1, 2. Panon ya impanengneng nen apostol Pablo ya pisalsalamatan toy agnaparaan a kaabigan na Dios?

SARAG ya ibaga nen apostol Pablo: “Agnagmaliw ya andi-kakanaan so agnaparaan a kaabigan [na Dios] ed siak.” (Basaen so 1 Corinto 15:9, 10.) Amta nen Pablo ya aliwan lapud impansagpot to odino lapud kanepegan to kanian akaawat na baleg a panangasi na Dios, ta sikatoy datin managpasegsegang ed saray Kristiano.

² Nen magano lan manampot so bilay nen Pablo, insulat tod kakimeyan ton si Timoteo: “Misasalamat ak ed si Kristo Jesus a Katawan tayo, ya angiter ed siak na pakayari, lapud impasen to ak a matoor diad impangiter tod siak na sakey a ministeryo.” (1 Tim. 1:12-14) Anto itan ya ministeryo? Imbaga tod saray mamatatken ed kongregasyon diad Efeso no antoy kaibad satan: “Agko ipapasen ya importante ed siak so bilay ko, basta nasumpal ko labat so babatiken ko tan say ministeryon inawat kod Katawan a Jesus, pian sigpot kon ipulong so maong a balita nipaakar ed agnaparaan a kaabigan na Dios.”​—Gawa 20:24.

3. Anton nikaduman ministeryo so niiter ed si Pablo? (Nengnengen so litratod gapo na artikulo.)

 ³ Anton “maong a balita” so impulong nen Pablo ya mangidadanet ed agnaparaan a kaabigan nen Jehova? Imbaga tod saray Kristiano ed Efeso: “Nadngel yo la ya inawat ko so responsabilidad a tulongan kayon nagunggonaan ed agnaparaan a kaabigan na Dios.” (Efe. 3:1, 2) Niganggan si Pablo ya ipulong so maong a balita ed saray aliwan Judio pian nakaiba met irad saramay apilin miuley ed Kristo diad Mesianikon Panarian. (Basaen so Efeso 3:5-8.) Lapud maseseg ya sinumpal nen Pablo so ministeryo to, sikatoy maabig ya ehemplo ed saray Kristiano natan tan impanengneng to ya “agnagmaliw ya andi-kakanaan” so agnaparaan a kaabigan na Dios ed sikato.

4, 5. Panon a say “maong a balita na Panarian” et sakey met ya maong a balita na “agnaparaan a kaabigan na Dios”?

⁴ Diad sayan panaon na anggaan, saray totoo nen Jehova et ingganggan ya ipulong day “maong a balita na Panarian . . . ed interon dalin bilang pantasi ed amin a nasyon.” (Mat. 24:14) Say ipupulong tayo et sakey met ya “maong a balita nipaakar ed agnaparaan a kaabigan na Dios” ta amin ya iilaloan tayon bendisyon na Panarian et naawat tayo lapud kaabigan ya impatnag nen Jehova panamegley nen Kristo. (Efe. 1:3) Kasin aaligen na kada sakey ed sikatayo si Pablo diad maseseg ya pibibiang ed ministeryo bilang pisasalamat ed agnaparaan a kaabigan nen Jehova?​—Basaen so Roma 1:14-16.

⁵ Diad akaunan artikulo, naaralan tayo ya dakel so nagugunggona tayo ed agnaparaan a kaabigan nen Jehova anggano makasalanan itayo. Kanian obligasyon tayod amin a totoo ya gawaen so anggaay nayarian tayo ya ipaamtad sikara no panon ya ipapatnag nen Jehova so panangaro to tan no panon ya nagunggonaan so kada sakey ed sikara. Anto ray pigaran pakapatnagan na agnaparaan a kaabigan na Dios ya nepeg tayon ipaamta ed arum?

6, 7. Akin ya no ipapaliwawa tayoy dondon ed totoo et nipapaamta tayo met so maong a balita na agnaparaan a kaabigan na Dios?

⁶ Diad sayan mundo ya nagagawaan na totoo so labay da, dakel so agmakakaliknan walay kasalanan da, kanian agda amta ya kaukolan day dondon. Balet ondarakel met so makakaprueba ya say kabibilay ya nagawaan moy labay mo et agmakapangiter na tuan liket. Anggad agnipaliwawa na saray Tasi nen Jehova, dakel so agmakaamta no anto tay kasalanan, no panon tayon naaapektoan na satan, tan no antoy nepeg tayon gawaen pian nibulos ed kasalanan. Saray totoon manaanap na katuaan et naliligliwa no naaamtaan da ya lapud baleg a panangaro tan agnaparaan a kaabigan nen Jehova, imbaki tod dalin so Anak to pian dondonen itayod kasalanan tan ed ipapatey ya epekto na satan.—1 Juan 4:9, 10.

⁷ Oniay insulat nen Pablo nipaakar ed inar-aro nen Jehova ya Anak to: “Diad panamegley to [si Jesus] et dinondon itayo tan nibulos itayo, on, aperdona iray kasalanan tayo diad panamegley na dala to, unong ed daakan ya agnaparaan a kaabigan na Dios [si Jehova].” (Efe. 1:7) Say dondon bagat nen Kristo so sankabalegan ya prueba na panangaro na Dios ed sikatayo tan pakapatnagan na daakan ya agnaparaan a kaabigan To. Agaylan makaligliwan naamtaan ya no walay pananisia tayod nipaagus ya dala nen Jesus, naperdona ray kasalanan tayo tan magmaliw ya malinis so konsiensia tayo! (Heb. 9:14)  Talagan maong a balita ya labay tayon ipaamtad arum!

8. Akin ya kaukolan a mikareenan ed Dios so makasalanan a totoo?

⁸ Responsabilidad tayon ipaamtad kapara tayon too ya sarag day makapikaaro ed Dios ya nanggawa ed sikara. Antis ya nawalaan na pananisia so totoo ed bagat nen Jesus, ipapasen ira na Dios ya kabusol to. Insulat nen apostol Juan: “Samay mangipapanengneng na pananisia ed Anak et walaan na bilay ya andi-anggaan; samay agmanguunor ed Anak et agto nagamoran so bilay, noagta mansiansia ed sikato so sanok na Dios.” (Juan 3:36) Makapaliket ta lapud bagat nen Kristo, posible so makapikareenan ed Dios. Imbaga nen Pablo: “Sikayoy nisian tan kakabusol nensaman lapud say pinonot yo et mauges iran gawa, natan et agawaan ton makapikareenan kayo ed sikato diad panamegley na laman na samay sakey ya inatey.”—Col. 1:21, 22.

9, 10. (a) Anton responsabilidad so inter ed saray alanaan ya agagi nen Kristo? (b) Panon ya tutulongan na ‘arum a karnero’ iray alanaan ya agagi da?

⁹ Saray alanaan ya agagi nen Kristo ed dalin et akaawat na samay tinukoy nen Pablo ya “ministeryo na pikakareenan.” Pian nipaliwawa itan nen Pablo, sinulatan to iray alanaan a Kristiano nen inmunan siglo: “Amin a bengatla et nanlapud Dios, samay nanggaway paraan pian makapikareenan kami lamet ed sikato diad panamegley nen Kristo tan angiter ed sikami na ministeryo na pikakareenan, salanti, say Dios et nanggaway paraan pian makapikareenan lamet so mundo ed sikato diad panamegley nen Kristo, ya agto bibilangen iray kasalanan da, tan inmatalek tod sikami so mensahe na pikakareenan. Kanian, sikami ray embahador a kasandi nen Kristo, a singano say Dios et mikakasi diad panamegley mi. Bilang kasandi nen Kristo et mikakasi kami: ‘Mikareenan kayo ed Dios.’”—2 Cor. 5:18-20.

¹⁰ Ipapasen na ‘arum a karnero’ ya pribilehyo dan tulongan iray alanaan ya agagi da ed satan a ministeryo. (Juan 10:16) Bilang mensahero nen Kristo, balbaleg so nagagawaan da ed pangibabangat day katuaan ed totoo tan panutulong ed sikaran nawalaan na relasyon ed si Jehova. Importante iyan kabiangan na kimey ya panangipulong ed maong a balita na agnaparaan a kaabigan na Dios.

11, 12. Akin et maong a balita ed saray totoo no naamtaan dan sarag day manpikasi ed si Jehova?

¹¹ Dakel so totoon manpipikasi lapud nalelemewan so liknaan da no gagawaen da itan, balet diad tua et ag-ira manisia ya dedengelen na Dios so pikakasi da. Kaukolan dan naamtaan ya si Jehova so “Dumerengel na pikakasi.” Insulat nen salmistan David: “O Dumerengel na pikakasi, onasingger ed sika so amin a klase na totoo. Dinaeg ak na saray lingok, balet sasakbongan mo ray kasalanan mi.”—Sal. 65:2, 3.

¹² Imbaga nen Jesus ed saray disipulo to: “No onkerew kayo na antokaman diad ngaran ko, gawaen ko itan.” (Juan 14:14) Say “antokaman” et malinew ya ontutukoy ed amin a bengatlan unong ed linawa nen Jehova. Ipapaseguro nen Juan: “Walaan itayo na onian panagmatalek ed sikato, ya antokaman so kekerewen tayo unong ed linawa to, dedengelen to itayo.” (1 Juan 5:14) Kanian maong no nibangat tayod arum ya say pikakasi et aliwa labat ya pampareen na nonot, noagta alay abig ya paraan pian makaasingger ed “trono na agnaparaan a kaabigan”  nen Jehova! (Heb. 4:16) No ibangat tayod sikara no antoy dugan panagpikasi, no siopay nepeg dan pampikasian, tan no anto ray nepeg dan ipikasi, natulongan tayo ran onapit ed si Jehova tan naligliwa ed panaon na gonigon.—Sal. 4:1; 145:18.

13, 14. (a) Anto ran alay abig ya pribilehyo so niiter ed saray alanaan diad arapen? (b) Anton makapakelaw ya kimey so gawaen na saray alanaan parad totoo?

¹³ Say agnaparaan a kaabigan nen Jehova et mantultuloy anggan anampot la iyan mauges a sistema na mundo. Nipaakar ed nikadkaduman pribilehyo ya inter na Dios ed 144,000, ya apilin manuley a kaiba nen Kristo diad Panarian tod tawen, insulat nen Pablo: “Say Dios et daakan so panangasi to, tan lapud baleg a panangaro to ed sikatayo, binilay to itayo a kaiba na Kristo, anggan sanen inatey itayo lapud saray impakasumlang tayo—niliktar kayo diad panamegley na agnaparaan a kaabigan. Niarum ni, bilang nikasakey ed si Kristo Jesus et binilay to itayo a kaiba to tan pinayurong to itayo a kaiba to diad tawen, pian diad saray onsabin panaon et nipanengneng toy daakan ya agnaparaan a kaabigan to lapud kaabigay-linawa to ed sikatayo ran nikasakey ed si Kristo Jesus.”​—Efe. 2:4-7.

¹⁴ Talagan makapakelkelaw iray gawaen nen Jehova parad saray alanaan ya Kristiano sano onyurong la rad trono pian manuley a kaiba nen Kristo ed tawen. (Luc. 22:28-30; Fil. 3:20, 21; 1 Juan 3:2) Sikara so manunan ‘pangipanengnengan nen Jehova na daakan ya agnaparaan a kaabigan to.’ Sikara imay “Balon Jerusalem,” say nobya nen Kristo. (Apo. 3:12; 17:14; 21:2, 9, 10) Kaiba ira nen Jesus ya “mamaabig ed saray nasyon,” igiya da iray maunor ya totoo no panon iran nibulos ed kasalanan tan patey tan magmaliw ya perpekto.​—Basaen so Apocalipsis 22:1, 2, 17.

15, 16. Panon ya ipanengneng nen Jehova so agnaparaan a kaabigan to ed ‘arum a karnero’ diad arapen?

¹⁵ Diad Efeso 2:7, nabasa tayo ya “diad saray onsabin panaon,” ipanengneng na Dios so agnaparaan a kaabigan to. Seguradon naeksperiensya ed balon sistema na mundo nen Jehova diad dalin so “daakan ya agnaparaan a kaabigan to.” (Luc. 18:29, 30) Say sakey ya sankaabigan ya paraan na pangipanengneng nen Jehova na makapadinayew ya kaabigan to et say pamaoli ed totoo manlapud “Lubok.” (Job 14:13-15; Juan 5:28, 29) Saray matoor ya lalaki tan bibii nensaman ya inatey antis ya insakripisyo nen Kristo so bilay to tan amin ya ‘arum a karnero’ ya ompatey a matoor legan na kaunoran iran agew et bilayen lamet pian mantultuloy iran manlingkor ed si Jehova.

¹⁶ Paolien met so minilyon ya totoon inatey ya agda akabat so Dios. Naikdan ira na pankanawnawan manpasakop ed soberanya nen Jehova. Insulat nen Juan: “Anengneng ko ray inaatey, saray ordinaryo tan saray prominente, ya akaalagey ed arap na trono, tan wala ray alukasan a lukot. Balet wala ni sananey a lukot ya alukasan; satan so lukot na bilay. Diad panamegley na saray akasulat ed saray lukot, saray inaatey et inukom unong ed saray gawa ra. Tan inter na dayat iray inaatey a wadtan, tan say patey tan say Lubok et inter da ray inaatey da, tan sansakey iran inukom unong ed saray gawa ra.” (Apo. 20:12, 13) Siempre, kaukolan ya naaralan na saray napaoli no panon dan unoren iray prinsipyo na Dios ya walad Biblia. Kaukolan da met ya unoren iray balon instruksion ya walad “saray lukot” a mangibabaga no anto ray kakaukolanen nen Jehova diad  panayam ed balon mundo. Say pangipaamta nen Jehova ed karga na sarayan lukot et sakey nin pakapatnagan na agnaparaan a kaabigan to.

17. Antoy nepeg tayon tandaan no manpupulong tayo?

¹⁷ Say sankaimportantian ya kimey tayo legan ya manasingger so anggaan et say pangipulong ed maong a balita na Panarian! (Mar. 13:10) Talagan idadanet na maong a balita so agnaparaan a kaabigan nen Jehova. Aya so nepeg tayon tandaan no manpupulong tayo. Labay tayon napagalangan si Jehova ed sayan kimey. Nagawaan tayo iya no ibaga tayod totoo ya say amin a bendisyon ed balon mundo et pakapatnagan na makapadinayew ya kaabigan nen Jehova.

18, 19. Panon tayon nigloria so agnaparaan a kaabigan nen Jehova?

¹⁸ No pupulongan tayo so arum, sarag tayon ipaliwawa ya diad uley nen Kristo, naawat la na totoo so amin ya gunggona na dondon bagat tan kalkalnan magmaliw iran perpekto. Ibabaga na Biblia: “Saray pinalsa et nibulos met manlapud impakaaripen ed kabubulok tan nawalaan na maglorian kawayangan bilang ananak na Dios.” (Roma 8:21) Magmaliw labat yan posible lapud nikadkaduman kaabigan nen Jehova.

¹⁹ Pribilehyo tayon inabang ed amin ya ondengel so alay abig ya sipan a nabasad Apocalipsis 21:4, 5: “Punasen [na Dios] so amin a lua ed kamataan da, tan anggapo lay patey, anggapo met lay panermen tan panakis tan panotot. Saray datin bengatla et linmabas la.” Tan inkuan nen Jehova, samay akayurong ed trono: “Gagawaen kon balo so amin a bengatla.” Inkuan to ni: “Isulat mo, ta sarayan salita et napanmatalkan tan tua.” No maseseg tayon ipupulong iyan maong a balita, nigloria tayo so agnaparaan a kaabigan nen Jehova!