NONOT mo pay sankaliketan ya agew ed bilay mo. Kasin satan may agew na impankasal mo, odino nen niyanak so panguloan ya anak mo? Odino kasin satan may agew ya insimbolom so dedikasyon mod si Jehova panamegley na bautismo? On, nayarin satan so isipen mon sankaimportantian tan sankaliketan ya agew. Tan malikeliket met iray kapananisiaan mo nen impanengneng mod totoo ya inarom so Dios ed interon pusom, kamarerwam, nonot, tan biskeg mo!​—Mar. 12:30.

Seguradon manlapu la nen nampabautismo ka et amayamay lay makapaliket ya naeksperiensyam. Balet wala ray manangiyabawag na Panarian ya abalang day liket da. Akin ey? Anto ray rason tayo pian mantultuloy ya maliket a manlingkor ed si Jehova?

Say mensahe na Panarian—kaiba lay promisa ya magano lan panampoten nen Jehova so mauges ya sistema natan tan iletneg to la so balon mundo to—et seguradon mangiiter ed sikatayoy rason pian manliket. Niarum ni, ipapaseguro ed sikatayo na Sofonias 1:14: “Say baleg ya agew nen Jehova asingger, sikato so asingger tan masiglat a maomaong!” Balet, say panalagar na mabayag nen say iilaloan tayo et nayarin mangekal na liket tayo tan ompan kalkalna lan onkapuy so panaglingkor tayod Dios.​—Uli. 13:12.

Say maliket ya pipiulop ed saray totoo na Dios et mamakiwas ed sikatayon mantultuloy ya maliket a manlingkor ed si Jehova. Diad tua, nayarin nagmaliw tayon interesado ed tuan panagdayew lapud maabig ya kondukta na saray lingkor nen Jehova, tan tinmulong itan pian manlingkor tayo met ed Dios. (1 Ped. 2:12) Balet antoy nayarin nagawa no nadisiplina so sakey ya kaagian tayo lapud asumlang toy estandarte na Dios? Ompan saramay angawat na katuaan lapud makadios iran ugali na totoo nen Jehova et nayarin nadismaya tan nabalang day liket da.

Say panasagyat na komersyo na mauges ya sistema nen Satanas et nayarin mangekal met na liket tayo. Uusaren na Diablo so mundo to pian panisiaen itayo ya kaukolan tayo ray bengatla ya diad tua et agmet importante. Balet, tandaan tayo so imbaga nen Jesus: “Anggapo so nayarin manpaaripen ed duaran katawan; ta balanglan busolen to imay sakey tan aroen to imay sananey, odino sikatoy mansiansia ed sakey tan mudmoraen to imay sananey. Agkayo nayarin manpaaripen ed Dios tan ed saray Kayamanan.” (Mat. 6:24) Agtayo makapanlingkor ya maliket ed si Jehova no ibansag tayon pansagpotan  ya naala so amin ya sarag tayon alaen diad sayan mundo.

Parad saramay mangaaro ed si Jehova, aliwan makapabelat so panlingkor ed sikato. (1 Juan 5:3) Tandaan so imbaga nen Jesus: “Dago kayo ed siak, amin yon mansasagpot tan nabebelatan, tan pampainawaen ta kayo. Sakbat yo so pakok tan manaral kayo ed siak, ta mauyamo ak tan mapaabeba ak, pian nainawaan iray kamarerwa yo. Ta mainomay a sakbaten so pakok tan anlemew so awit ko.” (Mat. 11:28-30) Makaparepresko tan makapaliket so panakbat ed pako bilang disipulo nen Kristo. Tan talagan wala ray rason tayon manliket a maong ed panlilingkor tayod si Jehova. Imanoen tayo natan so taloran importantin rason no akin ya sarag tayoy ‘manliket ed Dios na kilalaban tayo.’​—Hab. 3:18.

Manlilingkor tayo ed maliket a Dios, say angiter na bilay tayo. (Gawa 17:28; 1 Tim. 1:11) Amta tayo ya utang tayoy bilay tayo ed Manamalsa. Kanian anggano pigay taon lay linmabas manlapu nen abautismoan itayo, itultuloy tayoy maliket ya manlingkor ed sikato.

Imanoen si Héctor ya nanlingkor ed si Jehova bilang ombiabiahen manangasikaso diad loob na 40 a taon. Anggano masiken la, maaligwas nin siansia. (Sal. 92:12-14) Alimitaan so panaglingkor tod Dios lapud pansasakit na asawa to, balet ag-abalang so liket to. Say kuan to: “Anggano makapaermen ya nanengneng ya onkakapuy so asawak tan mairap lan asikasoen, agko inabuloyan itan ya mangekal na liket kod panaglingkor ed tuan Dios. Lapud amtak ya utang koy bilay kod si Jehova tan walay gagala na impamalsa tod too, magenap la itan pian sikatoy aroen kon maong tan panlingkoran kod interon pusok. Pansasagpotan koy mansiansian aktibo ed panagpulong, tan say ilalo ed Panarian so manunan nononoten ko pian agnabalang so liket ko.”

Intarya nen Jehova so dondon bagat kanian nagmaliw ya posible so pakawalaan tayoy maliket ya bilay. On, “ontan lay panangaro na Dios ed mundo ya inter to so bogbogtong ya Anak to, ta pian balang sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” (Juan 3:16) Naperdona iray kasalanan tayo tan nawalaan tayoy bilay ya anggapoy anggaan no walay pananisia tayod dondon bagat nen Jesus ya maaron intarya na Dios. Agta balibalin rason itan pian misalamat tayo? Tan agta napakiwas itayon maliket ya manlingkor ed si Jehova lapud misalsalamat itayod dondon?

Oniay inkuan na sakey a brother ed Mexico ya si Jesús: “Aripen ak na trabahok, no maminsan et anggad limaran shift ya dirediretso so pantrabahok anggano agko met kaukolan ya gawaen. Ginawak iman  pian mas dakel so kuartak. Insan ko naaralan so nipaakar ed si Jehova tan say impangiter tod inad-aro ton Anak parad saray totoo. Labalabay kon talagay manlingkor ed sikato. Kanian indedikak so bilay kod si Jehova, tan anggano 28 a taon ak lan mantratrabaho ed kompanya, nandesisyon ak ya onekal tan manlingkor ya sigpot panaon ed ministeryo.” Satan so gapoan na pigay taon ya maliket a panaglingkor ed si Jehova.

Say bunga tayo et mamawalay baleg a liket, aliwan ermen. Nanonotan mo ni kasi so datin paraan na panagbilay mo antis mon akabat si Jehova? Impanonot nen apostol Pablo ed saray Kristiano ed Roma ya ‘ariripen ira na kasalanan nensaman’ balet nagmaliw la ran ‘ariripen na inkatunong.’ Manbubunga la ra “nipaakar ed kasantosan,” tan mansumpal itan ed bilay ya anggapoy anggaan. (Roma 6:17-22) Say paraan na panagbilay tayo met natan et masanto, tan agtayo maermen lapud marutak ya kagagawa ed moral odino maruksan ugali. Talagan panliketan tayo itan!

Imanoey alimbawa nen Jaime, sakey ya datin boksingero ya ateista tan manisiad ebolusyon. Ginapoan nen Jaime so onatendi ed saray Kristianon pantitipon tan nandinayewan toy panangaro ya anengneng to diman. Pian nataynan to lay datin kabibilay to, impikasi nen Jaime ed si Jehova ya tulongan Ton manisia ed Sikato. “Kalkalna ya akabat koy maaron Ama tan mapangasin Dios,” so kuan nen Jaime. “Say pangiyaplikad matunong iran estandarte nen Jehova so nagmaliw ya proteksion ko. No agak anguman, ompan inatey ak la, ya singa agawad saray arum ya boksingero ya datin kaarok. Saray sankaliketan ya taon ed bilay ko et saramay taon ya impanlingkor kod si Jehova.”

Antoy nepeg ya liknaen tayo legan tayon aalagaren so anggaan na sayan mauges a sistema na mundo? Tandaan, sikatayoy “mantatanem nipaakar ed espiritu” tan “manani na bilay ya andi-anggaan.” Kanian “ag-itayo ontutundan manggawa na maabig, ta diad manepeg a panaon et manani itayo no ag-itayo onkesaw.” (Gal. 6:8, 9) Diad tulong nen Jehova, komon ta mansungdo tayo, makulin bayuboan iray kualidad ya kaukolan pian niliktar itayod “baleg ya irap,” tan itultuloy tayoy maliket ya panlingkor ed si Jehova, anggan wala ray subok.​—Apo. 7:9, 13, 14; Sant. 1:2-4.

Segurado tayon nabendisyonan so pansusungdo tayo, lapud amta na Dios so kimey tan panangaro tayo parad sikato tan parad ngaran to. No itultuloy tayoy maliket ya manlingkor ed si Jehova, singa tayo si salmistan David nen imbaga ton: “Impasen ko a naynay si Jehova ed unaan ko. Lapu ed sikato et wala ed nikawanan ko, agak natenyeg. Kanian say pusok maliket, tan say galang ko manggayaga. Say laman ko met mansiansia ed kaligenan.”​—Sal. 16:8, 9.