1, 2. (a) Antoy piparaan na sayan mauges a mundo ed asentensiaan lan kriminal? (Nengnengen so litratod gapo na artikulo.) (b) Antoy reaksion na amin ya matalinon pinalsa no naderal la iyan mauges a mundo?

“INATEY YA MANAAKAR!” Ontan so iyeeyag na saray guardia na prisoan legan ya manaakar paonlad selda so mauge-uges ya kriminal, insan narengel so pangitalak ed puerta. Akin ya ontan so iyeeyag da? Singa mabisbiskeg met may laki; anggapoy graben sakit to. Balet, sikatoy inawit na saray guardia ed pamateyan dad sikato. Sayan kriminal ya asentensiaan na patey et singa la inatey. *

² Walay piparaan na sayan sistema na mundo ed satan ya laki ya asentensiaan na patey. Abayag lan asentensiaan iyan mauges a mundo, tan asingsingger lay kaderal to. Ibabaga na Biblia: “Say mundo . . . et naandi.” (1 Juan 2:17) Seguradon nagawa itan. Balet, walay pandumaan na pangangga na sayan mundo ed samay pamatey ed kriminal. No pateyen la imay kriminal, nayarin wala ray manprotesta ed sentensia to, tan kuestionen da no kasin  patas o nayari nin umanen so desisyon. Dia balet ed kaso na sayan mundo, say sentensia et nanlapud patas tan perpekton Ukom ya Soberano ed uniberso. (Deu. 32:4) Ag-itan nauman tan agnakuestion so inkahustisya na desisyon to. No sumpalen to la itan, seguradon kombinsido so amin ya matalinon pinalsa ed uniberso ya niiter so hustisya. Nainawaan so amin!

3. Antoy apatiran naandi no onsabi lay Panarian na Dios?

³ Balet, antoy kaibad “mundo” ya “naandi”? Naandi iramay ipapasen na totoo natan ya permanentin parte na bilay. Kasin maermen itan ya balita? Andi! Diad tua, importantin kabiangan itan na “maong a balita na Panarian.” (Mat. 24:14) Kanian amtaen tayo no anto ray naandi no onsabi lay Panarian na Dios. Pantongtongan tayo so apatiran kategorya: mauges ya totoo, mapalikdo iran organisasyon, mauges iran kagagawa, tan saray sengegan na kairapan. Diad kada kategorya, aralen tayoy (1) no antoy epektod sikatayo na saratan natan, (2) no antoy gawaen nen Jehova ed saratan, tan (3) no panon ton salatan iratan na maong iran bengatla.

4. Antoy epektod sikatayo na gagawaen na mauges a totoo?

⁴ Antoy epektod sikatayo na gagawaen na mauges a totoo? Kayarin imbaga nen apostol Pablo ya diad sayan panaon et “onsabi iray mapeligro tan mair-irap a panaon,” sikatoy pinuyanan ya mangisulat: “Saray mauges a totoo tan saray impostor et magmaliw a lalon mauges.” (2 Tim. 3:1-5, 13) Kasin naiimanom ya nagagawa la itan ya propesiya? Dakel ed sikatayoy abiktima la na mauges ya totoo, singa saray bayolentin siga, saray masibeg ya terorista, tan saray andiay panangasin kriminal. Arum ed sikara et kabkabat lan mauges; saray arum balet et agda ipahalata, kunwari et matunong ira. Anggano agtayo asali so abiktima na ontan iran totoo, apektado ti nin siansia ed kagagawa da. Natatakot tayo no nababalitaan tayo ray graben krimen ya gagawaen da. Nabibigla tayod anggapoy panangasin pamapatey dad ugugaw, maedad, tan arum nin agda nidepensay sarili da. Say gagawaen na saratan ya mauges a totoo et singa agnagawaan na too, noagta inaayep tan dinedemonyo. (Sant. 3:15) Makapalikliket ta liligliwaen itayo nen Jehova panamegley na maong a balita ya walad Salita to.

5. (a) Anton pankanawnawa so lukas nid saray mauges ya totoo? (b) Antoy pansumpalan na saray mauges a totoo ya agda lan balot labay so manguman?

⁵ Antoy gawaen nen Jehova? Natan et iikdan nen Jehova iray mauges ya totoo na pankanawnawan manguman. (Isa. 55:7) Bilang indibidual, agni ra senentensiaan na Dios. Say senentensiaan to la et say mundo. Balet panon to iramay agda lan balot labay so manguman, tan ituloy dan suportaan iyan mundo anggad baleg a kairapan? Impromisa nen Jehova ya permanente ton ekalen iray mauges a totoo. (Basaen so Salmo 37:10.) Nayarin isipen na saray mauges ya ag-ira naukom. Eksperto la ran mangiyamot ed gagawaen da, tan singa nibabatikan day hustisya tan sentensia na saray autoridad. (Job 21:7, 9) Balet, oniay ipapanonot na Biblia: “Saray mata na Dios et akateen ed saray dalan na sakey a too, tan nanenengneng Toy amin a kupbang to. Anggapoy bilunget odino makapal a bilunget a napanamotan na saramay manggagaway aliwa.” (Job 34:21, 22) Anggapoy niyamot dad si Jehova a Dios. Anggapoy impostor ya makaloko ed sikato;  anggan diad bilunget odino makapal a bilunget et malinlinew iran nanengneng na perpekton mata na Dios. Kanian kayari Armagedon, agtayo la naromog iray mauges ta anggapo la ra​—ya anggad angga!​—Sal. 37:12-15.

6. Siopa ray mansiansia no naandi la ray mauges ya totoo, tan akin ya maong a balita itan?

⁶ Siopa ray mansiansia no naandi la ray mauges ya totoo? Oniay makapalikliket ya impromisa nen Jehova: “Saray mauyamo et tawiren day dalin, tan manliket iran maong ed agnaparaan a kareenan.” Diad satan lanlamang ya salmo et nabasa tayo: “Saray matunong et tawiren day dalin, tan manbilay ira ditan diad andi-anggaan.” (Sal. 37:11, 29) Siopa ray “mauyamo” tan “matunong”? Saray mauyamo et saramay mapaabeban mangaawat ed panangibangat tan panangigiya nen Jehova; saray matunong et saramay labalabay dan gawaey duga tan makapaliket ed si Jehova a Dios. Diad panaon tayo, mas dakel so mauges nen saray matunong ya totoo. Balet diad onsabin balon mundo, saray mauyamo tan matunong labat so manbilay. Tan pagmaliwen dan paraiso so interon dalin!

7. Antoy epektod sikatayo na gagawaen na saray mapalikdon organisasyon?

⁷ Antoy epektod sikatayo na gagawaen na saray mapalikdon organisasyon? Dakel ed saray mauges ya nagagawa natan et agmanlalapud pigpigaran indibidual noagta diad saray organisasyon. Singa bilang, saray relihyoson organisasyon et titilaan da ray minilyon ya totoo no siopa so Dios, ya agkuno napanmatalkan so Biblia, tan agda met ibabaga no antoy tua nipaakar ed pansumpalan na dalin tan totoo​—tan dakel ni ran tila. Wadtan met iray gobierno ya onsusuporta ed guerra tan panlalaban na nanduruman lahi, mangaabuso ed saray mairap bilay tan anggapoy kalaban-laban, tan labalabay day pasuksok tan paboritismo. Kumusta balet iray maagum ya korporasyon? Anggapoy malasakit dad planeta tayo, uupoten day natural iran kayamanan na dalin, tan sasamantalaen day inkainosente na saray kustomer pian onyaman so pigpigaran totoo, anggano minilyon so manirap. Talagan malinlinew ya saray mapalikdon organisasyon so sengegan na paniirap na mundo natan.

8. Base ed Biblia, antoy nagawa ed saray organisasyon ya ipapasen na totoo ya matibay?

⁸ Antoy gawaen nen Jehova? Onggapo so baleg a kairapan sano saray makapanyarin gobierno et atakien da so amin ya organisasyon na palson relihyon ya irerepresenta na imoral a bii ya tatawagen a Makapanyarin Babilonia. (Apo. 17:1, 2, 16; 18:1-4) Anggapoy nakera ed saratan ya relihyoson organisasyon. Kumusta balet iray arum nin mapalikdon organisasyon? Diad Biblia, isisimbolo na kapalandeyan tan saray isla so dakel ya organisasyon tan institusyon ya ipapasen na totoo ya matibay. (Basaen so Apocalipsis 6:14.) Impasakbay na Salitay Dios ya nayugayog so pundasyon na saray gobierno tan amin ya organisasyon a manmamatalek ed saratan. Say baleg a kairapan et manampot diad pakaderal na amin a gobierno ed sayan mauges a mundo tan amin ya onkakampi ed sikara pian labanay Panarian na Dios. (Jer. 25:31-33) Kayari na satan, anggapo la ray mapalikdon organisasyon!

9. Akin ya segurado tayon organisadon maong so balon dalin?

⁹ Antoy onsalat ed saray mapalikdon organisasyon? Kayari Armagedon, wala ni kasi organisasyon diad dalin? Oniay ibabaga na  Biblia: “Walay balon tawen tan balon dalin ya aalagaren tayo unong ed sipan to, tan diad saraya et manayam so inkatunong.” (2 Ped. 3:13) Anggapo lay daan ya tawen tan dalin, saray mapalikdon gobierno tan saray manpapasakop ed sikara. Antoy onsalat ed saratan? Say labay ya ibaga na “balon tawen tan balon dalin” et walay balon gobierno tan balon sakop na satan. Say Panarian ya uleyan nen Jesu-Kristo so perpekton mangipatnag ed personalidad nen Jehova, say Dios na uksoy. (1 Cor. 14:33) Kanian say “balon dalin” et organisado. Wala ray kualipikadon lalaki ya mangasikaso. (Sal. 45:16) Sikaray idaulo nen Kristo tan saray 144,000 ya kaiba ton manuley. Imadyin mo pay panaon sano amin ya mapalikdon organisasyon et nasalatan na saksakey, nankakasakey, tan matunong ya organisasyon!

10. Anto ran mauges ya kagagawa so kasmak ed lugar yo, tan antoy epekto na satan ed sika tan say pamilyam?

¹⁰ Antoy epektod sikatayo na mauges iran kagagawa? Amayamay so mauges ya nagagawa ed sayan mundon pambibilayan tayo. Anggan iner et wadtay imoralidad, panagtila, tan brutal ya panagpairap. Napapagaan iray atateng ta ompan agda naprotektaan iray ananak da ed saratan ya mauges a nagagawa. Saray industriya na panagligliwaan et pagmamaliwen dan makapasagyat so amin ya klase na mauges a kagagawa tan ibabaliwala day estandarte nen Jehova ed no antoy duga tan aliwa. (Isa. 5:20) Ag-itan aawaten na saray tuan Kristiano. Gagawaen day anggaay nayarian da pian naprotektaay katooran da anggano dakdakel so agmanrerespeto ed saray estandarte nen Jehova.

11. Antoy naaralan tayo ed impaneral nen Jehova ed Sodoma tan Gomorra?

¹¹ Antoy gawaen nen Jehova ed saray mauges a kagagawa? Imanoen pa no antoy ginawa to nen grabe lay kaugsan diad Sodoma tan Gomorra. (Basaen so 2 Pedro 2:6-8.) Naaburidon maong so matunong a toon si Lot lapud kaugsan ya nagagawad lugar da. Nen dineral nen Jehova so interon rehyon, agto labat basta pinatunda so kaugsan ya nagagawa diman. Ginawa to itan pian “onkanan pasakbay ed no antoy nagawad saray mauges a totoo.” No nensaman et pinatunda nen Jehova so amin ya imoral a kagagawa diad Sodoma tan Gomorra, patundaen to met so amin ya kaugsan natan sano deralen to la iyan mauges a mundo.

12. Anto ray labalabay mon gawaen no naandi la iyan daan ya sistema na mundo?

¹² Antoy onsalat ed mauges iran kagagawa? Diad Paraison dalin et dakdakel so makapaliket ya gawaen tayo. Isip mo pay eksayting ya kimey a pagmaliwen ya paraiso iyan planeta odino say pampaalagey na kaabungan tayo tan parad saray inad-aro tayo. Isipen pay tatalaranan tayon pangabet ed saray minilyon ya inaatey tan pangibangat tayod sikara nipaakar ed saray estandarte nen Jehova ontan met ed saray maabig ya ginawa to parad totoo. (Isa. 65:21, 22; Gawa 24:15) Amayamay so makapaliket ya gawaen tayo ya kirayewan nen Jehova!

13. Antoy resulta na impanrebelde nen Satanas, Adan, tan Eva?

¹³ Antoy epektod sikatayo na saray sengegan na kairapan? Saray mauges ya totoo, mapalikdon organisasyon, tan mauges iran kagagawa so sengegan na kairapan ed dalin natan. Siopad sikatayoy ag-apektado ed guerra, irap na bilay, nasyonalismo, sakit, tan ipapatey? Apektado itayon amin. Resulta  iratan na impanrebelde ed si Jehova na taloran mauges ya indibidual​—si Satanas, Adan, tan Eva. Anggapod sikatayoy makaiwas ed epekto na impanrebelde da.

14. Antoy gawaen nen Jehova ed saray sengegan na kairapan? Mangiter na alimbawa.

¹⁴ Antoy gawaen nen Jehova ed saray sengegan na kairapan? Singa bilang, say guerra. Impromisa nen Jehova ya permanente to lan patundaen itan. (Basaen so Salmo 46:8, 9.) Say sakit balet ey? Ekalen to met itan. (Isa. 33:24) Say patey ey? Akmonen to itan ed andi-angga. (Isa. 25:8) Patundaen toy irap na bilay. (Sal. 72:12-16) Ontan met so gawaen tod arum ni ran sengegan na kairapan natan. Ekalen to ni ingen so mauges ya “dagem” na sayan sistema na mundo lapud naandi lay mauges ya impluensya nen Satanas tan saray demonyo to.​—Efe. 2:2.

15. Anto ray sigpot lan naandi kayari Armagedon?

¹⁵ Kasin naiimadyin moy mundon anggapo lay guerra, sakit, odino patey? Isipen pa labat​—anggapo la ray sundalo, navy, odino air force! Anggapo la ray armas odino monumento parad saray biktima ed guerra. Anggapo met la ray ospital, doktor, nurse, odino health insurance; pati saray morge, punerarya, managbalsamo, odino sementeryo! Tan lapud anggapo lay krimen, anggapo la ray security agency, alarm system, pulis, anggan saray kandado o tumbok! Anggapo la ray panaburidoan o pampagaan tayo.

16, 17. (a) Antoy nalikna na saray makaliktar ed Armagedon? Mangiter na alimbawa. (b) Panon tayon naseguro ya mansiansia itayo no naandi la iyan daan a mundo?

¹⁶ Antoy kipapasen na bilay tayo no naandi la ray sengegan na kairapan? Ompan agtayo tanto naimadyin. Abaybayag ti lan manbibilay ed sayan daan ya mundo, kanian nayarin agti la naiimano iray makapa-stress ya kipapasen. Bilang alimbawa, saray totoon manaayam ed asingger na riles na tren et agda la naiimanoy ingal, tan saramay manaayam ed asingger na bantakan na basura et apasal lad angob na satan. Balet no naandi la iratan, seguradon nainawaan lay amin!

¹⁷ Antoy onsalat ed makapa-stress ya bilay tayo natan? Oniay ebat na Salmo 37:11: “Saray mauyamo et . . . manliket iran maong ed agnaparaan a kareenan.” Agta makapaliket itan? Atan so labay nen Jehova parad sika. Kanian, gawam so anggaay nayarian mon mansiansian maapit ed si Jehova a Dios tan ed organisasyon to legan na sayan makapa-stress ya kaunoran iran agew! Pablim so ilalom, dalepdep mo itan, tan pansiansiam itan ya mabilay ed isip tan pusom, tan inabang mo itan ed arum! (1 Tim. 4:15, 16; 1 Ped. 3:15) Diad ontan, seguradon agka naandin kaiba na sayan asentensiaan lan daan ya mundo. Imbes, mansiansia kan mabilay tan maliket diad andi-angga!