BINMALEG ak diad Graz, Austria. Nen pitoy taon ko, impanaral da ak ed eskuelaan ya manbabangat na relihyon. Balet naimatonan koy graben seksual ya imoralidad na saray pari tan madre. Kanian pinayagan ak nen nanay ko ya onalis lad satan ya eskuelaan kayari sakey taon.

Insan impanaral da ak ed eskuelaan ya walay boarding house to. Sakey ya labi, sinmabi si tatay pian iyakar to ak ed ligtas ya lugar ta pinasabog da na bomba so Graz. Linma kamid baley na Schladming pian diman kami onamot. Balet kasabi mi diman tan kabeltang mid taytay, sinmabog itan. Diad sakey nin inkagawa, wala ray eroplanon abebay tikyab da ya pinaputokan da kamin dua nen baik diad sular mi. Nen tinmunda lay guerra, pakalikna mi et pinaulyanan kami na simbaan tan gobierno.

Nen 1950, sakey ed saray Tasi nen Jehova so angipulong na mensahe na Biblia ed si nanay ko. Ondedengel ak ed saray tongtongan da tan iibaan ko ni ingen si Nanay ya miaral ed kongregasyon da no maminsan. Lapud akombinse si Nanay ya katuaan so ibabangat na Saray Tasi nen Jehova, sikatoy nampabautismo nen 1952.

Diad saman, abaloan ko ya say kongregasyon da et ulopan na saray akukulaw. Balet, nen akapiaral kamid sakey ya kongregasyon ya dakdakel so kabataan​—aliwa manayan ulopan na akukulaw! Kapawil mi ed Graz, ginapoan ko lan atendian so amin ya aral, tan ag-abayag et akombinse ak met ya katuaan so nanaaralan ko. Akabat ko met si Jehova bilang Dios ya lanang ton susuportaan iray lingkor to. Ontan so gagawaen to anggano say pakalikna tayo et singa bukbukor tayon aarapen iray mairap ya situasyon.​—Sal. 3:5, 6.

Labalabay kon ipulong so katuaan ed arum. Say sankaunaan ya pinulongan ko et saray agagik. Say apatiran atsik et agmi la ra kaibad abung ta mantratrabaho la ra bilang mamaestra. Balet bibisitaen ko irad lugar ya  panaayaman da tan pinaseseg ko ran manaral na Biblia. Ag-abayag, amin ya agagik et nanaral na Biblia tan nagmaliw iran Tasi nen Jehova.

Nen komadua lan simba ya mibibiang ak ed panagkabkaabungan, walay akabat kon bii ya masulok lan 30 so taon to tan agapoan kon iyaralan na Biblia. Sikatoy inmaligwas ya anggad nampabautismo, tan ag-abayag et tinmumbok so asawa to tan duaran anak da. Lapud satan ya impangiyaral ko, apabiskeg a maong so pananisiak. Akin? Anggapoy pormal ya angiyaral ed siak na Biblia. Kaukolan koy manparaan a maong kada manaral kami. Kanian pian nibangat ko so iyaaralan ko, singa kaukolan ko nin bangatan ya unona so sarilik! Lapud satan et atalosan kon maong so katuaan. Nen Abril 1954, indedikak so bilay kod si Jehova tan nampabautismo ak.

Nen 1955, inmatendi ak ed saray internasyonal a kombension diad Germany, France, tan England. Nen wala ak ed London, akabat koy Albert Schroeder. Sikatoy sakey ya instruktor ed saman diad Bible School of Gilead, tan nagmaliw ya membro na Mananguley ya Ulop. Legan kamin manto-tour diad British Museum, impanengneng ed sikami nen Brother Schroeder so pigaran manuskrito na Biblia. Nabasa ditan so ngaran na Dios diad saray Hebreon letra, tan impaliwawa toy kaimportantian na saratan. Tan saman so amakiwas ed siak ya mas aroen si Jehova tan say katuaan, ya lalon amabiskeg met na determinasyon ko ya ipaamtad arum so katuaan ed Salita na Dios.

Ginmapo ak ya manlingkor bilang full-time ya payunir nen Enero 1, 1956. Kalabas na apat bulan, naimbitaan ak ya manlingkor bilang espisyal payunir diad Austria. Diad saman et anggapo ni Tasi diad Mistelbach, say baley ya panlingkoran ko. Balet walay nikaduman subok ed siak. Mandumaan kamin maong na samay partner kon payunir. Mantaon ak na ngalngali 19 tan binmaleg ak ed syudad; say taon to balet et 25 tan binmaleg ed probinsya. Atrasado ak ya ombabangon; sikato balet et masaksakbay. No labi, labay kon atrasado ak lan onugip; say labay to balet et masakbay lan onugip. Pero, lapud iyaaplika mi so bilin na Biblia, asarag mi maniba anggano mandumaan kami tan nanliketan min dua so pampapayunir mi.

Diad tua, wala ni ray mairap a subok ya dinalan mi. Asali mi ni ingen so apasegsegang, balet ‘agkami tinaynanan.’ (2 Cor. 4:7-9) Aminsan, nen manpupulong kami na samay partner ko diad sakey ya baryo, imbulos na totoo iray aso da. Kabebekta et pinaliberan kami na angkakabaleg ya aso ya ondadangol tan akapaway iray ngipen da. Nambembenan kami lima, tan impikasik, “Aman Jehova, komon ta ompatey kami lan tampol no ketketen da kami!” Nen sakey depa labat lay kaasingger na saray aso, dinmeen ira tan inggalaw-galaw day ikol da, insan la ra inmalis. Alikna min prinotektaan kami nen Jehova. Kayari na saman, apulongan mi so interon baryo, tan manliket kami ta madengedengel iray totoo. Seguro mankelaw ira ta agkami kinetket na saray aso odino lapud intuloy mi ni nampulong anggano makapataktakot so agawa ed sikami. Say arum ed sikara et nagmaliw ya Tasi.

Wala ni sakey ya makapataktakot a naeksperiensya mi. Sakey agew, sinmabin abuek imay  lakin akanggawa na abung ya rerentaan mi tan ibabaga ton pateyen to kami ta iisturboen mi kuno iray kakaabay mi. Babanoen nen asawa to pero anggapoy agawaan to. Arengel min amin so imbaga to legan ya wala kamid kuarto ed tagey. Tampol min insara iray yurongan diad puerta tan inkarga mid maleta iray gamit mi. Kalukas mi ed puerta, akaalagey ed tagey na takayan imay laki, ya walay bemben ton andukey a kutsilyo. Kanian batik kami ya say pinawayan mi et diad beneg ya puerta tan dinmalan kamid maawang ya garden ya awi-awit mi ray gamit mi, tan agkami lan balot pinmawil.

Linma kamid sakey ya hotel tan tinepet mi no walay bakantin kuarto. Ditan la so nanayaman mi na ngalngali sakey taon, tan maabig laingen so resulta na ministeryo mi. Akin? Walad sentro na baley so hotel, tan labalabay na arum ya iyaaralan mi na Biblia so manaral ditan. Ag-abayag et ditan mi la gagawaen so panagaral na libro tan say sinimban Panagaral na Panag-bantayan, ya manga 15 so onaatendi.

Masulok ya sakey taon mi ed Mistelbach. Insan niyasain ak ed Feldbach, diad southeast na Graz. Walay balon partner ko ya payunir, pero anggapo met so kongregasyon ditan. Melag labat ya kuarto so panaayaman mi, diad tagey na abung ya gawad kiew. No maragem, onloloob so dagem diad baetan na saray dingding ya kiew tan maingal kanian pinupuletan mi iratan na dyaryo. Kaukolan mi met so onasol na danum manlapud bobon. Pero nambunga iray sagpot mi. Diad loob labat na pigaran bulan, wala lay abuo ya sakey a grupo. Ag-abayag, manga 30 ya membro na pamilyan inyaralan mi so angawat na katuaan!

Lapud saratan ya naeksperiensyak, inmaralem so apresasyon ko ed lanang ya isusuporta nen Jehova ed saramay mankikimey parad Panarian. Anggano ag-itayo natulongan na too, naynay ya wadtan si Jehova.​—Sal. 121:1-3.

Nen 1958, agawa so internasyonal a kombension ed New York City, diad Yankee Stadium tan Polo Grounds. Nan-aplay ak ya onatendi, tan tinepetan ak na branch ed Austria no labay koy onatendi ed koma-32 ya klase na Gilead School. Siempre agko tinanggian iman ya pribilehyo. Imbagak ya tampol, “On!”

Diad klase mid Gilead, kaabay kod yurongan si Martin Poetzinger. Dakel so graben eksperiensya ya sinungdoan to ed panamairapan ya  kampo na Nazi. Sikatoy nagmaliw met a membro na Mananguley ya Ulop. No maminsan legan na klase mi, iyesaes nen Martin ed siak, “Erika, antoy labay ton ibaga ’tan ed German?”

Nen mamepegley lay klase, impaamta nen Brother Knorr so asainmin mi. Say asainmin ko et diad Paraguay. Lapud ugaw ak nid saman, kaukolan koy manpatanir ed si tatay ko pian makaonla ak ed satan ya bansa. Nen pinayagan to ak, linma ak ed Paraguay nen Marso 1959. Niyasain ak ed sakey ya missionary home diad Asunción, tan sananey lamet so partner ko.

Ag-abayag, akabat koy Walter Bright, sakey ya misionero ya nan-graduate ed koma-30 ya klase na Gilead. Sinmabi panaon et nankasal kami tan saniba min inarap iray subok. Kada no walay onsabin problema, babasaen mi so promisa nen Jehova diad Isaias 41:10: “Agka ontatakot, ta wala ak ed sika. Agka ompapaga, ta siak so Dios mo. Pabiskegen ta ka.” Impaseguro na saya ed sikami ya basta gagawaen mi anggaay nayarian min manmatoor ed Dios tan iyuna so Panarian to, agto kamin balot paulyanan.

Sinmabi panaon, niyasain kamid lugar ya asingger ed border na Brazil. Balet wala ray kabataan diman ya sinugsogan na saray pari pian tupaken so missionary home mi, ya aliwa lan marakep so itsura to. Insan agapoan nen Walter ya iyaralan na Biblia so hepe na pulis. Sineguro ton wala ray pulis ya akabantay asingger ed abung mi diad loob na sakey simba, kanian tinmunda la ray manggugulo ed sikami. Ag-abayag, inmalis kamid mas komportablen ayaman diad border ya sakop na Brazil. Mas balibali diman ta makapangiyuuksoy kami na saray aral diad Paraguay tan diad Brazil. Antis ya manampot so asainmin mi diman, wala lay abuo ya duaran melag ya kongregasyon.

Imbaga na saray doktor ko ya agak makaanak, kanian abigla kami nen naamtaan min malukon ak nen 1962! Kanian nanayam kami lad Hollywood, Florida, ya asingger ed pamilya nen Walter. Pigay taon ya agkami akapampayunir nen Walter. Kaukolan min asikasoen so pamilya mi. Balet iyuuna mi nin siansia so kimey ed Panarian.​—Mat. 6:33.

Kasabi mi ed Florida nen Nobyembre 1962, abigla kami nen naamtaan min agnayarin maniba diman so andeket tan amputin agagi diad saray aral, tan nambiigan so teritorya da. Balet anggapoy panangidumaduma nen Jehova, kanian ag-abayag et pinan-iiba la iray nandumaan ya lahi ed saray kongregasyon. Mapatpatnag ya si Jehova so walad benegan na sayan uksoyan, ta natan et dakdakel lay kongregasyon ed satan ya lugar.

Makapaermen balet ta nen 2015 et inatey si Walter lapud brain cancer. Sikatoy maomaong ya asawa diad loob na 55 ya taon. Inar-aro toy Jehova tan dakel ya agagi so tinulongan to. Tatalaranan koy panaon ya sikatoy napinengnengan ko lamet ya anggapo lay sakit to sano napaoli.​—Gawa 24:15.

Misalsalamat ak ta akapanlingkor ak ya full-time ed masulok ya 40 taon, dakdakel so makapaliket ya naeksperiensyak tan bendisyon ya naawat ko. Singa bilang, naimatonan mi nen Walter so impanpabautismo na 136 ya inyaralan mi na Biblia. Siempre, wala ray dinalan min irap. Balet agmin balot inisip ya ontunda kami lan manlingkor ed matoor ya Dios lapud saratan. Imbes, mas inmapit kami ed sikato, ya manmamatalek kamin sikatoy manggaway solusyon diad mismon panaon to tan paraan to. Tan ginawa to itan!​—2 Tim. 4:16, 17.

Naiiliw ko lan maong si Walter, balet makakatulong ed siak so pampapayunir ko. Baleg met ya tulong ed siak so pambabangat kod arum, tan ipapaamtak ed sikara so ilalon nabilay lamet iray inaatey. On, agko la nabitlan amin no panon ya agak balot pinaulyanan nen Jehova. Tinoor toy impromisa to, inasikaso to ak, pinabiskeg to ak, tan tuloytuloy to ak ya bebembenan na ‘kawanan a lima to unong ed inkatunong to.’​—Isa. 41:10.