Binasam ta iray agano nin isyu na Say Panag-bantayan? Salim pa sirin ya ebatan irayan tepet:

No wala ray instruksion ya manlalapud organisasyon na Dios, anton ugali so nepeg ya ipanengneng na saray agagi, singa saray manangasikaso na sirkito tan saray elder?

Nepeg ya unoren dan tampol iratan. Tepetan day sarili da: ‘Kasin napapabiskeg kod espiritual iray nakakaulop ko? Kasin aawaten tan tutumboken kon tampol so instruksion na saray mangidadaulo?’—w16.11, p. 11.

Kapigan naaripen na Babilonia iray tuan Kristiano?

Agawa iya ag-abayag kayari na impatey na saray apostol. Diad saman, walay abuon grupo na papari. Sinuportaan na Simbaan tan Gobierno so apostatan Inkakristiano tan sinapawan day boses na saray singa trigon Kristiano kanian agla ra narengel. Balet pigaran dekada antis na 1914, ginapoan la na saray alanaan so onekal ed Babilonia.—w16.11, p. 23-25.

Akin et importante so agawaan nen Lefèvre d’Étaples?

Nen 1520’s, in-translate nen Lefèvre so Biblia ed French pian nabasa na ordinaryon totoo. Say paraan na impan-translate nen Lefèvre et akaimpluensyan maong ed si Martin Luther, William Tyndale, tan John Calvin.—wp16.6, p. 10-12.

Antoy pandumaan na “pangiteen na nonot ed laman” tan “pangiteen na nonot ed espiritu”? (Roma 8:6)

Samay mangiteteen na nonot ed laman et pakokontrol ed pilalek tan tendensia na agperpekton too, ya lanang ton itotongtong tan irarayew iray bengatlan nipaakar ed laman. Samay mangiteteen na nonot ed espiritu et akasentroy bilay to ed saray bengatlan nipaakar ed Dios tan ed kanonotan To; sikatoy igigiya na masanton espiritu. Samay unaan et mansumpal ed ipapatey, samay sakey et nawalaan na bilay tan kareenan.—w16.12, p. 15-17.

Antoy pigaran praktikal a paraan pian nabawasay kapagaan?

Iyuna iray importante, magmaliw ya realistiko ed iilaloan mo, ipanaon so panrelaks kada agew, enjoy moy pinalsa nen Jehova, manpaelek, regular ya man-exercise, tan onugip na susto.—w16.12, p. 22-23.

“Si Enoc et inyalis pian agto nanengneng so ipapatey.” (Heb. 11:5) Panon?

Mapatnag ya inyalis na Dios si Enoc manlapud bilay paonlad ipapatey, ya agto amtan ompatey la.—wp17.1, p. 12-13.

Akin ya importante nin siansia so inkamapaabeba?

No mapaabeba tayo, aliwan alablabas so pakanengneng tayod sarili tayo tan amta tayo ray limitasyon tayo. Kaukolan ya amta tayo no panon ya makaapekto ed arum so ugali tayo tan nepeg ya aliwan atagtagey so pakanengneng tayod sarili tayo.—w17.01, p. 18.

Antoy prueba ya iwawanwan na Dios so mananguley ya ulop nen inmunan siglo, ya singa gagawaen to ed Mananguley ya Ulop natan?

Diad tulong na masanton espiritu, atalosan da so katuaan ed Biblia. Diad tulong na saray anghel et inasikaso da so kimey a panagpulong, tan nanmatalek ira ed Salita na Dios no mangiiter ira na totontonen. Ontan met so nagagawa natan.—w17.02, p. 26-28.

Akin et mabmabli ed sikatayo so dondon?

Lapud apatiran rason: No siopay angiter, no akin et inter itan, no antoy insakripisyo, tan niiter toy talagan pankaukolan. Nepeg tayon nodnonoten no akin ya importante iratan.—wp17.2, p. 4-6.

No akapandesisyon la so sakey a Kristiano, sarag to ni kasin umanen itan?

Nepeg tayon tooren so imbaga tayo. Balet no maminsan et kaukolan tayon aralen lamet so desisyon tayo. Nen anengneng na Dios ya nagbabawi iray taga Ninive, inuman toy desisyon to. No maminsan, manguman iray sirkumstansya odino wala ray balon impormasyon kanian nayarin kaukolan tayon umanen so desisyon tayo.—w17.03, p. 16-17.

Akin ya talagan makaderal so pantsismis?

Posiblin palooren toy problema ya anggad agla nakontrol. Balanglan duga itayo o andi, anggapon balot so nitulong na negatibon panagsalita.—w17.04, p. 21.