1-2. Akin et ginawa to tayo nen Jehova ya mas nalikna tayoy liket no mangiiter tayo?

 GINAWA to tayo nen Jehova ya mas maliket tayo no mangiiter tayo nen say no mangaawat tayo. (Gawa 20:35) Say labay to kasin ibaga ’ya et agtayo maliket no walay angiter ed sikatayo? Andi. Balibali pay liknaan no akaawat tayoy regalo. Pero di ba, no sikatayoy mangiter, mas maliket tayo? Akin kasi et ontan so impanggawa nen Jehova ed sikatayo ran totoo?

² Ontan so impanggawa nen Jehova ed sikatayo pian walay abilidad tayon mas napaliket so sarili tayo. Labay ton ibaga, walad sikatayo no kasin labay tayoy onliket. No maiter tayo, mas maliket tayo. Maong labat ta ontan so impanggawa nen Jehova ed sikatayo ran totoo!—Sal. 139:14.

3. Akin et “maliket a Dios” si Jehova?

³ On, ibabaga na Biblia ya talagan makapaliket so mangiter. Kanian agtayo la pankelawan ya “maliket a Dios” si Jehova. (1 Tim. 1:11) Si Jehova so sankaunaan ya angiter. Tan no panangiter so pantongtongan, anggapoy makatalo ed sikato! Lapud sikato, “walay bilay tayo tan onggagalaw itayo tan wala itayo,” ya singa imbaga nen apostol Pablo. (Gawa 17:28) Tan no si Jehova so mangiter, amay sankaabigan so iiter to. Ibabaga na Biblia ya “amin a maong tan sankaabigan a regalo et manlalapud [sikato].”—Sant. 1:17.

4. Antoy gawaen tayo pian magmaliw tayon mas maliket?

⁴ No labay tayoy magmaliw ya mas maliket, aligen tayoy inkamaiter nen Jehova. (Efe. 5:1) Pantongtongan tayod sayan artikulo no panon tayon naalig so alimbawa to. Pantongtongan tayo met no antoy gawaen tayo no singa imbaliwala labat na arum so inter tayo o ginawa tayo parad sikara. Ontulong iya pian agtayo nadismayan mangiter tan mas nalikna tayoy liket no mangiiter tayo.

 ALIGEN TAYOY INKAMAITER NEN JEHOVA

5. Anto ray iiter nen Jehova ed sikatayo?

⁵ Akin et nibaga tayon maiter si Jehova? On ta dakdakel so iiter tod sikatayo. Nia ray pigaran alimbawa. Iiter nen Jehova iray materyal ya pankaukolan tayo. Tua, aliwan mayaman so amin ya lingkor nen Jehova, pero iiter to ray manunan pankaukolan na kada lingkor to, singa say panangan, kawes, tan napanayaman. (Sal. 4:8; Mat. 6:​31-33; 1 Tim. 6:​6-8) Kasin iiter iratan nen Jehova ta obligasyon to itan ya gawaen? Andi. Antoy rason akin et iiter to ray pankaukolan tayo?

6. Antoy naaralan tayod Mateo 6:​25, 26?

⁶ Iiter nen Jehova iray pankaukolan tayo ta inar-aro to tayo. Nengnengen tayo pa may imbaga nen Jesus ya walad Mateo 6:​25, 26. (Basaen.) Impaimano nen Jesus iray manok tan kuan to: “Ag-ira mantatanem na bukel odino manaani odino mantitipon diad saray kamalir, balet papakanen ira na Ama yod tawen.” Insan oniay intepet to ed saray disipulo to: “Agta mas mabli kayo ni nen say sikara?” Antoy punto? Diad pakanengneng nen Jehova, mas mabli tan espisyal iray matoor ya lingkor to no ikomparad saray ayayep. Kanian no papakanen tan aasikasoen to ray ayayep, di nagkalalo la ed sikatayo ran lingkor to! Di ba say maaron ama, agto paulyanay pamilya to ta inar-aro to ra? Ontan si Aman Jehova!—Sal. 145:16; Mat. 6:32.

7. Antoy sakey ya paraan pian naalig tayoy inkamaiter nen Jehova? (Nengnengen met so litrato.)

⁷ Singa si Jehova, sarag tayo met ya iter so materyal ya pankaukolan na arum, tan gawaen tayo itan lapud inar-aro tayo ra. Singa bilang, no naamtaan mo ya walay agin mankaukolan na naakan tan kawes, antoy gawaen mo? Maabig no manpausar kad si Jehova. Mannonot kay naiderew mo ed satan ya agi. Diad tua, kabkabat ya maiter iray lingkor nen Jehova, lalo la no walay kalamidad. Singa bilang, legan na COVID-19 pandemic, dakdakel ya agagi so angidonasyon na naakan, kawes, tan arum nin suplay parad saray mankakkaukolan. Dakel met so nandonasyon parad sankamundoan ya kimey. Baleg so nitulong to ’tan ya pundo pian makapambunog tayo na relief ed saray kongregasyon diad interon mundo ya apektadoy kalamidad. Inyaplika na sarayan maiter ya agagi imay nabasad Hebreo 13:16: “Agyo lilingwanan so panggawa na maabig tan say panginabang ed arum no antoy walad sikayo, ta naliliketan a maong so Dios ed saratan a bagat.”

8. Akin et kakkaukolan tayoy pakayari o biskeg ya manlalapud si Jehova? (Filipos 2:13)

 ⁸ Iikdan to tayo nen Jehova na pakayari. Mabisbiskeg tan makapanyarin-amin a Dios si Jehova, tan labalabay to met ya ikdan na biskeg iray lingkor to. (Basaen so Filipos 2:13.) Kasin asalim lan impikasi ed si Jehova ya ikdan to ka komoy kaukolan mon biskeg pian nalabanan moy tukso, naanosan moy mairap ya subok, o pian nasarag moy sanagew? Kada no papabiskegen ka nen Jehova, seguradon naliliknam imay imbaga nen apostol Pablo ya: “Walay biskeg kon arapen so amin a bengatla lapud samay mangiiter ed siak na pakayari.”​—Fil. 4:13.

9. Panon tayon naalig so pangiiter nen Jehova na biskeg to? (Nengnengen met so litrato.)

⁹ On, ag-isisiblet nen Jehova so biskeg to. Pero panon tayon naalig so alimbawa to anta limitado labat so biskeg tayo tan agtayo ’tan sarag ya ipasa ed arum? Naalig tayo nin siansiay Jehova no usaren tayoy biskeg tayo pian ontulong. Singa bilang, sarag tayon itindaanan o ilinisan na abung iray maedad o mansasakit ya agagi. Tan no sarag tayo met, maabig no ontulong tayod panaglinis tan panagmintina na Kingdom Hall. Seguradon misatsalamat iray agagi no usaren tayoy biskeg tayo diad onia ran paraan.

10. Panon tayon napabiskeg so arum diad saray ibabaga tayo?

¹⁰ Tandaan tayo met ya napabiskeg tayoy arum diad saray ibabaga tayod sikara. Kasin walay nanonotan mon agi ya kakkaukolan toy panamaseseg? Odino kasin naimanom ya naeermenan so sakey ya agi tan kakkaukolan toy ligliwa? Diad ontan iran situasyon, maabig no sika lay unonan onasingger tan ipaliknam ed sikato ya imamalasakit mo. Ompan kaukolan toy komendasyon. Sarag mo met ya pasyaren ed abung da, tawagan, ikdan mo na card, pawitan mo na e-mail, i-text, o i-chat mo. Agka mapagpaga ed no antoy ibagam. Anggano simpli labat so ibagam basta nalikna to ya nanlapud pusom. Malay mo, ompan atan so kakkaukolan to ’tan ya agi pian makapanmatoor, agnaekalan na ilalo, tan nasarag toy ontutumbok iran agew.—Pro. 12:25; Efe. 4:29.

11. Antoy nalilikna nen Jehova no mangiiter na karunongan?

¹¹ Iikdan to tayo nen Jehova na karunongan. Oniay insulat na disipulo ya si Santiago: “No walad sikayo so kulang na karunongan, mantultuloy komon ya onkerew ed Dios, ta sikatoy mabunlok a mangiiter ed amin tan agmamabalaw.” (Sant. 1:5) Base ed sayan teksto, ag-isisiblet nen Jehova so karunongan to. ‘Mabunlok to itan ya iiter’ ed arum. Kasin naimano  yo met ed samay teksto ya “agmamabalaw” si Jehova? Antoy labay ton ibaga ’tan? Agto tayo babalawen nen Jehova no onkekerew tayod sikato na karunongan. Kanian agtayo sirin nababaingan ya onkerew! Diad tua, labalabay to ya manpatulong tan manpaigiya tayod sikato.​—Pro. 2:​1-6.

12. Panon tayon naalig so pangiiter nen Jehova na karunongan to?

¹² Panon tayon naalig so pangiiter nen Jehova na karunongan to? (Sal. 32:8) No marunong tayo ed sakey ya bagay, agtayo itan sosoloen. Ibangat tayod arum no antoy amta tayo. Singa bilang, ipasal tayo ray balo ni pian magmaliw iran epektibo diad panagpulong tan panangiyaral na Biblia. Maanos met ya ibabangat na saray elder iray ministeryal ya lingkor tan arum nin bautismadon brother no panon dan gawaen iray asainmin tan responsabilidad da diad kongregasyon. Tan saray agagi ya marundunong ed construction tan panagmintina et ipapasal da met iray agagi ya daiset ni amta ra ed panagpaalagey na saray pasilidad tayo.

13. Panon tayon naalig si Jehova diad paraan na pangipapasal tayo ed arum?

¹³ Aligen tayo met si Jehova diad paraan na pangipapasal tayod arum. Apantongtongan tayo nen niman ya ag-isisiblet nen Jehova so karunongan to. Ontan met so gawaen tayo. No walay ipapasal mo, agmo isisiblet ed sikato so antam. Agmo komon iisipen ya agmo ibangat ya amin ta ompan salatan to ka ed pribilehyom. Tan agmo met komon iisipen ya, ‘Akauley tod bilay to! Siak et anggapoy nambangat ed siak.’ Andi, aliwan ontan diad organisasyon nen Jehova. Diad tua, aliwan karunongan labat so maliket tayon inanabang ed saray ipapasal tayo, “noag pati say mismon bilay [tayo].” (1 Tes. 2:8) Ipapasal tayo ran maong ta labay tayo ya onsabi panaon et magmaliw met iran “kualipikado a manbangat ed arum.” (2 Tim. 2:​1, 2) On, no ipasal tayoy arum tan ibangat tayod sikara iray amta tayo, kada sakey ed sikatayo et magmaliw ya mas marunong tan mas maliket!

NO SINGA IMBALIWALA NA ARUM SO INTER O GINAWA TAYO PARAD SIKARA

14. Antoy maslak ya reaksion na arum no walay inter o ginawa tayo parad sikara?

¹⁴ No walay inter o ginawa tayo parad arum, lalo lad saray agagi, seguradon misatsalamat ira. Ompan ikdan da tayoy thank-you card o ibalikas day pisasalamat da diad arum ya paraan. (Col. 3:15) Balibali ed liknaan no aapresyaen na arum so inter o ginawa tayo.

15. Antoy nepeg tayon tandaan no singa imbaliwala na arum so inter o ginawa tayo?

¹⁵ Pero no maminsan, ompan agda tayo pisalamatan ed ginawa tayon kaabigan tan pakalikna tayo et baliwala itan ed sikara. Normal labat ya naermenan tayo, lalo la no inusar tayoy panaon, biskeg, tan kuarta tayo pian labat walay niiter tayo. Anto balet so nepeg tayon gawaen pian agtayo nadismaya? Tandaan tayo may ibabaga na pinagkateman teksto: Gawa 20:35. Say liket tayon mangiter et ag-akadepende ed ibaga o reaksion na samay angiteran tayo. Antoy makatulong pian maliket tayo nin siansia anggano singa imbaliwala na arum so inter o ginawa tayo? Pantongtongan tayoy pigara.

16. Antoy nepeg tayon tandaan no mangiiter tayo?

¹⁶ Tandaan mo ya no mangiiter ka, aaligen moy Jehova. Maiter si Jehova ed amin, anggad diad saramay totoon agda amtay misalamat. (Mat. 5:​43-48) Insipan nen Jehova ya no aligen tayoy alimbawa to—amay mangiter tayo ya ‘agtayo maniilalo na antokaman ya kasalat’—‘baleg so tumang’ o premyo tayo. (Luc. 6:35) Kanian agka komon nadidismaya  no bilang ta singa imbaliwala da labat so inter mo o ginawam. Si Jehova so akauley ya ombales ed kamaongan ya impanengneng mo, ta ‘inaro to iray maliket ya mangiiter.’​—2 Cor. 9:7; Pro. 19:17.

17. Antoy sakey nin makatulong pian naalig tayoy Jehova no mangiiter tayo? (Lucas 14:​12-14)

¹⁷ Say sakey nin makatulong pian naalig tayoy Jehova et no iyaplika tayo may imbaga nen Jesus ya nabasad Lucas 14:​12-14. (Basaen.) Imbaga nen Jesus ya parawesen tayo iramay agmakabales ed sikatayo. Siempre, aliwa met ya makapuy no parawesen o regaloan tayo iramay walay pakasarag dan ombales. Pero, panon to no naimanom ed sarilim ya say mabetbet mon paparawesen o reregaloan et iramay antam ya makabales ed sika? No ontan, maabig no iyaplikam imay imbaga nen Jesus. Diad onsublay ya mangimbita ka, isip mo iramay totoon anggapoy pakasarag dan ombales. No parawesen mo ra, seguradon naliketan ka ta antam ya aaligen moy Jehova. No mangiter o mamarawes ka ya agka manaalagar na kasalat, agka nadismaya anggano aga misalamat imay toon inikdan o pinarawes mo.

18. Antoy agtayo gagawaen, tan akin?

¹⁸ Agka manhuhusga. (1 Cor. 13:7) No singa imbaliwala na arum so inter mo o ginawam, tepetan moy sarilim: ‘Talaga kasin agda amtay misalamat o alingwanan da labat?’ Ompan walay nanduruman rason akin et agda nibalikas so pisasalamat da. Wala ray arum ya labalabay da komoy misalamat pero nababaingan iran mangibaga. Wala ray agagi balet ya ag-apasal ya say arum so mangiiter ed sikara, ta dati et sikara so ontutulong ed arum. Antokaman so rason, komon ta agtayo huhusgaan iray agagi tayo. Inar-aro tayo ra kanian talosan tayo ra no bilang ta ag-ira akisalamat, tan agtayo onsasawan mangiter ed sikara.​—Efe. 4:2.

19-20. Anto ni sakey ya makatulong pian maliket tayon mangiter? (Nengnengen met so litrato.)

¹⁹ Agmo iilaloan ya pisalamatan da kan tampol. Oniay insulat nen Arin Solomon: “Ibantak  mo ed danum so tinapay mo, ta kalabas na dakel ya agew et naromog mo lamet itan.” (Ecl. 11:1) Nanengneng tayod sayan teksto ya ompan wala ray totoo ya ibalikas day pisasalamat da “kalabas na dakel ya agew” o kayari labat na andukey ya panaon. Naeksperiensya itan na sakey ya sister ya asawa na manangasikaso na sirkito.

²⁰ Sinulatan na asawa na C.O si Sandra, sakey ya sister ya kakkapampabautismo to, tan pinaseseg to ya mansiansian matoor. Kalabas na manga waloy taon, sinulatan nen Sandra imay asawa na C.O. Kuan to: “Sinulatan ta kayo ta labay kon ibagad sikayo ya balbaleg so nitulong yod siak diad apalabas iran taon. Makapa-touch may sulat yo. Pero say talagan tinmatak ed pusok tan agko nalingwanan et amay teksto ya insulat yo dimad card.” a Imbaga nen Sandra so nanduruman subok ya dinalan to, tan say kuan to: “No maminsan, labay ko lay ontundan manlingkor ed si Jehova. Pero no nanonotan ko may tekston insulat yo, natetenyeg so pusok tan . . . napapanonotan ak ya agak dapat onsuko.” Tan oniay imbaga tod sampot na sulat to: “Diad apalabas ya waloy taon, talagan balbaleg so epekto tod bilay ko imay card ya inter yo tan amay tekston imbaga yo.” Isip yo pay liket to may asawa na C.O. nen naawat to yan sulat kalabas na waloy taon! Kanian mangiter ka labat, ta agmo amta, ompan wala met so misalamat ed sika anggano linmabas lay dakel ya taon.

21. Akin et labay mon itultuloy ya aligen so inkamaiter nen Jehova?

²¹ Singa abitla nen niman, ginawa to tayo nen Jehova ya mas maliket tayo no mangiiter tayo nen say no mangaawat tayo. Balibali ed liknaan no natutulongan tayo ray kaagian, tan naliliketan tayo no ibabalikas day pisasalamat da. Pero no bilang ta alingwanan day misalamat, maliket tayo nin siansia ta amta tayon ginawa tayo no antoy duga. Tandaan mo ya anggan panon karakel ni tay iter mo, “sarasarag kan ikdan nen Jehova na mas dakdakel”! (2 Awa. 25:9) On, no panangiter so pantongtongan, agtayon balot natalo si Jehova! Tan no sikato so ombales, amay sankaabigan so iter to. Itultuloy tayo sirin ya aligen so maiter ya Ama tayo ed tawen.