DIAD interon mundo, nen imbeneg a taon, nilibon lalaki so aturo bilang elder tan ministeryal a lingkor diad Saray Tasi nen Jehova. No sakey ka ed saratan ya pinablin brother, seguradon maliket ka ed balon pribilehyom.

Balet ompan medyo mapaga ka met. Oniay imbaga na sakey ya ugaw nin elder ya si Jason: “Nen aturo ak, pakaliknak et agko sarag iyan balon responsabilidad.” Alikna met nen Moises tan Jeremias ya singa agda sarag iray balon asainmin da ya inter nen Jehova. (Exo. 4:10; Jer. 1:6) No ontan met so naliliknam, panon mon nadaeg itan pian tuloytuloy kan onaligwas? Imanoen tayo pay alimbawa na Kristianon disipulo ya si Timoteo.​—Gawa 16:1-3.

Nayarin si Timoteo et mantaon na ngalngali 20 odino onsulok ni nen sikatoy impila nen apostol Pablo ed pambiabiahe to. Diad gapo, nayarin anggapoy kompiyansa nen Timoteo ed sarili to tan ompan manaalangan ya gawaen so balon asainmin to lapud ugaw ni. (1 Tim. 4:11, 12; 2 Tim. 1:1, 2, 7) Balet kalabas na sakey dekada, oniay imbaga nen Pablo diad kongregasyon na Filipos: “Maniilalo ak ed Katawan a Jesus a nibakik la komon a tampol ed sikayo si Timoteo . . . Ta anggapo lay arum a nibakik a walaan na awawey a singa sikato.”​—Fil. 2:19, 20.

Akin et nagmaliw a maong ya alimbawan elder si Timoteo? Imanoen tayo pay anemiran naaralan tayo ed sikato.

1. Talagan iyaansakit to ray totoo. Oniay imbaga nen Pablo ed saray agagi ed Filipos: “[Si Timoteo so] peteg a mangasikaso ed sikayo.” (Fil. 2:20) On, iyaansakit nen Timoteo iray totoo. Sikatoy talagan interesado ed espiritual ya pankaabigan da, tan mabulos ton inusar so bilay to parad sikara.

Agtayo komon magmamaliw ya singa drayber na bus ya mas importante nid sikato so makasabi ed terminal diad dugan oras nen say ontundan mangalay pasahero. Si William, sakey ya respetadon elder diad masulok lan 20 taon, et oniay bilin tod saray balo nin aturon lalaki: “Aro yo iray agagi. Manpokus kayod pankaukolan da, imbes ya diad itumbok yo labat ed saray totontonen ed organisasyon.”

2. Iyuuna to iray espiritual a bengatla. Oniay imbaga nen Pablo nipaakar ed pidumaan nen Timoteo ed arum: “Say aanapen na arum et say nipaakar ed dilin pankaabigan da, aliwan say nipaakar ed si Jesu-Kristo.” (Fil. 2:21) Nen si Pablo et walad Roma, a kawalaan to nen mansusulat, naobserbaan ton wala ray agagi ditan ya masyadon akapokus ed personal iran kimey da. Wala ray panaon ya napapaulyanan da lay espiritual ya kimey da. Balet aliwan ontan si Timoteo! No walay pankanawnawa ton ipulong so maong a balita, sikatoy akaparaan ya singa si Isaias, ya angibagan: “Wadia ak! Ibaki mo ak!”​—Isa. 6:8.

Panon kan magmaliw ya balanse ed personal tan espiritual iran responsabilidad mo? Unona, amtaen so prayuridad mo. ‘Seguroen no anto ray mas importantin bengatla,’ so impaseseg nen Pablo. (Fil. 1:10) Gawam ya prayuridad iray prayuridad na Dios. Komadua, pasimplim so bilay mo. Ekal mo ray bengatlan manguupot na panaon tan biskeg mo. Binilin nen Pablo si  Timoteo: “Arawian mo ray inuugaw a pilalek, balet seetan mon ipatnag so inkatunong, pananisia, aro, kareenan.”​—2 Tim. 2:22.

3. Nansagpot a maong parad sagradon panaglingkor. Oniay impanonot nen Pablo ed saray taga Filipos nipaakar ed si Timoteo: “Amta yo ya apaneknekan to lan sikatoy makanepegan, a sikatoy nampaaripen a kaibak pian nikayat so maong a balita a singa sakey ya anak a kaibay ama to.” (Fil. 2:22) Aliwan mangiras si Timoteo. Sikatoy nansagpot a maong ya kaibay Pablo, tan lapud saya et nagmaliw iran maapit ed sakey tan sakey.

Dakel so kimey natan ed organisasyon na Dios. Talagan makapnek itan a kimey tan magmaliw kayon maapit ed saray agagi. Kanian pansagpotan yon naynay ya “dakel so gagawaen yo ed kimey na Katawan.”​—1 Cor. 15:58.

4. Inyaplika to ray nanaaralan to. Insulat nen Pablo ed si Timoteo: “Maapit mon tinumbok so ibabangat ko, kabibilay ko, gagalak, pananisiak, panag-anos ko, panangarok, panagsungdok.” (2 Tim. 3:10) Lapud inyaplika nen Timoteo so nanaaralan to, sikatoy nagmaliw ya kualipikado parad mas baleg ya responsabilidad.​—1 Cor. 4:17.

Kasin walay mas matatken tan eksperiensyadon kaarom ya labay mon aligen so ehemplo to? No anggapo ni, sarag moy mananap. Oniay nanonotan nen Tom ya abayag lan elder: “Sakey ya eksperiensyadon elder so angipanengneng na personal ya interes ed siak tan impasal to ak ya maong. Naynay kon kekerewen tan iyaaplika so simbawa to. Akatulong itan pian nawalaan ak na kompiyansa.”

5. Tuloytuloy ton impasal so sarili to. Oniay bilin nen Pablo ed si Timoteo: “Ipasal moy sarilim, a say gagalam et nipatnag moy debosyon ed Dios.” (1 Tim. 4:7) Say sakey ya atleta et walaan na coach, balet kaukolan to met ya ipasal so sarili to. Oniay impaseseg nen Pablo ed si Timoteo: “Itultuloy moy manseet ed panagbasa diad publiko, ed panamilin, tan ed panagbangat. . . . Nodnonot mo irayan bengatla; iyulom iraya, pian nanengneng na amin a totoo so iyaaligwas mo.”​—1 Tim. 4:13-15.

Kaukolan mon tuloytuloy ya paaligwasen met iray abilidad mo. Magmaliw ya makulin estudyante na Salita na Dios tan mibansag ed saray balo iran instruksion na organisasyon. Ontan met, paliisan so sobran tiwala ed sarili, ya ompan isipen mo ya dakel lay eksperiensyam kanian sarasarag mo lan arapen so antokaman ya situasyon anggano agka la man-research ya maong. Pian naalig moy Timoteo, “imanom a naynay so sarilim tan say ibabangat mo.”​—1 Tim. 4:16.

6. Sikatoy nanmatalek ed espiritu nen Jehova. No nipaakar ed ministeryo nen Timoteo, oniay impanonot nen Pablo ed sikato: “Alwaran mo iyan maabig a bengatlan nimatalek ed sika diad panamegley na masanton espiritu a walad sikatayo.” (2 Tim. 1:14) Pian naalwaran nen Timoteo so ministeryo to, kaukolan toy manmatalek ed espiritu na Dios.

Oniay naobserbaan nen Donald, ya abayag lan elder: “Kaukolan ya pablien na saray aturon lalaki so relasyon dad Dios. Saramay manggawa na ontan et ‘lalo ran onkasil.’ No kerewen day espiritu na Dios tan bayuboan so bunga na satan, seguradon magmaliw iran bendisyon ed agagi ra.”​—Sal. 84:7; 1 Ped. 4:11.

Talagan makapaseseg a nanengneng ya dakel iray balon aturon lalaki, a singa sika ya onaaligwas ed espiritual. Si Jason ya abitlad gapo et oniay imbaga to: “Legan kon manlilingkor bilang sakey ya elder, dakel so naaralan ko tan naaruman so kompiyansak. Natan et talagan panliliketan ko lay asainmin ko tan ipapasen kon mablin pribilehyo itan!”

Kasin labay mon tuloytuloy kan usaren nen Jehova? Pansagpotan mo sirin ya aligen so alimbawa nen Timoteo. Diad ontan et magmaliw ka met ya bendisyon ed totoo na Dios.