1. Anggano maliket so agew na kasal, antoy naeksperiensya na saray sanasawa? (Nengnengen so litratod gapo na artikulo.)

NO MANMAMARTSA lay magangganan nobya paonlad guapguapon nobyo to diad kasal da, anggad layag so imis da. Nen saninaro ni ra, mas naaro day sakey tan sakey kanian nandesisyon iran mansipanan ya manmatoor ed sakey tan sakey. Siempre, kaukolan day man-adjust ta mandumaan iray personalidad tan manbuo ray balon pamilya. Balet mangiiter so Biblia na epektibon simbawa parad amin ya mankasal, ta labay na Angigapo na panangasawa ya magmaliw a mareen tan maliket so ulopan da. (Pro. 18:22) Anggaman ontan, ibabaga met na Biblia ya saray imperpekton sanasawa et “nawalaay irap ed laman da.” (1 Cor. 7:28) Panon ya napaliisan iratan ya “irap”? Tan panon ya magmaliw a maliket so panangasawa na saray Kristiano?

2. Anto ran klase na panangaro so nepeg ya ipanengneng na sanasawa?

² Ipupurek na Biblia ya importante so panangaro. Kaukolan ya ipanengneng na sanasawa so maaron panamabli (Greek,  phi·liʹa). Say romantikon panangaro (eʹros) et makapaliket, tan importante so panangaro ed pamilya (stor·geʹ) no wala la ray ananak. Balet, say panangaro ya akabase ed prinsipyo (a·gaʹpe) so sekreto pian mas onelet so ulopan na sanasawa. Nipaakar ed satan a panangaro, oniay insulat nen apostol Pablo: “Kada asawan laki ed sikayo et nepeg ton aroen so asawa to a singa ed dilin laman to; ontan met, say asawan bii et nepeg a walaan na aralem a respeto ed asawa to.”​—Efe. 5:33.

3. Panon kaimportante so panangaro diad panangasawa?

³ Insulat nen Pablo: “Asawan lalaki, itultuloy yon aroen so kaasawaan yo, no panon a say Kristo et inaro to met so kongregasyon tan inter toy sarili to parad satan.” (Efe. 5:25) Pian naalig na papatumbok nen Jesus so alimbawa to, kaukolan dan aroen so sakey tan sakey ya singa impangaro tod sikara. (Basaen so Juan 13:34, 35; 15:12, 13.) Nepeg sirin ya inad-aro na sakey a Kristiano so asawa to, tan no kaukolan et iter toy bilay to parad asawa to. Balet agto itan nagawaan no agnaresolbe iray agpantatalosan. Anggaman ontan, say panangaro ya a·gaʹpe et “itetepel toy amin a bengatla, manisia ed amin a bengatla, maniilalo ed amin a bengatla, mansusungdo ed amin a bengatla.” On, “say aro et agbalot mangangga.” (1 Cor. 13:7, 8) No tandaan na sanasawa imay impansipanan da ya manaroan tan manmatoor irad sakey tan sakey, napakiwas iran mantulongan ya iyaplika iray prinsipyo nen Jehova pian nasolusyonan day anggan anton problema.

4, 5. (a) Antoy responsabilidad na asawan laki bilang ulo na pamilya? (b) Panon ya ipasen na asawan bii so inkaulo na asawa to? (c) Panon ya nan-adjust so sakey a sanasawa?

⁴ Espisipikon insulat nen Pablo so responsabilidad na sanasawa: “Komon ta saray asawan bibii et manpasakop ed kaasawaan da a singa pampapasakop da ed Katawan, lapud say asawan laki et ulo na asawa to a singa say Kristo et ulo na kongregasyon.” (Efe. 5:22, 23) Aglabay ya ibaga na sayan uksoyan ya abebbeba so asawan bii. Baleg so nitulong na asawan bii pian nagawaan na asawan laki iray responsabilidad ton inter na Dios nen imbaga To: “Aliwan maabig ed laki [Adan] a sikatoy mansiansian manbukbukor. Manggawa ak na sakey a katulongan to, bilang kaiba to.” (Gen. 2:18) Si Kristo ya “ulo na kongregasyon” et ipapanengneng toy tuan panangaro, tan ontan met ya panangaro so nepeg ya ipanengneng na asawan laki bilang ulo na asawa to. No gawaen to itan, maligen so liknaan na asawa to tan agnairapan ya ipanengneng so respeto, suporta, tan panagpasakop.

⁵ Imbaga nen Cathy ^[1] ya talagan kaukolan so man-adjust no miasawa so sakey: “Nen marikit ak ni, independent ak tan sarasarag kon asikasoey sarilik. Talagan nan-adjust ak nen wala lay asawak ta kaukolan kon araley manmatalek ed sikato. Aliwan mainomay, pero mas inmelet so relasyon mi ta gagawaen mi ray panlabayan nen Jehova.” Oniay imbaga nen Fred ya asawa to: “Aliwan mainomay so manggaway desisyon. No wala lay asawam, mas mairap ta aliwan sarilim labat so nonoten mo. Balet no manpikasi kamin sanasawa ed si Jehova parad panangigiya tan dedengelen koy suhestion nen asawak, kada agew et mas oniinomay lay mandesisyon. Singa kami manka-team!”

6. No wala ray problema, panon ya magmaliw a “perpekton bedber na pankakasakey” so aro?

⁶ Pian malet so ulopan na sanasawa, kaukolan ya palampasen day kakapuyan na sakey tan sakey. ‘Lanang dan itepel so sakey tan sakey tan mabulos iran manperdonaan.’ Seguradon walan walay nagawaan dan  agnagustoan na asawa ra. Balet no ontan, pankanawnawa dan makaaral ed saray lingo ra, manperdonaan, tan abuloyan day aro ya magmaliw a “perpekton bedber na pankakasakey.” (Col. 3:13, 14) Niarum ni, “say aro et maanos tan maomaong. . . . Agmanbibilang na impakasakitan.” (1 Cor. 13:4, 5) Kaukolan ya resolbien ya tampol iray agpantatalosan. Nepeg sirin ya ayosen lan tampol na saray sanasawan Kristiano iray problema da antis ya onlabas so agew. (Efe. 4:26, 27) Kaukolan so pampaabeba tan pakpel pian sinseron nibagam so “Sorry a, asakitan ta ka,” balet baleg so nitulong na satan pian naresolbe iray problema tan mas onelet so ulopan na sanasawa.

7, 8. (a) Antoy isisimbawa na Biblia nipaakar ed seksual a relasyon na sanasawa? (b) Akin ya nepeg a maalwar tan maar-aro so pantrato na sanasawa ed sakey tan sakey?

⁷ Nabasa ed Biblia iray makatulong ya simbawa parad saray sanasawa pian balanse dan niiter so kanepegan na asawa ra. (Basaen so 1 Corinto 7:3-5.) Importante so maaron konsiderasyon ed liknaan tan pankaukolan na asawa. No aliwan maaro so pantrato ed asawan bii, nayarin agnaliketan ed sayan aspekto na panangasawa. Bibilinen iray asawan lalaki ya ipatnag day konsiderasyon tan talosan day asawa ra. (1 Ped. 3:7) Say sakey ya asawa et agto nepeg ya puersaen o piliten so asawa to parad seksual ya relasyon. Nepeg ya natural dan naliknan dua so pankaukolan dad satan. Nayarin mas maples so reaksion na asawan laki, balet kaukolan dan ikonsidera so emosyon na sakey tan sakey.

⁸ Anggano agmangiiter so Biblia na saray espisipikon ganggan no anto ray nepeg tan agda nepeg ya gawaen diad romantikon relasyon da, nabasa tayo ditan so panangipatnag na aro ed asawa. (Kansion nen Sol. 1:2; 2:6) Importante ya maalwar tan maar-aro so pantrato na sanasawan Kristiano ed sakey tan sakey.

9. Akin ya agmanepeg so seksual ya pilalek ed agtayo asawa?

⁹ No inaro tayoy Dios tan kapara tayon too, agtayo abuloyan so anggan siopa o anggan anto ya maneral ed bedber na panangasawa. Wala ray sanasawan aproblema odino aderal so relasyon da lapud naadik ed pornograpiya so sakey ed sikara. Kaukolan tayon labanan so tendensian nasagyat ed pornograpiya odino arum nin seksual ya pilalek ed agtayo asawa. Anggan say pan-flirt ed agtayo asawa et makasakit tan nepeg ya paliisan. No tandaan tayon nababasa na Dios so amin ya iisipen tayo tan nanenengneng toy amin ya gagawaen tayo, mas desidido tayon gawaen so panlabayan to tan mansiansian malinis.​—Basaen so Mateo 5:27, 28; Hebreo 4:13.

10, 11. (a) Panon karakel so mandidiborsyo? (b) Antoy ibabaga na Biblia nipaakar ed pansian? (c) Antoy makatulong ed sakey ya asawa pian agtampol misian?

¹⁰ No wala ray seryoson problema na sanasawa, nayarin isipen day mansian o mandiborsyo. Diad arum a bansa, masulok ya 50 porsiento na sanasawa so mandidiborsyo. Anggano dagdaiset so mandidiborsyo ed kongregasyon, ondadakel balet so naproprobleman sanasawan Kristiano kanian labay tayo ran tulongan.

¹¹ Oniay bilin na Biblia: “Say asawan bii et nepeg ya agmisian ed asawa to. Balet no misian, sikatoy mansiansian anggapoy asawa odino mipawilan ed asawa to; tan say asawan laki et nepeg ya agto taynanan so asawa to.” (1 Cor. 7:10, 11) Say pisian et seryoson bengatla. Anggano singa atan so solusyon no wala ray graben agpantatalosan, diad tua  et panlapuan itan na mas dakel ya problema. Kayarin inulit nen Jesus so imbaga na Dios nipaakar ed panaynan na laki ed atateng to tan pangiyamong tod asawa to, inkuan to: “Say impankasakey na Dios et agnepeg a pansianen na too.” (Mat. 19:3-6; Gen. 2:24) Labay ya ibaga na satan ya agnayarin ‘pansianen na asawan laki o asawan bii so impankasakey na Dios.’ Parad si Jehova et legay bilay so panangasawa. (1 Cor. 7:39) Amin tayo et mikuentaan ed Dios, kanian nepeg ya gawaen na saray walaan na asawa so anggaay nayarian dan resolbien a tampol iray problema da pian agla onloor iratan.

12. Akin ya wala ray maniisip ya misian?

¹² No aliwan realistiko so iilaloan na sakey ya asawa, panlapuan itan na problema. No ag-agawa so papangarapen ton maliket ya pamilya, nayarin nadismaya, pakalikna to et aloko, odino maer-ermen ni ingen. Posiblin wala ray agpantatalosan lapud mandumaan so emosyon na laki tan bii, pati say paraan na impamabaleg ed sikara. Nayarin sengegay kolkolan so kuarta, katulangan, tan panagpabaleg na ananak. Balet, nakomendaan so dakel ya Kristianon sanasawa ta nareresolbe da iratan ya problema. Nagagawaan da itan lapud manpapaigiya rad Dios.

13. Anto ray makatunongan ya rason na pansian?

¹³ No maminsan balet et nayarin makatunongan so pansian. Wala ray nikadkaduman situasyon ya nayarin isipen na sakey so misian ed asawa to. Kaibad satan so agpanlegpet ed pamilya, graben panagmaltrato, tan talagan napepeligro so espiritualidad to. No walay seryoson problema na Kristianon sanasawa, kaukolan day manpatulong ed saray elder. Baleg so nitulong na sarayan eksperiensyadon agagi pian niyaplika na sanasawa so simbawa ed Salita na Dios. Pian naresolbe iray problema ed panangasawa, kaukolan tayo met ya kerewen so espiritu tan tulong nen Jehova. Diad ontan et niyaplika tayo ray prinsipyo na Biblia tan nipanengneng tayoy bunga na espiritu to.​—Gal. 5:22, 23. ^[2]

14. Antoy ibabaga na Biblia ed saray Kristiano ya agni manlilingkor ed si Jehova so asawa ra?

¹⁴ Wala met iray Kristiano ya agni manlilingkor ed si Jehova so asawa ra. Ibabaga na Biblia ya wala ray maabig a rason no akin ya ag-ira mansian. (Basaen so 1 Corinto 7:12-14.) Amta man na agmananisian asawa odino andi, sikatoy “ipapasen a masanto” lapud say asawa to et Kristiano. Saray anak da et ipapasen met a “masanto” tan aasikasoen ira na Dios. Inkuan nen Pablo: “Asawan bii, antoy amtam ompan niliktar moy asawam? Odino, asawan laki, antoy amtam ompan niliktar moy asawam?” (1 Cor. 7:16) Diad amin lawarin kongregasyon na Saray Tasi nen Jehova, wala ray asawan atulongan dan “niliktar” so asawa ra.

15, 16. (a) Antoy isisimbawa na Biblia ed saray Kristianon asawan bibii ya agni manlilingkor ed Dios so asawa ra? (b) Antoy nayarin gawaen na sakey a Kristiano “no samay agmananisia et labay toy ontaynan”?

¹⁵ Sinimbawa nen apostol Pedro iray Kristianon asawan bibii, ya inkuan to: “Manpasakop kayo ed asawa yo, pian no wala ray aliwan matulok ed salita, nayarin natangguyor ira ed kagagawa yo anggano agkayo mansalita, ta nanenengneng day maabig a kagagawa yo ya atekepan na aralem a respeto.” No say ugali na asawan bii et “mareen tan maulimek ya espiritu, a mabmabli ed pakanengneng na Dios,” mas natangguyor toy asawa to ed dugan panagdayew nen say no lanang ton bagaan nipaakar ed saray papanisiaan to.​—1 Ped. 3:1-4.

¹⁶ Panon to balet no mandesisyon so agmananisian asawa ya misian? Ibabaga na Biblia: “No samay agmananisia et labay toy ontaynan, paulyan yon ontaynan; say sakey ya agin laki odino agin bii et ag-obligadon miamong diad ontan iran kipapasen, balet  say Dios et inikdan to kayoy kareenan.” (1 Cor. 7:15) Aglabay ya ibaga na satan ya say Kristianon asawa et nayari lan miasawa lamet, balet agto nayarin piliten so agmananisian asawa to ya mansiansia. Say pisian et nayarin mangiter na kareenan. Tan nayarin ilaloan na Kristianon asawa ya ompawil lanlamang imay akisian ya asawa to pian isalbay panamaley da tan agmanbayag et manlingkor ed si Jehova.

17. Antoy nepeg ya iprayuridad na Kristianon sanasawa?

¹⁷ Lapud wala tayo lad sampot a parte na “kaunoran iran agew,” manbibilay tayo lad “mapeligro tan mair-irap a panaon.” (2 Tim. 3:1-5) Balet no mabiskeg so espiritualidad tayo, nalabanan tayo ray mauges ya impluensya na mundo. Insulat nen Pablo: “Apatikeyan lay akeran panaon. Manlapud natan, saramay lalakin walaay asawa et magmaliw komon a singa anggapoy asawa ra, . . . tan saramay manguusar ed mundo et singa saramay agsigpot a manguusar ed satan.” (1 Cor. 7:29-31) Ag-ibabaga nen Pablo ya paulyanan la na saray walaay asawa iray obligasyon dad asawa ra. Balet lapud antiktikey lay panaon, kaukolan dan iprayuridad iray espiritual a bengatla.​—Mat. 6:33.

18. Akin ya posible ed saray Kristiano so maliket tan mareen ya panangasawa?

¹⁸ Anggano manbibilay tayod mair-irap ya panaon tan dakdakel so mansisian, posible so maliket tan mareen ya panangasawa. On, saray Kristianon sanasawa ya mililimog ed arum ni ran lingkor nen Jehova, mangiyaaplikad simbawa na Biblia, tan manpapaigiya ed masanton espiritu nen Jehova et napansiasiansia ray “impankasakey na Dios.”​—Mar. 10:9.