1, 2. Akin et kaukolan tayon ipasal so arum ya nawalaan na goal ed espiritual?

SAY pangipulong ed maong a balita na Panarian so manunan asainmin nen Jesus. Balet, impanaon to met so pangipasal ed arum a magmaliw ya pastol tan managbangat. (Mat. 10:5-7) Anggano busy si Felipe ed panagpulong, seguradon tinulongan to ray apatiran mamarikit to pian magmaliw ya epektibon manangipulong na katuaan. (Gawa 21:8, 9) Akin ya importante so ontan ya panangipasal natan?

² Diad interon mundo, ondadakel so mangaawat ed maong a balita. Kaukolan ya natalosan na saray balo ni tan agni bautismado ya importante so personal a panaral na Biblia. Kaukolan met iran bangatan no panon ya ipulong so maong a balita tan ibangat so katuaan. Diad kongregasyon tayo, kaukolan ya pasesegen iray brother ya mankuli ed panaglingkor pian onkualipika ran ministeryal ya lingkor odino elder. Panamegley na ‘maabig a bilin,’ natulongan na saray eksperiensyadon Kristiano iray balo ni ya onaligwas ed espiritual.​—Pro. 4:2.

3, 4. (a) Panon ya inkonekta nen Pablo so panaral na Biblia ed epektibon ministeryo? (b) Pian napaseseg tayo ray iyaaralan tayo ya personal dan araley Biblia, antoy nepeg ya gagawaen tayo?

³ Panon kaimportante so personal ya panaral na Biblia? Naamtaan tayoy ebat diad samay imbaga nen apostol Pablo ed saray Kristiano ed Colosas: “Agkamin balot tinmundan mangipikasi ed sikayo tan kekerewen mi a napano kayo komon na suston kakabatan nipaakar ed linawa na Dios diad amin a karunongan tan pakatalos a manlalapud masanton espiritu, diad ontan et manbilay kayo a manepeg ed si Jehova pian sikatoy napaliket yon maong legan a manbubunga kayo ed kada maabig a kimey tan naaaruman so suston kakabatan yo nipaakar ed Dios.” (Col. 1:9, 10) Lapud walay suston kakabatan na saray Kristiano ed Colosas, ‘akapambilay iran manepeg ed si Jehova pian sikatoy napaliket dan maong.’ Bilang resulta, tuloytuloy iran ‘nambunga ed kada maabig a kimey,’ lalo lad panangipulong ed maong a balita. Pian epektibo itayo met ya makapanlingkor ed si Jehova, nepeg ya walay tutumboken tayon eskedyul na personal ya panaral na Biblia. Tan maabig no ipaliwawa tayod saray iyaaralan tayo ya importante itan.

⁴ Antis tayon pasesegen so arum ya personal dan araley Biblia, kaukolan ya sikatayon mismo et kombinsido ya importante itan. Diad tua, kaukolan ya nagugunggonaan tayod regular ya panaaral tayod Biblia. Kanian itepet tayod sarili tayo: ‘No kontra ed Biblia so opinyon na sakey ya unabung, odino mairap so tepet to, sarag ko kasin ebatan itan base ed Biblia? No nababasak so inkakuli ed ministeryo nen Jesus, Pablo, tan arum ni, kasin iisipen ko no panon kon niyaplika itan diad panaglingkor kod si Jehova?’ Kaukolan tayon amin so kakabatan tan simbawa na Biblia. Tan no ibaga tayod arum ya baleg so nitutulong na personal ya panaaral tayo na Biblia, nayarin napaseseg tayo met iran mankuli ya aralen itan.

5. Mangiter na suhestion no panon ya natulongan iray balo ni ya iyeskedyul so personal a panaral na Biblia.

⁵ Ompan nitepet mo, ‘Panon kon nipasal so iyaaralan ko ya regular ton aralen a mismo so Biblia?’ Nayarin ipanengneng mod sikato no panon ya iparaan so libron aaralen yo. Nayarim met ya i-suggest ya basaen toy sakey a parte na apendise na libron Anto so Peteg ya Ibabangat na Biblia? tan nengnengen to ray nisitan teksto. Tulongan mon manparaan parad aral pian makapankomento. Paseseg mon basaen toy kada isyu na Say Panag-bantayan tan Onliing! Sarag mon ipanengneng ed sikato no panon ya usaren so Watchtower Library odino Watchtower ONLINE YA LIBRARYA pian naamtaan  iray ebat ed saray tepet ed Biblia. No tulongan mo, seguradon agmanbayag et na-enjoy to lay personal ya panaral toy Biblia.

6. (a) Panon mon tulongan so iyaaralan mo ya napabli so Biblia? (b) Antoy nayarin gawaen na iyaaralan no apabli to lay Biblia?

⁶ Siempre, agtayo nepeg ya piliten so siopaman ya manbasa tan manaral na Biblia. Imbes, usaren tayo ray itatarya na organisasyon nen Jehova pian natulongan tayoy iyaaralan tayo ya mas pablien so Biblia. Agmanbayag, naliknan mismo na iyaaralan tayo iyan inkansion na salmista: “Say iyasingger ed Dios et pankaabigan ko. Say Soberanon Katawan a Jehova so pansasalimbengan ko.” (Sal. 73:28) Seguradon tulongan nen Jehova so ontan ya maseet tan maapresyan iyaaralan na Biblia.

7. Panon ya impasal nen Jesus iray manangipulong na maong a balita? (Nengnengen so litratod gapo na artikulo.)

⁷ Diad Mateo kapitulo 10, nabasa tayo ray instruksion nen Jesus ed saray 12 apostol to. Sikatoy angiter na espisipiko iran punto ya nausar dad panagpulong. ^[1] Madengedengel iray apostol nen imbangat nen Jesus no panoy epektibon pampulong. Insan la ra linmad teritorya. Lapud naobserbaan day paraan nen Jesus, nagmaliw iran epektibon managbangat na katuaan. (Mat. 11:1) Sarag tayo met ya ipasal iray iyaaralan tayon magmaliw ya epektibon manangipulong na maong a balita. Aralen tayo natan so duaran paraan ya natulongan ira.

8, 9. (a) Panon so impitongtong nen Jesus ed saray totoo diad ministeryo? (b) Panon tayon natulongan iray balon manangipalapag ya mitongtong ed totoo ya singa si Jesus?

⁸ Mitongtong ed totoo. Lanang ya ipupulong nen Jesus so nipaakar ed Panarian. Singa bilang, mabilabilay tan balibali resulta na impitongtong tod sakey a bii diad bobon nen Jacob ya asingger ed syudad na Sicar. (Juan 4:5-30) Akitongtong met ed si Mateo Levi, ya managsingil na buis. Daiset labat so nabasa tayo ed Ebanghelyo nipaakar ed satan ya tongtongan, balet inawat nen Mateo so imbitasyon nen Jesus ya magmaliw a babangatan to. Nadngel nen Mateo tan saray kakaiba to so paliwawa nen Jesus diad sakey a ponsia ed abung to.​—Mat. 9:9; Luc. 5:27-39.

⁹ Aminsan, makaaron akitongtong si Jesus ed si Natanael, ya negatiboy iisipen tod saray taga Nazaret. Lapud saman, anguman so kanonotan nen Natanael. Labay to lan naaralan so ibabangat nen Jesus ya taga Nazaret. (Juan 1:46-51) Maabig met sirin no ipasal tayo ray balon manangipalapag ya magmaliw a makaaro tan relaks ya mitongtong ed totoo. ^[2] Seguradon naliketan iray tutulongan tayo no naobserbaan dan maabig so epekto na pangipanengneng na personal ya interes tan makaaron pitongtong.

10-12. (a) Panon ya binayuboan nen Jesus so interes na saramay dinmengel ed maong a balita? (b) Panon tayon natulongan iray balon manangipalapag ya napaaligwas so abilidad dan mangibangat ed katuaan?

¹⁰ Bayuboan so interes. Limitado so panaon nen Jesus ed ministeryo. Anggaman ontan, impanaon ton bayuboay interes na totoon dinmengel ed maong a balita. Singa bilang, pian nabangatan to ray dakel a totoo, linmugan ed sakey a baloto. Diad saman, nanggaway milagro si Jesus kanian dakdakel ya sira so narel nen Pedro tan imbaga to: “Manlapud natan et mansigay ka la na totoon mabilay.” Antoy resulta na imbaga tan ginawa nen Jesus? Si Pedro tan saray kakaiba to et “insakbit da iray baloto tan tinaynan da so amin a bengatla tan tinmumbok irad [si Jesus].”​—Luc. 5:1-11.

¹¹ Si Nicodemo, ya membro na Sanhedrin, et nagmaliw ya interesado ed bangat  nen Jesus. Labay to ni makaaral balet antakot ed ibaga na totoo no nanengneng dan mantotongtong ira nen Jesus. Maong ya mibagay si Jesus tan inter toy panaon to; kanian diad labi akitongtong ed si Nicodemo pian agnanengneng na totoo. (Juan 3:1, 2) Antoy naaralan tayo ed saraya? Impanaon na Anak na Dios so pamabiskeg ed pananisia na saray interesado. Agta nepeg met ya makuli tayon pawilen tan iyaralan na Biblia iray interesado?

¹² Mas napaaligwas na saray balon manangipalapag so abilidad dan mangibangat ed katuaan no ulopen tayo rad ministeryo. Natulongan tayo ran nonoten iramay angipanengneng na anggan daiset ya interes. Sarag tayo ran itagar ya man-RV tan mangiyaral na Biblia. Lapud satan ya panangipasal tan panamaseseg, seguradon onkiwas met irayan agni eksperiensyadon manangipalapag ya iyaralan iray interesadon nakatongtong da. Naaralan da met ya ag-ira bastabasta onsuko noagta mananos tan manseet ed ministeryo.​—Gal. 5:22; nengnengen so kahon ya “ Importante so Pananos.”

13, 14. (a) Antoy naaralan mod saramay maong ya alimbawad Biblia ya nansakripisyo parad arum? (b) Anto ray praktikal a paraan ya nipasal mo ray balon manangipalapag tan kabataan ya aroen day agagi?

¹³ Nabasa tayod Biblia ya baleg a pribilehyo so pangipanengneng na ‘aro ed agagi’ tan ‘panserbi’ ed arum. (Basaen so 1 Pedro 1:22; Lucas 22:24-27.) Say Anak na Dios et inter toy amin, pati say bilay to, pian lingkoray arum. (Mat. 20:28) Si Dorcas et “dakdakel so agawaan ton kaabigan tan inter ton regalo lapud panangasi.” (Gawa 9:36, 39) Si Maria ya taga Roma et “nansagpot a maong” parad saray kaagian to. (Roma 16:6) Panon tayon natulongan iray balo ni ya natalosan so kaimportantian na itulong ed agagi?

¹⁴ Sarag ya itagar na saray maespiritual ya agagi iray balo ni no bisitaen da ray mansasakit tan maedad la. No posible, nayarin awiten na atateng iray ananak da no ombisita ra. Sarag met na saray elder so manpaibad arum no bibisitaen da ray maedad la pian nanengneng no kasin walay naakan da tan agnapapaulyanan so ayaman da. Diad ontan, naaralan na saray kabataan tan balo nin manangipalapag ya panserbian so arum. Diad panagpulong, sarag na sakey ya elder ya pasyaren iray agagi ed lugar ya pampupulongan da pian nakumusta ira. Diad ontan et natalosan na kabataan ya mabetbet ton kaiba ya kaukolan ton aroen so amin ya agagi.​—Roma 12:10.

15. Akin ya importantin tulongan na saray elder so arum nin brother diad kongregasyon?

¹⁵ Lapud uusaren nen Jehova iray lalaki ya manbangat ed kongregasyon, importantin paaligwasen na saray brother so abilidad dan mansalita. No sakey kan elder, sarag mo kasin dengelen so pangipraktis na ministeryal a lingkor ed paliwawa to? No tulongan mo, mas onaligwas so abilidad ton mangibangat ed Salita na Dios.​—Neh. 8:8. ^[3]

16, 17. (a) Panon ya impasal nen Pablo si Timoteo? (b) Panon ya nipasal na saray elder iray magmaliw ya pastol ed kongregasyon?

¹⁶ Dakel so kaukolan ya elder ed kongregasyon, tan kaukolan ya ipasal iramay walay potensyal dan manlingkor diad arapen. Impasal nen Pablo si Timoteo tan pinaseseg to ya ipasal met so arum. Inkuan to: “Ana’ko, mantultuloy kan onggamor na pakayari diad panamegley na agnaparaan a kaabigan a walad si Kristo Jesus; tan saray nadngel mo ed siak a sinuportaan na dakel  a tasi et imatalek mo ed saray matoor a lalaki, pian magmaliw iran kualipikado a manbangat ed arum.” (2 Tim. 2:1, 2) Akaaral si Timoteo ta akaiba toy eksperiensyadon apostol Pablo. Insan inalig met nen Timoteo so paraan nen Pablo diad ministeryo to tan arum ni ran sagradon panaglingkor.​—2 Tim. 3:10-12.

¹⁷ Sinegurado nen Pablo ya nipasal a maong si Timoteo. Impila to iyan kabataan diad impanmisionero to. (Gawa 16:1-5) Naalig na saray elder so alimbawa nen Pablo no ipila da met iray kualipikadon ministeryal a lingkor diad pan-shepherding da, no matukoy. No ontan so gawaen da, nipanengneng na saray elder no panoy pambangat. Nidanet da met so kaimportantian na pananisia, anos, tan aro ya kaukolan ed saray manangasikaso. No gawaen iya na saray elder, mangipapasal ira na magmaliw ya pastol ed “pulok na Dios.”​—1 Ped. 5:2.

18. Akin ya importante ed sikatayo so pangipasal ed arum?

¹⁸ Talagan importante ya ipasal so arum ta ondadakel so pankaukolan tan pankanawnawan manlingkor ed si Jehova. Kakkaukolan nin siansia imay panangipasal ya ginawa nen Jesus tan Pablo. Labay nen Jehova ya nipasal met a maong iray lingkor to natan diad saray teokratikon asainmin da. Inikdan itayo na Dios na pribilehyon tulongan iray daiset ni eksperiensya da pian napaaligwas day abilidad dan manggawa ed kimey na kongregasyon. Onloloor so situasyon ed sayan mundo tan mas dakel so pankanawnawan manpulong, kanian mas importante tan kakkaukolan so pangipasal ed arum.

19. Akin ya kombinsido kan aliwan sayang so inkakulim ya mangipasal ed arum?

¹⁹ Siempre, say pangipasal et mankaukolay panaon tan sagpot. Balet tulongan itayo nen Jehova tan say inad-aro ton Anak, tan ikdan da itayo na karunongan pian nipasal tayoy arum. Seguradon manliket tayo no nanengneng tayo ray tinulongan tayo ya “mansasagpot tan manseseet.” (1 Tim. 4:10) Tan komon ta itultuloy tayo nin siansia so onaligwas ed espiritual legan tayon manlilingkor ed si Jehova.