Diad Hebreon salita et aliwan saksakey so nayarin pantalos ed satan. No akin ya ontan, makatulong irayan rason pian nawalaan tayoy dugan pakatalos ed satan:

1. Ikonsidera so interon salmo. Say impangusar na “diad ontan” ed gapo na bersikulo 12 et ontulong pian saray bendisyon ya abitla ed bersikulo 12 anggad 14 et natalosan ya onaplika ed saray matunong​—saramay onkekerew na tulong ya ‘nisalba tan niliktar ira’ ed saray mauges (bersikulo 11). Napatnagan met iyan ideya ed bersikulo 15, ya amiduan abitla ditan so salitan “maliket” ya onaaplika ed pareho ya totoo​—saramay “say Dios da et si Jehova!”

2. Sayan pakatalos et mitukoyan ed arum ya teksto na Biblia ya pakabasaan na saray bendisyon ya insipan na Dios parad saray matoor ya totoo. Napatnagan ed sayan salmo so mabiskeg ya ilalo nen David kayari impangiliktar na Dios ed nasyon na Israel manlapud saray kakabusol da, bendisyonan To ray totoo, magmaliw iran maliket tan maaligwas. (Lev. 26:9, 10; Deu. 7:13; Sal. 128:1-6) Singa bilang, oniay ibabaga na Deuteronomio 28:4: “Nabendisyonan iray ananak yo tan say bunga na dalin yo tan saray kilaw na ayayep yo, saray malangwer a baka tan karnero yo.” Talagan abendisyonan so interon nasyon lapud walay kareenan tan inkaaligwas legan na uley na anak nen David ya si Solomon. Sakey ni, iyaanino na uley nen Solomon so uley na Mesias diad arapen.​—1 Ara. 4:20, 21; Sal. 72:1-20.

Kanian, mas pinalinew na sayan impangipatalos ed Salmo 144 so interon salmo nipaakar ed ilalo ya abayag lan tatalaranan na saray lingkor nen Jehova​—say paneral na Dios ed saray mauges insan tumbokan na andi-anggaan ya kareenan tan maaligwas ya bilay parad saray matunong.​—Sal. 37:10, 11.