“Say Mabunlok a Too et Nabendisyonan”

I-PLAY

SAY panagbagat et abayag lan importantin kabiangan na dugan panagdayew. Saray Israelita et mangiyaapay na saray bagat ya ayayep, tan saray Kristiano et dati lan kabkabat ya mangiiter na saray “bagat a panangidayew.” Balet wala ni ray arum ya bagat ya makapaliket ed Dios. (Heb. 13:15, 16) Sarayan bagat et manresulta ed liket tan bendisyon, a singa nanengneng ed sarayan alimbawa.

Si Hana, ya matoor a lingkor nensaman, et labalabay toy nawalaan na anak a laki balet ta agmakaanak. Diad pikakasi to, insipan tod si Jehova ya no nawalaan na anak a laki, ‘sikatoy iter tod si Jehova diad amin ya agew na bilay to.’ (1 Sam. 1:10, 11) Asabi panaon, nanlukon si Hana, tan angiyanak na sakey a laki ya nginaranan toy Samuel. Nen apakso lay Samuel, inawit nen Hana diad tabernakulo unong ya insipan to. Benendisyonan nen Jehova si Hana lapud impansakripisyo to. Sikatoy awalaan ni na limaran ananak, tan si Samuel et nagmaliw ya propeta tan managsulat na Biblia.—1 Sam. 2:21.

Singa si Hana tan Samuel, saray Kristiano natan et walaan na pribilehyon idedika tan usaren so bilay da diad panlingkor ed Amalsa. Insipan nen Jesus ya antokaman so isakripisyo tayo parad panagdayew ed si Jehova et nasalatan na dakel a bendisyon.—Mar. 10:28-30.

Nen inmunan siglo, walay Kristianon bii ya manngaran na Dorcas a kabkabat lapud saray “agawaan ton kaabigan tan inter ton regalo lapud panangasi”—saray sakripisyo to pian tulongan so arum. Balet ta “nansakit si Dorcas tan inatey,” kanian maer-ermen so kongregasyon. Nen naamtaan na saray disipulo ya wadman ed syudad da si Pedro, akikasi ra ed sikato ya onlan tampol ed sikara. Isip mo pay liket da nen sinmabi si Pedro tan pinaoli toy Dorcas—say sankaunaan a nirekord ya impamaoli na sakey ya apostol! (Gawa 9:36-41) Ag-alingwanan na Dios iray sakripisyo nen Dorcas. (Heb. 6:10) Say inkamabunlok to et nisulat ed Salitay Dios bilang maong ya alimbawan aligen tayo.

Si apostol Pablo et maabig met ya alimbawa lapud mabunlok ton inter so panaon tan atension tod arum. Nen sinulatan to ray kapara ton Kristiano ed Corinto, oniay inkuan to: “Malikeliket ak a mangusar ed amin a walad siak tan sigpot ak a pausar parad sikayo.” (2 Cor. 12:15) Naaralan nen Pablo ed saray eksperiensya to ya say pangisakripisyoy sarili parad arum et aglabat makapaliket noagta—mas importante—manresulta ed pakaawat na bendisyon tan pabor nen Jehova.—Gawa 20:24, 35.

Kanian, naliliketan si Jehova no uusaren tayoy panaon tan biskeg tayo pian suportaan iray kimey ed Panarian tan tulongan iray kapananisiaan. Balet wala ta ni arum ya paraan pian nasuportaan tayoy kimey a panagpulong na Panarian? On! Likud ed saray kimey ya gagawaen tayo lapud aro, napagalangan tayoy Dios panamegley na boluntaryon kontribusyon tayo. Uusaren iratan pian nasuportaan so kimey a panagpulong diad interon mundo, kaiba lay pansuporta ed saray misionero tan arum nin walad special full-time. Uusaren met iratan diad pangitatarya tan pangipapatalos na saray literatura tan video, diad pangiiter na tulong no wala ray kalamidad, tan diad pangipapaalagey na saray balon Kingdom Hall. Makaseguro tayo ya “say mabunlok a too et nabendisyonan.” Sakey ni, napagalangan tayoy Jehova no iiter tayo ed sikato iray mabmablin kaykayarian tayo.—Pro. 3:9; 22:9.

No Panon A Mangiiter Na Kontribusyon So Arum Parad Sankamundoan A Kimey

Singa ed panaon nen apostol Pablo, dakel natan so ‘mangibibiig,’ odino mangibabadyet na kuarta, tan ipepelag da itan ed contribution box ya amarkaan na “Worldwide Work.” (1 Cor. 16:2) Binulan ya ipapawit na kada kongregasyon so atugyop ya kontribusyon diad branch office a makansakop ed bansan kawalaan da. Sarag yo met ya direktan ipawit so donasyon yo diad korporasyon ya uusaren na Saray Tasi nen Jehova diad lugar yo. Pian naamtaan no antoy manunan korporasyon ya uusaren na Saray Tasi nen Jehova ed bansa yo, ipangasin kontaken so branch office ya makansakop ed bansan kawalaan yo. Saray address na branch office et naromog ed www.pr418.com/pag. Niraya so klase na donasyon a sarag yon ipawit:

DIREKTAN PANDONASYON

Donasyon panamegley na electronic bank transfer, debit card, odino credit card. Diad pigaran branch, posible met iya panamegley na jw.org odino arum nin apilin website.
Pandonasyon na kuarta, alahas, odino arum nin mablin kayarian. Mangilaktip na sulat a mangibabagan say kuarta odino kayarian et idodonasyon yo.

DONASYON A WALAAY KONDISYON

Pandonasyon na kuarta a say kondisyon et ipawil itan ed samay angidonasyon no kaukolan to la.
Mangilaktip na sulat a mangibabagan say donasyon et walaan na kondisyon.

CHARITABLE PLANNING

Likud ed pangidonasyon na kuarta tan mabli iran kayarian, wala ni arum a paraan na panagdonasyon a makatulong ed kimey na Panarian ed interon mundo. Nabasa iratan ed onsublay iran parapo. Antokaman so paraan a labay yon usaren, ipangasin ontawag nin unona ed branch office ya makansakop ed lugar yo pian naamtaan no anto ran paraan na panagdonasyon so nayari ed bansa yo. Lapud nanduruma iray legal a totontonen tan ganggan ed panagbuis, importantin onkonsulta ed kualipikadon tax tan legal adviser antis a manpili na sankaabigan a paraan na pandonasyon.

Insurance tan Retirement Plan: Sarag yon gawaen ya beneficiary na life insurance policy, retirement account, odino retirement/pension plan so korporasyon ya uusaren na Saray Tasi nen Jehova.

Saray Bank Account: Saray bank account et nayarin imatalek odino iter ed korporasyon ya uusaren na Saray Tasi nen Jehova depende ed requirement na bangko tan no naandi lad bilay imay nandonasyon.

Saray Stock tan Bond: Sarag iyan idonasyon ed korporasyon ya uusaren na Saray Tasi nen Jehova bilang regalo odino manggaway kasulatan ya iyalis la itan ed ngaran na korporasyon no say sakey et naandi lad bilay.

Lote tan Abung: Say lote tan abung a nayarin ilako et sarag ya idonasyon ed korporasyon ya uusaren na Saray Tasi nen Jehova bilang regalo. No residential itan, nayarin manggaway kasulatan imay angidonasyon ya manayam ditan anggad mabilay ni.

Saray Testamento tan Trust Fund: Saray kayarian odino kuarta so nayarin ipatawir ed korporasyon na Saray Tasi nen Jehova panamegley na legal a testamento, odino satan ya korporasyon so gawaen ya beneficiary na trust agreement. Diad sayan pandonasyon, nayarin nabawasan iray babayaran a buis.

Nanengneng ed terminon “charitable planning” a kaukolan ya manplanon maong so mandonasyon no dinan ed saraya so pilien to. Pian natulongan iray malabay a mandonasyon ed sankamundoan a kimey na Saray Tasi nen Jehova panamegley na charitable planning, walay brosyur diad English tan Spanish ya Charitable Planning to Benefit Kingdom Service Worldwide. Sayan brosyur et im-publish pian mangiter na impormasyon ed nanduruman paraan na panagdonasyon, ya iter la natan odino ipatawir sano naandi lad bilay imay akanggawa. Saray impormasyon ya nabasad sayan brosyur et nayarin ag-onaplikad amin ya situasyon lapud ganggan ed panagbuis odino arum nin ganggan ed bansa yo. Panamegley na sarayan paraan na panagdonasyon, dakel so makakasuportad sankamundoan a kimey tayo tan ed itutulong tayod saray mankaukolan. Makakala met iray diskuento ed babayaran dan buis. No wala iyan brosyur ed bansa yo, sarag yoy onkerew na kopya ed sekretaryo na kongregasyon yo.

Parad kaaruman ya impormasyon, onlad link ya “Mandonasyon Parad Sankamundoan a Kimey Mi” diad leksab na home page na jw.org, odino kontaken so branch office.

Ompan Nagustoan Mo Met

Tutorial ed Pandonasyon

Nengnengen no anto iray opsyon tan paraan pian makapandonasyon.

SAY PANAG-BANTAYAN—PANARALAN YA EDISYON