1:​22-25.

3. Anto ray bendisyon no iyaplika tayo iray nababasa tayo ed Biblia?

³ Dakel so bendisyon no iyaplika tayo iray nababasa tayod Biblia. Singa bilang, napapaliket tayoy Jehova no uunoren tayo ray ganggan to. Amay antam ya napapaliket moy Jehova, balibali itan ed liknaan! (Ecl. 12:13) Tan seguro, naimanom ya kada no uunoren mo ray bilin na Biblia, lalon oneelet so aroan ed pamilya yo tan mas onaapit so liknaan na saray agagi ed sika. Nipapaliis ka met ed saray problema ya dadalanen na saramay agmanguunor ed si Jehova. On, duga may inkansion nen Arin David ya nabasa ed Salmo 19:​7-11. Imbaga to ya ‘no unoren tayo ray ganggan, totontonen, tan panangukom nen Jehova, makaawat tayo na baleg a tumang.’

4. Akin et mairap no maminsan so manbasa na Biblia tan man-personal study?

⁴ Pero aminen tayo ya no maminsan et agtayo naarap so manbasa na Biblia, tan nanairapan tayo met ya iyaplika iray nanaaralan tayo. Tua, dakdakel so kimey tayo, pero tandaan tayo ya importantin maong so manbasa na Biblia tan man-personal study. Atan labat so paraan pian naamtaan tayo  no antoy labay nen Jehova ya gawaen tayo. Pantongtongan tayo sirin no anto ray makatulong pian inagew-agew tayon nabasa so Biblia. Pantongtongan tayo met no anto ray gawaen tayo pian nadalepdep tayo ray babasaen tayo tan no panon tayon niyaplika iratan ed bilay tayo.

IMPORTANTE YA WALAY ESKEDYUL MON MANBASA NA BIBLIA

5. Anto ray manguupot na panaon tayo?

⁵ Bip-busy tayo ran lingkor nen Jehova. Halos nanaupot so panaon tayo ed nanduruman responsabilidad tayo ya akabase met ed Biblia. Singa bilang, maslak ed sikatayo et mantratrabaho pian walay pansuporta tayod sarili tayo tan ed pamilya tayo. (1 Tim. 5:8) Wala ray agagi ya sikara so mangaasikaso ed kapamilya dan mansasakit o maedad la. Kaukolan tayo met ya asikasoey sarili tayo pian agtayo mansakit, tan mangala met itan na panaon. Diad kongregasyon, wala met iray kaaruman ya responsabilidad tayo. Singa bilang, seseguradoen tayo ya walay regular ya eskedyul tayon manpulong, ta amta tayon importantin maong itan. Diad karakel na obligasyon mo, antoy makatulong pian wala nin siansiay panaon mo ya manbasay Biblia kada agew? Tan anto kasi marakep ya gawaen pian nadalepdep mo met iray nababasam tan niyaplikam iratan?

6. Antoy makatulong pian segurado ya inagew-agew kan makapanbasa na Biblia? (Nengnengen met so litrato.)

⁶ Say panagbasa na Biblia et sakey ed saray sankaimportantian ya nepeg tayon gawaen. (Fil. 1:10) Kanian agtayo komon aabuloyan ya onlabas so sanagew ya agtayo akapambasay Biblia. Oniay nabasa ed sankaunaan ya salmo: “Maliket so toon . . . say panliliketan to et say ganggan nen Jehova, tan babasaen ton makalna so ganggan To diad agew tan labi.” (Sal. 1:​1, 2) Base ed satan ya teksto, wala dapat so eskedyul tayon manbasa na Biblia. Pero say tepet, kapigan so sankaabigan ya oras ya pambasa na Biblia? Depende itan ed kada too. Say importante, pilim may oras ya makapanbasa kay Biblia ya inagew-agew. Oniay imbaga nen Brother Victor: “Kada  kabuasan so pambabasak na Biblia. Diad tua, agak apasal ya ombangon na masakbay. Pero impasal koy sarilik ta aman may oras ya anggapoy masyadon makaisturbo. Tan lapud akapampainawa ak, mas makakapampokus ak ed pambabasak.” Kasin parehoy situasyon mo ed si Victor? Maabig no tepetan moy sarilim, ‘Siak ey, anto kasi sankaabigan ya oras na pambasak na Biblia?’

DALEPDEP MOY BABASAEN MO

7-8. Akin et agtayo masyadon nagunggonaan no manaapura tayon manbasa na Biblia? Mangiter na ilustrasyon.

⁷ Pero agto labay ya ibaga ya basta natutumbok moy eskedyul mod panagbasa na Biblia et ayos la. Asalim la may kayarim ya nambasa et anggapoy atandaan mod samay binasam? Amin tayo et nasasali tayo ’tan. Nakomendaan ka no say goal mo et makapanbasa na pigaran kapitulo ed Biblia kada agew. Diad tua, duga labat ya walay goal tayo. (1 Cor. 9:26) Pero pian talagan nagunggonaan kad pambabasam na Biblia, aliwan basta akapambasa ka et ayos la.

⁸ Imanoen iyan ilustrasyon: Pian ombuna so tanaman, kaukolan toy danum. Kanian manliket iray tanaman no onuran. Pero antoy nagawa no mabalasubos so uran? Ompan aga nasepsep ya tampol na dalin so danum tan nalegep laingen iray tanaman. Mas labay na tanaman ya kalkalna labat so terter na uran pian nasepsep na dalin so danum. Ontan met ed panagbasa na Biblia. No manaapura tayon manbasa, ag-onsepsep ed puso tayo iray nababasa tayo, kanian agtayo laingen itan natandaan tan niyaplika.—Sant. 1:24.

9. Antoy gawaen mo no apasal ka ya mapmaples so panagbasam na Biblia?

⁹ Kasin no maminsan et nalikas mon mapmaples so panagbasam na Biblia? No ontan, antoy gawaen mo? Marakep no ipasal moy sarilim ya matantan labat so pambasam pian nadalepdep moy babasaen mo. Tan sarag to met ya manbasa ka ni insan ka mandalepdep. No panagdalepdep so pantongtongan, iisipen na arum ya mairap itan ya gawaen. Pero diad tua, simpli met labat itan. Say labay to labat ya  ibaga ’tan et amay isipen mon maong imay binasam. Ompan sarag mon aruman so inyeskedyul mon oras pian makapandalepdep ka. Odino no bilang ta agmo naaruman, anggano pigaran bersikulo labat so basaen mo pian walay panaon mo nin mandalepdep. Oniay imbaga nen Victor ya abitla nen niman: “Sakey ya kapitulo labat na Biblia so babasaen ko kada agew. Lapud kabuasan so eskedyul ko, sanagew kon nadalepdep may abasak.” Siempre, aliwan pareparehoy situasyon tayo. Wala lad sika ’tan no panon karakel so basaen mo. Say importante et agka manaapura pian makapandalepdep ka.—Sal. 119:97; nengnengen so kahon ya “ Saray Tepet ya Makatulong ed Pandalepdep.”

10. Mangiter na alimbawa no panon mon niyaplika so babasaen mo. (1 Tesalonica 5:​17, 18)

¹⁰ No akapambasa ka lay pigaran bersikulo, nonot mo no panon mon niyaplika iratan. Tepetan moy sarilim: ‘Panon ko yan niyaplika natan tan ed ontutumbok iran agew?’ Bilang alimbawa, isipen pa ya kaibad Bible reading mo so 1 Tesalonica 5:​17, 18. (Basaen.) Kayarim ya abasa irayan duaran bersikulo, sarag moy ontundan magano tan nonot mo no maminpiga kan manpipikasi ed sanagew tan no kasin impapuso iray pikakasim. Sarag mo met ya isipen no anto ray pisatsalamatan mod si Jehova. Tan no wala lay naisip mo, anto kasi no i-goal mon bitlaen so anggan talora ed saratan diad onsublay ya pikakasim? On, diad loob labat na pigaran minuto, dakel lay adalepdep mo. Balbaleg lay nitulong to ’tan pian natalosan tan niyaplikam iray nababasam ed Biblia. No oniay gawaen mo kada agew, seguradon magmaliw kan mas maong ya Kristiano. Pero panon to no naimanom ed sarilim ya dakdakel ni manayay papaaligwasen mo?

TULOYTULOY MON IYAPLIKA IRAY NANAARALAN MO

11. Antoy makapadismaya no maminsan? Mangiter na alimbawa.

¹¹ Legan kan manbabasa na Biblia, ompan nadismaya ka no nanengneng mon dakdakel manayay papaaligwasen mo. Singa bilang, isip mo pa ya say Bible reading mo et dia lad libron Santiago. Diad sayan agew, abasam ya agdapat ipanengneng na saray Kristiano so paboritismo. (Sant. 2:​1-8) Naimanom ed sarilim ya wala ray mas papaboran mo. Kanian nen abasam man, apakiwas kan ipanengneng so panangaro ed amin. Nakomendaan kad satan! Insan diad tinmumbok ya agew, abasam ya importantin kontrolen tayoy panagsalita tayo. (Sant. 3:​1-12) Apansin mod sarilim ya no maminsan, aliwan makapaseseg iray ibabagam. Kanian naisip mo ya mas apipigeren moy panagsalitam pian napaseseg moy arum.  Diad tinmumbok lamet ya agew, abasam ya agtayo dapat mikakaaro ed mundo. (Sant. 4:​4-12) Kanian nandesisyon ka ya pilien mo lan maong no anto ray babasaen, babantayan, tan dedengelen mo. Kasabi balet na komapat ya agew, ompan nadismaya ka la ed karakel na papaaligwasen mo.

12. Akin ya agka dapat nadidismaya no nanengneng mo ya dakel ni ray papaaligwasen mo? (Nengnengen met so paimanod leksab.)

¹² No anengneng mo ya dakel ni kaukolan mon umanen o paaligwasen ed sarilim, agka komon nadidismaya. Diad tua, prueba itan ya mapaabeba ka. No say sakey ya Kristiano et mapaabeba, awaten to ray bilin nen Jehova tan mabulos ya manguman. a Tandaan mo met ya say pangisulong na “balon personalidad” et aliwan pinsanan. Tuloytuloy tayo itan ya gawaen. (Col. 3:10; nengnengen met so study note ya “nagiging bago” diad nwtsty-TG.) Antoy makatulong pian tuloytuloy mon niyaplika iray nababasam ed Biblia?

13. Antoy sarag mon gawaen pian niyaplikam iray nanaaralan mo? (Nengnengen met so litrato.)

¹³ Imbes ya pinsanan mon iyaplika so amin ya nababasam, mas marakep no manpili ka labat na pigara, tan atan so pampokusan mo. (Pro. 11:2) Niay sarag mon gawaen: Ilistam so amin ya papaaligwasen mod sarilim, insan ka manpili na sakey odino duara ya i-goal mon gawaen ed sayan simba. Manumtumbok la iramay arum diad listaan mo. Anto ray marakep ya unaen mo?

14. Anto ray marakep ya unaen mon i-goal?

¹⁴ Marakep no say unaen mon i-goal et saramay mas mainomay mon nagawaan. Odino sarag mo met ya iyuna imay antam ya kakkaukolan mon paaligwasen. No akapili ka la,  i-research mo itan ed saray publikasyon tayo, singa diad Watchtower ONLINE YA LIBRARYA odino diad Giya ed Pan-research na Saray Tasi nen Jehova. Ipikasim ed si Jehova so goal mo tan kerew mod sikato ya ikdan to kay “panlabay tan pakayarin onkiwas.” (Fil. 2:13) Insan gawam so anggaay nayarian mon iyaplika iray a-research mo. No agawaan mo iyan unonan goal mo tan alikas mo ya walan talagay inaligwasan mo, mas ganado ka ya gawaen iramay akerad listaan mo, tan ompan agka la nairapan ya gawaen iratan.

‘MANPAIMPLUENSYA KA’ ED SALITA NA DIOS

15. Akin et duma iray lingkor nen Jehova no ikomparad maslak ya totoo ya manbabasa na Biblia? (1 Tesalonica 2:13)

¹⁵ Wala ray totoon aminpigapiga da la kunon abasa so Biblia. Balet kasin manisia ra ed ibabangat na Biblia? Kasin iyaaplika da iray bilin ya wadtan? Makapaermen ta andi. Duma balet iray lingkor nen Jehova. Singa saray Kristiano nen inmunan siglo, manisia tayo ya say Biblia et ‘salita na Dios tan karga na satan so katuaan.’ Tan agtayo labat itan babasaen. Ipapanengneng tayo ya atan so ‘mangiimpluensya’ ed bilay tayo.—Basaen so 1 Tesalonica 2:13.

16. Antoy makatulong pian magmaliw tayon mananumpal na Salita?

¹⁶ Tua, aliwan lanang ya mainomay ya basaen tan iyaplika so Salita na Dios. Ompan dakdakel so kimey tan obligasyon tayo kanian ngalngali anggapo lay panaon tayon manbasa. Odino ompan apasal tayon manbasa ya mapmaples kanian ag-onsesepsep ed puso tayo iray nababasa tayo. Odino ompan nadidismaya tayo ta dakdakel ni manayay papaaligwasen tayo. On, nandurumay subok ed pambasa na Biblia. Pero diad tulong nen Jehova, seguradon nagawaan mo itan. Komon ta manpatulong kad sikato pian agka magmaliw ya mililingwan a dumerengel, noagta mananumpal na Salita to. No diman mo mas babasaen so Salita na Dios tan iyaaplikam itan, magmaliw ya mas maliket so bilay mo.—Sant. 1:25.