“NO NARERENGEL ko ray eksperiensya na kakaarok ya manlilingkor ed lugar ya baleg so pankaukolan parad saray payunir, labay kon nalikna met so liket ya nalilikna da,” kuan nen Sylviana, sakey a payunir ya 27 so taon to. “Balet,” inyarum to, “ompan agko nasarag so manlingkor ed lugar ya mas baleg so pankaukolan.”

Kasin miparad si Sylviana so naliliknam? Kasin labay mo met so manlingkor ed lugar ya kaukolan so mas dakel ya manangipalapag na Panarian balet manaalangan ka no kasin nasarag mo? No ontan so naliliknam, agka nadidismaya! Diad tulong nen Jehova, alampasan na nilibon agagi iray subok ya mangaamper ed sikaran napalaknab so ministeryo da. Pian naamtaan no panon ya tinulongan nen Jehova so arum ed sikara, ombisita tayod Madagascar, say komapat ya sankabalegan ya isla ed interon mundo.

Diad apalabas ya samploran taon, masulok ya 70 a maseseg ya manangipalapag tan payunir ya nanlapud 11 a bansa * so linma pian manlingkor ed sayan mabungan teritorya ed Africa, ya ditan et dakel so totoon manisia ed Biblia. Ontan met, dakel ya lokal a manangipalapag so mabulos ya inmalis pian suportaan so pangipulong na mensahe na Panarian diad sayan maawang ya isla. Kabaten tayoy pigara ed sikara.

Si Louis tan Perrine, sanasawa ya masulok a 30 so taon da, et taga rad France tan inmalis irad Madagascar. Pigay taon da lan iisipen so onalis ed arum ya bansa pian napalaknab so ministeryo da, balet manaalangan si Perrine. Imbaga to: “Antakot ak ya onlad lugar ya agko kabisado. Singa mairap kon taynanan so kapamilyak, kakongregasyon, apartment mi, amin ya apasalan ko lan lugar tan rotina mi. Talagan say manunan mamipigil ed siak et saray mismon pampapagaan ko.” Balet nen 2012, awalaan na pakpel si Perrine, kanian nandesisyon iran onalis nen Louis. Antoy nalilikna to ed desisyon da? “No isipen koy apalabas, nibagak ya talagan binmiskeg so  pananisiak ta anengneng ko no panon kamin tinulongan nen Jehova.” Imbaga met nen Louis, “Makapaliket ta diad unonan Memoryal mi ed Madagascar, samplora ed saray iyaaralan mi na Biblia so inmatendi!”

Antoy akatulong ed sayan sanasawa pian mansiansia rad asainmin da nen wala ray sinmabin problema da? Impikasi dad si Jehova ya ikdan to ra na biskeg pian makapansungdo ra. (Fil. 4:13) Imbaga nen Louis: “Alikna min inebatan nen Jehova so pikakasi mi tan inikdan to kami na ‘kareenan na Dios.’ Atulongan kamin manpokus ed liket ya nalilikna mi ed panlilingkor mi. Ontan met, saray kakaaro mi ed France et nampawit na saray e-mail tan sulat pian pasesegen da kamin ag-onsuko.”​—Fil. 4:6, 7; 2 Cor. 4:7.

Talagan benendisyonan nen Jehova so pansusungdo nen Louis tan Perrine. “Nen Oktubre 2014, nanaral kami ed Bible School for Christian Couples * diad France,” so kuan nen Louis. “Say impanaral mid satan ya eskuelaan et sakey ya regalo nen Jehova ya agmin balot nalingwanan.” Diad graduation da, maliket ya inawat na sayan sanasawa so asainmin dan ompawil ed Madagascar.

Nen inmalis ed Madagascar so sanasawan taga France ya si Didier tan Nadine, masulok ya 50 so taon da. Imbaga nen Didier: “Medyo ugaw kami ni nen nampayunir kami, insan awalaan kami na taloran ananak. Nen adulto la ra, inisip mi no sarag mi manlingkor ed arum a bansa.” Inamin nen Nadine: “Nan-alangan ak ta singa mairap ed siak so onarawi ed ananak ko, balet imbaga dad sikami: ‘No onla kayod arum a bansa pian manlingkor ed lugar ya mas baleg so pankaukolan, magmaliw kamin proud ed sikayo!’ Lapud satan ya imbaga ra, apaseseg kami ya onalis. Anggaman arawi kami natan ed saray anak mi, siansia nin maliket kami ta mabetbet mi ran nakakatongtong.”

Parad si Didier tan Nadine, aliwan mainomay so manaral na lenguahen Malagasy. “Aliwa lan 20 so edad mi,” so kuan nen Nadine ya makakaimis. Antoy akatulong ed sikara? Unona, linma ni rad kongregasyon ya manguusar na French. Ag-abayag, nen akaparaan la ran manaral na lokal a lenguahe, inmalis ira ed kongregasyon ya manguusar na Malagasy. Oniay imbaga nen Nadine: “Dakel so totoon napupulongan mi ya labalabay day manaral na Biblia. Mabetbet iran misasalamat ed ibibisita mi. Nen unaan, say amtak mankukugip ak labat. Labalabay koy manpayunir diad sayan lugar. Kada kabuasan no ombabangon ak, ibabagak ed sarilik, ‘Ayos—manpulong ak lamet!’”

Makakaimis si Didier no nanonotan to imay panaon nen agano nin manaaral na Malagasy. “Mangikokondukta ak na aral ed kongregasyon balet agko natatalosan iray ebat na agagi. Basta ibabagak labat ya, ‘Salamat.’ Aminsan, nen akisalamat ak ed ebat na sakey ya sister, saramay akayurong ed benegan to et sininyasan da ak ya aliwa may ebat to. Anawag ak ya tampol na brother ya onebat na duga—pero komon ta dugay ebat to.”

Diad kombension nen 2005, abantayan nen Thierry tan say asawa ton si Nadia so draman “Dampoten Iray Kalat a Mamagalang ed Dios.” Apaseseg ira ed saman ya base ed Biblian drama nipaakar ed si Timoteo tan mas lalo ran apaseseg a manlingkor ed lugar ya kaukolan so dakel ya manangipalapag na Panarian. Imbaga nen Thierry: “Kayari na saman ya drama, legan kamin mantitipak, inyesaes kod si asawak, ‘Iner so laen ta ey?’ Imbaga nen asawak ya pareho kami nononoten.” Ag-abayag kayari na kombension, nanggawa ray paraan pian nagawaan day goal da. Imbaga nen Nadia, “Kalkalna min binawasan iray gamit mi ya anggad say akera et amay onkarga labat ed apatiran maleta!”

Sinmabi rad Madagascar nen 2006 tan manlapud saman et nai-enjoy day ministeryo da. Imbaga nen Nadia, “Agaylay liket mi ta madengedengel iray totoon napupulongan mi.”

Balet kalabas na anemiran taon, walay sinmabin subok ed sikara. Say nanay nen Nadia ya si Marie-Madeleine, ya manaayam ed France, et atumba tan aputer so sakey a taklay to tan nikenay ulo to. Kayari dan kinonsulta so doktor nen Marie-Madeleine, tinepetan day nanay da no labay toy manayam ed Madagascar ya kaiba ra. Anggano 80 lay taon to ed saman, sikatoy pinmayag ya miayam ed sikara. Antoy nalilikna to ed panaayam tod arum a bansa? Imbaga to: “No maminsan et mairap so man-adjust, balet anggano limitado lay nagawaan ko, pakaliknak et mausar ak ni ed kongregasyon. Tan lapud kaamong ko ray anak ko, nitutuloy day mabungan ministeryo da ed sayan lugar. Atan so talagan panliliketan ko.”

Si Riana et sakey a brother ya 22 so taon to. Sikatoy binmaleg ed Alaortra, Mangoro, sakey a mabunan rehyon ed eastern Madagascar. Atagey iray grado to ed eskuelaan tan labay toy mangala na atagey ya edukasyon. Balet nen nanaral na Biblia, anguman so nonot to. Imbaga to: “Ginawak so anggaay nayarian kon maka-graduate ya mas masakbay ed high school tan impromisak ed si Jehova, ‘No makapasa ak ed final exam, manpayunir ak la.’” Ka-graduate nen Riana, tinoor toy promisa to. Sikatoy inmalis na ayaman kaibay sakey a payunir a brother, akalmoy part-time ya trabaho, tan ginmapon nampayunir. Imbaga to, “Aya so sankaabigan a desisyon ko.”

Balet agnatalosan na saray kanayon nen Riana no akin ya agla nankolehyo. Imbaga to: “Labalabay nen tatay ko, uncle ko, tan auntie nen tatay ko ya mangala ak na atagey ya edukasyon. Balet agko isalat ed antokaman so pampapayunir ko.” Pirawat nen Riana so manlingkor ed lugar ya mas baleg so pankaukolan. Akin ya atan so labay ton gawaen? Imbaga to: “Nilooban na saray matakew so panaayaman mi tan dakel so atakew ya gamit ko. Lapud satan ya agawa, anonotan ko imay imbaga nen Jesus nipaakar ed pantipon na ‘kayamanan ed tawen.’ Kanian mas nansagpotan koy mantipon na espiritual a kayamanan.” (Mat. 6:19, 20) Sikatoy inmalis ed sankasampotan lan lugar ed Madagascar diad south—diad kelang a rehyon ya manga 1,300 kilometro so kaarawi to manlapud datin panaayaman to. Ditan so panaayaman na saray tribun Antandroy. Akin et linma ditan?

Sakey bulan antis iran atakewan di Riana, walay duaran lalakin Antandroy ya agapoan ton inyaralan na Biblia. Walay pigaran salita ed lenguahe da ya naaralan to tan ninonot to ya dakel ni ray Antandroy ya agni akarengel na mensahe na Panarian. Imbaga to, “Impikasik ed si Jehova ya tulongan to ak ya makaalis ed lugar na saray mansasalita na Tandroy.”

Kaalis nen Riana, walan tampol so subok ed sikato. Anggapoy naromog ton trabaho. Walay lakin angibaga ed sikato: “Akin et linma ka dia? Saray taga dia et oonlad lugar yo pian mananap na trabaho!” Kayari na duay simba, ngalngali anggapo lay keran kuarta nen Riana nen inmalis pian onatendi ed regional a kombension, tan agto amtay gawaen to. Diad sampot ya agew na kombension, sikatoy inasinggeran na sakey ya brother tan walay inyan tod bulsa na amerikana to. Kuarta manaya tan masulosulok ya ipasahe to papawil ed Antandroy tan wala ni pampuunan to parad melag a negosyo ya manlakoy yogurt. Imbaga nen Riana: “Aliknak so tulong nen Jehova diad panaon ya kakkaukolan ko. Natulongan ko ni iray totoon agda ni akabat si Jehova!” Dakel met so kimey to ed kongregasyon. Imbaga ni nen Riana:  “Kada duay simba et manpapaliwawa ak. Ipapasal ak nen Jehova panamegley na organisasyon to.” Natan et siansia nin ipupulong nen Riana so mensahe na Panarian diad dakel a totoon mansasalitay Tandroy pian nakabat da si Jehova.

Ipapaseguro ed sikatayo nen Jehova ya “siopaman ya onkekerew na bendisyon diad dalin et bendisyonan na Dios na katuaan.” (Isa. 65:16) No gawaen tayoy anggaan na nayarian tayon daegen iray subok pian napalaknab so ministeryo tayo, bendisyonan itayo nen Jehova. Si Sylviana ya abitla ed gapo na sayan artikulo, et nan-alangan no kasin sarag toy manlingkor ed lugar ya mas baleg so pankaukolan. Akin et ontan so naisip to? Imbaga to: “Say kawigin salik et mas antikey na 9 sentimetro nen say kawanan. Kanian mankitley ak tan maganggano ak ya nakesawan.”

Nen 2014, aka-partner nen Sylviana si Sylvie Ann, sakey a kabataan a payunir ed kongregasyon da, tan inmalis irad melag a baryo ya 85 kilometro so kaarawi tod baley da. Anggano dakel iray subok, tinmua so pangarap nen Sylviana—tan balibali itan ya bendisyon ya naawat to! “Sakey taon ak ni labat ed balon asainmin ko,” kuan to, “si Doratine, a medyo ugaw nin ina ya inyaralan koy Biblia, et abautismoan ed sirkiton asemblea mi.”

Singa ed imbalikas na sarayan manlilingkor ed lugar ya mas baleg so pankaukolan, no daegen tayo ray subok pian napalaknab so ministeryo tayo, naeksperiensya tayon mismo imay promisa nen Jehova ed saray lingkor to: “Pabiskegen ta ka, on, tulongan ta ka.” (Isa. 41:10) Lapud satan et mas onelet so relasyon tayod si Jehova. Ontan met, no mabulos tayon iyapay so sarili tayo diad lugar tayo odino diad arum ya bansa—ipaparaan tayoy sarili tayo ed saray teokratikon kimey diad balon mundo. Imbaga nen Didier ya abitla niman ya “say panlingkor ed lugar ya mas baleg so pankaukolan et balibalin panangipasal diad arapen!” Komon ta dakel nin boluntaryo so mabulos ya paipasal!