Binasam ta iray agano nin isyu na Say Panag-bantayan? Salim pa sirin ya ebatan irayan tepet:

Pian natulongan ed espiritual na immigrant ya atateng so ananak da, akin ya nepeg dan ikonsidera no dinan ya lenguahe so mas natalosan na ananak da?

Posiblin naaralan na ananak so lokal a lenguahe diad eskuelaan tan diad saray walad kaliberliber da. Makatulong ed anak no aliwan sakey labat a lenguahe so amta to. Nepeg ya ikonsidera na atateng no dinan ya kongregasyon so atendian da pian natalosan na ananak da so katuaan tan onaligwas irad espiritual, balanglan diad kongregasyon a manguusar na lokal a lenguahe odino diad kongregasyon ya manguusar na lenguahe na immigrant. Nepeg ya iyuna na Kristianon atateng so espiritual a pankaabigan na ananak da imbes ya say sarilin panlabayan da.​—w17.05, p. 9-11.

Nen tinepetan nen Jesus si Pedro: “Kasin mas inarom ak nen saraya?” antoy tutukoyen to ya “saraya”? (Juan 21:15)

Mapatnag ya say tutukoyen nen Jesus et saray sira ya walad abay da tan/odino say negosyon panagsigay. Kayari impatey nen Jesus, pinmawil si Pedro ed datin anapan to​—panagsigay. Saray Kristiano et nepeg ya balanse so pangipasen da ed trabaho.​—w17.05, p. 22-23.

Akin et kinerew nen Abraham ed asawa to ya ibaga ton sikatoy agi to? (Gen. 12:10-13)

Diad tua, si Sara et agi nen Abraham ed ama. No ibaga nen Sara ya asawa toy Abraham, nayarin pateyen day Abraham tan agla ra nawalaan na samay ilalak ya impromisa na Dios ed sikato.​—wp17.3, p. 14-15.

Anton teknik so inusar nen Elias Hutter pian natulongan to iramay malabay ya manaral na Hebreo?

Labay ton tulongan iray estudyante to ya nibiig iray root word ed Hebreo diad Biblia tan saray prefix tan suffix na saratan. Kanian, mabakat ya letra so inusar to parad root word, pero aliwan mabakat ya letra so inusar to parad saray prefix tan suffix. Ontan met ya teknik so inusar ed saray footnote ed New World Translation of the Holy Scriptures​—With References.​—wp17.4, p. 11-12.

Anto ray nepeg ya nonoten no nayari kasi ed sakey a Kristiano so nawalaan na paltog pian protektaan toy sarili to ed arum a too?

Nia ray nonoten: Ipapasen na Dios ya sagrado so bilay. Ag-imbaga nen Jesus ed saray papatumbok to ya mangusar iray espada pian protektaan so sarili da. (Luc. 22:36, 38) Nepeg tayon pitpiten iray espada tayo pian gawaen ya tarem na lukoy. Mas importante so bilay nen saray materyal a bengatla. Rerespetoen tayo so konsiensia na arum, tan labay tayoy magmaliw ya alimbawa. (2 Cor. 4:2)​—w17.07, p. 31-32.

Akin et mandumaan so insulat nen Mateo tan Lucas nipaakar ed impanugaw nen Jesus?

Si Mateo et nampokus ed saray agawa ed si Jose, singa say reaksion nen Jose nen naamtaan ton malukon si Maria tan nen imbaga na anghel ya ombatik irad Ehipto insan ompawil ira. Balet si Lucas et nampokus ed saray agawa ed si Maria; singa bilang, nen sikatoy binmisita ed si Elizabet tan say reaksion to nen atilak ed templo so ugaw nin si Jesus.​—w17.08, p. 32.

Anto ran subok so dinalan na Biblia?

Say panguuman na kabaliksan na saray salita tan balikas ya inusar ed Biblia diad ilalabas na panaon. Saray pananguman ed sistema na politika et angapekta ed lenguahen uusaren na karaklan. Wala ray kontra ed panagpatalos na Biblia ed saray lenguahen uusaren na karaklan.​—w17.09, p. 19-21.

Kasin walay anghel dela guardia tayo?

Anggapo. Imbaga nen Jesus ya wala ray anghel na disipulo to a walad arapan na Dios. (Mat. 18:10) Pero aglabay ya ibaga nen Jesus ya walay anghel dela guardia na kada too, noagta ipapaamta to ya walay malasakit na saray anghel ed saray disipulo to.​—wp17.5, p. 5.

Anto so sankaabigan a klase na panangaro?

No base ed duga iran prinsipyo, say a·gaʹpe so sankaabigan ya klase na panangaro. Kaiba ed satan so panamabli tan maapit ya liknaan. Balet manunan napatnagan itan ed saray agmakasarilin ikikiwas parad pankaabigan na arum.​—w17.10, p. 7.