1, 2. Panon ya impatnag nen David ya sikatoy matoor ed Dios? (Nengnengen so litratod gapo na artikulo.)

ARALEM lay labi nen ag-aliklikas a linmoob si David tan Abisai ed kampo na 3,000 ya sundalon nanaugip. Diad pegley na kampo, aromog day Arin Saul a naugi-ugip. Sikatoy naksawan a nambiahe ed kalawakan na Judea pian anapen tan pateyen si David. Inyesaes nen Abisai: “Yabuloy mo a [si Saul] kabilen ko, pikasik ed sika, ed gayang angga ed dalin ed sakey a segkal, tan sikato so agko kabilen a piduaen.” Makapakelaw so inyebat nen David! “Sikato so agmo bagbagen; ta siopa so makapangyunat na lima to sumpa ed nilanaan nen Jehova, tan andi kasalanan to? . . . Si Jehova insebel to ya yunat ko so limak sumpa ed nilanaan nen Jehova.”—1 Sam. 26:8-12.

² Malinew ed si David no antoy labay ya ibaga na katooran ed Dios. Anggapoy plano ton sakitan si Saul. Akin ey? Lapud si Saul et nilanaan nen Jehova a manari ed Israel. Rerespetoen na saray matoor a lingkor nen Jehova iramay tinuro to. On, kakaukolanen  nen Jehova ed amin a lingkor to so ‘pangaro ed katooran.’​—Basaen so Miqueas 6:8.

3. Panon a nanmatoor si Abisai ed si David?

³ Nirespeto nen Abisai si David. Bilang alimbawa: Pian nasakoban nen David so impikalugoran tod si Batseba, ingganggan toy Joab ya agi nen Abisai ya ipuesto toy Urias ya asawa nen Batseba ed posisyon ya seguradon ompatey. (2 Sam. 11:2-4, 14, 15; 1 Awa. 2:16) Nayarin amta nen Abisai iyan plano, balet siansia nin nirespeto toy David bilang ari a pinili na Dios. Sakey ni, agbalot inusar nen Abisai so pakayari to bilang lider na armada pian samsamen so trono ed Israel. Imbes, indepensa toy David sumpad saray traidor tan arum ya kalaban to.​—2 Sam. 10:10; 20:6; 21:15-17.

4. (a) Akin ya maabig ya alimbawa na katooran ed Dios si David? (b) Anto ni ran alimbawa so aralen tayo?

⁴ Aglabay a sakitan nen David si Arin Saul. Diad satan et impanengneng to ya sikatoy matoor a lingkor nen Jehova. Nen ugaw ni David, nilabanan toy higanten Filisteo a si Goliat lapud anggapoy-baing ton kakantiawan iray sundalo na mabilay a Dios! (1 Sam. 17:23, 26, 48-51) Nen nagmaliw ya ari si David tan akagaway ambelat a kasalanan ya pikakalugoran tan panagpatey, inawat to so panangipetek nen propeta Natan tan nagbabawi. (2 Sam. 12:1-5, 13) Nen masiken lay David, intultuloy ton impatnag so katooran tod Dios. Singa bilang, dakdakel so inter ton kontribusyon diad impamaalagey ed templo nen Jehova. (1 Awa. 29:1-5) Tua, akagaway seryoso iran lingo si David balet nansiansian matoor ed Dios. (Sal. 51:4, 10; 86:2) Legan tayon aaralen so arum nin salaysay nipaakar ed si David tan saray kapanaonan to, amtaen tayo ray ebat ed sarayan tepet: Siopay unonan panmatooran tayo? Anto ran kualidad so kaukolan tayon ipatnag pian makapanmatoor itayo?

5. Antoy naaralan tayo ed lingo nen Abisai?

⁵ Sanen ag-aliklikas ya linmoob si Abisai diad kampo a kawalaan nen Saul, aliway angipatnagan toy katooran to. Lapud manmamatoor ed si David, labay a pateyen nen Abisai si Arin Saul, balet sikatoy binano nen David ta amta ton agnepeg a sakitan so “nilanaan nen Jehova.” (1 Sam. 26:8-11) Diad satan ya inkagawa, naaralan tayo so sakey ya importantin leksion: Aliwan mauges ya pigara so panmamatooran tayo, balet nepeg tayon iyaplika iray prinsipyo na Biblia no manpili tayo no siopay unonan panmatooran tayo.

6. Anggaman natural labat ya matoor tayod kapamilya tan kakaaro tayo, akin et nepeg tayon manalwar?

⁶ Say katooran et manlalapud puso, balet say puso na too et agnapanmatalkan. (Jer. 17:9) Kanian anggan matoor ed Dios so sakey a too, ompan matoor met ed sakey a malet a kaaro odino kanayon to ya manggagaway mauges. Nepeg tayon tandaan a si Jehova so unonan panmatooran tayo, lalo la no say maapit ed sikatayo et taynan to lay katuaan.​—Basaen so Mateo 22:37.

7. Panon ya nansiansian matoor so sakey ya sister diad mairap a situasyon?

⁷ Nayarin mairap so manpili no siopay unonan panmatooran sano adispelo so sakey a kaaro odino kapamilya. Alimbawa, tinmawag ed si Anne ^[1] so ina ton adispelo. Labay toy ombisita ed si Anne lapud naeermenan ed inkisian tod pamilya ra. Apagaan a maong si Anne ed satan ya kerew na ina to, kanian insipan to ya ebatan to panamegley na sulat. Antis ya nansulat et nirepaso to ni ray prinsipyo na Biblia. (1 Cor. 5:11; 2 Juan 9-11) Diad sulat, maaron impanonot nen Anne ed ina to ya sikaton mismo so amultot ed relasyon tod pamilya ra lapud mauges ya ginawa to tan agto impanbabawi. “Say paraan labat pian naekal itan ya ermen yo et no  ompawil kayod si Jehova,” so insulat nen Anne.​—Sant. 4:8.

8. Anto ran kualidad so makatulong ed sikatayo pian makapanmatoor tayo ed Dios?

⁸ Idadanet na katooran na saray kapanaonan nen David so taloran kualidad a makatulong pian napruebaan tayoy katooran tayo ed Dios. Saratan a kualidad et say kapaabebaan, kaabigan, tan inkakpel. Sansakey tayon aralen iratan.

9. Akin et labay a pateyen nen Abner si David?

⁹ Nen katongtong nen David si Arin Saul legan ton sankabembenan so aputot ya ulo nen Goliat, manga duaran lalaki so akanengneng ed sikara. Sakey lay anak nen Saul a si Jonatan ya akisipanan ed si David bilang kaaro to, tan say sakey et si Abner ya lider na armada. (1 Sam. 17:57–18:3) Asabi panaon et sinuportaan nen Abner si Saul pian pateyen si David. Inkuan nen David a sikatoy labay a pateyen na saray maruksan totoo. (Sal. 54:3; 1 Sam. 26:1-5) Akin et midumaan so reaksion nen Jonatan ed si Abner nipaakar ed si David? Singa si Jonatan, amta met nen Abner ya pinili na Dios si David a manari ed Israel. Kayari na impatey nen Saul, impatnag komon nen Abner so kapaabebaan tan prinuebaan to komon so katooran tod Dios diad panuporta tod si David, aliwan diad anak nen Saul ya si Is-boset. Balet nen akirelasyon si Abner ed onkokomaduan asawa nen Arin Saul, mapatnag ya labay ton samsamen so trono.​—2 Sam. 2:8-10; 3:6-11.

10. Akin et agmatoor ed Dios si Absalom?

¹⁰ Lapud aliwan mapaabeba, ag-akapanmatoor ed Dios si Absalom ya anak nen David. Sikatoy ‘angitadia na luganan tan saray kabayo, tan limamplo a lalaki ya ombatik ed unaan to.’ (2 Sam. 15:1) Sinamsam to met so katooran na totoo ya para komon ed ama to. Singa si Abner, labay a pateyen nen Absalom si David, anggano amta ton tinuro nen Jehova si David ya manari ed Israel.​—2 Sam. 15:13, 14; 17:1-4.

11. Panon itayon nagunggonaan ed saray salaysay na Biblia nipaakar ed si Abner, Absalom, tan Baruc?

¹¹ Idadanet na saray alimbawa nen Abner tan Absalom a say sakey a toon sobran maambisyon et mainomay a magmaliw ya agmatoor ed Dios. Seguradon aglabay a gawaen na anggan siopan matoor a lingkor nen Jehova so ontan a makasarili tan mauges ya kagagawa. Balet, anggan say pampilalek ya onyaman odino onsikat ed sayan mundo et  makaderal met ed espiritualidad na sakey a Kristiano. Anggano ag-akadetalye ed Biblia, walay panaon ya aliway akapokusan nen Baruc ya sekretaryo nen propeta Jeremias. Oniay mensahe nen Jehova ed si Baruc: “Nia saman so impaalagey ko, igebak ta naani, tan say intanem ko bagoten ko ta naani; et saya so gawaen ko naani ed amin a dalin. Et anapen mo so saray baleg a bengatla a nipaakar ed sika lanlamang? Agmo ra anapen.” (Jer. 45:4, 5) Inawat nen Baruc itan a panangipetek. Tan makabat a nodnonoten iratan a salita na Dios legan tayon aalagaren so panampot na sayan mauges a mundo!

12. Ipaliwawa no akin ya agtayo makapanmatoor ed Dios no makasarili itayo.

¹² Si Daniel, sakey a brother ed Mexico, et kaukolan toy manpili no kasin manmatoor ed Dios odino unaen toy makasarilin panlabayan to. Labay ton naasawa so sakey a biin agmananisia. Inkuan nen Daniel: “Susulatan ko nin siansia anggano payunir ak la. Balet sinmabi panaon, nampaabeba ak tan imbagak ed sakey ya eksperiensyadon elder ya agko amtay pilien ko no siopay panmatooran ko. Tinulongan to ak pian natalosan ko ya kaukolan ko lan itunda ya sulatan imay bii pian makapanmatoor ak ed Dios. Kayari na dakel ya impanpikasi tan impanakis, ginawak itan. Agnambayag et mas maliket ak la ed ministeryo.” Diad kaunoran et akaasawa si Daniel na maomaong a sister tan sikatoy manlilingkor la natan bilang manangasikaso na sirkito.

13. Panon ya nansiansian matoor si Natan ed Dios tan ed si David sanen nankasalanan si David?

¹³ No maminsan et apektaen na katooran tayod si Jehova so katooran tayo ed totoo. Nansiansian matoor si propeta Natan ed si David legan a mansiasiansian matoor ed Dios. Naamtaan nen Natan so impikalugoran nen David tan say ginawa to pian ompatey ed guerra so asawa na samay bii. Anggano matoor si Natan ed si David, inunor toy ganggan nen Jehova tan makpel ton sinimbawa si David. Impatnag nen Natan so karunongan tan kaabigan nen sinimbawa toy David. Pian natalosan nen David ya talagan ambelat iray kasalanan to, angusar si Natan na sakey ya ilustrasyon nipaakar ed ag-inkahustisya ya ginawa na mayaman a lakin angala ed saksakey a kordero na pobrin too. Nampasnok si David ed ginawa na mayaman a laki, insan imbaga nen Natan ed sikato: “Sika so laki”! Atalosan itan nen David!​—2 Sam. 12:1-7, 13.

14. Panon kan makapanmatoor ed si Jehova tan ed kaarom odino kanayon mo?

 ¹⁴ Makatulong ed sika so pangipatnag na kaabigan pian makapampili ka no siopay unonan panmatooran mo. Alimbawa, amtam ya walay makapuy ya gagawaen na sakey ya agi. Nayarin matoor kad sikato, lalo la no malet a kaarom odino kapamilyam. Balet no sakoban mo so aliwan gagawaen to, agka makapanmatoor ed Dios. Siempre, nepeg mon unaen so katooran mod Dios. Kanian, ipatnag moy kaabigan, ingen ta magmaliw kan mapekder, a singa si Natan. Paseseg moy kaarom odino kapamilyam ya onkerew a tampol na tulong ed saray elder. No agto itan gawaen, say katooran mod Dios so mamakiwas ed sika pian ibagam itan ed saray elder. No ontan so gawaen mo, nipanengneng mon matoor kad si Jehova tan nipatnag moy kaabigan ed kaarom odino kapamilyam, lapud manggaway paraan iray elder pian ipetek itan ya agi diad maulimek a paraan.​—Basaen so Levitico 5:1; Galacia 6:1.

15, 16. Akin et kaukolan nen Husai so manpakpel pian makapanmatoor ed Dios?

¹⁵ Kaukolan ya makpel si Husai pian makapanmatoor ed Dios. Sikatoy matoor a kaaro nen Arin David. Balet asubok so katooran nen Husai sanen atangguyor nen Absalom ya anak nen David, so kapusoan na totoo tan labay ton samsamen so Jerusalem tan magmaliw ya ari. (2 Sam. 15:13; 16:15) Tinaynan nen David so syudad, balet antoy gawaen nen Husai? Kasin si Absalom lay panmatooran to, odino ontumbok ni ed masiken lan ari ya ombabatik pian nisalbay bilay to? Determinadon manmatoor si Husai ed arin pinili na Dios, kanian nila toy David ed Palandey na Saray Olibo.​—2 Sam. 15:30, 32.

¹⁶ Pinapawil nen David si Husai diad Jerusalem pian mankunwari ya kaaro nen Absalom, tan deralen to so simbawa nen Ahitofel. Impeligro nen Husai so bilay to. Prinuebaan toy katooran tod si Jehova tan ginawa toy pagagawa nen David ed sikato. Naebatan so impikasi nen David, ta say simbawa na makpel a lakin si Husai et dineral toy simbawa nen Ahitofel.​—2 Sam. 15:31; 17:14.

17. Akin et kaukolan tayoy manpakpel pian makapanmatoor?

¹⁷ Kaukolan tayo met so manpakpel pian makapanmatoor ed si Jehova. Dakel ed sikatayo so makpel ya ontatalindeg sumpad pananesdes na saray kapamilya, katrabaho, odino saray walad sekular ya autoridad pian pruebaan so katooran tayo ed Dios. Alimbawa, diad Japan, binmaleg si Taro ya akasentro so bilay to ed panmatoor tan itulok ed atateng to. Agto labat ginawa itan lapud obligasyon. Talagan labay ton paliketen so atateng to. Kanian sanen kinontra da lapud pililimog tod saray Tasi nen Jehova, maer-ermen ton imbaga ya sikatoy determinadon onatendi diad saray aral. Inkuan nen Taro: “Mamapasnok iran maong kanian pigay taon ya agda ak labay ya ombisita ed sikara. Impikasik a makapanpakpel ak komon pian nagawaan koy desisyon ko. Natan et anguman lay pidedeneng da, tan nayarik la ran bisitaen ya naynay.”​—Basaen so Uliran 29:25.

18. Antoy naaralan mo ed sayan artikulo?

¹⁸ Singa si David, Jonatan, Natan, tan si Husai, komon ta nalikna tayoy liket lapud prupruebaan tayoy katooran tayo ed si Jehova. Balet, komon ta akaaral tayo met ed ag-impanmatoor nen Abner tan si Absalom. Seguradon labay tayoy manmatoor ed si Jehova, a singa ginawa nen David. Lapud ag-itayo perpekto, nalilingo itayo. Balet, sarag tayon pruebaan ya iyuuna tayo so panmatoor ed si Jehova.