DIAD sakey a melag a baley ed Gujarat, India, say tatay nen John et abautismoan bilang Tasi nen Jehova nen bandad sampot na dekada 1950. Si John, say limaran agagi ton lalaki tan bibii, tan say nanay da et saradon Romano Katoliko, kanian kontra rad pananisia na tatay da.

Sakey ya agew, si John et ingganggan na tatay to ya mangitulor na sobre ed sakey ya agi ed kongregasyon. Balet diad saman ya kabuasan, asugat nen John so gamet to legan ton aabrian so sakey a baleg ya lata. Pero lapud maunor ed tatay to, binerber to na abel so ondadala ya gamet to insan la linma pian itulor so sobre.

Kasabi nen John ed abung na samay agi, say akaawat na sobre et say asawan bii, ya sakey met ed saray Tasi nen Jehova. Naimano to ya asugat so gamet nen John tan inyopresi to ya tulongan to. Inala toy first aid kit to, nilinisan toy sugat, tan binendaan toy gamet nen John. Insan to intimplaan na ampetang ya tsa, tan legan na satan et makaaron mitotongtong ed si John nipaakar ed Biblia.

Lapud satan, kalkalnan anguman so panmoria nen John ed saray Tasi, kanian walay duaran intepet to nipaakar ed papanisiaan nen tatay to ya duma ed papanisiaan to​—no kasin Dios si Jesus tan no kasin nayarin manpikasi ed si Maria iray Kristiano. Lapud inaral na sister so lenguahe nen John ya Gujarati, inebatan to iratan panamegley na Biblia tan inikdan to na bokletan “Sayan Maong a Balita na Panarian.”

Nen babasaen la nen John imay bokleta, first time ya alikna ton say babasaen to et katuaan. Linmad pari ed simbaan da tan intepet toy parehon tepet. Nampasnok a tampol imay pari tan intupak toy Biblia ed si John, tan inyeyag to: “Satanas ka la! Iturom ed siak no iner nabasad Biblia ya aliwan Dios si Jesus. Iner nabasa ditan ya agnayari mandayew ed si Maria. Iturom!” Abiglan maong si John ed reaksion na pari kanian imbaga to, “Agak lan balot onlad simbaan na Katoliko.” Tan aglan balot linma!

Si John et ginmapon nanaral na Biblia ed saray Tasi, inawat toy dugan panagdayew, tan nanlingkor ed si Jehova. Asabi panaon, ontan met so ginawa na pigaran kapamilya to. Natan, wala ni piglat nen John ed kawanan ya tamuro to ya asugat manga 60 taon lay apalabas. Agto nalingwanan iman ya sakey a gawa na Kristianon kaabigan ya anagyat ed sikato ed dugan panagdayew.​—2 Cor. 6:4, 6.