1, 2. Anton subok so aarapen na totoo na Dios natan? (Nengnengen iray litratod gapo na artikulo.)

DAKEL ya doktor tan nurse so walaan na saray pasyenten makaalis so sakit da. Aasikasoen da ra ta labay da ran tulongan. Balet kaukolan dan protektaan so sarili da pian ag-ira naalisay sakit na pasyente ra. Mipadpara, wala met iray nakakaiba tayod ayaman tan ed trabaho ya saray ugali tan personalidad da et midumaan ed saray ugali ya makapaliket ed Dios. Nayarin nasubok itayo lapud satan.

² Diad sayan kaunoran iran agew et abebbeba lan maong so moral na totoo. Diad komaduan sulat nen apostol Pablo ed si Timoteo, deneskribe to so ugali na totoon nisian ed Dios, saray ugalin mas onloor ni diad arapen. (Basaen so 2 Timoteo 3:1-5, 13.) Anggano nayarin nabigla tayo ed idarakel na totoon makapuy so ugali da, posiblin naalig tayo iratan ya ugali tan kagagawa ra. (Pro. 13:20) Diad sayan artikulo, aralen tayo no panon ya saray ugali na dakel a totoo ed kaunoran iran agew et midumaan ed saray ugali na totoo na Dios. Aralen tayo met no panon tayon naprotektaan so sarili tayo pian ag-itayo naalisan na makapuy iran ugali legan tayon tutulongan so arum ed espiritual.

3. Siopa ray mangipapatnag na saray ugalin binitla ed 2 Timoteo 3:2-5?

 ³ Insulat nen apostol Pablo ya “diad kaunoran iran agew et onsabi iray mapeligro tan mair-irap a panaon.” Binitla to so 19 ya makapuy iran ugali ya ipatnag na totoo diad panaon tayo. Saratan ya ugali et mipara ed saramay binitla nen Pablo ed Roma 1:29-31, balet diad sulat tod si Timoteo et wala ray salita ya anggapod arum a kabiangan na Kristianon Griegon Kasulatan. Nen insulat nen Pablo iratan ya makapuy ya ugali, inggapo to ed saray salitan “ta saray totoo et magmaliw . . . ” Balet, aliwan amin ya totoo et ontan so ugali da. Baleg so pidumaan na ugali na saray Kristiano.​—Basaen so Malaquias 3:18.

4. Panon mon deskribien so toon mapaatagey?

⁴ Kayarin imbaga nen Pablo ya dakel so magmaliw ya maaro ed sarili ra tan ed kuarta, insulat to ya saray totoo et magmaliw met ya mapasirayew, mapaatagey, tan makinon, saray ugalin mabetbet ya ipapatnag na sakey ya toon maabilidad, walay itsura to, mayaman, odino atagey so posisyon to. Saray totoon ontan so ugali ra et labalabay day narayew tan napagalangan. Oniay insulat na sakey ya scholar nipaakar ed toon sobran mapaatagey: “Diad puso to et walay melag ya altar ya dadakmomoan to.” Ibabaga na arum ya say inkalastog et aliwliwan ugali, ya anggan saray malastog et kabusol day arum ya malastog.

5. Panon ya anggan saray matoor et nayarin magmaliw ya mapaatagey?

⁵ Kagula nen Jehova so panagpasirayew tan kabusol toy “mapaatagey iran mata.” (Pro. 6:16, 17) Agmakaasingger ed Dios so toon mapasirayew o mapaatagey. (Sal. 10:4) Ugali itan na Diablo. (1 Tim. 3:6) Makapaermen ta anggan saray arum ya matoor ya lingkor nen Jehova et nagmaliw ya mapaatagey. Si Uzias, ya ari na Juda, et matoor ed loob na dakel a taon. Balet ibabaga na Biblia ya ‘sanen mabiskeg la, nagmaliw a mapaatagey so puso to a saya so akaderalan to, tan impatnag toy ag-inkamatoor ed si Jehova a Dios to nen linmoob ed templo nen Jehova pian mamool na insenso diad altar parad insenso.’ Anggan si Arin Hezekias et nagmaliw met ya mapaatagey, balet anguman lanlamang.​—2 Awa. 26:16; 32:25, 26.

6. Akin ya nayarin magmaliw komon ya mapaatagey si David, balet akin ya nansiansian mapaabeba?

⁶ Saray arum et magmamaliw ya mapaatagey lapud magana o guapo ra, sikat, marunong ed musika, mabiskeg, odino atagey so posisyon da. Saratan et walan amin ed si David, balet nansiansian mapaabeba legay bilay to. Kayarin apatey nen David si Goliat tan niiter ed sikato so anak a bii nen Arin Saul bilang asawa to, oniay inkuan to: “Siopa ak, tan siopa ray kakanayon ko, say pamilya nen amak ed Israel, pian magmaliw a manugang na ari?” (1 Sam. 18:18) Antoy akatulong ed si David pian mansiansian mapaabeba? Niwalad sikato iray ugali, abilidad, tan pribilehyo to lapud say Dios so ‘inmusdong’ odino nampaabeba pian sikatoy imanoen to. (Sal. 113:5-8) Amta nen David ya amin ya maabig a walad sikato et nanlapud si Jehova.​—Ikompara so 1 Corinto 4:7.

7. Antoy makatulong pian nipanengneng tayo so kapaabebaan?

⁷ Singa si David, panggugunaetan na saray totoo nen Jehova natan so magmaliw ya mapaabeba. Mandinayew tayo lapud amta tayon si Jehova, say Sankatagyan ed uniberso, et ipapatnag to itan ya balibalin kualidad. (Sal. 18:35) Labay tayon unoren iyan bilin na Biblia: “Isulong yo so maaron panangabagey, kaabigan, inkamapaabeba, inkaulimek,  tan anos.” (Col. 3:12) Amta tayo met ya say aro et “agmanlalastog, agmanpapaatagey.” (1 Cor. 13:4) No nanenengneng na totoo ya mapaabeba tayo, nayarin niyasingger ira ed si Jehova. No panon ya saray asawan lalaki et nayarin natangguyor lapud kagagawa na asawan bii anggano agmansalita, saray arum et nayarin natangguyor ya mandayew ed Dios lapud inkamapaabeba na totoo to.​—1 Ped. 3:1.

8. (a) Panon ya ipapasen na arum natan so ag-inkamatulok ed atateng? (b) Antoy bilin na Kasulatan ya gawaen na ananak?

⁸ Deneskribe nen Pablo no panon so pantrato na saray totoo ed sakey tan sakey diad kaunoran iran agew. Insulat to ya saray ananak et magmaliw ya agmatulok ed atateng da. Balet no maminsan et ipapasen ya agmauges iyan kagagawa tan ipapaseseg ni ingen natan ed saray libro, pelikula, tan palabas ed TV. Pero diad tua, say ag-inkamatulok so mamubuyak ed sankaimportantian a kabiangan na komunidad​—say pamilya. Abayag lan amta iyan prinsipyo. Diad Gresya nensaman, no walay toon kinabil to ray ateng to, naandi ed sikato so amin ya karapatan to bilang mibabaley; diad ganggan na Roma, no kinabil na sakey so ama to, seryoso itan ya kasalanan a singa panagpatey. Diad Hebreon Kasulatan tan Kristianon Griegon Kasulatan, bibilinen iray ananak ya igalang da iray ateng da.​—Exo. 20:12; Efe. 6:1-3.

9. Antoy makatulong ed ananak pian magmaliw iran matulok ed atateng da?

⁹ Saray ananak et agnaalisan na ugalin agmatulok no nonoten da ray ginawa na atateng da parad sikara. Napaseseg so sakey a magmaliw ya maapresya no natatalosan to ya say katutulok et kakaukolanen na Dios, say Ama tayon amin. No balibali ibabaga na ananak nipaakar ed atateng da, natulongan da met iray arum ya kabataan ya apresyaen iray ateng da. Siempre, no saray ateng et anggapoy panangaro ra ed ananak da, nayarin nairapan so anak da ya ontulok ed sikara. Balet no nalilikna na anak so tuan panangaro na atateng to, sikatoy napakiwas ya unoren ira anggano natutukso ya ag-ontulok. Oniay inamin nen Austin: “Anggano say lanang ya labay kon gawaen et aglabay na atateng ko, mangiiter ira na aliwan is-istrikton totontonen tan ibabaga day rason, tan lanang kami met ya mantotongtong. Tinmulong iya pian magmaliw ak ya matulok. Sankaliknak ya inar-aro da ak, kanian labalabay ko ran unoren.”

10, 11. (a) Anto ran makapuy ya ugali so pakapatnagan ya saray totoo et anggapoy panangaro dad sakey tan sakey? (b) Panon kalaknab so panangaro na saray tuan Kristiano ed kapara dan too?

¹⁰ Binitla nen Pablo so arum nin makapuy ya ugali na totoon anggapoy panangaro dad sakey tan sakey. Nibagan say sakey ya agto amtay misalamat et magmaliw ya “agmatulok ed atateng to” lapud ontan so ugali na totoon agda aapresyaen so kaabigan ya ipapanengneng na arum ed sikara. Saray totoo et magmaliw met ya aliwan matoor. Agda labay so mipaknaan, agdan balot labay so mikareenan ed arum. Magmaliw iran managmudmora tan traidor, makapasakit tan makaderal iray ibabaga da ed arum tan anggan diad Dios. Tan wala met iray managpauges, saray totoon mangibabaga na katilaan pian deralen so maong ya reputasyon na arum. *

¹¹ Balet aliwan singa saray totoo natan ya anggapoy panangaro da, saray mandadayew ed si Jehova et walaan na tuan panangaro ed kapara dan too. Talagan tua itan. Imbaga nen Jesus a say panangaro ed kaparan too, sakey  a klase na a·gaʹpe, so komaduan sankaimportantian a ganggan ed Mosaikon Ganggan, onkokomadua ed panangaro ed Dios. (Mat. 22:38, 39) Imbaga met nen Jesus ya say panangaro ed sakey tan sakey so kualidad ya pakabidbiran ed saray tuan Kristiano. (Basaen so Juan 13:34, 35.) Aaroen da ni ingen anggan saramay mamubusol ed sikara.​—Mat. 5:43, 44.

12. Panon ya impanengneng nen Jesus so panangaro ed totoo?

¹² Impanengneng nen Jesus ya talagan inaro to ray totoo. Sikatoy linmad nanduruman syudad pian ipaamta ed totoo so maong a balita na Panarian na Dios. Pinaabig to iray bulag, piley, akating, tan telek. Pinaoli to iray inatey. (Luc. 7:22) Inter ni ingen nen Jesus so bilay to parad totoo, anggano dakel so nambusol ed sikato. Perpekton inalig nen Jesus so panangaron impanengneng na Ama to. Diad interon mundo, saray Tasi nen Jehova et aaligen day Jesus tan aaroen da so arum.

13. Panon ya say panangaro tayod arum et nayarin ontulong ed sikaran onapit ed si Jehova?

¹³ Say panangaron ipapanengneng tayod arum et nayarin ontulong ed sikara ya onapit ed Ama tayod tawen. Singa bilang, apakiwas so sakey a lakin taga Thailand nen anengneng toy aroan na saray agagi diad sakey a regional a kombension. Kasempet to, kinerew to ya sikatoy iyaralan na Biblia a mamidua ed sakey simba. Pinulongan toy amin ya kanayon to, tan anem bulan labat kayari na kombension, sikatoy naikdan na unonan asainmin ya manbasa na Biblia diad Kingdom Hall. Pian nausisa tayo no talaga kasin nipapanengneng tayoy panangaro ed arum, tepetan tayoy sarili tayo: ‘Kasin gagawaen koy anggaay nayarian ko ya tulongan iray kapamilyak, saray agagi ed kongregasyon, tan saray totoon napupulongan ko? Kasin ipapasen ko so arum a singa ed pangipapasen nen Jehova ed sikara?’

14, 15. Anto ran inaayep ya ugali so ipapatnag na dakel a totoo, balet panon ya anguman so arum ed sikara?

¹⁴ Saray arum nin makapuy ya ugali na totoo ed sayan kaunoran iran agew so sakey met  ya rason no akin ya nepeg iran paliisan na saray Kristiano. Saray totoon anggapoy takot dad Dios et agda aaroen so kamaongan, odino diad arum a patalos et “bubusolen day maong” odino “kontra ira ed amin a kamaongan.” Anggapoy kontrol da ed sarili ra, masesebeg ira. Saray arum et anawet so ulo ra, odino ipasoot day labay da tan palpalaran.

¹⁵ Dakel ya datin walaan na ontan iran inaayep ya ugali et anguman. Sayan makapakelaw a pananguman et nipasakbay ed Biblia. (Basaen so Isaias 11:6, 7.) Nabasa tayo ditan ya saray masesebeg ya ayayep, a singa saray lobo tan leon, et mareen lan miaayam ed maamon ayayep, a singa saray kordero tan kilaw a baka. Imanoen ya posiblin niwala so onian kareenan “lapud say dalin et napano na kakabatan ed si Jehova.” (Isa. 11:9) Lapud agsarag na ayayep ya kabaten si Jehova, sayan propesiya et piguratibon ontutukoy ed panguuman na personalidad na totoo.

16. Panon ya tutulongan na Biblia iray totoo ya umanen so personalidad da?

¹⁶ Dakel so totoo ya datin masesebeg a singa saray lobo, balet natan et mareen la ran miuulop ed arum. Nabasa yo so arum ed saray eksperiensya ra diad saray artikulon “Uumanen na Biblia so Bilay,” a walad jw.org. Saramay akabat day Jehova tan manlilingkor lad sikato et aliwan singa saray totoon singano walay takot da ed Dios balet agnapatnagan ed kabibilay da so pakayari na satan, ya onkikiwas iran makadios balet ipapatnag na kagagawa ra ya kunkunwari labat itan. Balet saramay datin masesebeg a totoo et ‘insulong day balon personalidad a pinalsa unong ed linawa na Dios tan mitunosan ed saray kakaukolanen na tuan inkatunong tan katooran.’ (Efe. 4:23, 24) Legan dan nakakabat so Dios, natatalosan da ya kaukolan day manbilay unong ed saray estandarte to. Kanian apakiwas ira ya umanen iray papanisiaan, ugali, tan kagagawa ra. Aliwan mainomay so manguman balet posible itan lapud tulongan na espiritu na Dios iramay talagan labay dan gawaen so linawa to.

17. Panon tayon napaliisan ya naalig iray totoon makapuy so ugali ra?

¹⁷ Natan et lalon napapatnagan so pandumaan na saray manlilingkor ed Dios tan saray agmanlilingkor ed sikato. Sikatayo ran manlilingkor ed Dios et nepeg ya manalwar pian agtayo naalig iray mauges ya ugali na arum. Labay tayon unoren so bilin na Biblia ya arawian iray totoon adeskribe ed 2 Timoteo 3:2-5. Siempre, agtayo sigpot ya naarawian iray totoon makapuy so ugali ra. Nayarin nakaiba tayo rad trabaho, diad eskuelaan, odino diad ayaman tayo. Balet sarag tayon paliisan ya naalig so panagnonot tan ugali ra. Nagawaan tayo itan no pabiskegen tayoy espiritualidad tayo panamegley na panagaral na Biblia tan lanang ya pilimog ed saramay determinadon manlingkor ed si Jehova.

18. Panon tayon natulongan ed espiritual so arum diad panagsalita tan kagagawa tayo?

¹⁸ Nepeg tayon gawaen met so anggaay nayarian tayon tulongan so arum ed espiritual. Manggawa kay paraan ya napulongan ira, tan ipikasim ed si Jehova ya tulongan to kan duga so nibagam diad dugan panaon. Nepeg tayon ipaamta ed arum ya sikatayoy Tasi nen Jehova. Diad ontan et nigloria so Dios aliwan say sarili tayo lapud saray maong ya ugali tayo. Sikatayoy nipapasal la ya “ipulisay so mauges a kagagawa tan minumundo iran pilalek tan manbilay itayon walaan na limpion kanonotan tan inkatunong tan debosyon ed Dios diad sayan kaplesan a sistema na mundo.” (Tito 2:11-14) No manbilay tayo ed paraan ya makapaliket ed Dios, naobserbaan itan na arum, tan nibaga da ni ingen ya: “Mila kami ed sikayo, ta nadngelan min say Dios et walad sikayo.”​—Zac. 8:23.