1, 2. (a) Antoy pidumaan na balibalin ilalo na saray tuan Kristiano ed iilaloan na totoo ed mundo nen Satanas? (b) Anto ran importantin tepet so aralen tayo?

BALIBALI so ilalo na saray tuan Kristiano! Amin tayo, balanglan alanaan o kabiangan na ‘arum a karnero,’ et iilaloan tayon nanengneng so pakasumpal na gagala nen Jehova tan say pamasanto ed ngaran to. (Juan 10:16; Mat. 6:9, 10) Saratan ya ilalo et sankaimportantian ed sikatayon amin. Tatalaranan tayo met so regalon bilay ya anggapoy anggaan balanglan kabiangan itayo na “balon tawen” odino “balon dalin.” (2 Ped. 3:13) Legan tayon aalagaren itan, iilaloan tayon tuloytuloy ya onaligwas so espiritualidad na amin ya manlilingkor ed Dios.

² Saramay kabiangan na mundo nen Satanas et wala met iray iilaloan da, balet ta ag-ira segurado no talaga kasin nagawa iratan. Singa bilang, iilaloan na minilyon ya sugarol ya manalo rad lotto, balet ag-ira segurado ya nagawa itan. Tandaan tayo ya say tuan pananisia et “mabiskeg a panagmatalek a seguradon nagawa imay iilaloan” tayo. (Heb. 11:1) Pero nayarin isipen mo, panon kon napabiskeg so pananisiak ed saray iilaloan ko? Tan anto ray bendisyon no mabiskeg so pananisiak ed saray iilaloan ko?

3. Akin ya walay pananisia na saray tuan Kristiano?

 ³ Say pananisia et agnisipor ed makasalanan ya totoo, agmet itan automatikon niwala ed sakey. Say pananisia na saray Kristiano et resulta na ikikiwas na masanton espiritu na Dios ed puso na mangawat ed satan. (Gal. 5:22) Ag-ibabaga na Biblia ya walay pananisia nen Jehova odino kaukolan to itan. Lapud makapanyarin-amin tan sankarunongan si Jehova, anggapoy makapatundad panggawa tod gagala to. Talagan segurado so Ama tayod tawen ya nagawa iray impromisa ton bendisyon, tan parad sikato et asumpal la iratan. Kanian, nibaga to: “Agawa la iraya!” (Basaen so Apocalipsis 21:3-6.) Walay pananisia na saray tuan Kristiano lapud amta ran si Jehova et “matoor a Dios,” naynay ton gagawaen iray impromisa to.—Deu. 7:9.

4. Antoy ilalo na saray matoor ya lalaki tan bibii antis ya inyanak si Jesu-Kristo?

⁴ Diad kapitulo 11 na Hebreo et nabasa so kangaranan na 16 ya lalaki tan bibii ya mabiskeg so pananisia ra. Imbaga na pinuyanan a nansulat ya sikara tan say arum ni et “akaawat . . . na maabig a pantasi lapud pananisia ra.” (Heb. 11:39) Amin da et walaan na “mabiskeg a panagmatalek” ya seguradon itarya nen Jehova so impromisa ton “ilalak” ya mangekal ed epekto na impanrebelde nen Satanas tan manumpal ed gagala nen Jehova. (Gen. 3:15) Saraman ya matoor et inatey antis ya inyanak so impromisan “ilalak,” si Jesu-Kristo, say angilukas ed bilay diad tawen. (Gal. 3:16) Anggaman ontan, lapud seguradon sumpalen nen Jehova so impromisa to, sikaray napaoli tan magmaliw ya perpekto diad paraison dalin.—Sal. 37:11; Isa. 26:19; Os. 13:14.

5, 6. Antoy angipokusan nen Abraham tan say pamilya to na ilalo ra, tan panon dan apansiansian mabiskeg so pananisia ra? (Nengnengen so litratod gapo na artikulo.)

⁵ Oniay ibabaga na Hebreo 11:13 nipaakar ed saray matoor ya lingkor na Dios nensaman: “Amin iraya et inaatey a walaan na pananisia, anggano agda naawat so kasumpalan na saray sipan; balet anengneng da iratan manlapud arawi tan nampirpirawatan da.” Sakey ed sikara si Abraham. Kasin malinew ed isip to so iilaloan ton maliket ya bilay diad uley na impromisan “ilalak”? Malinew so ebat nen Jesus ed satan ya tepet nen imbaga tod saray onkokontra: “Nanliketan a maong na ama yon si Abraham so ilalon makanengneng ed agew ko, tan anengneng to itan tan nanliket.” (Juan 8:56) Ontan met so alikna nen Sara, Isaac, Jacob tan dakel ni ra. Impokus day ilalo rad Panarian, “a say nandesinyo tan nampaalagey et say Dios.”—Heb. 11:8-11.

⁶ Panon ya apansiansia nen Abraham tan say pamilya to ya mabiskeg so pananisia ra? Nayarin naaralan day nipaakar ed Dios ed saray maedad lan lingkor nensaman odino diad saray daan ya sulsulat. Posible met ya akitongtong so Dios ed sikara panamegley na anghel, pasingawey, odino kugip. Balet say mas importante, agda nilingwanay naaralan da noagta pinabli da ray impromisa tan kakaukolanen na Dios tan dinalepdep da iratan. Lapud segurado rad iilaloan da, nanmatoor irad Dios anggano wala ray irap tan subok.

7. Anto ray maaron inter nen Jehova pian ombiskeg so pananisia tayo, tan antoy nepeg tayon gawaen ed saratan ya bendisyon?

⁷ Pian mansiansian mabiskeg so pananisia tayo, maaron inter nen Jehova so kompleton Salita to, say Biblia. Pian magmaliw ya “maliket” tan “onaligwas” tayo, kaukolan ya regular tayon basaen so Salitay Dios, inagew-agew no posible. (Sal. 1:1-3; basaen so  Gawa 17:11.) Tan singa saray lingkor nen Jehova nensaman, nepeg tayon dalepdepen iray promisa na Dios tan unoren iray kakaukolanen to. Bebendisyonan itayo met nen Jehova na dakel ya espiritual a naakan panamegley na “matoor tan makabat ya aripen.” (Mat. 24:45) Kanian no pablien tayo iray espiritual ya probisyon nen Jehova, naalig tayoy pananisia na saray matoor nensaman ya walaay “mabiskeg a panagmatalek” ya seguradon onsabi so Panarian.

8. Panon ya napabiskeg na pikakasi so pananisia tayo?

⁸ Baleg met so nitulong na pikakasi kanian nansiansian mabiskeg so pananisia na saray lingkor na Dios nensaman. Binmiskeg so pananisia ra nen inebatan na Dios iray pikakasi da. (Neh. 1:4, 11; Sal. 34:4, 15, 17; Dan. 9:19-21) Sarag tayo met ya ipikasi ed si Jehova so amin ya kapagaan tayo, ta amta tayon dengelen tan pabiskegen to itayo pian makapanlingkor tayon maliket. Tan no naebatan iray pikakasi tayo, mas ombiskeg so pananisia tayo. (Basaen so 1 Juan 5:14, 15.) Lapud say pananisia et sakey ya aspekto na bunga na espiritu, kaukolan ya ‘tuloytuloy tayon kerewen’ so espiritu na Dios, a singa impaseseg nen Jesus ed sikatayo.—Luc. 11:9, 13.

9. Likud ed pangipikasid sarili tayo, anto tan siopa ni ray nepeg tayon ipikasi?

⁹ Balet aliwa labat ya sarili tayo so ipikasi tayo. “Agaylay karakel” na “saray makapakelaw a kimey” nen Jehova kanian sikatoy nepeg tayon pisalamatan tan inagew-agew ya idayew! (Sal. 40:5) Sakey ni, kaukolan tayo met ya ipikasi tan ‘nodnonoten iramay walad prisoan a singano kaiba da tayon apriso.’ Tan ipikasi tayo met iray agagi tayod interon mundo, lalo lad saramay “mangidadaulo diad limog [tayo].” Malikeliket tayo no nanenengneng tayon eebatan nen Jehova iray nankakasakey ya pikakasi tayo!—Heb. 13:3, 7.

10. Siopa ray lingkor na Dios ya ag-akikompromiso, tan antoy amabiskeg ed sikara?

¹⁰ Diad Hebreo kapitulo 11, sinansakey nen apostol Pablo iray subok ya dinadalan na dakel ya lingkor na Dios ya ag-abitlay ngaran da. Singa bilang, binitla nen Pablo iray bibiin mabiskeg so pananisia ra ya inateyan na ananak balet apaoli lanlamang. Insan sinalambit toy arum ya “agda nilabay so nibulos diad panamegley na pikompromiso, pian nagamoran day mas maabig a kioli.” (Heb. 11:35) Anggano agtayo segurado no siopay tutukoyen nen Pablo, saray arum, singa si Nabot tan Zacarias et tinupak anggad inatey lapud inunor day Dios tan ginawa day panlabayan to. (1 Ara. 21:3, 15; 2 Awa. 24:20, 21) Walay pankanawnawa nen Daniel tan saray kaiba to ya “nibulos” no mikompromiso ra. Balet lapud pananisia dad pakayari na Dios, singa da ‘pinepet so sangi na saray leon’ tan “anggapoy epekto ed sikara na pakayari apoy.”—Heb. 11:33, 34; Dan. 3:16-18, 20, 28; 6:13, 16, 21-23.

11. Anto ran subok so inanosan na arum ya propeta lapud pananisia ra?

¹¹ Lapud pananisia na saray propetan singa si Micaias tan Jeremias, asali day “panagludlurey . . . tan impakapriso.” Saray arum, singa si Elias et “nanamot-amot . . . diad desierto tan kapalandeyan tan saray ungib tan saray abot ed dalin.” Amin da et nan-anos lapud walay “mabiskeg a panagmatalek [da] a seguradon nagawa imay iilaloan” da.—Heb. 11:1, 36-38; 1 Ara. 18:13; 22:24-27; Jer. 20:1, 2; 28:10, 11; 32:2.

12. Siopay sankaabigan ya alimbawa na impan-anos ed saray subok, tan antoy akatulong ed sikaton nagawaan itan?

¹² Kayarin sinalambit nen Pablo iray lalaki tan bibii ya mabiskeg so pananisia ra, indanet toy sankaabigan ya alimbawa—say Katawan ya Jesu-Kristo. Ibabaga na Hebreo 12:2:  “Lapud liket a niiyan diad arapan to, sikatoy nansungdo ed panamairapan a poste, imbaliwala to so kababaingan, tan yinmurong ed nikawanan na trono na Dios.” Kanian kaukolan tayon ‘nonoten ya maong’ so pananisia nen Jesus no nipaarap tayod sankairapan iran subok. (Basaen so Hebreo 12:3.) Singa si Jesus, wala ray Kristianon martir, a singa say disipulon si Antipas ya ag-akikompromiso. (Apo. 2:13) Say bendisyon da et kioli ed bilay diad tawen, ya “mas maabig a kioli” nen samay inilaloan na saray matoor ya lingkor antis ya inyanak si Jesus. (Heb. 11:35) Ag-abayag, sanen ginmapon nanuley so Panarian nen 1914, amin iratan ya matoor ya alanaan ya inatey et pinaoli ed tawen bilang espiritu pian nakaiba nen Jesus ya manuley.—Apo. 20:4.

13, 14. Anto ray subok ed si Rudolf Graichen, tan antoy akatulong ed sikaton man-anos?

¹³ Aaligen na minilyon ya manlilingkor ed Dios natan so alimbawa nen Jesus. Akapokus irad ilalo da tan agda aabuloyan ya lapud subok et onkapuy so pananisia ra. Imanoey alimbawa nen Rudolf Graichen, ya inyanak ed Germany nen 1925. Nanonotan to iramay base ed Biblia a drowing ya akasabit ed dingding na abung da. Imbaga to: “Diad sakey ya drowing et walay lobo tan  kordero, melag nin kanding tan leopardo, kilaw a baka tan leon—saniiba ra tan melag ya ugaw so mangaasikaso ed sikara. . . . Agko nalingwanan iraman.” (Isa. 11:6-9) Anggano pigay taon ya pinairap tan pinasegsegang na Nazi Gestapo, insan ag-abayag et say Communist Stasi na East Germany, nansiansian mabiskeg so pananisia ton manbilay diad paraison dalin.

¹⁴ Say arum nin graben subok ed si Rudolf et say impatey na inad-aro ton ina lapud typhus diad panamairapan ya kampo ed Ravensbrück, tan say inkapuy na pananisia na ama to ya anggad nampirma na dokumento ya ibeneg to lay pagmaliw ya Tasi nen Jehova. Kapaway nen Rudolf ed prisoan, nanlingkor ya manangasikaso na sirkito tan naimbitaan ya manaral ed Gilead. Sikatoy niyasain ya misionero ed Chile tan nanlingkor lamet ya manangasikaso na sirkito. Pero agni anampot iray subok ed si Rudolf. Sakey taon kayari na impankasal da nen Patsy, ya misionero met, inatey so anak da. Ag-abayag, inatey met so inad-aro ton asawa ya 43 to ni labat. Naanosan nen Rudolf iratan ya subok, tan anggano maedad la tan masakit, manlilingkor ni ya regular payunir tan elder nen nisulat so istoryay bilay to ed Agosto 1, 1997, ya Say Panag-bantayan, pahina 20-25. ^[1]

15. Siopa ray Tasi nen Jehova ya maabig so alimbawa ra tan maliket dan aanosay panamasegsegang?

¹⁵ Anggano grabe so panamairap tan panamasegsegang ed saray Tasi nen Jehova, siansian malikeliket ira lapud ilalo ra. Singa bilang, dakel so agagi tayon akapriso ed Eritrea, Singapore, tan South Korea lapud uunoren day imbaga nen Jesus ya ag-ira nepeg ya mangusar na espada. (Mat. 26:52) Kaiba ed sarayan nilasus ya akapriso si Isaac, Negede, tan Paulos, ya masulok lan 20 taon ya akapriso ed kampo diad Eritrea! Ag-ira inabuloyan ya mangasikasod saray maedad lan atateng da tan mangasawa, pero nansiansia ran matoor anggano pinairap ira. Nanengneng tayod jw.org website ya positibo ira, pakapatnagan itan ya nansiansian mabiskeg so pananisia ra. Anggan saray guardia ed prisoan et rerespetoen da ra.

16. Panon kan naprotektaan na mabiskeg ya pananisia?

¹⁶ Agnasasali na karaklan ya lingkor nen Jehova so graben panamasegsegang. Duma so pakakasubokan na pananisia ra. Dakel so kaukolan ya man-anos lapud irap na bilay odino biktima ira na guerra o kalamidad. Saray arum et singa si Moises tan saray matoor ya lalaki nensaman ya tinaynan day mainawan bilay odino inkaprominente. Nansagpotan dan arawian so materyalistiko o makasarilin kabibilay. Antoy akatulong ed sikara? Say panangaro rad si Jehova tan say mabiskeg ya pananisia rad promisa to ya ekalen to so amin ya ag-inkahustisya. Kombinsido met ira ya bendisyonan to ray matoor ya lingkor to na bilay ya anggapoy anggaan diad balon mundo.—Basaen so Salmo 37:5, 7, 9, 29.

17. Antoy determinasyon mo, tan antoy aralen tayod onsublay ya artikulo?

¹⁷ Diad sayan artikulo, naaralan tayo ya baleg so nitulong na panagdalepdep ed saray promisa na Dios tan regular ya panagpikasi pian mansiansian mabiskeg so pananisia tayo. Diad ontan et naanosan tayo ray subok legan tayon manpopokus ed ilalo tayo a walaan na “mabiskeg a panagmatalek.” Balet aliwan satan labat so ibabaga na Biblia ya kabaliksan na pananisia, tan satan so aralen tayod onsublay ya artikulo.