1, 2. (a) Siopa ray unonan tutukoyen nen Jesus nen imbaga to imay nabasa ed Mateo 24:12? (b) Panon ya ipapanengneng na libro na Gawa ya maslak ya Kristiano nensaman et tuloytuloy dan impatnag so panangaro? (Nengnengen so litratod gapo na artikulo.)

KAIBA ed samay tanda ya inter nen Jesus nipaakar ed “kaunoran a parte na sistema na mundo” et “ombetel so panangaro na karaklan a totoo.” (Mat. 24:3, 12) Nen inmunan siglo, saray Judio ya mangibabagan totoo ira na Dios et inabuloyan dan ombetel so panangaro ra ed Dios.

² Anggaman ontan, maslak ya Kristiano ed saman ya panaon et makulikulin “angiyabawag ed maong a balita nipaakar ed Kristo” tan tuloytuloy dan impatnag so panangaro ed Dios, ed kapara dan Kristiano, tan ed saray agmananisia. (Gawa 2:44-47; 5:42) Balet, arum ed saray patumbok nen Jesus nen inmunan siglo et pinaulyanan dan ombetel so panangaro ra.

3. Antoy nayarin rason no akin ya binmetel so panangaro na arum a Kristiano?

³ Oniay imbaga na apaolin si Jesu-Kristo ed saray Kristiano ed Efeso: “Say nanenengneng kon kakulangan mo et pinaulyan mon  naandi so panangaron walad sika diad gapo.” (Apo. 2:4) Antoy nayarin rason ya imbaga to iya? Saray inmunan disipulo nen Kristo et nayarin naimpluensyaan na panagnonot na mundo. (Efe. 2:2, 3) Singa saray dakel ya syudad natan, say Efeso nen inmunan siglo et napno na kaugsan. Mayamyaman itan a syudad, tan say akapokusan na totoo et say panliliket tan say maluho tan mainawan bilay. Mapatnag ya mas labay dan paliketen so sarili da nen say ipanengneng so panangaro ed arum. Sakey ni, dakel so manggagaway graben imoralidad tan anggapoy-baing a kagagawa.

4. (a) Panon ya ombebetel so panangaro na totoo ed panaon tayo? (b) Anto ray taloran aspekto a nayarin nasubok so panangaro tayo?

⁴ Say propesiya nen Jesus nipaakar ed ibetel na panangaro et nagagawa anggad panaon tayo. Natan et nababawasan lan nababawasan so panangaro na totoo ed Dios. Imbes ya say Dios so ilaloan dan manggaway solusyon ed saray problema ed mundo, dakdakel so mantitiwala ed saray organisasyon na too. Kanian tuloytuloy ya ombebetel so panangaro na saray totoon agmandadayew ed si Jehova a Dios. Balet singa agawa ed kongregasyon na Efeso nen inmunan siglo, saray tuan Kristiano natan et posiblin magmaliw ya kampante tan paulyanan da la ya kalkalnan naandi so panangaro ra. Aralen tayo natan so taloran aspekto a nayarin nasubok so panangaro tayo: (1) Panangaro ed si Jehova, (2) panangaro ed katuaan ed Biblia, (3) panangaro ed agagi tayo.

5. Akin et nepeg tayon aroen so Dios?

⁵ Diad samay mismon agew antis ya impasakbay nen Jesus so nipaakar ed ibetel na panangaro, indanet to no siopay sankamanunaan ya aroen tayo. Imbaga to: “ ‘Arom si Jehova a Dios mo ed interon pusom tan interon kamarerwam tan interon nonot mo.’ Saya so sankaimportantian tan unonan ganggan.” (Mat. 22:37, 38) Kanian say aralem a panangaro ed si Jehova so ontulong ed sikatayon unoren iray ganggan to, mansungdo, tan busolen so kaugsan. (Basaen so Salmo 97:10.) Balet, gagawaen nen Satanas tan say mundo to so amin a paraan pian ombetel so panangaro tayo ed Dios.

6. Antoy resulta no naandi so panangaro na totoo ed Dios?

⁶ Saray totoo ed mundo et lingoy pakatalos da ed panangaro. Imbes ya aroen da so Dios ya Amalsa, saray totoo et “maaro ed sarili ra.” (2 Tim. 3:2) Ipapaseseg na mundon uuleyan nen Satanas so “pilalek na laman tan say pilalek na mata tan say panangipangta na sakey ed saray kaykayarian to.” (1 Juan 2:16) Oniay impasakbay nen apostol Pablo ed saray kapara ton Kristiano nipaakar ed pamaliket ed laman: “Say pangiteen na nonot ed laman et mangitonton ed ipapatey . . . lapud say pangiteen na nonot ed laman et mangitonton ed pagmaliw a kabusol na Dios.” (Roma 8:6, 7) Kanian saramay iyuuna dad bilay da so pananap na materyal iran bengatla odino pamenek ed seksual iran pilalek da et nadidismaya tan nasasakitan ya maong.—1 Cor. 6:18; 1 Tim. 6:9, 10.

7. Anto ran peligro so nayarin makaapekto ed saray Kristiano natan?

⁷ Diad pigaran bansa, saray ateista, agnostiko, tan ebolusyonista et iimpluensyaan day arum pian naandi so panangaro ra ed Dios odino agla ra manisia ed sikato. Dakel so akombinse da ya no say sakey et manisia ya walay Amalsa, sikatoy balanglan ignorante odino aliwan matalino. Ontan met, mas papagalangan na totoo iray scientist imbes ya say Amalsa. (Roma 1:25) No manisia tayo ed saratan, niyarawi itayo ed si Jehova tan ombetel so panangaro tayo.—Heb. 3:12.

8. (a) Anto ran situasyon so nayarin pakadismayaan na saray lingkor nen Jehova? (b) Anton panamaseguro so nabasa tayo ed Salmo 136?

⁸ No masyado tayon nadismaya, nayarin  onkapuy so pananisia tayo tan ombetel so panangaro tayo ed Dios. Diad sayan mauges ya mundon kontrolado nen Satanas, no maminsan et wala ray situasyon ya pakadismayaan tayo. (1 Juan 5:19) Ompan wala ray probleman dadalanen tayo natan, singa say itatatken, sakit, odino problemad kuarta. Odino nayarin naeermenan itayo lapud pakalikna tayo et kulang so nagagawaan tayo, agnagagawa iray iilaloan tayo, odino lapud mismon kakapuyan tayo. Balet anggano ontan so situasyon o nalilikna tayo, agtayo komon iisipen ya pinaulyan itayo la nen Jehova. Imbes, nonoten tayo iray makapaseseg iran salita nipaakar ed agmanganggan panangaro nen Jehova ed sikatayo. Nabasa itan diad Salmo 136:23: “Sankanonot to itayo sanen nipaabeba tayo, ta say matoor a panangaro to et mansiansia ya anggad angga.” Agmanguuman so matoor a panangaro nen Jehova ed saray lingkor to. Kanian makaseguro tayo ya dedengelen to so ‘ikekerew tayoy tulong’ tan eebatan to iratan.—Sal. 116:1; 136:24-26.

9. Antoy tinmulong ed si Pablo pian mansiansian mabiskeg so panangaro to ed Dios?

⁹ Singa say salmista, apabiskeg met si Pablo nen dinalepdep to ya sikatoy lanang ya tutulongan nen Jehova. Insulat nen Pablo: “Si Jehova so mananulong ko; agak ontakot. Antoy nagawaan na too ed siak?” (Heb. 13:6) Say mabiskeg ya talek nen Pablo ed maaron panangasikaso nen Jehova so tinmulong ed sikato ya nasarag iray problema to. Agto inabuloyan ya sikatoy onkapuy lapud mairap iran situasyon. Diad tua, anggan sanen walad prisoan si Pablo, nansulat na pigaran makapaseseg iran sulat. (Efe. 4:1; Fil. 1:7; Filem. 1) On, anggan sanen nasusubok ya maong si Pablo, apansiansia to so panangaro to ed Dios. Antoy tinmulong ed sikato pian nagawaan itan? Sikatoy nanmatalek ed “Dios na amin a ligliwa, a manliligliwa ed sikatayo diad amin a subok a dadalanen tayo.” (2 Cor. 1:3, 4) Panon tayon naalig so alimbawa nen Pablo tan panon tayon napansiansian mabiskeg so panangaro tayod si Jehova?

10. Panon tayon napansiansian mabiskeg so panangaro tayo ed si Jehova?

¹⁰ Imbaga nen Pablo so sakey ya importantin paraan pian napansiansia tayon mabiskeg so panangaro tayod si Jehova. Oniay insulat to ed saray kapananisiaan to: “Naynay kayon manpikasi.” Ag-abayag et insulat to lamet: “Manseet kayod pikakasi.” (1 Tes. 5:17; Roma 12:12) Say komunikasyon ed Dios panamegley na pikakasi so pundasyon na malet ya relasyon ed sikato. (Sal. 86:3) No ipanaon tayon ibalikas ed si Jehova no anton talagay walad nonot tan puso tayo, seguradon mas onapit itayo ed Ama tayo ed tawen, say “Dumerengel na pikakasi.” (Sal. 65:2) Ontan met, no natebek tayon eebatan nen Jehova iray pikakasi tayo, mas onaralem so panangaro tayo ed sikato. Mas nalikna tayo ya “si Jehova et asingger ed amin ya ontatawag ed sikato.” (Sal. 145:18) Say ontan a panagmatalek ed panangaro tan suporta nen Jehova so ontulong ed sikatayo ya nasarag iray arum nin subok ed pananisia tayo.

11, 12. Panon tayon napaaralem so panangaro tayod katuaan ed Biblia?

¹¹ Bilang Kristiano, aawaten tan papablien tayoy katuaan. Say Salita na Dios labat so panlalapuan na katuaan. Oniay imbaga nen Jesus nen nampikasi ed Ama to: “Say salitam et katuaan.” (Juan 17:17) Kanian pian naaro tayoy katuaan, nepeg ya nawalaan tayo ni na suston kakabatan ed Salita na Dios. (Col. 1:10) Balet, aliwan kakabatan labat so kaukolan. Imanoen no panon itayon tutulongan na nansulat ed Salmo 119 pian natalosan tayo so kabaliksan na panangarod katuaan ed Biblia. (Basaen so Salmo 119:97-100.) Kasin  mangigagana tayoy panaon diad loob na sanagew pian dalepdepen o nononoten a maong iray nababasa tayo ed Biblia? Mas naaro tayoy katuaan ed Biblia no dalepdepen tayo iray gunggona ed pangiyaaplika tayod satan ed bilay tayo.

¹² Imbaga ni na salmista: “Masamsamit ed pakataway ko iray salitam, mas masamit ni nen say dilo!” (Sal. 119:103) Mipadpara, masamsamit iray espiritual a naakan ya based Biblia ya itatarya na organisasyon na Dios. Namnamen tayon maong iratan pian mainomay tayon natandaan so “makapaliket iran salita” na katuaan tan nausar iratan pian tulongan so arum.—Ecl. 12:10.

13. Antoy akatulong ed si Jeremias pian naaro toy katuaan ed Biblia, tan antoy epekto ed sikato?

¹³ Inad-aro nen propeta Jeremias so katuaan ed Biblia. Imanoen so epekto na salita na Dios ed puso to. “Sinmabi ed siak so salitam, tan kinan ko iratan; tan nanggayaga tan nanliket so pusok lapud salitam, ta atawag ak ed ngaran mo, O Jehova a Dios na saray armada.” (Jer. 15:16) Diad simbolikon paraan et inakan tan ginatgat nen Jeremias so mablin salita na Dios diad impandalepdep to ed satan. Diad ontan et awalaan na impapuson apresasyon ed pribilehyo ton natawag ed ngaran na Dios. Kasin say panangaro tayod katuaan ed Biblia so mamapakiwas ed sikatayon apresyaen so espisyal ya pribilehyo tayon natawag ed ngaran na Dios tan iyabawag so Panarian to diad sayan panaon na anggaan?

14. Antoy makatulong pian onaralem so panangaro tayod katuaan ed Biblia?

¹⁴ Likud ed pambasa na Biblia tan saray based Biblia ya publikasyon tayo, anto ni makatulong pian onaralem so panangaro tayod katuaan ed Biblia? Mas naar-aro tayoy katuaan ed Biblia no regular itayon mimiaral ed kongregasyon. Say sinimban panagaral na Biblia panamegley na Say Panag-bantayan so manunan paraan pian nibangat itayo. Pian natalosan tayo so aaralen, kaukolan tayoy manparaan ya maong parad kada Panagaral na Panag-bantayan. Kaibad satan so pambasa ed amin ya nisitan teksto. Natan, Say Panag-bantayan et sarag tayo lan i-download ed website ya jw.org odino basaen ed JW Library app ed dakel ya lenguahe. Wala ray electronic format ya nalukasan tayon tampol iray nisitan teksto  ed kada aaralen ya artikulo. Pero antokaman so usaren tayo, say pambasa tan pandalepdep ed sarayan teksto et makatulong pian onaralem so panangaro tayod katuaan ed Biblia.—Basaen so Salmo 1:2.

15, 16. (a) Base ed Juan 13:34, 35, antoy obligasyon tayo? (b) Panon ya say panangarod agagi tayo et mikonektaan ed panangaro tayod Dios tan ed Biblia?

¹⁵ Diad sampot lan labi nen Jesus ed dalin, imbaga tod saray disipulo to: “Iter kod sikayo so sakey a balon ganggan, a manaaroan kayo; no panon so impangarok ed sikayo, ontan met so panaaroan yo. Diad saya et naamtaan na amin a sikayo iray disipulok—no manaaroan kayo.”—Juan 13:34, 35.

¹⁶ Say panangaro ed agagi tayo et mikonektaan ed panangaro tayo ed si Jehova. Diad tua, agtayo naaro so Dios no agtayo inaro iray agagi tayo. Oniay insulat nen apostol Juan: “Say agmangaaro ed agi to a nanenengneng to et agto nayarian ya aroen so Dios ya agto nanenengneng.” (1 Juan 4:20) Ontan met, say panangaro ed si Jehova tan saray agagi tayo et mikonektaan ed panangaro tayod Biblia. Akin? Lapud say panangaro tayod katuaan ed Biblia so mamakiwas ed sikatayo ya impapuson unoren iray ganggan ed Biblia ya aroen so Dios tan aroen iray agagi tayo.—1 Ped. 1:22; 1 Juan 4:21.

17. Antoy pigaran paraan ya nipanengneng tayoy panangaro?

¹⁷ Basaen so 1 Tesalonica 4:9, 10. Antoy pigaran praktikal a paraan ya nipanengneng tayoy panangarod saray agagi ed kongregasyon tayo? Nayarin mankaukolan na naluganan so sakey ya maedad lan agi pian makapiaral. Nayarin wala ray kaukolan ya apigeren ed abung na sakey ya abalon sister. (Sant. 1:27) Ugaw man o matatken, saray agagi ed kongregasyon ya nadidismaya, nadi-depress, odino ondadalan ed arum nin subok et kaukolan tayon ikdan na atension, pasesegen, tan ligliwaen. (Pro. 12:25; Col. 4:11) No ipanengneng tayo ed salita tan gawa ya walay malasakit tayo ed “saray kapananisiaan tayo,” prueba itan ya talagan inaro tayo ra.—Gal. 6:10.

18. Antoy makatulong pian naayos tayo iray daiset ya agpantatalosan?

¹⁸ Impasakbay na Biblia ya diad “kaunoran iran agew” na sayan mauges a sistema na mundo, magmaliw ya makasarili tan maagum iray totoo. (2 Tim. 3:1, 2) Bilang Kristiano, nepeg tayon pansagpotan ya paaralemen so panangaro tayo ed Dios, ed katuaan ed Biblia, tan ed sakey tan sakey. Tua, no maminsan et wala ray daiset ya agpantatalosan ed sikatayo ran sanaagi. Balet talagan bendisyon ed interon kongregasyon no say aro so mamakiwas ed sikatayo ya ayosen ed maaron paraan so antokaman ya agpantatalosan! (Efe. 4:32; Col. 3:14) Kanian agtayon balot komon papaulyanan ya ombetel so panangaro tayo! Imbes, itultuloy tayon aroen ya maong si Jehova, say Salita to, tan saray agagi tayo.