1, 2. Panon ya mabunlok ya uusaren nen Jehova iray materyal a kayarian to?

SI Jehova et maiter a Dios. Nanlapud sikato so amin ya walad sikatayo. Kayarian nen Jehova so amin ya balitok tan pilak tan arum ni ran kayamanan ed dalin, tan uusaren to iratan pian nasustuni so bilay. (Sal. 104:13-15; Ag. 2:8) Dakel so salaysay ed Biblia no panon ya makapakelaw ya inusar nen Jehova iray kaykayarian to pian nitarya iray nakaukolan na totoo to.

² Diad loob na 40 taon, sinuplayan nen Jehova na mana tan danum iray Israelita legan iran walad kalawakan. (Exo. 16:35) Kanian “ag-ira kinmulang na antokaman.” (Neh. 9:20, 21) Panamegley nen propeta Eliseo, nanggawa na milagro si Jehova nen pinarakel toy daiset ya larak na matoor ya biin balo. Sayan regalo na Dios et akatulong pian nabayaran na biin balo iray utang to tan nawalaan na magenap a kuarta ya pambilay to tan saray anak to. (2 Ara. 4:1-7) Diad tulong na Dios, si Jesus et angitarya na naakan tan pati kuarta panamegley na milagro.​—Mat. 15:35-38; 17:27.

3. Antoy aralen tayod sayan artikulo?

³ Sarag nen Jehova ya usaren so dakdakel ya kayarian to pian  nasustuni iray pinalsa tod dalin. Balet papasesegen to nin siansia iray lingkor to ya usaren da iray materyal a kayarian da pian suportaan so kimey na organisasyon to. (Exo. 36:3-7; basaen so Proverbio 3:9.) Akin ya iilaloan nen Jehova ya mangiter tayod sikato panamegley na mablin kaykayarian tayo? Panon ya saray matoor a lingkor nensaman et sinmuporta ed pinansyal parad kimey na saray mangirerepresenta ed si Jehova? Panon ya uusaren natan na organisasyon iray indonasyon a kuarta? Naamtaan tayoy ebat diad sayan artikulo.

4. Antoy ipapanengneng tayod si Jehova no susuportaan tayoy kimey to?

⁴ Mangiiter tayod si Jehova lapud sikatoy inaro tayo tan misalsalamat tayo. Talagan napakiwas tayo no isipen tayoy amin ya ginawa nen Jehova parad sikatayo. Nen imbaga nen Arin David no anto ray kaukolan parad pangipaalagey na templo, binidbir to ya amin ya walad sikatayo et nanlapud si Jehova tan antokaman ya iter tayod si Jehova et nanlapu lanlamang ed sikato.​—Basaen so 1 Awaran 29:11-14.

5. Panon ya ipapanengneng na Kasulatan ya say mabunlok ya panangiter et importantin kabiangan na dugan panagdayew?

⁵ Say panangiter et sakey met a paraan pian nidayew tayo si Jehova. Diad sakey a pasingawey ed si apostol Juan, nadngel to ya ibabaga na saray lingkor nen Jehova diad tawen: “Sika so makanepegan, Jehova a Dios mi, a mangawat na gloria tan galang tan pakayari, lapud pinalsam so amin a bengatla, tan lapud linawam et niwala tan apalsa iratan.” (Apo. 4:11) Agta onabobon ka ya si Jehova so makanepegan a mangawat na amin ya gloria tan galang diad pangiter tayod sikato na sankaabigan ya walad sikatayo? Panamegley nen Moises, ingganggan nen Jehova iray Israelita ya onarap irad si Jehova diad taloran tinaon ya piesta. Bilang kabiangan na panagdayew da, saray Israelita et agnepeg ya “onarap a kalimalima ed si Jehova.” (Deu. 16:16) Ontan met natan, say mabunlok ya panangiter bilang apresasyon tan suporta ed kimey na organisasyon nen Jehova diad dalin et importantin kabiangan na panagdayew tayo.

6. Akin ya say panangiter et pankaabigan tayo? (Nengnengen so litratod gapo na artikulo.)

⁶ Say panangiter et pankaabigan tayo. Maong so epekto ed sikatayo no lanang tayon mangiiter tan aliwa labat ya mangaawat. (Basaen so Proverbio 29:21.) Nayarin nanonotan tayo so sakey ya ugaw ya niregaloan to ray ateng to manlapud melag ya balon ton kuarta ya inter dad sikato. Seguradon panliketan na atateng to itan ya regalo! Say sakey ya anak a manpapayunir tan wala nid pudir na ateng to et nayarin mangiter na kuarta ya makatulong ed saray gastos dad abung. Anggano agmet itan iilaloan na atateng to, nayarin awaten day iter to lapud sakey itan a paraan pian nipanengneng na anak da so apresasyon to ed amin a gagawaen da parad sikato. Ontan met, amta nen Jehova ya pankaabigan tayo so pangiiter tayo na mablin kaykayarian tayo.

7, 8. Panon ya saray lingkor nen Jehova nensaman et maabig ya alimbawa ed panangiter (a) parad espisipiko iran proyekto? (b) parad pansuporta ed kimey na Dios?

⁷ Niyugali na saray lingkor na Dios nensaman so mangiter manlapud kaykayarian da. Say arum ya lingkor nen Jehova et mangiiter parad espisipiko iran proyekto. Singa bilang, impaseseg nen Moises so pandonasyon parad pangipaalagey na tabernakulo, tan ontan met so ginawa nen David parad pangipaalagey na templo. (Exo. 35:5; 1 Awa. 29:5-9) Legan na uley nen Arin Jehoas, saray akolektan kuarta et inusar na saray saserdote pian apigeren so abung nen Jehova. (2 Ara.  12:4, 5) Diad Kristianon kongregasyon nen inmunan siglo, nen impaamta ed saray agagi ya wala ray mankaukolan na tulong lapud eras, ‘nandesisyon iran mangipawit na tulong ed saray agagin manaayam diad Judea, kada sakey unong ed nasarag to.’​—Gawa 11:27-30.

⁸ Diad arum a pankanawnawa, saray totoo nen Jehova et angiter na pinansyal a tulong ed saray mangidadaulo ed kimey. Base ed Mosaikon Ganggan, saray Levita et anggapoy tawir da, aliwan singa saray arum ya tribu. Kanian iikdan ira na saray Israelita na kakaplo pian makapanpokus irad kimey da ed tabernakulo. (Num. 18:21) Mipadpara, si Jesus tan saray apostol to et agunggonaan met ed inkamaiter na saray bibii a “manlilingkor ed sikara diad panguusar day kayamanan da.”​—Luc. 8:1-3.

9. Anto ray panlalapuan na saray donasyon nensaman?

⁹ Siempre, nandurumay nanlapuan na saratan ya donasyon. Nen nandonasyon iray Israelita parad pangipaalagey na tabernakulo diad kalawakan, nayarin kaiba ed saray inter da iramay kayarian dan nanlapud Ehipto. (Exo. 3:21, 22; 35:22-24) Nen inmunan siglo, wala ray Kristianon angilako na kaykayarian da, singa say dalin odino abung, tan inawit dad saray apostol iray nanlakoan da. Insan imbunog iratan na saray apostol ed saramay mankaukolan. (Gawa 4:34, 35) Say arum et angibiig na kuarta tan regular iran nandonasyon parad pansuporta ed kimey. (1 Cor. 16:2) Kanian saray totoo ya nandurumay kipapasen dad bilay​—balanglan mayaman odino mairap—​et angiter na donasyon.​—Luc. 21:1-4.

10, 11. (a) Panon tayon naalig iray maiter ya lingkor nen Jehova nensaman? (b) Antoy naliliknam ed pribilehyom ya suportaan so kimey na Panarian?

¹⁰ Natan et papasesegen itayo met ya mandonasyon parad espisipiko iran gagala. Singa bilang, kasin walay planon mangipaalagey na balon Kingdom Hall ya usaren na kongregasyon yo? Odino kasin kaukolan ya i-renovate so Kingdom Hall yo? Nayarin impaamta ed sikatayo iray pinansyal a pankaukolan parad pan-renovate na branch office tayo, parad kombension ya aatendian tayo, odino itulong ed agagi ya naapektoay kalamidad. Mandodonasyon tayo met pian nasuportaan iramay mankikimey diad world headquarters tan diad saray branch office ed interon mundo. Uusaren iray donasyon tayo pian suportaan iray misionero, espisyal payunir, tan manangasikaso na sirkito. Nayarin wala met so ginawan resolusyon na kongregasyon ya mangiter na pinansyal a kontribusyon parad programan panagpaalagey na Assembly Hall tan Kingdom Hall diad interon mundo ya pinanabangan na saray agagi tayo.

¹¹ Sarag tayon amin so mangiter pian suportaan so kimey nen Jehova ya nasusumpal ed sayan kaunoran iran agew. Maslak ed saray donasyon et ag-amta no siopay nanlapuan. Agtayo ipapaamta ed arum so pangipepelag tayoy donasyon ed saray kahon parad kontribusyon diad Kingdom Hall, odino nayarian tayoy mandonasyon online panamegley na jw.org. Ompan iisipen tayo ya anggapoy nitutulong na saray melag a donasyon tayo. Balet, maslak ed saray donasyon ya nanaawat natan et angkelag balet dakel so mangiiter, imbes ya angkakabaleg ya pigpigara so mangiiter. Saray agagi tayo, anggan saramay mairap so bilay da, et singa saray taga Macedonia ya anggano ‘pinasyay irap na bilay’ da et akikasi iran nawalaan na pribilehyon mangiter, tan mabunbunlok ira.​—2 Cor. 8:1-4.

12. Panon ya seseguroen na organisasyon ya nausar ed sankaabigan ya paraan iray indonasyon ya pundo?

¹² Gagawaen na Mananguley ya Ulop so anggaay nayarian to ya magmaliw a matoor tan makabat ed panguusar na pundo na organisasyon. (Mat. 24:45) Saray nanaawat iran  pundo et ibabadyet tan gagastosen ed dugan paraan. (Luc. 14:28) Nensaman, saray mangaasikaso na indonasyon iran pundo et walay tinumbok dan uksoyan pian naseguro ya saray donasyon et nausar labat ed manepeg ya pangusaran ed saratan. Singa bilang, nen pinmawil si Esdras ed Jerusalem, awi-awit to ray indonasyon na ari na Persia​—saray balitok, pilak, tan arum nin materyales ya say kantidad to natan et masulok ya $100 milyon (U.S.). Impasen nen Esdras ya saratan ya pundo et boluntaryon apay parad si Jehova tan nanggaway detalyadon uksoyan pian naprotektaan iratan a kayamanan diad pambiahe ed mapeligron lugar. (Esd. 8:24-34) Si apostol Pablo et nankolekta na saray donasyon bilang tulong ed saray mankaukolan ya agagi ed Judea. Sikatoy nanggaway paraan pian naseguro ya saray imbakin mangawit na pundo et “dugay paraan na pangaasikaso [da] ed amin a bengatla, aliwa labat a diad pakanengneng nen Jehova, noagta diad pakanengneng met na totoo.” (Basaen so 2 Corinto 8:18-21.) Bilang pangalig ed alimbawa nen Esdras tan Pablo, wala met iray uksoyan ya maalwar a tutumboken na organisasyon tayo nipaakar ed pangasikaso tan panggastos ed saray indonasyon ya pundo.

13. Akin ya diad agano ni et nanggaway pigaran pananguman so organisasyon?

¹³ Say sakey ya pamilya et nayarin manggawa na pananguman pian ag-ira manggastos na sobra nen say nanaalmo ra odino iisipen da no panon dan napasimpli so bilay da tan nabawasan so gastos da pian mas makapanlingkor ira ed si Jehova. Ontan met so gagawaen na organisasyon nen Jehova. Diad agano ni labat iran taon, dakel so ginapoan iran balon proyekto. No maminsan, walay panaon ya mas dakel so kuartan ompapaway nen say nanaawat. Kanian manggagaway paraan so organisasyon pian nabawasan iray gastos tan napasimpli so kimey, diad ontan et nausar ed sankaabigan ya paraan iray donasyon ya mabunbunlok yon inter.

14-16. (a) Anto ray pigaran maabig ya agawaan lapud pandodonasyon yo? (b) Panon kan agunggonaan ed sarayan probisyon?

¹⁴ Dakel ya abayag lan lingkor nen Jehova so mangibabaga ya natan da labat nanenengneng so onian karakel na espiritual iran probisyon. Isipen pa labat! Diad agano ni, anengneng tayoy inggapo na jw.org tan JW Broadcasting. Say Balon Mundo a Patalos na Masanton Kasulatan et im-publish ed dakel ni ran lenguahe. Nen 2014 tan 2015, wala ray nirentaan ya angkakabaleg ya istadyum ed 14 ya syudad ed interon mundo parad taloy agew ya “Anapen Nin Unona so Panarian na Dios!” ya  Internasyonal a Kombension. Talagan malikeliket iray inmatendi.

¹⁵ Dakel so mangibabalikas na pisasalamat da ed balibali iran gunggona ya nanaawat da ed organisasyon nen Jehova. Singa bilang, nipaakar ed JW Broadcasting, oniay insulat na sanasawan manlilingkor ed sakey a bansa ed Asia: “Say asainmin mi et diad sakey a melag ya syudad. Kanian no maminsan, pakalikna mi et akabiig kami tan mainomay min nalingwanan no panon kalaknab so kimey nen Jehova. Balet no babantayan mi la ray programa ed JW Broadcasting, nipapanonot ed sikami ya kaiba kami ed sankamundoan ya impanaagi. Saray agagi et eksayted ya maong ed JW Broadcasting. Kayari min manbantay na binulan ya programa, mabetbet dan ibabaga ya pakalikna da et asingsingger irad saray membro na Mananguley ya Ulop. Natan et mas proud ira ya kaiba irad organisasyon na Dios.”

¹⁶ Diad interon mundo, manga 2,500 ya Kingdom Hall so peles ya ipapaalagey odino ire-renovate. Nen ginapoan lan usaren na sakey a kongregasyon ed Honduras so balon Kingdom Hall da, oniay insulat na saray agagi ditan: “Talagan malikeliket kami ya kaiba kami ed pamilya nen Jehova tan na-enjoy so sankamundoan ya impanaagi ya tinmulong pian ontua so pangarap min nawalaan na Kingdom Hall ed lugar mi.” Dakel met so angibalikas na ontan ya apresasyon nen wala lay nipatalos ya Biblia tan arum nin publikasyon diad sarili dan lenguahe, nen akaawat iray tulong kayari kalamidad, odino nen anengneng day maabig iran resulta na metropolitan tan public witnessing diad lugar da.

17. Panon ya saray nagagawaan na organisasyon tayo natan et prueba ya tutulongan itayo nen Jehova?

¹⁷ Agmakapanisia iray aliwan Tasi nen Jehova no panon tayon nagagawaan irayan amin ya kimey panamegley labat na saray boluntaryon donasyon. Kayarin nan-tour ed sakey ed saray panag-imprintaan tayo so sakey ya manedyer na baleg a kompanya, sikatoy mandinayew ta amin ya kimey et nagagawaan panamegley na saray boluntaryon mankikimey, boluntaryon donasyon, tan anggapoy oorganisaen iran event parad pamawalay pundo. Imbaga to ya imposible so nagagawaan tayo. Dugay imbaga to! Amta tayo ya nagagawaan tayo labat iratan lapud tulong nen Jehova.​—Job 42:2.

18. (a) Anto ran bendisyon so naawat tayo no mangiter tayo pian suportaan so Panarian? (b) Panon tayon nipasal iray anak tayo tan saray balo ni ya mibiang ed panangiter?

¹⁸ Iikdan itayo nen Jehova na kagalangan tan pribilehyo ya suportaan so kimey na Panarian natan. Ipapaseguro to ya nabendisyonan itayo no mangiter tayo pian suportaan so Panarian. (Mal. 3:10) Ipropromisa nen Jehova ya saray mabunlok ya mangiiter et onaligwas. (Basaen so Proverbio 11:24, 25.) Nalikna tayo met so liket no mangiiter tayo, lapud “mas makapaliket so mangiter nen say mangawat.” (Gawa 20:35) Diad salita tan alimbawa, pribilehyo tayon ipasal iray anak tayo tan saray balo ni ya mibiang ed panangiter pian makaawat met ira na dakel ya bendisyon.

19. Panon kan apaseseg na sayan artikulo?

¹⁹ Amin a walad sikatayo et nanlapud si Jehova. No mangiiter tayod sikato, ipapanengneng tayo ya sikatoy inaro tayo tan pisasalamatan tayoy amin a ginawa to parad sikatayo. (1 Awa. 29:17) Nen nandonasyon iray Israelita parad pangipaalagey na templo, “nanliketan na saray totoo so impangiter da na saray boluntaryon apay, ta interon puso iran angiter na saray boluntaryon apay ed si Jehova.” (1 Awa. 29:9) Ontan met, komon ta tuloytuloy tayon panliketan so mangiter ed si Jehova panamegley na amin ya nanaawat tayo ed sikato.