1. Panon so panedeskribe na Biblia ed disiplina?

ANTOY nanonotan mo no narengel moy salitan “disiplina”? Nayarin say naisip mon tampol et dusa, balet mas ni so nalalanor ed satan. No bibitlaen na Biblia so disiplina, lanang itan ya positibo, tan no maminsan et kaiba na kakabatan, karunongan, aro, tan bilay. (Pro. 1:2-7; 4:11-13) On ta say disiplina na Dios et pakapatnagan na panangaro tod sikatayo tan labay ton manbilay itayo ya andi-anggaan. (Heb. 12:6) Anggano no maminsan et walay kaiba ton dusa, agbalot itan sobsobra odino maruksa. Kanian say kabaliksan na “disiplina” et manunan ontutukoy ed panangibangat, singa ed pamabaleg na inad-aron anak.

2, 3. Panon a nayarin kaiba ed disiplina so pangibangat tan panusa? (Nengnengen so litratod gapo na artikulo.)

² Imanoen iyan alimbawa: Say ugaw nin si Johnny et manggagalaw na bola ed loob na abung. Inkuan nen nanay to: “Johnny, agka nayarin manggalaw na bola diad loob na abung! Ompan walay napisit mo.” Pero agto dinengel so nanay to, tan tuloytuloy nin manggagalaw na bola kanian abetag toy flower vase. Panon ya disiplinaen nen nanay to? Nayarin ibangat to tan dusaen to met. Diad pangibangat to, nayarin ipanonot tod si Johnny no akin ya aliway ginawa to. Ibaga to ya importantin unoren iray ganggan na ateng  to, ya ipaliwawa ton nakaukolan tan manepeg labat iratan. Insan pian talagan makaaral na leksion si Johnny, nayarin walay matukoy ya gawaen nen nanay to bilang dusa. Singa bilang, nayarin isinop to ni so bola tan agto ni panggalawen. Diad ontan et namoria nen Johnny ya talagan makapuy so resulta na ag-itulok.

³ Bilang kabiangan na Kristianon kongregasyon, kaiba itayo ed sankaabungan na Dios. (1 Tim. 3:15) Kanian rerespetoen tayo so kanepegan nen Jehova ya mangiter na saray totontonen tan maaro to tayon disiplinaen no agtayo unoren iratan. Sakey ni, no makapuy iray nansumpalan na saray ginawa tayo, say disiplina to so mangipanonot ed sikatayo ya importantin maong so idengel ed Ama tayo ed tawen. (Gal. 6:7) Talagan iyaansakit itayo na Dios tan agto labay ya aliway pansumpalan tayo.​—1 Ped. 5:6, 7.

4. (a) Anton panangipasal so bebendisyonan nen Jehova? (b) Antoy aralen tayo ed sayan artikulo?

⁴ No mandisiplina itayo base ed Biblia, natulongan tayoy anak tayo odino iyaaralan na Biblia ya onaligwas pian magmaliw ya patumbok nen Kristo. Say Salita na Dios, ya manunan uusaren tayo ed panagpasal, et ontulong ed sikatayon ‘mandisiplina unong ed inkatunong.’ Kanian natulongan so anak tayo odino say iyaaralan na Biblia ya natalosan tan ‘naunor to so amin ya ingganggan nen Jesus ed sikatayo.’ (2 Tim. 3:16; Mat. 28:19, 20) Bebendisyonan nen Jehova iyan panangipasal, ya ontutulong ed saray ipapasal pian nibangat da met so arum a magmaliw ya disipulo nen Kristo. (Basaen so Tito 2:11-14.) Amtaen tayoy ebat ed taloran importantin tepet: (1) Panon ya say disiplina na Dios et pakapatnagan na panangaro tod sikatayo? (2) Antoy naaralan tayod saramay dinisiplina na Dios nensaman? (3) No mandidisiplina tayo, panon tayon naalig si Jehova tan say Anak to?

5. Diad anto ran paraan ya say pandidisiplina nen Jehova et pakapatnagan na panangaro tod sikatayo?

⁵ Lapud panangaro nen Jehova, ipepetek, ibabangat, tan ipapasal to itayo pian mansiansia tayod panangaro to tan diad dalan a mamaarap ed bilay. (1 Juan 4:16) Agto tayon balot eekalan na dignidad o iinsultoen, ya nalikna tayon anggapoy kana tayo. (Pro. 12:18) Imbes, iikdan to tayoy dignidad, onnenengneng ed maong iran ugali tayo, tan aabuloyan to tayon mandesisyon a bukor. Kasin ontan so pangipapasen mod disiplina na Dios, balanglan nanlapu itan ed Salita to, saray publikasyon ya base ed Biblia, Kristianon atateng, odino saray elder ed kongregasyon? Saray elder ya maulimek tan maaron mangipepetek ed sikatayo no agtayo nalilikas ya ‘aliwa lay aarapen tayo’ et ipapatnag da so panangaro nen Jehova ed sikatayo.​—Gal. 6:1.

6. Anggano say disiplina et walay kaiba ton restriksion, panon a siansia nin pakapatnagan itan na panangaro na Dios?

⁶ Balet no maminsan, say disiplina et aliwa labat ya panimbawa o pamilin. No ambelat iray agawaan ya kasalanan, say sakey et nayarin naandian na saray pribilehyo ed kongregasyon. Balet anggano ontan so nagawa, siansia nin napatnagan ed satan so panangaro na Dios ed sikatayo. Singa bilang, no naandian na pribilehyo so sakey, makatulong itan pian namoria to ya importantin mas ikdan to na imano so personal a panagaral na Biblia, panagdalepdep, tan panagpikasi. Diad ontan et sikatoy napabiskeg ed espiritual. (Sal. 19:7) Onsabi panaon, nayarin naikdan lamet na saray pribilehyo. Say panagdispelosip et pakapatnagan met na panangaro nen Jehova, ta naprotektaan so kongregasyon ed mauges iran impluensya. (1 Cor. 5:6, 7, 11) Tan lapud say disiplina na Dios et aliwan alablabas, nayarin namoria na adispelo so kabelat  na kasalanan to tan napakiwas ya magbabawi.​—Gawa 3:19.

7. Siopa si Sebna, tan anton makapuy ya ugali so impatnag to?

⁷ Pian idanet so kaimportantian na disiplina, aralen tayoy duaran indibidual ya dinisiplina nen Jehova: si Sebna, ya nambilay diad panaon nen Arin Hezekias, tan si Graham, sakey a brother ed panaon tayo. Si Sebna et walaan na atagey a posisyon bilang manag-asikaso ya “angipiyaan ed abung”​—nayarin abung nen Hezekias. (Isa. 22:15) Makapaermen balet ta nagmaliw ya mapaatagey tan labay ton narayew so sarili to. Nampagawa ni ingen na magarbon ponponan parad sarili to, tan onlulugan ed ‘mararakep iran karwahe’!​—Isa. 22:16-18.

8. Panon ya dinisiplina nen Jehova si Sebna, tan antoy resulta?

⁸ Lapud labay nen Sebna ya narayew so sarili to, ‘inekal na Dios so betang to’ tan insalat toy Eliakim. (Isa. 22:19-21) Agawa iya nen labay ya atakien nen Arin Senakerib na Asirya so Jerusalem. Ag-abayag, imbaki nen Arin Senakerib iray atagey ya opisyal to ya onlad Jerusalem, kaibay dakdakel ya sundalo, pian pakapuyen so liknaan na saray Judio tan taktakoten si Hezekias ya onsuko la. (2 Ara. 18:17-25) Si Eliakim so imbaki ya mitongtong ed saray opisyal, balet agto bukbukor. Walay duaran kaiba to, sakey lay Sebna, a nagmaliw ya sekretaryo. Agta pakapatnagan itan ya si Sebna et agsinmanok tan agnanem-em na sakit na linawa noagta mapaabeba ton inawat so mas abeban betang? No ontan, antoy naaralan tayo? Pantongtongan tayoy talora.

9-11. (a) Anto ray importantin naaralan tayo ed eksperiensya nen Sebna? (b) Panon kan napaseseg ed paraan na impantrato nen Jehova ed si Sebna?

⁹ Unona, nakal ed posisyon si Sebna. Say eksperiensya to et onkanan pasakbay ya “say panagpasirayew et mansumpal ed kadederal, tan say inkamapaatagey et mansumpal ed katumba.” (Pro. 16:18) No wala ray pribilehyom ed kongregasyon, a nayarin ipapasen na arum ya importante so betang mo, kasin mansiansia kan mapaabeba? Kasin bidbiren mon nanlapud si Jehova so antokaman ya abilidad mo odino nagagawaan mo iray kimey mo lapud tulong to? (1 Cor. 4:7) Insulat nen apostol Pablo: “Ibagak ed balang sakey ed sikayo ditan ya agkayo maniisip na alabas ed sarili yo nen say manepeg yon isipen, noagta kada sakey et manisip diad paraan a pakapatnagan na limpion kanonotan.”​—Roma 12:3.

¹⁰ Komadua, napatnagan ed ambelat ya impandisiplina nen Jehova ed si Sebna ya agto  inisip ya anggapo lan balot so ilalo nen Sebna ya makapawil. (Pro. 3:11, 12) Talagan makaaral iramay nakalan na saray pribilehyo ed kongregasyon na Dios natan! Imbes ya onsanok ira tan manem-em na sakit na linawa, komon ta anggano anguman so kipapasen da et itultuloy da ni manlingkor ed Dios ed anggaay nayarian da, ya ipasen dan say disiplina et ebidensya na panangaro nen Jehova. Tandaan ya no manpaabeba tayo, ag-ipasen na Ama tayo ya anggapo lan balot so ilalo tayo. (Basaen so 1 Pedro 5:6, 7.) Say maaron disiplina et nayarin paraan na Dios pian nibangat itayo, kanian mansiansia tayo komon ya singa anlemek a pitek ya mainomay ton moldien.

¹¹ Komatlo, diad impantrato nen Jehova ed si Sebna et walay importantin naaralan na saray walaan na autoridad ya mandisiplina, singa saray ateng tan manangasikaso ed kongregasyon. Antoy naaralan da? Anggaman napatnagan ed impandisiplina nen Jehova ya kabusol toy kasalanan, napatnagan met ya walay malasakit to ed toon nankasalanan. No kaukolan yoy mangiter na disiplina bilang ateng odino manangasikaso, kasin aligen yoy Jehova, ya busolen yoy kaugsan balet ta nengnengen yoy maong ya ugali na anak yo odino kapananisiaan yo?​—Jud. 22, 23.

12-14. (a) Panon so ikikiwas na arum ed pandidisiplina na Dios? (b) Panon ya tinmulong so Salita na Dios ed sakey ya brother pian umanen toy ugali to, tan anto ray resulta?

¹² Makapaermen ta wala ray arum ya nen adisiplina ira, sininti da itan tan tinaynan day Dios tan say kongregasyon to. (Heb. 3:12, 13) Balet labay to kasin ibaga ya agla ran balot natulongan? Imanoen pa si Graham, ya adispelo tan akapawil lamet, insan nagmaliw ya inaktibo. Kalabas na pigaran taon, kinerew tod kaaro ton elder ya sikatoy iyaralan lamet na Biblia.

¹³ Oniay nanonotan na elder: “Ma-pride si Graham. Makritiko ed saray elder ya kaiban nambemben ed kaso to. Kanian diad tinmumbok iran impanaral mi, nantongtongan mi ray teksto nipaakar ed panagpaatagey tan saray epekto to. Singa anengneng nen Graham so sarili to ed espiho panamegley na Salita na Dios, tan agto agustoan so anengneng to! Balibali epekto na satan ed sikato! Kayari ton inamin ya sikatoy abulag na inkamapaatagey to ya singa ‘troso’ ed mata to tan sikatoy makritiko, inuman ton tampol so ugali to. Ginapoan toy miaral lamet ya regular, maseet ton inaral so Salita na Dios, tan inyugali toy manpikasi ya inagew-agew. Ginawa to met iray responsabilidad to bilang ulo na pamilya, kanian malikeliket so asawa to tan saray anak to.”​—Luc. 6:41, 42; Sant. 1:23-25.

¹⁴ Inkuan ni na elder: “Sakey ya agew, walay imbaga nen Graham ed siak ya agusgustoan ko. ‘Abayag ak lad katuaan,’ kuan to, ‘tan asalik ni ingen so nampayunir. Balet aminen ko, natan ko labat nibaga ya inarok si Jehova.’ Ag-abayag, sikatoy naikdan na asainmin ya manderew na mikropono ed Kingdom Hall​—tan pisalsalamatan to itan ya pribilehyo. Naaralan kod alimbawa to ya no manpaabeba so sakey ed arapan na Dios tan awaten toy disiplina, mantutumbokan iray bendisyon!”

15. No labay tayon onsabid puso so panagdisiplina tayo, antoy nepeg tayon gawaen?

¹⁵ Pian magmaliw tayon maong a managbangat, kaukolan ya maseet tayo nin manaral. (1 Tim. 4:15, 16) Ontan met, saramay inikdan na Dios na autoridad ya mandisiplina et kaukolan ya tuloytuloy iran manpaigiya ed si Jehova. No gawaen da itan, naawat day respeto tan walay kawayangan dan mansalita legan dan ipapasal odino ipepetek so arum. Imanoen pay alimbawa nen Jesus.

16. Anto ray naaralan tayod si Jesus nipaakar ed dugan panagdisiplina tan epektibon panagbangat?

¹⁶ Lanang ya dedengelen tan uunoren nen  Jesus so Ama to, anggano aliwan mainomay itan ya gawaen. (Mat. 26:39) Tan ibabaga ton manlalapud Ama to iray ibabangat to tan say karunongan to. (Juan 5:19, 30) Lapud mapaabeba tan maunor si Jesus, sikatoy labalabay ya asinggeran na saray matuan totoo tan akatulong met ed sikato iratan ya kualidad pian magmaliw a maabagey tan makonsidera ya managbangat. (Basaen so Lucas 4:22.) Lapud mauyamon panagsalita to, aligliwa iray totoon singa abalbal a tanubong odino makuykuyep a pabilo. (Mat. 12:20) Anggan sanen asubok so pasensia nen Jesus, sikatoy maomaong tan maar-aro nin siansia. Napatnagan itan sanen impetek to ray apostol to nen nagmaliw iran makasarili tan pinirawat day nawalaan na atagey ya posisyon.​—Mar. 9:33-37; Luc. 22:24-27.

17. Anto ran balibalin kualidad so makatulong ed saray elder pian epektibo dan napastolan so pulok na Dios?

¹⁷ Amin ya walaan na autoridad a mangiter na disiplinan base ed Biblia et marunong no aaligen day alimbawa nen Kristo. No ontan so gagawaen da, ipapanengneng da ya labay day manpaigiya ed Dios tan ed Anak to. Insulat nen apostol Pedro: “Pastolan yoy pulok na Dios a walad panangasikaso yo, a manlingkor kayo bilang manangasikaso, ya agnapapasootan, noagta mabulos yon gawaen itan diad arapan na Dios; aliwan lapud panangaro ed agmanepeg a nabang, noagta lapud labalabay yon gawaen itan; tan agkayo pakakatawan ed saramay kayarian na Dios, noagta magmaliw kayon alimbawa ed pulok.” (1 Ped. 5:2-4) Saray manangasikaso ya maliket ya manpapasakop ed Dios tan ed Kristo, say ulo na kongregasyon, et seguradon nagunggonaan pati saramay walad panangasikaso da.​—Isa. 32:1, 2, 17, 18.

18. (a) Antoy kakaukolanen nen Jehova ed saray atateng? (b) Panon ya tutulongan na Dios iray ateng ya sumpalen iray responsabilidad da?

¹⁸ Saratan ya prinsipyo et onaplika met diad pamilya. Bibilinen iray ulo na pamilya: “Agyo papasyodoten iray ananak yo, noagta itultuloy yo ran pabalegen diad disiplina tan panamilin nen Jehova.” (Efe. 6:4) Panon kaseryoso itan? Ibabaga na Proverbio 19:18: “Disiplinam so anak mo legan a wala ni ilalo, tan agka magmamaliw a sengegan na ipatey to.” On, walay eebatan na saray Kristianon atateng ed si Jehova no agda disiplinaen so anak da! (1 Sam. 3:12-14) Balet, ikdan nen Jehova iray ateng na karunongan tan biskeg ya kaukolan da no mapaabeba dan ipikasi iratan ed sikato tan no manpaigiya ira ed Salita to tan ed masanton espiritu to.​—Basaen so Santiago 1:5.

19, 20. (a) Anto ray bendisyon no awaten tayoy disiplina na Dios? (b) Antoy aralen tayod ontumbok ya artikulo?

¹⁹ No awaten tayoy disiplina nen Jehova tan aligen tayoy paraan na panagdisiplina to tan nen Jesus, dakdakel so bendisyon ya naawat tayo. Saray pamilya tan kongregasyon et magmaliw a mareen ya pasen. Nalikna met na kada sakey so tuan panangaro, panamabli, tan seguridad​—a pigara labat ed dakel ni ran bendisyon diad arapen. (Sal. 72:7) Kanian duga labat ya ibagan say disiplina nen Jehova so mangibabangat ed sikatayon manbilay ya anggapoy anggaan bilang mareen tan nankakasakey ya pamilya ya aasikasoen to. (Basaen so Isaias 11:9.) No ontan so pangipasen tayod disiplina na Dios, mas naapresya tayo no anton talaga itan: balibalin ebidensya na balbaleg ya panangaro na Dios ed sikatayo.

²⁰ Diad ontumbok ya artikulo, aralen tayo so arum nin aspekto na disiplina diad pamilya tan ed kongregasyon. Aralen tayo met so nipaakar ed disiplina ed sarili tan no panon tayon napaliisan so mas graben epekto na pangibaliwala ed disiplina.