1. Anton panamaseseg so inter nen Jehova kayari na impanrebelde diad Eden?

MANLAPU nen nankasalanan so too tan nagmaliw ya aliwan perpekto, prinuebaan nen Jehova ya sikatoy Dios ya mangiiter na panamaseseg. Kayarin mismo na impanrebelde diad Eden, angiter si Jehova na rason pian makapanpakpel iray magmaliw ya ilalak nen Adan. Wala ni sirin so ilalo na too. Say promisa na Dios ya walad Genesis 3:15, no talagan natalosan et mangiter na ilalo ed totoo ya naderal lanlamang so “sankaunaan ya uleg,” si Satanas ya Diablo, pati amin a mauges ya kimey to.​—Apo. 12:9; 1 Juan 3:8.

2. Panon ya pinaseseg nen Jehova si Noe?

² Say lingkor nen Jehova ya si Noe et nambilay diad mundon  anggapoy takot na totoo ed Dios. Diad saman et pamilya to labat so mandadayew ed si Jehova. Grabe so kaugsan tan imoralidad, kanian adismaya la komon si Noe. (Gen. 6:4, 5, 11; Jud. 6) Balet walay imbaga nen Jehova ed si Noe ya amaseseg ed sikaton mantultuloy ya ‘manakar a kaiba na Dios.’ (Gen. 6:9) Imbaga nen Jehova ya deralen To iman ya mauges a mundo, insan to inikdan si Noe na instruksion no antoy nepeg ton gawaen pian seguradon makaliktar so pamilya to. (Gen. 6:13-18) Impanengneng nen Jehova ed si Noe ya talagan sikato so Dios ya mamapaseseg.

3. Panon ya apaseseg si Josue? (Nengnengen so litratod gapo na artikulo.)

³ Si Josue et awalaan met na ambelat ya responsabilidad ya idaulo so totoo na Dios paarap ed Insipan ya Dalin. Kaukolan ton taloen iray mabiskeg ya armada na saray nasyon ya manaayam ed satan ya lugar. Natural labat ya ontakot si Josue. Natatalosan itan nen Jehova, kanian binilin toy Moises ya pasesegen toy Josue. Oniay imbaga na Dios ed si Moises: “Turom si Josue tan paseseg mo tan pabiskeg mo, ta sikato so ombaliw diad unaan na sarayan totoo tan diad panamegley to et natawir da so dalin a nabantag mo.” (Deu. 3:28) Antis ya milaban si Josue, sikatoy pinaseseg nen Jehova: “Agko ta ingganggan ed sika, ‘Manpakpel tan manpabiskeg ka’? Kanian agka ontatakot odino onkekebbiew, ta walad sika si Jehova a Dios mo ed inerman a laen mo.” (Jos. 1:1, 9) Talagan makapaseseg itan!

4, 5. (a) Panon ya pinaseseg nen Jehova iray totoo to nensaman? (b) Panon ya pinaseseg nen Jehova so Anak to?

⁴ Aglabat papasesegen nen Jehova iray totoo to bilang indibidual, papasesegen to met ira bilang grupo. Oniay impropesiya nen Jehova ya gawaen to pian naligliwa iray Judio ya inawit ed Babilonia: “Agka ontatakot, ta wala ak ed sika. Agka ompapaga, ta siak so Dios mo. Pabiskegen ta ka, on, tulongan ta ka. Talagan bembenan ta ka ed kawanan a limak unong ed inkatunong ko.” (Isa. 41:10) Akaawat met na ontan ya panamaseseg iray inmunan Kristiano ya anggad saray lingkor na Dios natan.​—Basaen so 2 Corinto 1:3, 4.

⁵ Anggan si Jesus et akaawat met na panamaseseg manlapud Ama to. Nen abautismoan si Jesus, walay arengel ton boses manlapud tawen: “Saya so Ana’ko, say inad-arok, ya inabobonan ko.” (Mat. 3:17) Seguradon apaseseg si Jesus ed saratan ya salita legan ton susumpalen so ministeryo tod dalin.

6. Akin et makapaseseg ed sikatayo so ilustrasyon na saray talento?

⁶ Inalig nen Jesus so Ama to. Say ilustrasyon na saray talento, ya kaiba ed propesiya nen Jesus nipaakar ed anggaan na sayan sistema, et pasesegen to tayon mansiansian matoor. Pinagalangan na katawan so kada matoor ya aripen ed sarayan salita: “Maabig so agawaan mo, maong tan matoor ya aripen! Matoor kad daiset a bengatla. Turoen ta kan mangasikaso ed dakel a bengatla. Miliket kad katawan mo.” (Mat. 25:21, 23) Talagan mamaseseg itan ed sikatayon matoor ya manlingkor ed si Jehova!

7. Panon ya pinaseseg nen Jesus iray apostol to, lalo lay Pedro?

⁷ Naynay ya pansasangsangan na saray apostol nen Jesus no siopay sankamanunaan ed sikara, balet maan-anos iran pinaseseg nen Jesus ya magmaliw iran mapaabeba tan panlingkoran day arum, imbes ya singa ra  amo. (Luc. 22:24-26) Aminpigan adismaya si Jesus ed ginawa nen Pedro. (Mat. 16:21-23; 26:31-35, 75) Balet imbes ya naekal so talek nen Jesus, siansia nin pinaseseg toy Pedro tan ingganggan ton pabiskegen to iray agagi to.​—Juan 21:16.

8. Panon ya pinaseseg nen Hezekias iray pangulo na armada tan totoo na Juda?

⁸ Antis nin linmad dalin si Jesus pian ipanengneng so perpekton alimbawa no panoy pamaseseg ed arum, amta la na saray matoor ya lingkor nen Jehova ya kaukolan day mamaseseg. Nen asingger lan onataki iray Asiryano, tinipon nen Hezekias iray pangulo na armada tan totoo na Juda pian pasesegen ira. Tan “apabiskeg iray totoo ed saray salita [to].”​—Basaen so 2 Awaran 32:6-8.

9. Antoy naaralan tayod libro na Job nipaakar ed panamaseseg?

⁹ Anggan kaukolan a mismo nen Job so panamaseseg, siansian imbangat to so taloran “makapagonigon a managligliwa” to no panon so mamaseseg. Imbaga to ya no sikatoy walad kipapasen da, ‘pabiskegen to ira na saray salitan ompapaway ed sangi to, tan say panagligliwa na bibil to et mangiter na inawa ed sikara.’ (Job 16:1-5) Akaawat a siansia si Job na panamaseseg manlapud si Elihu tan ed si Jehova ya mismo.​—Job 33:24, 25; 36:1, 11; 42:7, 10.

10, 11. (a) Akin et kaukolan na marikit nen Jefte so panamaseseg? (b) Siopa met natan iray makanepegan na panamaseseg?

¹⁰ Say sakey nin alimbawa nensaman ya nankaukolan na panamaseseg et say marikit nen Jefte. Antis ya milaban si Jefte ed saray Ammonita, insamba tod si Jehova ya no sikatoy panaloen to, say unonan onabet ed sikato kayari na guerra et iter tod si Jehova pian manlingkor ed santuaryo. Nibana ya say inmabet ed sikato et say marikit to, say alenleneg ya anak to, ya malikeliket a pinmaway lapud analoy tatay to. Ansakisakit iman ed si Jefte! Balet, tinoor to so insamba to tan imbaki toy marikit to ed Silo pian manlingkor ed tabernakulo legay bilay to.​—Ukom 11:30-35.

¹¹ No mairap iman ed si Jefte, nayarin mas mairap iman ed anak to, ya mabulos a tinmulok ed desisyon nen tatay to. (Ukom 11:36, 37) Labay ton ibaga, agla makapiasawa, agla nawalaay anak, nabalang met lay ngaran na pamilya tan tawir da. Kanian no walay mankaukolan na ligliwa tan panamaseseg, sikato iman. Ibabaga na Biblia: “Saya so nagmaliw a kustombre ed Israel: Kada taon, saray kalangweran a bibii ed Israel et oonla pian komendaan day marikit nen Jefte a Gileadita, apat agew ed sakey taon.” (Ukom 11:39, 40) Agta makanepegan met na panamaseseg tan komendasyon iray agagin mansiasiansian single ya akapokus ed “saray bengatlan nipaakar ed Katawan”?​—1 Cor. 7:32-35.

12, 13. Panon ya pinabiskeg nen Pedro iray agagi to?

¹² Diad samay labi antis na impatey nen Jesus, imbaga tod si apostol Pedro: “Simon, Simon, imbaga nen Satanas a labay to kayon yakayaken ya amin a singa trigo. Balet impikasi ta ka lan masimsimoon ta pian ag-onkapuy so pananisiam; tan sano akapawil ka la, pabiskeg mo iray agagim.”​—Luc. 22:31, 32.

¹³ Prinuebaan nen Pedro ya sikatoy lusek na Kristianon kongregasyon nensaman. (Gal. 2:9) Pinaseseg to ray agagi to ed  maabig ya alimbawa to manlapu la nen Pentecostes. Nen asingger lan manampot so andukey ya ministeryo to, sinulatan to ray kapara ton Kristiano: “Sinulatan ta kayo na antikey pian pasesegen kayo tan masimoon kon tasian a saya so tuan agnaparaan a kaabigan na Dios. Bembenan yo itan a malet.” (1 Ped. 5:12) Satan ya pinuyanan ya sulat nen Pedro et nansiansian lapuan na panamaseseg ed saray Kristiano, manlapu la nensaman ya anggad natan. Talagan kakkaukolan tayo natan itan ya panamaseseg legan tayon aalagaren so pakasumpal na saray sipan nen Jehova!​—2 Ped. 3:13.

14, 15. Panon itayon napaseseg na saray libro ed Biblia ya insulat nen Juan?

¹⁴ Si apostol Juan et sakey met a lusek na Kristianon kongregasyon nensaman. Say makapainteres ya salaysay tod ministeryo nen Jesus et makapaseseg ed saray Kristiano ed dakel lan taon ya anggad natan. Diad libro to labat so pakabasaan ed samay imbaga nen Jesus ya say aro so pakabidbiran na saray tuan disipulo to.​—Basaen so Juan 13:34, 35.

¹⁵ Karga na taloran sulat nen Juan so arum nin mablin katuaan. No ngalngali tayo la onsuko lapud belat na kasalanan tayo, agta makaligliwa no nabasa tayon “lilinisan itayo na dala nen Jesus . . . ed amin a kasalanan”? (1 Juan 1:7) Tan no agnaekal so pakakakonsiensia tayo, agta nalemewan so pagew tayo tan makalua tayod liket no nabasa tayon “say Dios et mas baleg nen say puso tayo”? (1 Juan 3:20) Si Juan labat so angisulat ya “say Dios et aro.” (1 Juan 4:8, 16) Diad komadua tan komatlon sulat to, kinomendaan to iramay Kristianon tuloytuloy ya “manaakar ed katuaan.”​—2 Juan 4; 3 Juan 3, 4.

16, 17. Anton panamaseseg so inter nen apostol Pablo ed saray inmunan Kristiano?

¹⁶ Nen inmunan siglo, nayarin say apostol ya amaseseg a maong ed saray agagi to et si  apostol Pablo. Mapatnag ya nen agano nin niletneg so Inkakristiano, maslak ed saray apostol et nansiansia ed Jerusalem, ya ditan so kawalaan na mananguley ya ulop. (Gawa 8:14; 15:2) Impulong na saray Kristiano ed Judea so nipaakar ed Kristo diad saray totoon dati lan manisiad saksakey ya Dios. Balet imbaki na masanton espiritu si Pablo ya pulongan iray totoo ed saray nasyon ya sakop na Gresya tan Roma, ya mandadayew ed dakel ya dios.​—Gal. 2:7-9; 1 Tim. 2:7.

¹⁷ Pinulongan nen Pablo so ararawi tan maawang ya lugar a tatawagen natan ya Turkey, ontan met ed Greece tan Italy, pian iletneg so Kristianon kongregasyon ed saray aliwan Judio. Sarayan balon nagmaliw ya Kristiano et ‘pinairap na saray kabaleyan da’ kanian kakkaukolan day panamaseseg. (1 Tes. 2:14) Nen manga 50 C.E., sinulatan nen apostol Pablo so balon kongregasyon diad Tesalonica: “Naynay kamin misasalamat ed Dios sano bibitlaen mi kayon amin ed saray pikakasi mi, ta diad arapan na Dios tan Ama tayo et sankanonot min naynay so matoor a pankikimey yo, maaron pansasagpot yo, tan pansusungdo yo.” (1 Tes. 1:2, 3) Binilin to met iran pabiskegen day sakey tan sakey, ya imbaga to: “Itultuloy yon pasesegen tan pabiskegen so sakey tan sakey, a singa gagawaen yo la.”​—1 Tes. 5:11.

18. Panon ya apaseseg si Felipe na inmunan siglon mananguley ya ulop?

¹⁸ Talagan say inmunan siglon mananguley ya ulop et makapaseseg ed saramay mangidadaulo tan ed amin ya Kristiano. Nen impulong nen Felipe ed saray Samaritano so nipaakar ed Kristo, sikatoy sinuportaan na mananguley ya ulop. Imbaki day duara ed saray membro ra, si Pedro tan Juan, pian ipikasi da ray balon mananisia ya makaawat iray masanton espiritu. (Gawa 8:5, 14-17) Seguradon apaseseg a mismo si Felipe tan saramay atulongan ton magmaliw ya Kristiano lapud suporta na mananguley ya ulop!

19. Antoy epekto na sulat ya impawit na mananguley ya ulop ed saray kongregasyon nen inmunan siglo?

¹⁹ Ag-abayag, nepeg ya mandesisyon so mananguley ya ulop no kaukolan ni kasin nasegat iray Kristiano ya aliwan Judio, ya gagawaen na saray Judio unong ed Ganggan nen Moises. (Gawa 15:1, 2) Diad tulong na masanton espiritu tan impanaral a maong ed Kasulatan, nandesisyon so mananguley ya ulop ya agda la itan kaukolan ya gawaen, insan da sinulatan iray kongregasyon. Wala ray imbaki na mananguley ya ulop a mangiter na sulat ed saray kongregasyon. Antoy resulta? “Kayari ran binasa itan, aliketan ira ed panamaseseg.”​—Gawa 15:27-32.

20. (a) Anton panamaseseg so iiter na Mananguley ya Ulop natan ed amin ya agagi diad interon mundo? (b) Anton tepet so ebatan diad ontumbok ya artikulo?

²⁰ Natan, say Mananguley ya Ulop na Saray Tasi nen Jehova so mamapaseseg ed saray membro na pamilyan Bethel, ed arum nin walad special full-time, tan ed amin ya agagi diad interon mundo. Tan say resulta et singa nen inmunan siglo—naliliketan tayon amin ed panamaseseg! Ontan met, nen 2015, im-publish na Mananguley ya Ulop so brosyur ya Pawil Ka Lad si Jehova, ya talagan baleg a tulong ed saramay akaarawi ed katuaan pian napaseseg iran ompawil. Balet kasin saramay mangidadaulo labat so nepeg a mangalig ed si Jehova diad pangiter na panamaseseg? Naebatan itan diad ontumbok ya artikulo.