1, 2. (a) Akin et napapaseseg tayod saray matoor ya manpupulong ed saray teritoryan daiset so interesado? (Nengnengen so litratod gapo na artikulo.) (b) Antoy imbaga nen Jesus nipaakar ed impanpulong tod “mismon baley to”? (Nengnengen so paimanod leksab.)

SI SERGIO TAN OLINDA et sanasawan payunir a manedad na masulok ya 80, tan manaayam irad United States. Diad apalabas, nanairapan la ran onakar lapud onsasakit-sakit lay bikking da. Balet singa gagawaen da lad dakel a taon, kada kabuasan et manaakar iran onlad plaza, tan onsasabi ira ditan na ala-siete. Ompupuesto rad asingger na istasyon na bus tan mangiyoopresi ra na saray literatura tayon base ed Biblia ed saray ondadalan. Maslak a totoo et agda ra iimanoen, balet ag-ira onaalis ed puesto ra, tan iimisan da iramay onnenengneng ed sikara. Insan no ugto la, kalkalnaan da lay manakar pasempet. Diad ontumbok ya kabuasan et onla ra lamet ed plaza diad oras na ala-siete. Diad tua, sayan matoor a sanasawa et makuli dan ipupulong so mensahe na Panarian, kada kabuasan, anemiran agew ed loob na sakey simba, diad interon taon.

² Singa si Sergio tan Olinda, amayamay ya agagi tayo ed interon  mundo so dakel a taon lan manpupulong ed saray teritoryan daiset so interesado. No ontan met so situasyon mo, kokomendaan mi ka ed pansusungdom. * Say makulin panlilingkor mo ed si Jehova et mamapaseseg ed dakel ya agagi​—anggan diad saramay abayag la. Imanoen iyan imbaga na saray manangasikaso na sirkito: “No nakakaibak iray matoor ya agagi diad ministeryo, napapabiskeg ak ed alimbawa ra.” “Napapaseseg ak ed katooran da pian makapansungdo tan makapanpakpel ak ed ministeryok.” “Natetenyeg so pusok ed alimbawa ra.”

3. Anton taloran tepet so ebatan tayo, tan akin?

³ Pian napabiskeg so determinasyon tayon sumpalen so panagpulong a kimey ya inter nen Jesus ed sikatayo, amtaen tayoy ebat ed sarayan taloran tepet: Akin ya no maminsan et nadidismaya tayo? Panon tayon magmaliw a mabunga? Antoy makatulong ed sikatayon makapansungdo tan mansiansian mabunga?

4. (a) Panon ya naapektoan si Pablo ed negatibon reaksion na saray Judio? (b) Akin et ontan so alikna nen Pablo?

⁴ No nadidismaya ka lapud ngalngali anggapoy interesado ed teritoryan pampupulongan mo, natalosan moy naeksperiensya nen apostol Pablo. Legan na manga 30 taon ya ministeryo to, dakel so atulongan ton magmaliw ya disipulo nen Kristo. (Gawa 14:21; 2 Cor. 3:2, 3) Balet, dakel ya Judio so agto akombinsin magmaliw a tuan managdayew. Diad tua, maslak et agdinmengel ed si Pablo, tan sikatoy pinasegsegang ni ingen na arum. (Gawa 14:19; 17:1, 4, 5, 13) Antoy epekto na satan ed si Pablo? Oniay imbaga to: “Ibabagak so katuaan nipaakar ed Kristo . . . a pinasyay paneermen ko tan ag-ontutunday sakit a naliliknay pusok.” (Roma 9:1-3) Akin et ontan so alikna nen Pablo? Lapud impapuso to so panagpulong a kimey. Pinulongan to ray Judio lapud inaro to ra. Kanian ansakisakit ed si Pablo no agda aawaten so panangasi na Dios.

5. (a) Akin et pupulongan tayo ray totoo? (b) Akin et agla pankelawan ya no maminsan et nadismaya tayo?

⁵ Singa si Pablo, pupulongan tayo ray totoo lapud inaro tayo ra. (Mat. 22:39; 1 Cor. 11:1) Akin? Lapud amta tayo, base ed eksperiensya tayon mismo ya dakdakel so bendisyon ya naawat na saramay mandesisyon a manlingkor ed si Jehova. No isipen tayo ray totoo diad teritorya tayo, nibaga tayod sarili tayon, ‘No natulongan ko labat ira komon ya nanengneng da no antoy napapalampas da!’ Kanian agtayo ontutundan mamapaseseg ed sikara ya aralen da so katuaan nipaakar ed si Jehova tan say gagala to parad totoo. Singa oniay ibabaga tayod saray pupulongan tayo: ‘Walay balibalin regalo mi ed sika. Komon ta awaten mo.’ Kanian no agda awaten itan ya regalo, normal labat ya nayarin ‘nasakitan so puso tayo.’ No ontan so nalilikna tayo, agto labay ya ibagan kulang so pananisia tayo, noagta ipapanengneng na satan ya inaro tayo so panagpulong a kimey. Kanian anggano wala ray makapadismayan situasyon ed panagpulong, mansusungdo itayo. Si Elena, sakey ya payunir ed masulok lan 25 taon, et oniay imbaga to ya mipara met ed nalilikna na dakel ed sikatayo: “Aliwan mainomay so panagpulong a kimey. Balet anggapo lay arum ya mas labay kon gawaen nen say saya.”

6. Anton tepet so ebatan tayo, tan panon tayon naebatan itan?

⁶ Panon tayon naseguro ya anggano iner so pampulongan tayo et sarag tayoy magmaliw a mabunga? Pian naebatan itan ya importantin tepet, aralen tayo so duara ed saray ilustrasyon nen Jesus, ya no iner et indanet ton kaukolan tayoy ‘manbunga.’ (Mat. 13:23) Say unona et nipaakar ed sengeg na ubas.

7. (a) Siopay irerepresenta na “tomatanem,” “sengeg na ubas,” tan saray “sanga”? (b) Anton tepet so labay tayon naebatan?

 ⁷ Basaen so Juan 15:1-5, 8. Imanoen so imbaga nen Jesus ed saray apostol to: “Nigloria so Amak no mantultuloy kayon manbunga na dakel tan paneknekan yon sikayo ray disipulok.” Deniskribe nen Jesus si Jehova bilang “tomatanem,” sikato balet et bilang “sengeg na ubas,” tan saray disipulo to bilang saray “sanga.” * Anto sirin so bunga a nepeg a pawalaen na saray patumbok nen Kristo? Diad sayan ilustrasyon nen Jesus, agto direktan imbaga no anto itan ya bunga, balet sikatoy angiter na importantin detalye ya makatulong pian naamtaan tayoy ebat.

8. (a) Diad sayan ilustrasyon, akin ya say bunga et ag-ontutukoy ed saray balon disipulo? (b) Antoy napatnagan ed saray igaganggan nen Jehova ed sikatayo?

⁸ Oniay imbaga nen Jesus nipaakar ed Ama to: “Eekalen tod siak so kada sanga ya agmanbubunga.” Labay ton ibaga, ipasen itayo labat nen Jehova bilang lingkor to no manbunga itayo. (Mat. 13:23; 21:43) Kanian diad sayan ilustrasyon, say bunga ya nepeg a pawalaen na kada Kristiano et ag-ontutukoy ed saray balon disipulo ya nayarin atulongan tayo. (Mat. 28:19) Ta no onman, ompaway a saramay matoor ya agagi ya anggapoy napapakiwas dan magmaliw a disipulo nen Jesus, lapud agmaawat iray totoo ed teritoryan pampupulongan da, et singa samay agmanbubungan sanga diad ilustrasyon nen Jesus. Balet aliwan makatunongan itan! Akin? Lapud agtayo nayarin puersaen iray totoo ya magmaliw a disipulo. Kontra itan ed linawa nen Jehova, agto itayon balot piliten ya gawaen so bengatlan agtayo nasarag. Amin ya igaganggan nen Jehova ed sikatayo et sarag tayon gawaen.​—Deu. 30:11-14.

9. (a) Nawalaan itayo na bunga no mibiang tayo ed anton kimey? (b) Anton ilustrasyon so aralen tayo, tan akin?

⁹ Anto sirin so bunga ya nepeg tayon pawalaen? Malinew ya say tutukoyen to yan bunga et say kimey ya nagawaan na kada sakey ed sikatayo. Anto itan a kimey ya mamawalay bunga? Say panagpulong na maong a balita na Panarian na Dios. * (Mat. 24:14) Prupruebaan iya na ilustrasyon nen Jesus nipaakar ed tomatanem. Aralen tayo iyan komaduan ilustrasyon.

10. (a) Diad sayan ilustrasyon, antoy irerepresenta na bini tan dalin? (b) Anton bunga so pinawala na dawa na trigo?

¹⁰ Basaen so Lucas 8:5-8, 11-15. Diad ilustrasyon na tomatanem, say bini et “say salita na Dios,” odino say mensahe na Panarian. Say dalin et irerepresenta toy piguratibon puso na too. Say bini ya naplag ed maong a dalin et linmamot, tinmubo, tan binmaleg, ibaga tayo lan nagmaliw ya dawa na trigo. Insan “nambunga ray 100.” Balet anton klase iratan ya bunga a pinawala na dawa na trigo? Kasin nambunga itan na angkekelag iran dawa? Andi, amawala so dawa na trigo na balon bini, ya no ombaleg et magmaliw met ya dawa. Diad sayan ilustrasyon, say sakey ya bukel na bini et nambunga na sanlasus ya bukel. Panon ya onaplika itan ya ilustrasyon ed ministeryo tayo?

11. (a) Panon ya onaplika ed ministeryo tayo so ilustrasyon nipaakar ed tomatanem? (b) Panon itayon makapawala na balon bini na Panarian?

¹¹ Bilang panangikompara, ibaga tayon pigay taon lay apalabas et impulong ed sikatayo na saray Tasi odino Kristianon atateng tayo so mensahe na Panarian. Aliketan ira lapud naimano dan onsasabi ed puso tayo so singa bini a mensahe na Panarian. No panon ya say maong a dalin ed ilustrasyon nen Jesus et pinatubo  to so bini, inawat tayo met so mensahe tan pinabli tayo itan. Bilang resulta, say singa bini ya mensahe na Panarian et linmamot tan binmaleg, a singa say dawa na trigo ya ag-abayag et nambunga. Tan no panon ya say dawa na trigo et agnambunga na balon dawa noagta balon bini, mamapawala itayo met na bunga ya ag-ontutukoy ed balon disipulo noagta balon bini na Panarian. * Panon itayon makapawala na balon bini na Panarian? Kada no ipupulong tayo so mensahe na Panarian, singa tayo paparakelen tan ikakayat so bini ya nitanem ed puso tayo. (Luc. 6:45; 8:1) Kanian naaralan tayo ed sayan ilustrasyon nen Jesus ya anggad tuloytuloy tayon ipupulong so mensahe na Panarian, sikatayoy ‘manbubunga tan mansusungdo.’

12. (a) Antoy naaralan tayo ed saray ilustrasyon nen Jesus nipaakar ed sengeg na ubas tan tomatanem? (b) Antoy epekto ed sika na sayan naaralan mo?

¹² Antoy naaralan tayo ed saray ilustrasyon nen Jesus nipaakar ed sengeg na ubas tan tomatanem? Makatulong iratan ed sikatayon natalosan ya say abilidad tayon mamawala na bunga et ag-akadepende ed ikiwas na totoo ed teritorya tayo. Imbes, akadepende itan ed katooran tayo. Ontan met so binitla nen Pablo sanen imbaga to: “Kada sakey et mangawat na tumang to unong ed kinimeyan to.” (1 Cor. 3:8) Say tumang et unong ed kinimeyan na sakey, aliwan diad resulta na kinimeyan to. Oniay imbaga nen Matilda ya 20 taon lan payunir: “Naliliketan ak diad pakaamtan tutumangan nen Jehova iray sagpot tayo.”

13, 14. Base ed Roma 10:1, 2, anto ray rason no akin ya agsinmuko si Pablo ya tulongan iramay ag-angawat ed mensahe na Panarian?

¹³ Antoy makatulong ed sikatayon makapansungdo tan mansiansian mabunga? Singa naaralan tayo, adismaya si Pablo nen ag-inawat na saray Judio so mensahe na Panarian. Anggaman ontan, sikatoy agsinmuko ya tulongan ira. Imanoen no anto ni imbaga tod sulat to parad saray Kristiano ed Roma nipaakar ed liknaan tod saray Judio: “Say pipirawaten na pusok tan say masimoon ya ipipikasik ed  Dios nipaakar ed sikara et say pakaliktar da. Lapud tatasian ko a maseseg ira parad Dios, balet aliwan unong ed suston kakabatan.” (Roma 10:1, 2) Antoy indanet nen Pablo ya rason no akin ya intultuloy toy ministeryo to?

¹⁴ Unona, imbaga nen Pablo no akin ya tuloytuloy ton pinulongan iray Judio. Sikatoy apakiwas na ‘pipirawaten na puso to.’ Pirawat na puso to ya niliktar so arum ya Judio. (Roma 11:13, 14) Komadua, binitla nen Pablo so ‘masimoon ya ipipikasi to ed Dios nipaakar ed sikara.’ Sikatoy akikasi ed Dios ya natulongan to komon iray Judio ya awaten da so mensahe na Panarian. Komatlo, onia ni imbaga to: “Maseseg ira parad Dios.” Say ninengneng to et say potensyal na kada too ya manggawa na maong. Say seseg, no duga so pangusaran ed satan et makatulong ed saray matuan impanpuso ya totoo pian magmaliw ya maseseg a disipulo nen Kristo, a singa amta la nen Pablo.

15. Panon tayon naalig si Pablo? Mangiter na alimbawa.

¹⁵ Panon tayon naalig si Pablo? Unona, gawaen tayoy anggaay nayarian tayon pansiansiaen so pirawat na puso tayo ya anapen iramay “walaan na dugan kipapasen na puso parad bilay ya andi-anggaan.” Komadua, ipikasi tayod si Jehova ya nalukasan komon so puso na saray matuan totoo. (Gawa 13:48; 16:14) Oniay imbaga nen Silvana ya payunir ed ngalngali 30 taon, “Antis ak ya onlad sakey ya abung diad teritorya mi, manpipikasi ak nid si Jehova, kekerewen kon magmaliw ak komon ya positibo.” Ipipikasi tayo met ed Dios ya komon et igiya itayo na saray anghel ed saray matuan impanpuso ya totoo. (Mat. 10:11-13; Apo. 14:6) Imanoen tayo pay imbaga nen Robert ya payunir ed masulok lan 30 taon, “Say pankimey a kaiba na saray anghel ya makaamta ed no antoy nagagawa ed bilay na saray unabung et makapalikliket.” Komatlo, say nenengnengen tayo et say potensyal na too ya manggawa na maong. Oniay imbaga nen Carl, sakey ya elder a masulok lan 50 taon ya abautismoan, “Nenengnengen koy anggan melag a pakapatnagan ya interesado so sakey a too, nayarin diad imis to, mauyamon itsura, odino ed balibalin tepet to.” On, singa si Pablo, makapansungdo tan makapawala itayo na bunga.

16, 17. (a) Antoy naaralan tayo ed bilin ya walad Eclesiastes 11:6? (b) Iyilustra no panon ya makaapekto ed saray makakaobserba so kimey tayo a panagtanem.

¹⁶ Anggano say mensahe na Panarian ya ipupulong tayo et singa ag-onsasabi ed puso na totoo, agtayo nepeg a melmelagen so epekto na kimey tayo ya panagtanem. (Basaen so Eclesiastes 11:6.) Tua ya dakel so totoon ag-ondengel ed sikatayo, balet oobserbaan da tayo. Iimanoen day masimpit ya panangawes tayo, maong ya ugali tayo, tan makaaron imis tayo. Agmanbayag, nayarin makatulong so kondukta tayo pian nanengneng da ya aliwan tua manaya so negatibon iisipen dad sikatayo. Naimano itan nen Sergio tan Olinda ya abitlad gapo.

¹⁷ Oniay inkuan nen Sergio: “Lapud sakit, medyo abayag kamin ag-akaonla ed plaza. Nen akapawil kami lamet, tinepetan kami na saray ondadalan, ‘Antoy agawa? A-miss mi kayo ah.’” Onia met so makakaimis ya imbaga nen Olinda: “Pinayapayan kami na saray driver na bus tan inyeyag ni ingen na arum ed sikara, ‘Ayos ’tan!’ Kinmerew ni ra ingen na magasin tayo.” Tan asurprisa so sanasawa nen walay lakin tinmunda ed arap na witnessing cart, inikdan to ra na rosas, tan akisalamat ed gagawaen da.

18. Akin ya determinado kan ‘manbunga tan mansungdo’?

¹⁸ On, no ‘agtayo pampainawaen so lima tayo’ diad pantatanem na bini na Panarian, makanakana so pibibiang tayo ed “pantasi ed amin a nasyon.” (Mat. 24:14) Nagkalalo la, talagan maliket tayo ta amta tayon walad sikatayo so pabor nen Jehova, lapud aaroen to so amin ya ‘manbubunga tan mansusungdo’!