IMPASAKBAY nen Jesus ya naliketan iray patumbok to lapud dakel so aanien diad panaon na anggaan. (Mat. 9:37; 24:14) Imanoen tayo no panon ya makapakelaw ya tinmua itan ed sakey ya lugar na Transcarpathia, Ukraine. Diad taloran nan-aasinggeran ya baley ed satan ya lugar, walay 50 ya kongregasyon tan masulok ya 5,400 so manangipalapag. * On, 1 ed 4 totoo na impaniiban populasyon na taloran baley et Tasi nen Jehova!

Kumustay panagpulong ed sarayan lugar? “Rerespetoen na totoo dia so Biblia, importante ed sikara so hustisya, relasyon ed pamilya, tan tutulongan day sakey tan sakey,” so imbaga nen brother Vasile ya manaayam ditan. Imbaga to ni: “Aliwan naynay ya onabobon irad papanisiaan tayo. Balet no walay ipanengneng mo manlapud Biblia, madengedengel ira.”

Siempre, wala ray nikadkaduman subok ya aarapen na saray agagi tayo no manpupulong irad lugar ya mas atagey so ratio na manangipalapag ed populasyon. Singa bilang, walay sakey ya kongregasyon ya 134 so manangipalapag balet 50 ya abung labat so walad teritorya to! Antoy gagawaen na saray manangipalapag ed onia ran situasyon?

Dakel ya agagi tayo so manpupulong ed saray lugar ya baleg so pankaukolan. “Say ratio na manangipalapag ed saray kaabungan ya teritorya na kongregasyon mi et 1 ed 2,” so imbaga nen brother Ionash ya mantaon na 90. “Manpupulong ak ed baryo, balet anggan nen kinmapuy lay laman ko, manbiabiahe ak nin siansia na manga 100 milya (160 km) diad sakey a lugar ya agnapupulongan, diad lenguahen Hungarian.” Talagan kaukolan ya mansakripisyo iray manangipalapag pian makatulong ed arum ya teritorya. “Pian naabetan koy train, ombabangon ak na alas-4 ed kabuasan tan manpupulong ak ya anggad ala-6 na labi no onalis lay train pasempet. Ontan so gagawaen ko mamidua o mamitlo ed sakey simba,” so imbaga nen Ionash. Kasin sulit so pansasagpot to? “Malikeliket ak ed sayan klase na ministeryo,” so imbaga to. “Pribilehyok ya natulongan so pamilyan walad arawin lugar pian naamtaan day katuaan.”

Siempre, aliwan amin ed saray kongregasyon dia et makapanbiahe na arawi. Balet amin, pati saray maedad lan manangipalapag et gagawaen day anggaan na nayarian da pian nakobrian ya maong so teritorya da. Kanian bilang resulta nen 2017, say impaniiban bilang na inmatendi ed Memoryal manlapud sarayan taloran baley et ngalngali doble ed bilang na saray manangipalapag​—odino kapaldua na interon populasyon. Kombinsido tayo ya anggan iner so panlingkoran tayo, siansian “dakel so gagawaen [tayo] ed kimey na Katawan.”​—1 Cor. 15:58.