1. Anto ran subok so kaukolan tayon sungdoan, balet akin ya malikeliket si Jehova ed saray matoor ya lingkor to? (Nengnengen iray litratod gapo na artikulo.)

SAY bilay tayo ed sayan sistema na mundo et napnoy problema. Dakel ed sikayo ran pinablin agagi so walaan na graben sakit. Saray arum, anggano medyo maedad la, et walay aasikasoen dan mas maedad lan kapamilya. Wala met iray naiirapan ya mangitarya na anggan saray manunan pankaukolan na pamilya da. Tan dakel so ondadalan ed aliwa labat a sakey noagta pigaran mansasabay ya problema! Mankaukolan iratan na dakel a panaon, biskeg na liknaan, tan baleg a kuarta. Balet anggano ontan so dadalanen mo, maniilalo ka ya nasumpal iray sipan na Dios; mabiskeg so pananisiam ya walay marakep ya nagawa ed arapen. Seguradon malikeliket si Jehova ed sika!

2. Panon itayon napaseseg ed ibabaga na Isaias 40:29, balet anton baleg a lingo so nayarin isipen tayo?

² Balet kasin no maminsan et singa labay mo lay onsuko lapud saray subok ya dadalanen mo? No ontan so naliliknam, agmo bukbukor. Ibabaga na Biblia ya wala ray matoor ya lingkor na Dios nensaman ya aminpigapiga dan alikna ya agda la nasarag. (1 Ara. 19:4; Job 7:7) Balet imbes ya onsuko ra, nanilalo irad si Jehova ya  pabiskegen to ra. Ag-ira adismaya, lapud say Dios tayo et “iikdan toy pakayari iray naksawan.” (Isa. 40:29) Pero makapaermen ta inisip na arum ya lingkor na Dios natan ya say sankaabigan a paraan pian nasarag da iray subok et ‘ontunda ni ran manlingkor,’ a singa makapabelat iray Kristianon aktibidad imbes ya makapaliket. Kanian agla ra manbabasa na Salitay Dios, mimiaral, tan manpupulong—saray labalabay nen Satanas ya gawaen da.

3. (a) Antoy nayarin gawaen tayo pian ag-itayo onkapuy a singa ed labay nen Satanas? (b) Antoy aralen tayo ed sayan artikulo?

³ Amta na Diablo ya ombiskeg tayo no lanang tayon mibibiang ed saray Kristianon aktibidad, balet say labay to et onkapuy tayo. Kanian no say pakaliknam et naknaksawan ka la tan agmo la nasarag, agmo iyaarawi so sarilim ed si Jehova. Kaukolan moy onapit ya maong ed sikato, lapud ‘gawaen to kan mapekder, gawaen to kan mabiskeg.’ (1 Ped. 5:10; Sant. 4:8) Diad sayan artikulo, aralen tayoy duaran situasyon ya nayarin pansengegan ya nabawasan so seseg tayo ed panaglingkor ed Dios tan amtaen tayo no panon ya say pangiyaplika ed saray prinsipyo ed Biblia et ontulong ed sikatayon arapen iratan. Balet pantongtongan tayo ni no panon a sarag itayon pabiskegen nen Jehova, unong ya ibabaga na Isaias 40:26-31.

4. Antoy naaralan tayod Isaias 40:26?

⁴ Basaen so Isaias 40:26. Anggapoy too ya makabilang ed amin ya bitewen ed uniberso. Papanisiaan na saray scientist ya nayarin anggad 400 bilyon so karakel na bitewen dia labat ed Milky Way a galaxy tayo. Balet si Jehova et inikdan to na ngaran so kada bitewen. Antoy naaralan tayo? No iimanoen nen Jehova iray andiay bilay ya pinalsa, isip mo pa labat no antoy nalilikna to ed sika ya manlilingkor ed sikato, aliwan lapud aka-program itan a gawaen mo noagta lapud sikatoy inarom! (Sal. 19:1, 3, 14) Kabkabat ka na maaron Ama tayo. ‘Anggan saray buek mo et binilang ton amin.’ (Mat. 10:30) Tan ipapaseguro ed sikatayo na salmista: “Amta nen Jehova so dadalanen na saray andiay pakabalawan.” (Sal. 37:18) On, amta to iray subok ya dadalanen mo, tan sarag to kan pabiskegen pian nasungdoan mon amin iratan.

5. Panon tayon makaseguro ya sarag itayon pabiskegen nen Jehova?

⁵ Basaen so Isaias 40:28. Si Jehova so Lapuan na mabisbiskeg ya enerhiya. Singa bilang, isipen pay karakel na enerhiyan iiter to dia labat ed agew. Oniay imbaga na writer ed science ya si David Bodanis: “Say ibubuga na Agew kada segundo ya magmamaliw ya enerhiya et katumbas toy [bilyon-bilyon ya] bomba atomika.” Kinalkula met na sakey ya researcher ya say agew et “mamapawala natan na . . . magenap ya enerhiya ed kada segundo pian nasustuni so bilay na totoo ed 200,000 ya taon”! Kasin mairap ya panisiaan ya say Dios ya mangiiter na enerhiya ed agew et nayarian to tayon ikdan na biskeg pian nasarag so anggan anton problema?

6. Akin ya nibagan maabig so pako nen Jesus, tan antoy nepeg ya epekto na satan ed sikatayo?

⁶ Basaen so Isaias 40:29. Makapaliket so manlingkor ed si Jehova. Oniay imbaga nen Jesus ed saray disipulo to: “Sakbat yoy pakok.” Tan inyarum to: “Pian nainawaan kayo. Ta say pakok et maabig, tan anlemew so awit ko.” (Mat. 11:28-30) Talagan tua itan! No maminsan, singa naknaksawan tayo antis tayon onalis ed abung pian miaral odino manpulong. Balet antoy liknaan tayo kapawil tayo? Nainawaan—tan mas akaparaan tayon arapen iray subok. Talagan maabig so pako nen Jesus!

7. Mangisalaysay na eksperiensya ya mangipapanengneng ya tua so ibabaga na Mateo 11:28-30.

 ⁷ Walay sister ya manngaran na Kayla ya aanosan toy sakit to ya sobran mikekesaw (chronic fatigue syndrome), depresyon, tan graben sakit na ulo. Kanian no maminsan et naiirapan ya miaral. Balet kayari ton ginawa so anggaay nayarian to pian naatendian so publikon paliwawa, insulat to: “Say paliwawa et nipaakar ed pakakadismaya. Walay empatya tan malasakit na espiker ed paraan na impanpaliwawa to kanian akalua ak. Nipanonot ed siak ya talagan kaukolan ko so miaral.” Sikatoy malikeliket ta ginawa toy anggaay nayarian ton miaral!

8, 9. Antoy labay ya ibaga nen apostol Pablo nen insulat ton: “No kapigan a makapuy ak, diman ak mabiskeg”?

⁸ Basaen so Isaias 40:30. Anggano marundunong tayo, limitado nin siansia so nagawaan tayo diad sarili tayon biskeg. Atan so nepeg tayon tandaan. Singa si apostol Pablo, anggano dakel so amta ton gawaen, wala met iray limitasyon to kanian agto nagawaan so amin ya labay to. Nen imbalikas tod Dios so nalilikna to, oniay imbaga ed sikato: “No kapigan makapuy ka, diman mabisbiskeg so pakayarik.” Atalosan itan nen Pablo. Kanian inkuan to: “No kapigan a makapuy ak, diman ak mabiskeg.” (2 Cor. 12:7-10) Antoy labay ton ibaga?

⁹ Binidbir nen Pablo ya daiset labat so nagawaan to no anggapoy tulong na Dios. Sarag ya iter na masanton espiritu na Dios so biskeg ya kaukolan nen Pablo. Akatulong met itan pian nagawaan to iray kimey ya agto sarag ya sumpalen ed sarili ton biskeg. Ontan tayo met. No say biskeg tayo et manlalapud si Jehova, seguradon mabisbiskeg tayo!

10. Panon ya tinulongan nen Jehova si David pian nasarag to iray subok?

¹⁰ Say salmistan si David et mabetbet ton naeksperiensya a sikatoy pinabiskeg na masanton espiritu na Dios. Inkansion to: “Diad tulong mo et nalabanan koy grupo na tulisan; diad pakayari na Dios et nakalab koy padir.” (Sal. 18:29) Wala ray singa padir iran problema ya agtayo “nakalab” diad sarili tayon biskeg; kaukolan tayoy tulong nen Jehova.

11. Panon itayon natulongan na masanton espiritu pian nasarag iray problema tayo?

¹¹ Basaen so Isaias 40:31. Say agila et agmakatikyab na atagtagey tan arawrawi diad sarili ton biskeg. Say onaatagey ya ampetang a dagem so ontutulong ed agila pian makatikyab, kanian nirereserba toy biskeg to. Kanian no walay mairap ya asainmin mo, nonot moy agila. Kerew mod si Jehova ya pabiskegen to ka panamegley na “say mananulong, say masanton espiritu.” (Juan 14:26) Makapaliket ta sarag tayon kerewen itan kada no kaukolan tayo​—anggan anton oras. Ontan met, nayarin kakkaukolan tayoy tulong na Dios no walay agtayo akapitalosan ya kakongregasyon tayo. Balet akin ya nagagawa so ontan ya agpantatalosan?

12, 13. (a) Akin ya wala ray nagagawan agpantatalosan ed saray Kristiano? (b) Diad samay agawa ed si Jose, antoy naaralan tayo nipaakar ed si Jehova?

¹² Wala ray nagagawan agpantatalosan lapud amin tayo et aliwan perpekto. Kanian no maminsan et onsyodot tayo ed saray ibabaga odino gagawaen na agagi tayo—odino sikara so napasyodot tayo. Lapud saya et nayarin nasubok tayon maong. Singa ed arum ya subok, aabuloyan itan nen Jehova pian nipanengneng tayoy katooran tayo. Panon? No aralen tayoy mikimey a nankakasakey ed saray agagi tayo ya aaroen nen Jehova anggano aliwa ran perpekto.

¹³ Nanengneng ed agawad si Jose ya aabuloyan nen Jehova ya nasubok iray lingkor to. Nen kabataan ni Jose, sikatoy inlako na saray maimon ya kuya to bilang aripen tan inawit ed  Ehipto. (Gen. 37:28) Amta nen Jehova so nagagawa tan seguradon naermenan nen anengneng toy impantrato ed matunong ya kaaro ton si Jose. Balet inabuloyan Ton nagawa iratan. Insan nen inakusaan si Jose ya sasalien ton akdolan so asawa nen Potifar tan nipriso, siansia nin inabuloyan itan nen Jehova. Balet kasin pinaulyanan na Dios si Jose? Andi, ta oniay imbaga na Biblia: “Pinagmaliw nen Jehova a matalona so amin a ginawa to.”—Gen. 39:21-23.

14. Anto ray nagunggona tayo ed espiritual tan pisikal no “tundaan” tayoy manpasnok?

¹⁴ Nia ni sakey ya alimbawa. Wala ray totoo ya talagan aliwliway impantrato ed sikara a singa si David. Balet ag-inabuloyan na sayan kaaro na Dios ya sikatoy onsanok lapud asakitan so liknaan to. Imbes, oniay insulat to: “Tundaan moy manpasnok tan paliisan moy onsanok; agka onsyosyodot tan onggapon manggaway kaugsan.” (Sal. 37:8) Say sankaimportantian a rason no akin ya “tundaan” tayoy manpasnok et labay tayon aligen si Jehova, ya “agto ginawa ed sikatayo so unong ed saray kasalanan tayo.” (Sal. 103:10) Wala met iray gunggona no “tundaan” tayoy manpasnok. Say pampasnok et nayarin pansengegan na saray problema ed pisikal a singa say iyatagey na blood pressure tan sakit ed puso. Naapektoan na satan so altey tan lapay, tan nairapan so digestive system tayo. No manpapasnok tayo, agtayo makapannonot na duga. Tan no maminsan, say sanok et nayarin manresulta ed depresyon ya agmainomay ya naandi. Balet ibabaga na Biblia ya “say kalmadon puso et mangiiter na bilay ed laman.” (Pro. 14:30) Anto sirin so gawaen tayo no asakitan so liknaan tayo tan panon tayon makapikareenan ed agi tayo? Sarag tayon iyaplika so makabat ya bilin na Biblia.

15, 16. Anto ray nepeg tayon gawaen no walay agi ya asakitan toy liknaan tayo?

¹⁵ Basaen so Efeso 4:26. Agtayo la pankelawan ya kaukolan tayon anosan so aliwliwan panagtrato na totoo ed mundo. Balet no asakitan so liknaan tayo lapud imbaga o ginawa na sakey ya agi odino kapamilya tayo, nayarin nadismaya tayon maong. Panon to no agtayo nalingwanan a tampol so agawa? Kasin paulyanan tayon mantultuloy ed dakel a taon so sakit na liknaan tayo? Odino labay tayon unoren so makabat ya bilin na Biblia ya ayosen a tampol so problema? No kapigan tayo pababayagen ya agnaayos so problema, mas mairap so makapikareenan ed agi tayo.

¹⁶ Panon to no asakitan ka na sakey ya agi tan agmo itan napalampas. Anto ray maabig ya nagawaan mo pian makapikareenan ka? Unona, masimoon kan manpikasi ed si  Jehova. Ipikasim ya tulongan to kan mitongtong ya maayos ed agim. Tandaan ya sikatoy kaaro met nen Jehova. (Sal. 25:14) Sikatoy aaroen na Dios. Maabig so panagtrato nen Jehova ed saray kaaro to, tan ontan met so iilaloan ton gawaen tayo. (Pro. 15:23; Mat. 7:12; Col. 4:6) Insan, nonot mon maong so ibagam. Agmo iisipen ya ginagala ton sakitan ka; agmo huhusgaan ya tampol. Tan awat mo ya nayarin wala met so ginawam ya sengegan na agyo impantalosan. Nayarin oniay pangigapom diad pitongtong mo: “Seguro masyado ak labat ya sensitibo, kanian nen kinatongtong mo ak karuman, pakaliknak et . . . ” No bilang ta aliwan maabig so resulta na impitongtong mo, salim so mikareenan lamet diad arum a pankanawnawa. Legan na satan, ipikasim so agim; kerew mod si Jehova ya bendisyonan to. Ipikasim ed Dios ya tulongan to kan say nengnengen mo et saray maong ya ugali na agim. Antokaman so resulta, makaseguro ka ya napaliket moy Jehova ed panggagawam na anggaay nayarian mo ya makapikareenan ed agim—ya kaaro na Dios.

17. Antoy nayarin usaren nen Jehova pian tulongan itayon nipawil so relasyon tayod sikato no akagawa tayoy kasalanan, tan akin ya nepeg tayon awaten itan?

¹⁷ Say pakalikna na arum et ag-ira makanepegan ya manlingkor ed si Jehova lapud akagawa ra na seryoson kasalanan. Talagan manermen tan onkapuy so sakey no nakokonsiensia. Oniay imbalikas nen Arin David nen nakokonsiensia: “Sanen nampareen ak, saray pukel ko et kinmapuy lapud sanagew ya impanakis ko. Ta agew-labi a say limam et ambelbelat ed siak.” Maong ta makpel ya inarap nen David so problema to bilang maespiritual ya too. Imbaga to ni: “Diad kaunoran et impatuak ed sika so kasalanan ko . . . tan pinerdonam iray kasalanan ko.” (Sal. 32:3-5) No akagawa kay seryoson kasalanan, akaparaan si Jehova ya ontulong ed sika ya nipawil so relasyon mod sikato. Balet nepeg mon awaten so tulong ya iiter to panamegley na kongregasyon. (Pro. 24:16; Sant. 5:13-15) Agmo la pababayagen, ta akadepende ed satan so andi-anggaan a bilay mo! Balet panon to no siansia nin nakokonsiensia ka anggano abayag lan aperdona so kasalanan mo?

18. Panon ya makatulong so alimbawa nen Pablo ed saramay nalilikna dan ag-ira makanepegan?

¹⁸ Mapatnag ya wala ray panaon ya naermenan si apostol Pablo lapud saray agawaan ton lingo nensaman. Oniay inamin to: “Siak so sankaabebaan ed saray apostol, tan agak manepeg a tawagen ya apostol, lapud pinasegsegang koy kongregasyon na Dios.” Anggaman ontan, imbaga ni nen Pablo: “Balet lapud agnaparaan a kaabigan na Dios et niiter ed siak iyan betang.” (1 Cor. 15:9, 10) Inawat nen Jehova si Pablo anggano wala ray agawaan ton lingo, tan iilaloan Ton namoria nen Pablo itan. No talagan pagbabawian mo iray agawaan mon kasalanan tan impatuam iratan, makaseguro ka ya kasian ka nen Jehova. Kanian panisiaan moy panamaseguro nen Jehova, tan awat moy panamerdona to!—Isa. 55:6, 7.

19. Anto so teksto tayo ed sayan taon 2018, tan akin ya dugaruga itan?

¹⁹ Legan ya manasingger so anggaan na sayan sistema na mundo, ilaloan tayon ondakel ni ray subok ya arapen tayo. Balet makaseguro ka ya say Dios ya “iikdan toy pakayari iray naksawan, tan pakakasilen ton maong iramay andiay biskeg” et sarag to kan ikdan na antokaman ya kaukolan mo pian makapansungdo ka. (Isa. 40:29; Sal. 55:22; 68:19) Legan na taon 2018, nipanonot ed sikatayo iyan importantin katuaan kada no miaral tayo diad Kingdom Hall. Nanengneng itan ed saray salita ed teksto tayo ed sayan taon: “Ombiskeg iramay maniilalo ed si Jehova.”—Isa. 40:31.