1, 2. (a) Panon tayon naseguro ya sarag na saray totoo so magmaliw a kaaro na Dios? (b) Antoy aralen tayo ed sayan artikulo?

MANLAPUD inkianak anggad ipatey tayo, kakkaukolan tayo so panangaro. Kaukolan tan pipirawaten na totoo so aro​—balet aliwa labat ya romantikon panangaro. Labalabay tayoy mikaaro tan nawalaay maapit ya relasyon ed arum. Balet walay klase na panangaro ya mas kakkaukolan tayo​—say panangaro nen Jehova. Iisipen na arum ya imposible so makapikaaro ed agnanengneng a Makapanyarin-amin a Dios ya walad tawen. Ontan met kasi iisipen tayo? Andi!

² Ipapanengneng na Biblia ya wala ray agperpekton totoo ya akapikaaro ed Dios. Balibalin aligen iray alimbawa ra, lapud say ontan ya pikakaaro et talagan makagunggonan kalat ya sarag tayon gawaen ed bilay tayo. Say sankaabigan ya alimbawa ya awalaan na ontan ya pikakaaro et si Abraham. (Basaen so Santiago 2:23.) Panon ya nagmaliw a malet ya sankaaro si Abraham tan si Jehova? Say sankaimportantian ed satan ya pikakaaro et pananisia. Diad  tua, tinawag na Biblia si Abraham ya “ama na amin a walaan na pananisia.” (Roma 4:11) Aralen tayo no panon ya akatulong so pananisia nen Abraham pian magmaliw ya malet a kaaro na Dios. Tan sarag tayon tepetay sarili tayo, ‘Panon kon aligen so pananisia nen Abraham pian napaelet koy pikakaarok ed si Jehova?’

3, 4. (a) Ipaliwawa no anto so nayarin sankairapan a subok ed pananisia nen Abraham. (b) Akin et mabulos si Abraham ya ibagat si Isaac?

³ Isipen pa so sakey a masiken ya ontatatdang ed palandey. Saman lay sankairapan ya impanakar to ed interon bilay to. Aliwan say edad to so problema. Si Abraham iman tan manga 125 años to la, balet mabiskeg ni. ^[1] Manumtumbok ed sikato so anak ton si Isaac ya nayarin manedad na 25, tan sankasakbat toy kiew ya popoolan. Walay awit nen Abraham ya kutsilyo tan pampadangat na apoy. Sikatoy ingganggan nen Jehova ya ibagat so mismon anak to!​—Gen. 22:1-8.

⁴ Nayarin saya so sankairapan a subok ed pananisia nen Abraham. Wala ray mangibabagan maruksa so Dios lapud satan ya ingganggan tod si Abraham. Tan wala ray mangibabagan basta labat la tinmulok si Abraham ya imbaliwala toy liknaan to. Ontan so ibabaga ra ta anggapoy pananisia ra tan agda natatalosan no antoy nagawaan na pananisia. (1 Cor. 2:14-16) Si Abraham et aliwan singa bulag ya basta labat unor-unor ed Dios. Lapud sikatoy walaan na mata na tuan pananisia, anengneng to ya agbalot pagawa nen Jehova ed saray matoor ya lingkor To so anggan anto ya pankaugsan da. Amta nen Abraham ya no unoren toy Jehova a Dios to, sikato tan say inad-aro ton anak et nabendisyonan. Panon ya awalaan na ontan ya pananisia? Niwala itan lapud kakabatan tan eksperiensya to.

5. Panon so nayarin impakapikabat nen Abraham ed si Jehova, tan antoy alikna to ed Dios lapud satan ya kakabatan?

⁵ Kakabatan. Naamtaan nen Abraham so nipaakar ed si Jehova anggaman sikatoy binmaleg ed Ur, sakey a syudad na saray Caldeo ya dakdakel so mandadayew ed saray idolo. Panon to balet ya akabat si Jehova anta managdayew ed idolo so mismon ama to ya si Tera? (Jos. 24:2) Anggapoy espisipikon ibabaga na Biblia balet naamtaan tayo ed satan ya si Abraham et walad komasiam ya henerasyon manlapud si Sem, sakey ed saray ilalak nen Noe ya mabiskeg so pananisia to. Nambilay si Sem anggad nen manga 150 años lay Abraham. Agtayo segurado ompan naaralan nen Abraham ed si Sem so nipaakar ed si Jehova. Balet, singa duga labat ya isipen ya impasa nen Sem ed pamilya to so kakabatan to nipaakar ed si Jehova. Anggan panon et akasabi ed si Abraham itan ya kakabatan tan apakiwas so puso to. Naaralan ton aroen so Dios ya akabat to, tan satan ya kakabatan so tinmulong ed sikaton nawalaay pananisia.

6, 7. Panon ya binmiskeg so pananisia nen Abraham lapud saray naeksperiensya to?

⁶ Eksperiensya. Antoy naeksperiensya nen Abraham ya amabiskeg na pananisia tod si Jehova? Walay panangibaga ya no antoy nononoten mo et satan so naliknam, tan no antoy naliliknam et satan so gawaen mo. Lapud naaralan nen Abraham so nipaakar ed Dios, nandinayew tan nirespeto ton maong si “Jehova, Dios a Sankatageyan, a makankien na tawen tan say dalin.” (Gen. 14:22) Tinawag na Biblia itan a liknaan ya ‘takot ed Dios,’ tan importante itan pian onelet so pikakaaro ed Dios. (Heb. 5:7; Sal. 25:14) Say ontan ya takot ed Dios so tinmulong ed si Abraham pian onkiwas.

⁷ Ingganggan na Dios so matatken lan si Abraham tan Sara ya taynan day Ur tan onalis irad sananey a pasen. Diad interon bilay da et manayam la rad saray tolda. Lapud  inmunor si Abraham, walay rason nen Jehova pian sikatoy bendisyonan tan protektaan To. Singa bilang, natatakot si Abraham ompan pateyen da tan alaen dad sikatoy magangganan asawa to ya si Sara. Posiblin nagawa itan, balet agto inabuloyan itan ya kapagaan to ya mangamper ed pangunor tod si Jehova. Kanian aminpigan prinotektaan nen Jehova si Abraham tan Sara, ginawa to ni ingen itan diad mamilagron paraan. (Gen. 12:10-20; 20:2-7, 10-12, 17, 18) Saratan ya eksperiensya so amabiskeg ed pananisia nen Abraham.

8. Panon itayon nawalaay kakabatan tan eksperiensya ya mamaelet ed pikakaaro tayod si Jehova?

⁸ Sarag tayo kasi so makapikaaro ed si Jehova? On, siempre! Nitarya la ray kakabatan tan eksperiensya ya kaukolan tayo. Daiset labat so amta nen Abraham ed saray dakdakel a karunongan ya wala natan ed Biblia. (Dan. 12:4; Roma 11:33) Say Salita na Dios et napno na kayamanan ya mamaaralem na kakabatan tayo nipaakar ed “makankien na tawen tan say dalin,” tan ontulong itan pian sikatoy respetoen tan aroen tayo. Legan ya napapakiwas itayon mangunor ed Dios lapud saratan a liknaan, nawalaan tayoy eksperiensya lapud nanenengneng tayo so maabig a resulta na pangunor ed sikato. Naprotektaan itayo no unoren tayo ray simbawa to, tan bendisyonan tan pabiskegen to itayo. Naaralan tayo ya no manlingkor tayod Dios diad interon puso tayo, nalikna tayoy inkapnek, kareenan, tan gayaga. (Sal. 34:8; Uli. 10:22) No naaaruman so kakabatan tan eksperiensya tayo, ombibiskeg met so pananisia tayod si Jehova tan oneelet so pikakaaro tayod sikato.

9, 10. (a) Antoy kaukolan pian onelet so pikakaaro? (b) Antoy mangipanengneng ya pinabli tan pinaelet nen Abraham so pikakaaro tod si Jehova?

⁹ Say pikakaaro et mabmablin kayamanan. (Basaen so Uliran 17:17.) Balet, say pikakaaro et aliwan singa sakey ya bengatla ya nasaliw, insan tayo iyatol tan narabokan labat. Singa itan tanaman a kaukolan ya asikasoen tan salogen pian ombaleg tan ombuna. Pinabpabli tan pinansiansia nen Abraham so pikakaaro tod si Jehova. Panon ton ginawa itan?

¹⁰ Agbalot inisip nen Abraham ya magenap la ray apalabas ya agawaan to ya pakapatnagay takot tan katutulok tod Dios. Legan ton manbiabiahe a kaibay baleg ya sankaabungan to ya paonlad Canaan, sikatoy tuloytuloy ya nampaigiya ed si Jehova diad saray desisyon ya gawaen to, melag man odino baleg. Nen 99 años nen Abraham, sakey taon antis ya nianak si Isaac, ingganggan nen Jehova ya segaten so amin ya lalaki ed sankaabungan nen Abraham. Kasin kinuestion nen Abraham itan a ganggan odino nambaraan pian agto itan naunor? Andi, nanmatalek tan inunor toy Dios “ed saman lanlamang ya agew.”​—Gen. 17:10-14, 23.

11. Akin ya mapaga si Abraham nipaakar ed Sodoma tan Gomorra, tan panon ya tinulongan nen Jehova?

 ¹¹ Lapud impasal to lan unoren si Jehova anggano diad saray singa ag-importantin bengatla, apansiansia nen Abraham ya mabiskeg tan malmalet so pikakaaro tod Dios. Sarasarag ton ibaga ed si Jehova iray walad puso to tan kinmerew na tulong pian naebatan iray mairap ya tepet. Alimbawa, nen naamtaan ton deralen na Dios iray syudad na Sodoma tan Gomorra, apagaan si Abraham ompan naderal met iray matunong a kaiba na mauges. Nayarin mapaga si Abraham ed kaanakan ton si Lot tan say pamilya to ya diad saman et manaayam ed Sodoma. Mapaabeban nantepet tan nanmatalek si Abraham ed Dios, say “Ukom na amin a dalin.” Maan-anos ya imbangat nen Jehova ed si Abraham so inkamapangasi To, iimanoen toy kada puso tan nenengnengen to ray matunong pian iliktar to ra, anggan diad panaon lay panangukom.​—Gen. 18:22-33.

12, 13. (a) Panon ya akatulong ed si Abraham so kakabatan tan eksperiensya to? (b) Antoy mangipanengneng a nanmatalek si Abraham ed si Jehova?

¹² Seguradon akatulong ed si Abraham so amin ya kakabatan tan eksperiensya to pian napansiansia ton malet so pikakaaro to ed si Jehova. Kanian nen nipaarap ed mairap a subok​—nen kinerew nen Jehova ya ibagat toy anak ton si Isaac—​anonotan nen Abraham iray maabig ya kualidad na Kaaro to ed tawen. Pawilen tayo pa sirin imay matoor a laki ya ontatatdang ed palandey diad dalin na Moria. Inisip to kasin biglan manguman si Jehova tan magmaliw ya maruksa tan andiay panangasi? Agbalot itan inisip nen Abraham! Panon tayon amta?

¹³ Antis ton taynan iray lingkor to, imbaga nen Abraham: “Ontilak kayo dia a pati say asno, ta siak tan say ugaw onla kami’d man; ta mangigalang kami ed Dios, tan ompawil kami lanlamang dia ed sikayo.” (Gen. 22:5) Antoy labay ya ibaga nen Abraham? Kasin tinilaan to ray lingkor to, ya imbaga tod sikaran kaiba ton ompawil si Isaac anta amta ton ibagat to la? Andi. Naamtaan tayod Biblia no antoy iisipen nen Abraham. (Basaen so Hebreos 11:19.) “Inisip [nen Abraham] a nayarian na Dios a paolien [si Isaac] anggano inatey la.” On, manisia si Abraham ed kioli. Amta ton impawil nen Jehova so pakasarag dan mananak anggano matatken la ran dua nen Sara. (Heb. 11:11, 12, 18) Inisip nen Abraham ya anggapoy imposible ed si Jehova. Kanian matalek ya anggan antoy nagawa ed saman ya agew, nipawil ed sikato so inad-aro ton anak pian nagawa so amin ya sipan nen Jehova. Kanian agla pankelawan ya si Abraham et tinawag ya “ama na amin a walaan na pananisia”!

14. Anto ray pakakasubokan mo diad panlilingkor mod si Jehova, tan panon ya makatulong ed sika so alimbawa nen Abraham?

¹⁴ Sikatayo ey? Tua, aliwan ontan iray kekerewen na Dios ed sikatayo natan. Balet  kekerewen to ya unoren tayo anggano mairap parad sikatayo ya gawaen iray ganggan to, odino anggano agtayo natatalosan no akin ya kaukolan tayon gawaen iratan. Wala tay naisip mon ipapagawa na Dios ed sika ya mairap mon gawaen? Parad arum, nayarin say panagpulong. Ompan nababaingan ira, kanian naiirapan ira ya ibagad saray agda kabat so nipaakar ed maong a balita. Parad arum balet, nayarin say pagmaliw a duma ed saray kaeskuela odino katrabaho ra. (Exo. 23:2; 1 Tes. 2:2) Kasin walay kimey ya singa agmo nasarag, tan singa ka met si Abraham ya ontatatdang ed palandey diad Moria? No ontan, manpakpel ka tan alig moy Abraham tan say pananisia to! No dalepdepen tayo ray alimbawa na matoor ya lalaki tan bibii, napakiwas itayon aligen ira tan onapit ed si Jehova bilang Kaaro tayo.​—Heb. 12:1, 2.

15. Panoy pakaamta tayo ya agbalot pagbabawian nen Abraham so matoor ya impangunor tod si Jehova?

¹⁵ Magbabawi kasi si Abraham ed matoor ya impangunor tod si Jehova? Ibabaga na Biblia ya si Abraham et inatey ya “masiken la a napnek na taotaon.” (Gen. 25:8) Kinmapuy si Abraham nen 175 años to la, balet no nonoten toy impanbilay to, talagan napnek. Say bilay to et tuloytuloy ya akapokus ed pikakaaro tod si Jehova a Dios. Balet, anggano nabasa tayon si Abraham et “masiken la a napnek na taotaon,” agtayo iisipen ya kontento la ed saman ya bilay tan agto la labay so manbilay diad arapen.

16. Anto ray panliketan nen Abraham diad Paraiso?

¹⁶ Oniay ibabaga na Biblia nipaakar ed si Abraham: “Aalagaren to so syudad a walaan na saray tuan pundasyon, a say mangipaalagey tan manggawa ed satan et say Dios.” (Heb. 11:10) Manisia si Abraham ya onsabi agew et nanengneng to itan ya syudad, say Panarian na Dios ya manuley ed sayan dalin​—tan seguradon nanengneng to itan! Isipen pay liket nen Abraham no manayam lad Paraiso diad dalin tan itultuloy to nin pabiskegen so pikakaaro tod si Jehova! Seguradon sikatoy manliket no naamtaan ton akatulong ed saray lingkor nen Jehova so alimbawa na pananisia to diad pigan libon taon kayari impatey to! Diad Paraiso, naamtaan to ni ingen ya samay ginawa ton pangibagat komon ed si Isaac et nausar bilang ilustrasyon na mas baleg ya agawa. (Heb. 11:19) Tan naamtaan ton say sakit ya alikna to legan ya ipaparaan toy pangibagat to ed si Isaac et tinmulong ed minilyon a matoor ya totoo ya natalosan so sakit ya aliknan mismo nen Jehova diad impangitarya tod Anak to, si Jesu-Kristo, bilang dondon. (Juan 3:16) Atulongan itayon amin ed alimbawa nen Abraham pian mas lalon naapresya so dondon, say sankabalgan ya impangipatnag na panangaro!

17. Antoy determinasyon mo, tan antoy aralen tayo diad onsublay ya artikulo?

¹⁷ Komon ta determinado tayon aligen so pananisia nen Abraham. No itultuloy tayon kabaten nin maong si Jehova, makagawa tayoy maabig ya rekord na katooran ed sikato tan naeksperiensya tayo so dakel iran bendisyon diad matoor ya panlilingkor tayod sikato. (Basaen so Hebreos 6:10-12.) Komon ta si Jehova so Kaaro tayo ed andi-angga! Diad onsublay ya artikulo, aralen tayo so talora nin alimbawa na saray matoor a totoon nagmaliw ya malet a kaaro na Dios.