1-3. (a) Kapigan posible ya insulat so Salmo 147? (b) Antoy naaralan tayo ed Salmo 147?

NO BALIBALI so agawaan na sakey ed kimey ya inyasain ed sikato odino angipanengneng na maabig ya Kristianon kualidad, nepeg labat ya sikatoy idayew. No idadayew tayoy totoo, mas lalo lan idayew tayo si Jehova a Dios! Sikatoy idayew tayo lapud mabisbiskeg a pakapanyari to a singa nanengneng ed palsa to, odino lapud panangaro tod saray totoo a napatnagan ed impangiter tod mismon Anak to bilang dondon bagat.

² Say nansulat ed koma-147 ya Salmo et apakiwas ya idayew si Jehova. Pinaseseg to met so arum ya idayew so Dios.—Basaen so Salmo 147:1, 7, 12.

³ Agtayo amta no siopay nansulat ed sayan salmo, balet posiblin nambilay iyan salmista diad panaon ya impawil nen Jehova iray Israelita ed Jerusalem manlapud inkibantak da ed Babilonia. (Sal. 147:2) Seguradon say impawil na totoo na Dios ed pasen na tuan panagdayew so amakiwas ed salmista ya idayew si Jehova. Balet wala ni ray arum ya imbaga ton rason no akin ya idayew so Dios. Anto iratan? Diad mismon bilay mo, anto ray rason mo pian ibagam so “Hallelujah!”?—Sal. 147:1, paimanod leksab.

4. Anto kasi alikna na saray Israelita nen imbulos ira nen Arin Ciro, tan akin?

⁴ Imadyin mo pa no antoy alikna na saray Israelitan walad Babilonia. Oniay inkantiaw na saray angerel ed sikara: “Kansionan yo kami na sakey ed saray kansion nipaakar ed Sion.” Diad saman a panaon, aderal lay Jerusalem—say manunan sengegan na panliket da ed si Jehova. (Sal. 137:1-3, 6) Aglabay na saray Judio so mangansion lapud asugatan so puso ra, tan kaukolan day ligliwa tan panamaseseg. Balet singa impasakbay na salita na Dios, niliktar ira panamegley nen Ciro, say ari na Persia. Sinakop to so Babilonia tan imbaga to: “Si Jehova . . . ingganggan to ak a mangipaalagey na abung to ed Jerusalem . . . Balang sakey ed sikayo a kabiangan na totoo to, niwala komon ed sikato si Jehova a Dios to, tan sikatoy naabuloyan ya onlad Jerusalem.” (2 Awa. 36:23) Seguradon aligliwa iray Israelitan walad Babilonia lapud saya!

5. Antoy imbaga na salmista nipaakar ed pakayari nen Jehova ya mamaabig?

⁵ Aliwan say bansan Israel labat bilang grupo so niligliwa nen Jehova noagta kada Israelita. Ontan met natan. Oniay insulat na salmista nipaakar ed Dios: “Papaabigen to iramay asakitan so puso ra; bebedberan to iray sugat da.” (Sal. 147:3) On, aasikasoen nen Jehova iramay walaay problema, balanglan diad pisikal odino diad emosyon. Labalabay nen Jehova ya ligliwaen itayo tan paabigen iray asugatan ya puso tayo. (Sal. 34:18; Isa. 57:15) Iikdan to tayo na karunongan tan biskeg pian nasarag so antokaman ya probleman dadalanen tayo.—Sant. 1:5.

6. Panon ya makatulong ed sikatayo so singa impanguman na tema na salmista diad Salmo 147:4? (Nengnengen so litratod gapo na artikulo.)

⁶ Insan inimano na salmista so tawen, ya ibabaga ton si Jehova et “bibilangen to ray bitewen” tan “amin da et tatawagen tod ngaran.” (Sal. 147:4) Akin et singa anguman so tema to, ya tinukoy to la ray bengatlan walad tawen? Nonoten iya: Nanenengneng na salmista iray bitewen, balet agto amta no panon karakel iratan. Diad ilalabas na taon, nanaaruman lan nanaaruman so amta tayo ya bilang na bitewen. Iisipen na arum ya diad Milky Way galaxy labat et binilyon lay bitewen. Tan nayarin pigaran trilyon nin galaxy so walad uniberso! Parad sikatayo, talagan agnabilang iray bitewen! Balet amin iratan et nginaranan na Amalsa. Labay ton ibaga, kada bitewen et nikaduma ed si Jehova. (1 Cor. 15:41) Kumusta balet iray pinalsa ton totoo diad dalin? No amta na Dios so kawalaan na kada bitewen ed anggan anton panaon, seguradon kabat to ka met bilang indibidual—no iner so eksakton kawalaan mo, no antoy talagan naliliknam, tan no antoy espisipikon nakaukolan mo ed antokaman ya panaon!

7, 8. (a) Antoy ikokonsidera nen Jehova no tutulongan to iray totoo to pian nalampasan da ray subok? (b) Mangiter na alimbawa no panon ya ipapatnag nen Jehova so inkamapangasi to ed saray agperpekton totoo.

⁷ Aglabat interesado ed sika si Jehova bilang indibidual, noagta wala met so pakayari tan pililikna to pian natulongan ka ed saray problemam. (Basaen so Salmo 147:5.) Nayarin pakaliknam et agaylay irap na situasyon mo tan ambelbelat ya singa agmo la nasarag. Natatalosan na Dios so limitasyon mo, ‘ya sankanonot ton dabok ka labat.’ (Sal. 103:14) Lapud agtayo perpekto, nayarin nauulit-ulit tayo ray lingo tayo. Talagan magbabawi tayo no walay nibaga tayon aliwa, no nalilikna tayo sagpaminsan iray makasalanan ya pilalek na laman, odino no iibegan tayoy arum! Ag-iratan naeeksperiensya nen Jehova; balet say pakatalos tod sikatayo et agnasukat tan agnasarag ya usisaen!—Isa. 40:28.

⁸ Nayarin naeksperiensyam lay mabiskeg a  lima nen Jehova ya tinmulong ed sika pian nalampasan mo ray subok. (Isa. 41:10, 13) Singa bilang, walay payunir ya sister a si Kyoko ya adismayan maong nen sikatoy linmad balon asainmin to. Panon ya impanengneng nen Jehova ya natatalosan toy dadalanen nen Kyoko? Diad balon kongregasyon nen Kyoko, anengneng ton dakel so makatalos ed liknaan to. Pakalikna to et singa ibabaga nen Jehova ed sikato: “Inar-aro ta ka, aliwan lapud payunir ka, noagta lapud anak ta ka tan dedikado kad siak. Labay kon na-enjoy moy bilay mo bilang sakey ed saray Tasik!” Diad sika balet ey, panon ya impanengneng na Makapanyarin-amin ya “agnasukat so pakatalos to”?

9, 10. Antoy unonan itatarya nen Jehova no tutulongan to itayo? Mangiter na alimbawa.

⁹ No maminsan, nayarin say kaukolan mo et materyal. Singa bilang, nayarin mapaga ka ya ompan anggapoy naakan mo. Balet, si Jehova so nanggawa na natural cycle ya nakaukolan pian niwalay naakan parad amin, anggan parad saray sibong na wawak ya onkekerew na naakan! (Basaen so Salmo 147:8, 9.) No tuloytuloy ya papakanen nen Jehova iray wawak, makapanmatalek ka ya iter to met iray materyal a pankaukolan mo.—Sal. 37:25.

¹⁰ Say sankaimportantian ya iiter nen Jehova et say espiritual a pankaukolan tayo, pian niwalad sikatayo so “kareenan na Dios a palumbasan toy amin a pakatalos.” (Fil. 4:6, 7) Alimbawa, kayari na tsunami ed Japan nen 2011, naeksperiensya na brother a si Mutsuo tan say asawa to so pakayari nen Jehova ya ontulong. No ag-ira sinmapat ed atep na abung da, ag-ira akaligtas ed tsunami. Balet diad saman ya agew et naandi lawarin amin so kayarian da. Sanlabi ran walad ambilunget tan ambetebetel ya kuarto ed second floor na abung da. Kaimbuasan to, nananap ira na nayarin mamaseseg ed sikara ed espiritual. Say alenleneg a libron aromog da et say 2006 Yearbook of Jehovah’s Witnesses. Anengneng a tampol nen Mutsuo so title ya “The Deadliest Tsunamis Ever Recorded.” Nipaakar itan ed yegyeg diad Sumatra nen 2004, ya lapud satan et agawa iray sankakasilan a tsunami ya nirekord ed history. Akaakis si Mutsuo tan say asawa to legan dan babasaen iray eksperiensya. Alikna day maaron panangasikaso na Dios diad impangiter to na espiritual a panamaseseg nen kakkaukolan da itan. Inter met Jehova so materyal a pankaukolan da. Akaawat iray relief manlapud agagi. Balet say talagan akapaseseg ed sikara et say imbisita na saray representative na organisasyon diad kongregasyon da. Oniay imbaga nen Mutsuo: “Aliknak ya si Jehova et singa walad abay na balang sakey ed sikami tan aasikasoen to kami. Talagan aligliwa kami!” Say unonan itatarya na Dios et say espiritual ya pankaukolan tayo, insan saray materyal ya pankaukolan tayo.

11. Antoy kaukolan tayon gawaen pian nagunggonaan itayo ed pakayari na Dios a mangiliktar?

¹¹ Si Jehova et naynay ya akaparaan ya onkiwas parad sikatayo tan ‘iyaatagey to so mauyamo.’ (Sal. 147:6a) Balet, panon tayon nagunggonaan ed satan? Nepeg a walaan itayo na maapit a relasyon ed sikato. Pian niwala itan, kaukolan tayoy magmaliw ya mauyamo. (Sof. 2:3) Saray mauyamo et aalagaren day Dios ya mangipetek ed antokaman ya kaugsan tan mangekal ed paniirap da. Walad sikara so pabor nen Jehova.

12, 13. (a) Anto ray nepeg tayon paliisan pian nagunggonaan tayod tulong na Dios? (b) Diad siopa naliliketan si Jehova?

¹² Balet, say Dios et “ibabalsak tod dalin  so mauges.” (Sal. 147:6b) Ambelat iratan a salita! Pian nagunggonaan tayo ed matoor a panangaro nen Jehova tan ag-onsanok ed sikatayo, nepeg tayon busolen iray bubusolen to. (Sal. 97:10) Singa bilang, nepeg tayon busolen so seksual ya imoralidad. Labay ton ibaga et arawian tayo so antokaman ya nayarin manukso ed sikatayon manggawa na ontan ya kasalanan, kaiba lay pornograpiya. (Sal. 119:37; Mat. 5:28) Nayarin mairap itan ya labanan, balet nabawbawi tayoy pansagpot tayo lapud bendisyonan itayo nen Jehova.

¹³ Pian nalabanan tayo itan, kaukolan tayoy manmatalek ed si Jehova, aliwan diad sarili tayo. Kasin sikatoy naliketan no salien tayon iliktar so sarili tayo panamegley na “biskeg na kabayo,” say antokaman ya iisipen na totoo ya makatulong? Andi! Tan agtayo met nepeg a manmatalek ed “mabiskeg a bikking na too,” a singa sarag tayo odino na arum a too so mangiliktar. (Sal. 147:10) Imbes, nepeg tayon asinggeran si Jehova tan kerewen so tulong to. Aliwan singa saray totoon managsimbawa, sikatoy agbalot onsawan ondengel ed saray pikakasi tayo, anggano paulit-ulit tayon kerewen so tulong to. “Naliliketan si Jehova ed saramay ontatakot ed sikato, diad saramay manaalagar ed matoor a panangaro to.” (Sal. 147:11) Makapanmatalek itayo ya lapud matoor a panangaro to et agto tayo taynan tan tulongan to itayon nadaeg iray mauges ya pilalek tayo.

14. Anton panamaseguro so amabiskeg ed salmista?

¹⁴ Iikdan itayo nen Jehova na rason pian makapanmatalek itayo ya tulongan to iray totoo to no mankaukolan ira. Nen sankanonot na salmista so panaon ya nipaalagey lamet so Jerusalem, oniay kinansion to nipaakar ed si Jehova: “Gagawaen ton malet iray balewet na puerta na syudad mo; bebendisyonan to ray ananak mon lalaki. Papawalaen toy kareenan ed sakop mo.” (Sal. 147:13, 14) Talagan apaseguroan so salmista diad pakaamta ya paeleten nen Jehova so balewet na puerta na syudad pian protektaan iray mandadayew ed sikato!

15-17. (a) No maminsan, antoy nalilikna tayo ed saray subok ya dadalanen tayo, balet panon ya uusaren nen Jehova so Salita to pian tulongan itayo? (b) Mangiter na alimbawa ya mangipapanengneng no panon ya ‘mapmaples ya onsasabi so salita na Dios.’

¹⁵ Nayarin napapagaan ka lapud saray irap ya dadalanen mo. Balet ikdan ka nen Jehova na karunongan pian nasarag mo iratan. Imbaga na salmista ya say Dios et “ibabaki toy ganggan to diad dalin; mapmaples ya onsasabi ditan so salita to.” Tan imbaga met na salmista ya si Jehova et ‘ibabaki toy niebe, itatayak to iray kinmigtel a linaew, tan ipepelag to iray uran a kristal,’ insan to intepet: “Siopay makaanos ed betel a papawalaen to?” Inyarum to ni ya si Jehova et “ibabaki toy salita to, tan natutunaw iratan.” (Sal. 147:15-18) Say Dios tayo ya sankarunongan tan sankamakapanyarian, ya mangokontrol ed saray uran a kristal tan niebe, so ontulong ed sika pian nalampasan mo so antokaman a subok ya onsabid sika.

¹⁶ Natan, igigiya itayo nen Jehova panamegley na Salita to, say Biblia. Tan ‘mapmaples ya onsasabi so salita to’ lapud sikatoy akaparaan ya mangiter ed sikatayo na espiritual a panangigiya no kaukolan tayo itan. Isip mo pa no panon kan nagugunggonaan ed pambabasam na Biblia, panaaral mod saray publikasyon na “matoor tan makabat ya aripen,” pambabantay moy JW Broadcasting, panlulukas moy jw.org, pitotongtong mod saray elder, tan ed piuulop mod saray agagi. (Mat. 24:45) Agta nanenengneng mo ya mapmaples si Jehova ya mangiter ed sika na panangigiya?

¹⁷ Si Simone et naeksperiensya ton mismo  so pakayari na Salita na Dios. Abebbebay pakanengneng tod sarili to, ya anggad panduaruwaan to la no kasin sikatoy aabobonan na Dios. Balet diad panaon ya sikatoy nadidismaya, masimoon ya manpipikasi tan onkekerew na tulong ed si Jehova. Maseet to met ya aaralen so Biblia. Imbaga to: “Diad amin ya situasyon, sankaliknak so biskeg tan panangigiya nen Jehova.” Akatulong iyad sikato pian mansiansian positibo.

18. Akin et naliliknam ya espisyal kad si Jehova, tan anto ray rason mo pian ibaga so “Idayew yoy Jah!”?

¹⁸ Amta na salmista ya talagan espisyal iray totoo na Dios nensaman. Sikara labat so nasyon ya angiteran na “salita” na Dios tan “saray pananontonan to tan saray panangukom to.” (Basaen so Salmo 147:19, 20.) Natan, baleg a pribilehyo ya sikatayo labat so totoo diad dalin ya atawag ed ngaran na Dios. Lapud kabat tayoy Jehova tan iyaaplika tayoy Salita to ed bilay tayo, panliliketan tayoy pribilehyon nawalaan na maapit a relasyon ed sikato. Singa say nansulat na Salmo 147, agta dakdakel so rason mo pian ibaga so “Idayew yoy Jah!” tan pasesegen so arum ya ontan met so gawaen da?