1. Diad Eden, antoy impaamta nen Jehova nipaakar ed kalaban tayo?

AMTA nen Adan ya agmakasalita so uleg. Kanian nayarin inisip ton say akitongtong ed si Eva et sakey ya espiritun pinalsa panamegley na uleg. (Gen. 3:1-6) Anggapoy amta nen Adan tan Eva nipaakar ed sayan espiritun pinalsa. Anggaman ontan, ginagala nen Adan ya ag-unoren so maaron Ama to ed tawen tan akikomplot ed sayan estranghero ya sumlangen so linawa na Dios. (1 Tim. 2:14) Tampol ya impaamta nen Jehova so nipaakar ed sayan kalaban ya amalikdo ed si Adan tan Eva, ya impromisa ton agmanbayag et naderal lanlamang iyan mauges. Balet impasakbay nen Jehova ya legan a wadia nid dalin iyan espiritun pinalsa ya akitongtong panamegley na uleg et walay pakayari ton sumpaen iramay mangaaro ed Dios.​—Gen. 3:15.

2, 3. Akin ya daiset labat so nabasa tayo nipaakar ed si Satanas antis na isabi na Mesias?

² Lapud karunongan nen Jehova, agton balot imbaga ed sikatayo so personal ya ngaran na samay anghel a nanrebelde ed sikato. * Tan ag-ingen anggan angiter so Dios na ngaran ya mangidedeskribe ed satan ya kalaban, ya anggad linmabas so 2,500 a taon kayari  na inmunan rebelyon. (Job 1:6) Diad tua, talora labat ya libro ed Hebreon Kasulatan​—1 Awaran, Job, tan Zacarias—​so pakabasaan ed si Satanas, ya mankabaliksan na “Sumusumpa.” Akin ya daiset labat so nabasa nipaakar ed kalaban tayo antis na isabi na Mesias?

³ Mapatnag ya aglabay nen Jehova ya naikdan na importansia si Satanas ed pangipasulat na dakel ya impormasyon diad Hebreon Kasulatan nipaakar ed sikato tan ed gagawaen to. Say manunan gagala nen Jehova ed impangipuyan tod satan ya kabiangan na Kasulatan et pian nabidbir so Mesias tan nitonton so totoo na Dios ed sikato. (Luc. 24:44; Gal. 3:24) Nen asumpal iratan tan sinmabi la so Mesias, inusar nen Jehova si Jesus tan saray disipulo to pian dakel ni naamtaan nipaakar ed si Satanas tan saray anghel ya akikomplot ed sikato. * Dugaruga itan, ta si Jesus tan saray alanaan ya kaiba ton manuley so usaren nen Jehova ya maneral ed si Satanas tan ed saray ontutumbok ed sikato.​—Roma 16:20; Apo. 17:14; 20:10.

4. Akin ya agtayo nepeg a takotan so Diablo?

⁴ Deneskribe nen apostol Pedro si Satanas a Diablo bilang “managlem a leon,” tan sikatoy tinawag nen Juan bilang “uleg” tan “dragon.” (1 Ped. 5:8; Apo. 12:9) Balet agtayo nepeg ya takotan so Diablo ta limitado labat so pakapanyari to. (Basaen so Santiago 4:7.) Tutulongan itayo nen Jehova, Jesus, tan saray matoor ya anghel. Diad tulong da et natalo tayo so kalaban tayo. Balet, kaukolan tayo nin amtaen so ebat ed sayan taloran importantin tepet: Panon kalaknab so impluensya nen Satanas? Panon ton iimpluensyaan iray totoo? Tan anto ray limitasyon na pakapanyari to? Legan tayon aamtaen iray ebat ed saratan ya tepet, amtaen tayo met no anto ray naaralan tayo.

5, 6. Akin ya agsarag na saray gobierno na too ya gawaen iray pananguman ya kakkaukolan na too?

⁵ Dakel ya anghel so akibiang ed impanrebelde nen Satanas. Antis na Delap, tinukso nen Satanas so pigara ed sikara ya nawalaay imoral a relasyon ed saray ananak a bibii na totoo. Sayan katuaan et impaamta na Biblia ed simbolikon paraan sanen deneskribe to so dragon ya ingguyor toy kakatlo na saray bitewen ed tawen a kaiba to. (Gen. 6:1-4; Jud. 6; Apo. 12:3, 4) Nen tinaynan na saratan ya anghel so pamilya na Dios, nampakontrol la rad si Satanas. Balet, sarayan rebelde et aglabat basta sakey ya grupo na manggugulo. Angiletneg met si Satanas na sarili ton gobierno, ya sikato so ari. Inorganisa nen Satanas irayan demonyo a magmaliw ya manuley.​—Efe. 6:12.

⁶ Panamegley na espiritun organisasyon to, uuleyan nen Satanas so amin ya gobierno na too. Napatnagan itan ya tua sanen impanengneng nen Satanas ed si Jesus so “amin a panarian ed dalin” tan imbaga ton: “Iter kod sika iyan amin a pakauley tan say gloria na saraya, lapud niiter la iya ed siak, tan iter ko iya ed siopaman a labay ko.” (Luc. 4:5, 6) Balet anggaman mauges so impluensya nen Satanas, dakel a gobierno so manggagawa na maabig ed nasasakopan da. Tan nayarin maabig met so intension na saray manuuley. Balet anggapoy gobierno na too odino indibidual ya sarag ton gawaen iray pananguman ya kakkaukolan na too.​—Sal. 146:3, 4; Apo. 12:12.

7. Likud ed saray gobierno, panon ya uusaren met nen Satanas so palson relihyon tan komersyo? (Nengnengen so litratod gapo na artikulo.)

⁷ Aliwan say gobierno labat so uusaren nen Satanas tan saray demonyo to pian ibalang so “interon mundo,” noagta uusaren to met so palson relihyon tan komersyo. (Apo. 12:9) Panamegley na palson relihyon, ikakayat nen Satanas iray katilaan nipaakar ed si Jehova.  Ontan met, gagawaen na Diablo so anggaay nayarian to pian dakel a totoo so makalingwan ed ngaran na Dios. (Jer. 23:26, 27) Kanian naloloko laingen iray matuan totoo ya iisipen dan mandadayew irad Dios anta manaya et saray demonyo so dadayewen da. (1 Cor. 10:20; 2 Cor. 11:13-15) Ikakayat met nen Satanas iray katilaan to panamegley na komersyo. Singa bilang, lapud komersyo et nababangatan iray totoo ya isipen dan say sankaabigan ya paraan pian magmaliw ya maliket et say pakawalaan na dakel a kuarta tan kaykayarian. (Pro. 18:11) Saramay manisia ed sayan katilaan et uusaren day bilay da diad panlilingkor ed “Kayamanan” imbes ya diad Dios. (Mat. 6:24) Kanian say panangaro da ed saray materyal a bengatla so angekal ed panangaro dad Dios.​—Mat. 13:22; 1 Juan 2:15, 16.

8, 9. (a) Anton duaran leksion so naaralan tayo ed saramay agawad si Adan, Eva, tan saray rebelden anghel? (b) Antoy gunggona no amta tayoy kalaknab na impluensya nen Satanas?

⁸ Makaaral tayo na duaran importantin leksion ed saramay agawad si Adan, Eva, tan saray rebelden anghel. Unona, wala labat so duaran pampilian tayo, tan sakey labat so nepeg tayon pilien. Balanglan mansiansia tayon matoor ed si Jehova odino ondapag tayod si Satanas. (Mat. 7:13) Komadua, saramay ondadapag ed si Satanas et limitado labat so nagunggona ra. Akapangiletneg si Adan tan Eva na sarili dan estandarte ed no antoy maong tan mauges, tan inimpluensyaan na saray demonyo iray gobierno na too. (Gen. 3:22) Balet, naynay ya mauges so resulta na antokaman ya singa makagunggonan iyoopresi nen Satanas.​—Job 21:7-17; Gal. 6:7, 8.

⁹ Antoy gunggona no amta tayoy kalaknab na impluensya nen Satanas? Makatulong iya pian balanse so pangipasen tayo ed saray sekular ya autoridad tan napaseseg tayo ed panagpulong. Natatalosan tayon labay nen Jehova ya manpasakop tayod autoridad na gobierno. (1 Ped. 2:17) Tan iilaloan ton unoren tayo ray ganggan na gobierno basta ag-itan kontra ed saray estandarte to. (Roma 13:1-4) Balet tandaan a nepeg tayoy mansiansian neutral, ya agtayon balot papaboran so anggan anton partido na politika odino toon lider. (Juan 17:15, 16; 18:36) Lapud nanenengneng tayo no antoy labay ya gawaen nen Satanas ed ngaran na Dios tan ed reputasyon to, mas napapakiwas tayon ibangat ed arum so katuaan nipaakar ed Dios. Malikeliket tayon natawag ed ngaran na Dios tan usaren itan ta amta tayon mas makagunggona so pangaro ed sikato nen say pangaro ed kuarta odino saray bengatla.​—Isa. 43:10; 1 Tim. 6:6-10.

10-12. (a) Panon ya apatitan nen Satanas iray kapara ton anghel? (b) Anto ray naaralan tayo nen atukso so dakel ya anghel?

¹⁰ Manguusar si Satanas na epektibo iran  paraan pian impluensyaan iray totoo. Singa bilang, wala ray uusaren ton patit pian natukso to ran gawaen day panlabayan to. Ontan met, papagyawen to ra pian ontulok irad sikato.

¹¹ Imanoen no panon kaepektibo so inusar to pian napatitan so dakel ya kapara ton anghel. Seguradon inobserbaan to ni ran maong antis to ran tuksoen ya ondapag ed sikato. Nen nampatukso so pigarad sarayan anghel tan akirelasyon irad saray bibii, nanilalak ira na angkakabaleg a poli ya anguley ed totoo. (Gen. 6:1-4) Sanen tinukso nen Satanas irayan agmatoor ya anghel, nayarin aliwan say pankanawnawan pisekso labat so inusar to noagta insipan to met ya nawalaan ira na pakayarin nauleyan so totoo. Nayarin say gagala to et amperen so isabi na insipan ya ‘ilalak na bii.’ (Gen. 3:15) Antokaman so rason, ag-inabuloyan nen Jehova ya nagawa iratan ya plano diad impangiyakar to na Delap​—saya so angamper ed saray sagpot nen Satanas tan saray rebelden anghel diad saman a panaon.

¹² Anto ray naaralan tayo ed satan ya agawa? Agtayon balot melmelagen so patit ya imoralidad odino say pagmaliw ya mapaatagey. Saramay anghel ya dinmapag ed si Satanas et abaybayag lan manlilingkor ed mismon arapan na Dios. Balet, anggano diad satan ya kipapasen da, inabuloyan dan ontubo tan ombaleg so mauges a pilalek. Mipadpara, nayarin abayag tayo met lan manlilingkor ed kabiangan na organisasyon na Dios ed dalin. Balet anggan diad sayan malinis ya kipapasen ed espiritual, nayarin onlamot iray marutak a pilalek. (1 Cor. 10:12) Talagan importante sirin ya naynay tayon usisaen so puso tayo, ipulisay iray imoral ya panagnonot, tan paliisan so inkamapaatagey!​—Gal. 5:26; basaen so Colosas 3:5.

13. Anto ni sakey ya epektibon uusaren nen Satanas, tan panon tayon napaliisan itan?

¹³ Say sakey nin epektibon patit ya uusaren nen Satanas et say pagmaliw ya mausisa nipaakar ed okultismo. Natan et ipapaseseg toy pakawalaan na interes ed saray demonyo, aliwa labat ya diad panamegley na palson relihyon noagta diad panamegley met na saray panagligliwaan. Ipapanengneng ed saray pelikula, video games, pati diad media ya singa makapaliket so espiritismo. Antoy gawaen tayo pian agtayo napatitan? Agtayo nepeg ya ilaloan ya say organisasyon na Dios et mangiter na listaan no anto ray manepeg tan agmanepeg ya panagligliwaan. Kaukolan ya kada sakey ed sikatayo et ipasal toy sarili ton konsiensia ya mitunosan ed saray estandarte na Dios. (Heb. 5:14) Balet, magmaliw itayon marunong ed pampili no iyaplika tayo so pinuyanan a simbawa nen apostol Pablo ya nepeg a say panangaro tayo ed Dios et “andiay pansimpisimpitan.” (Roma 12:9) Nayari tayon tepetay sarili tayo: ‘Kasin say pipilien kon panagligliwaan et gagawaen to ak ya  mansimpisimpitan? No nanengneng na saray iyaaralan ko na Biblia odino saray papawilen ko so pipilien kon panagligliwaan, kasin isipen da ya gagawaen ko no antoy ipupulong ko?’ No diman tayo mas gagawaen no antoy ibabaga tayo, ag-itayo bastabasta napatitan nen Satanas.​—1 Juan 3:18.

14. Anto ray nayarin gawaen nen Satanas pian pasegsegangen itayo, tan panon tayon nasarag iratan?

¹⁴ Likud ed pamapatit nen Satanas, uusaren to met so panamasegsegang pian nikompromiso tayoy katooran tayod si Jehova. Singa bilang, usaren to ray gobierno pian isebel so kimey tayon panagpulong. Odino nayarin impluensyaan to ray katrabaho odino kaeskuela tayo pian balawen da itayo lapud itutumbok tayod estandarte na Biblia nipaakar ed moral. (1 Ped. 4:4) Nayarin impluensyaan to met iray mangiyaansakit ya kapamilya tayo pian dismayaen itayon miaral. (Mat. 10:36) Panon tayon nasarag iratan? Unona, nepeg labat ya ilaloan tayo iyan direktan panangataki​—milalaban si Satanas ed sikatayo. (Apo. 2:10; 12:17) Insan, kaukolan tayon nengnengen so talagan rason na saratan ya nagagawa—ibabaga nen Satanas ya manlilingkor tayo labat ed si Jehova no kombeniente itan ed sikatayo. Ibabaga to met ya no naiirapan tayo la, ibeneg tayo lanlamang so Dios. (Job 1:9-11; 2:4, 5) Tan kaukolan tayoy manmatalek ed si Jehova ya pabiskegen to tayo pian nasarag iratan ya subok. Tandaan, agto tayon balot paulyanan.​—Heb. 13:5.

15. Kasin napasoot itayo nen Satanas ya gawaen so agtayo labay? Ipaliwawa.

¹⁵ Agnapasoot nen Satanas iray totoo ya gawaen day agda labay. (Sant. 1:14) Ag-amta na dakel ya say gagawaen da manaya et panlabayan nen Satanas. Balet nen naaralan day katuaan, kaukolan ya pilien na sakey no siopa so nepeg ton panlingkoran. (Gawa 3:17; 17:30) No determinado tayon gawaen so linawa na Dios, anggapoy nagawaan nen Satanas pian deralen so integridad tayo.​—Job 2:3; 27:5.

16, 17. (a) Anto ray arum ya limitasyon nen Satanas tan saray demonyo? (b) Akin et agtayo nepeg ya ontakot ya ibalikas iray pikakasi tayod si Jehova?

¹⁶ Wala ni ray arum ya limitasyon nen Satanas tan saray demonyo. Singa bilang, anggapoy ibabaga na Biblia ya sarag dan basaen so walad nonot odino puso na sakey a too. Si Jehova tan si Jesus labat so walaan na ontan ya pakayari. (1 Sam. 16:7; Mar. 2:8) Panon to balet no mansalita odino ibalikas tayo ray pikakasi tayo? Kasin ontakot tayo ya ompan narengel na Diablo odino na saray demonyo iray pikakasi tayo tan onkontra ira? Andi. Akin ey? Agtayo natatakot ya manggaway maabig diad panlilingkor tayod si Jehova lapu labat ta ompan nanengneng itayo na Diablo. Mipadpara, nepeg ya agtayo ontakot ya ibalikas iray pikakasi tayo lapu labat ta ompan narengel itayo na Diablo. Diad tua, dakel so nabasa tayo ed Biblia ya alimbawa na saray lingkor na Dios ya imbalikas day pikakasi da, tan anggapoy pakapatnagan ya tinmakot ira ta ompan narengel ira na Diablo. (1 Ara. 8:22, 23; Juan 11:41, 42; Gawa 4:23, 24) No gawaen tayoy anggaay nayarian tayon mansalita tan onkiwas ya mitunosan ed gagala na Dios, makaseguro tayon ag-abuloyan nen Jehova so Diablo ya manggaway antokaman ya pankaugsan tayo.​—Basaen so Salmo 34:7.

¹⁷ Kaukolan tayon kabaten so kalaban tayo, balet agtayo nepeg ya ontakot ed sikato. Diad tulong nen Jehova, anggan saray aliwan perpekton totoo et sarag dan taloen si Satanas. (1 Juan 2:14) No sikatoy sumpaen tayo, ibatikan to tayo. (Sant. 4:7; 1 Ped. 5:9) Saray kabataan so nayarin labalabay nen Satanas ya biktimaen. Anto sirin iray espisipikon makatulong ed sikara pian nalabanan day Diablo? Naebatan itan diad ontumbok ya artikulo.