INYANAK ak nen 1926 ed Crooksville, Ohio, diad United States. Aliwan relihyoso si Tatay tan Nanay, balet babagaan da kami ran waloran ananak da ya mimisa. Diad Methodist Church so lalaen ko, tan nen 14 años ko et inikdan ak na ministro na premyo ta anggapoy asaew kon misa diad loob na sakey taon.

Diad saman, say kaabay min si Margaret Walker a sakey ya Tasi nen Jehova, et ginapoan ton bisitaen so nanay ko tan pupulongan to nipaakar ed Biblia. Aminsan et dinmengel ak. Say amta nen nanay ko et ompan isturboen ko labat so panaaral da kanian papapawayen to ak ed abung. Balet siansian dinengel koy pantotongtongan da. Kayari na aminpigan imbisita to, tinepetan ak nen Margaret: “Antam no antoy ngaran na Dios?” Say kuan ko: “Amta la ’tan na amin—siempre Dios.” Kuan to: “Alam so Bibliam tan basam so Salmo 83:18.” Binasak tan naamtaan ko ya say ngaran na Dios et Jehova. Linma ak ya tampol ed saray kakaarok tan imbagak ed sikaran, “Kasempet yod abung  yo naani labi, basa yod Biblia so Salmo 83:18 tan naamtaan yo no antoy ngaran na Dios.” Nayarin nibaga yo ya diad satan et ginmapo ak lan tampol ya nampulong.

Nanaral ak na Biblia tan abautismoan ak nen 1941. Agano ni labat kayari na satan, niyasain ak ya mangikondukta na panagaral na kongregasyon ed libro. Pinaseseg koy nanay ko tan saray agagik ya onatendi, tan manlapud saman et onaatendi la ra. Balet ag-interesadoy Tatay ko.

Naaruman ni responsabilidad kod kongregasyon, tan nanggawa ak na librarya na saray publikasyon tayo diad abung mi. Aminsan, inturo nen Tatay iramay librok insan to imbaga: “Nanenengneng mo ’ratan ay? Ipaway mo ’ratan ed sayan abung, tan ipilam met lay sarilim.” Kanian inmalis ak tan nanrenta ak na kuarto ya asingger ed Zanesville, Ohio, balet ompapawil-pawil ak ed abung mi pian pasesegen so pamilyak.

Sesebelan nen Tatay si Nanay ya onatendid saray pantitipon. No paonlad aral si Nanay, no maminsan et usilan to insan to guyoren a papawil ed abung. Balet ombatik si Nanay tan ondalan ed arum ya puerta pian makapiaral. Imbagak ed si Nanay: “Agkayo mapaga. Nakesawan lanlamang iran mangusil ed sikayo.” Asabi panaon, sinmuko lanlamang si Tatay kanian anggapo lay problema nen Nanay ed pipiaral.

Nen 1943, ginmapoy Teokratikon Eskuelaan Parad Ministeryo diad kongregasyon, tan naikdan ak na saray parte. Saray simbawa ya naaawat ko kayari na saray betang ko ed sayan eskuelaan et tinmulong ed siak pian napaaligwas koy abilidad kon mansalita.

Diad saman et peles na World War II. Nen 1944, atawag ak ya mansundalo. Linma ak ya nanreport ed Fort Hayes diad Columbus, Ohio, tan ineksamin day laman ko, insan wala ray pinirmaan kon papeles. Imbagak ed saray opisyal ya agak mansundalo. Pinasempet da ak. Kayari na pigaran agew, walay opisyal ya linmad panaayaman ko tan inkuan to: “Corwin Robison, walay warrant ko pian arestoen ka.”

Kayari na duay simba, oniay inkuan na huis diad korte: “No siak labat so naunor, sentensiaan ta kan napriso ya legay bilay. Antoy nibagam?” Inmebat ak: “Your Honor, natrato ak komon ya singa sakey a ministro. Say pulpitok et diad arap na puerta na kada abung, tan dakel lay apulongan ko nipaakar ed maong a balita na Panarian.” Imbaga na huis ed saray hurado: “Agkayo linma dia pian mandesisyon no kasin sayan laki et ministro odino andi. Wadia kayo pian mandesisyon no kasin sayan laki et nansundalo odino andi.” Anggapo ni kapalduan oras et wala lay desisyon na saray hurado tan say sentensia dad siak et “guilty.” Senentensiaan ak na huis na limay taon ya pakapriso diad Ashland, Kentucky.

Say primeron duaran simbak ed prisoan et diad Columbus, Ohio. Agak pinmaway ed seldak diad unonan agew. Nampikasi ak ed si Jehova: “Agko sarag so manayam ed selda na limaran taon. Agko amtay gawaen ko.”

Kaimbuasan, pinapaway ak na guardia ed selda. Walay sakey ya atagey tan maregregkel ya  priso ya say ngaran to et Paul. Inasinggeran ko tan akaalagey kamin akabantag ed bintana. Tinepetan to ak, “Kutingot, antoy kasom?” Kuan ko, “Tasi ak nen Jehova.” Kuan to, “Tasi ka? Akin et wadia ka ey?” Kuan ko, “Agmigiguerra iray Tasi nen Jehova tan ag-ira mamapatey na totoo.” Kuan to, “Impriso da ka lapud agka mamatey na too. Ipripriso da balet so arum lapud mamapatey iray totoo. Singa agmakatunongan, awa?” Kuan ko, “Andi lanti.”

Insan to imbaga, “Labinliman taon ak diad sananey a prisoan, tan diman ko abasa so arum ed saray literatura yo.” Kanian nampikasi ak, “Aman Jehova, tulongan yo ak pa pian ondapag ed siak iyan laki.” Diad saman ya bekta, imbaga nen Paul: “No diwiten ka na anggan siopad sarayan lalaki, eyag ka labat. Siak lay akauley ed sikara.” Kanian anggapoy problemak ed 50 ya akapriso ed saman ya seksion.

Nen inyalis ak na saray opisyal na prisoan diad Ashland, naamtaan kon wala ray wadman ya agagin matatken ed espiritual. Say ulopan da so tinmulong ed siak tan ed arum pian mansiansian mabiskeg ed espiritual. Inikdan da kami asainmin ya sinimban babasaen ed Biblia, tan angiparaan kami ray tepet tan ebat parad saray aral ya tatawagen min Bible Bee. Wala met so aturon manangasikaso na teritorya. Wala kamid baleg ya dormitoryo ya akadasig ed abay na dingding iray dukolan. Imbagad siak na manangasikaso na teritorya: “Robison, sikay akauley ed sarayan dukolan. Teritoryam so siopaman ya akan-dukolan ed satan. Seguradom ya napulongan mo antis ya onalis.” Ontan so organisadon paraan na panagpulong mi.

Asumpal so World War II nen 1945, balet wala ak nid prisoan kayari na satan. Mapaga ak ed pamilyak ta imbaga nen Tatay ed siak ya “No napaekal ta ka, sarasarag ko la ra yay arum.” Kapaway kod prisoan, asurprisa ak ed balibalin naamtaan ko. Anggano susumpaen ira nen Tatay, pitora ed saray kapamilyak so onaatendi lad saray aral tan sakey ed saray agagik ya bibii et abautismoan la.

Nen ginmapoy Guerra ed Korea nen 1950, atawag ak lamet ya mansundalo tan nanreport ak ed Fort Hayes. Kayari na eksamin no kasin sarag koy mansundalo, imbagad siak na sakey ya opisyal, “Sakey kad saray sankatageyan so nala diad grupo yo.” Say kuan ko, “Ayos sirin, balet agak mansundalo.” Binitlak may walad 2 Timoteo 2:3 insan ko imbagan, “Sundalo ak la nen Kristo.” Diad saman et ag-inmesel ya  tampol imay opisyal, insan to imbaga, “Sarag mo lay onalis.”

Agano ni kayari na satan, inmatendi ak ed miting parad Bethel ed sakey a kombension diad Cincinnati, Ohio. Imbagad sikami nen Brother Milton Henschel ya no labay na sakey ya agin laki so impasyan mankimey parad Panarian, sikatoy nayarin usaren na organisasyon diad Bethel. Nan-aplay ak tan naaprobaan ak. Nen Agosto 1954 et ginmapo ak ya nanlingkor ed Brooklyn Bethel. Manlapu lad saman et wala ak nid Bethel.

Walan walay trabahok ed Bethel. Diad pigaran taon, manag-asikaso ak na saray angkabaleg ya tangki ya panagpapetangay danum diad printery tan diad saray opisina, tan manag-apiger ak na saray makina tan saray talak na puerta. Nantrabaho ak met ed saray Assembly Hall diad New York City.

Labalabay ko ray espiritual ya rotina diad Bethel, kaiba lay morning worship tan say panagaral na pamilyan Bethel ed Panag-bantayan, pati say pibiang ed ministeryo kaibay kongregasyon. No nonoten tayo, sarag tan nepeg met ya gawaen iratan na anggan siopan pamilya ya Tasi nen Jehova. No saniiban pantongtongan na saray ateng tan ananak so inagew-agew ya teksto, regular ya walay Panagdayew na Pamilya ra, tan maseseg iran mibiang ed saray aral na kongregasyon tan mangipulong na maong a balita, say interon pamilya et seguradon ombiskeg ed espiritual.

Dakdakel so kakaarok ed Bethel tan diad kongregasyon. Wala ray alanaan tan linma la rad tawen, tan wala ra met balet so aliwan alanaan. Balet amin ya lingkor nen Jehova—pati saray Bethelite—et aliwan perpekto. No walay agi ya agko akapitalosan, naynay ak ya mikakareenan. Iisipen ko may walad Mateo 5:23, 24 tan no antoy iilaloan nen Jehova ya gawaen tayo pian naresolbe so agpantatalosan. Aliwan mainomay so onkerew na dispensa, balet no man-sorry ak la, mataltalag so problema ya agnaresolbe.

Lapud edad ko, naiirapan ak lan manpulong ed kaabungan, balet agak ni sinmuko. Nanaral ak na daiset ya Mandarin Chinese tan labalabay  kon asinggeran iray ondadalan ya Chinese diad karsada. Wala ray kabuasan ya makapangipalima ak na 30 odino 40 magasin ed saray interesado.

Akapan-RV ak ni ingen ed China! Oniay agawa: Walay makitkitsing ya marikit ya inmimis ed siak nen dinmalan ya mangiiter na flyer na lakoay prutas. Inimisan ko met insan ko inikdan na Say Panag-bantayan tan Onliing! ya Chinese. Inala to tan imbaga ton Katie so ngaran to. Kayari to man, kada no nanengneng to ak, mitongtong ed siak. Imbangat kod sikato iray ngaran na prutas tan pising diad English, insan to uliten iray salitan ibagak. Wala ray teksto ed Biblia ya impaliwawak met ed sikato, tan inawat to so libron Ibabangat na Biblia. Balet kayari pigaran simba, agla nampanengneng ed siak.

Kalabas na pigaran bulan, wala lamet so bii ya mangiiter na flyer, tan inawat toy inter kon magasin. Diad tinmumbok ya simba, inderew tod siak so cell phone to tan kuan to, “Mitongtong kayo diad China.” Kuan ko, “Anggapoy kabat kod China.” Balet impilit to, kanian inalak so cell phone tan kuan ko, “Hello, si Robison ya.” Say kuan to may boses diad cell phone, “Hello! Si Katie ya. Sinmempet ak lad China.” Kuan ko, “China?” Inmebat si Katie, “On. Amta yo ’tay biin angiderew ed sikayoy cell phone? Agik ’tan. Komon ta ibangat yo met ed sikato iramay maabig ya imbangat yod siak.” Kuan ko, “Gawaen koy anggaay nayarian ko, Katie. Salamat ta imbagam ed siak no iner so kawalaan mo.” Ag-abayag, akatongtong ko lamet so agi nen Katie, balet sampot la iman. Anggan iner so kawalaan na saraman ya duaran mamarikit, komon ta itultuloy day manaral nipaakar ed si Jehova.

Say sagradon panaglingkor ed si Jehova so kimey ko ed loob na 73 a taon. Maliket ak ta tinulongan to ak ya mansiansian neutral tan matoor ed prisoan. Ontan met, imbagad siak na agagik ya nagmaliw iran makpel lapud agak sinmuko ed isusumpa nen Tatay. Abautismoan si Nanay tan anemira ed saray agagik. Anguman met si Tatay, tan asali to met so akapiaral antis ya inatey.

No linaway Dios, nabilay lamet diad balon mundo iray inaatey lan kapamilyak tan kakaarok. Isipen pay liket ya mandayew ed si Jehova diad andi-angga, ya kaiba tayo ray inad-aro tayo! *