1, 2. (a) Akin ya napaseseg tayod alimbawa nen Noe, Daniel, tan Job? (b) Antoy situasyon nen insulat nen Ezequiel iray salitan walad Ezequiel 14:14?

KASIN wala ray dadalanen mon subok a singa say sakit, problemad pinansyal, odino panamasegsegang? Kasin no maminsan et naaandi so liket mo ed panaglingkor ed si Jehova? No ontan so naliliknam, napaseseg ka ed alimbawa nen Noe, Daniel, tan Job. Aliwa ran perpekto, tan singa sikatayo et dakel ya subok so dinalan da, kaiba la ray subok ya angipeligrod bilay da. Balet agda inikbanan so katooran da, tan nagmaliw iran alimbawa na pananisia tan inkamatulok ed pakanengneng na Dios.​—Basaen so Ezequiel 14:12-14.

² Saray salita na pinagkateman teksto tayo et insulat nen Ezequiel diad Babilonia nen 612 B.C.E. * (Eze. 1:1; 8:1) Diad saman, magano lan nagawa imay nipasakbay ya pakaderal na apostatan Jerusalem,  ya agawa nen 607 B.C.E. Pigpigara so angipatnag na kualidad a singa ed si Noe, Daniel, tan Job, ya lapud satan et amarkaan ira parad kililiktar. (Eze. 9:1-5) Say arum ed sikara et si Jeremias, Baruc, Ebed-melec, tan saray Rekabita.

3. Antoy aralen tayo ed sayan artikulo?

³ Ontan met natan, saramay ipapasen labat nen Jehova ya andiay pakabalawan​—singa si Noe, Daniel, tan Job—​so namarkaan parad kililiktar no mangangga la iyan sistema na mundo. (Apo. 7:9, 14) Kanian amtaen tayo no akin ya inusar nen Jehova irayan lalaki bilang alimbawa na inkatunong. Legan tayon aaralen so nipaakar ed kada sakey ed sikara, amtaen tayo (1) no anto ray subok ya dinalan da tan (2) no panon tayon naalig so pananisia tan inkamatulok da.

4, 5. Anto ran subok so dinalan nen Noe, tan akin ya makapaseseg so impansungdo to?

⁴ Saray subok ed si Noe. Diad panaon nen Enoc ya laki ed pueg nen Noe, saray totoo et mauge-uges. Mangibabaga ni ra ingen na “makapabiglan bengatla” sumpad si Jehova. (Jud. 14, 15) Dinmakel so maruksan totoo. Diad tua, nen panaon nen Noe, “say dalin et napnoy inkaruksa.” Saray mauges ya anghel et nansulong na laman na too, angasawa na bibii, tan awalaan na masesebeg tan angkakabaleg ya ilalak. (Gen. 6:2-4, 11, 12) Balet duman maong si Noe. “Inabobonan nen Jehova si Noe. . . . Sikatoy andiay pakabalawan no ikomparad saray kapanaonan to. Si Noe et nanakar a kaiba na tuan Dios.”​—Gen. 6:8, 9.

⁵ Imanoen pa itan ya impaneskribe ed satan ya matunong a too. Si Noe et aglabat nanakar a kaibay Dios diad mauges a mundo antis na Delap ed loob na 70 odino 80 taon​—say karukey na bilay na dakel a totoo natan. Sikatoy nambilay na ngalngali 600 a taon! (Gen. 7:11) Tan aliwan singa sikatayo natan, anggapo ray naasinggeran ton agagi ed kongregasyon—anggan agagi to ni ingen ed laman​—ya nakerewan toy tulong ed espiritual. *

6. Panon ya impanengneng nen Noe so pakpel?

⁶ Ag-inisip nen Noe ya basta anggapoy gagawaen ton mauges et kontento la. Makpel to met ya ‘impulong so inkatunong,’ ya impaamta tod totoo so pananisia tod si Jehova. (2 Ped. 2:5) “Diad panamegley na sayan pananisia et kinondena to so mundo,” so insulat nen apostol Pablo. (Heb. 11:7) Lapud satan et nipaarap si Noe ed panagbalaw tan isusumpa, tan ompan sinali ni ingen na arum ya sakitan. Balet ‘agginmiwgiw ed arap na totoo.’ (Pro. 29:25) Imbes, sikatoy awalaan na pakpel ya iiter nen Jehova ed saray matoor ya lingkor to.

7. Nen gagawaen nen Noe so biong, anto ran subok so inarap to?

⁷ Kayari na masulok ya limanlasus a taon ya impanakar nen Noe a kaibay Dios, sikatoy ingganggan nen Jehova ya manggawa na biong pian niliktar iray totoo tan ayayep. (Gen. 5:32; 6:14) Seguradon nairapan si Noe ya manggawa ed satan ya balbaleg ya biong! Tan amta to met ya sikatoy lalon balawen tan sumpaen na totoo. Balet inunor nin siansia nen Noe so ganggan na Dios lapud pananisia to. “Ontan so ginawa to.”—Gen. 6:22.

8. Panon ya nanmatalek si Noe ya itarya nen Jehova iray pankaukolan to?

⁸ Say sakey nin subok ed si Noe et say pangitarya na materyal a pankaukolan na pamilya to. Antis na Delap, saray totoo et kaukolan ya mankimey na impasya pian walay kanen da, tan ontan met so nepeg a gawaen nen Noe. (Gen. 5:28, 29) Anggaman ontan, say Dios so inyuna tod bilay to, aliwan say materyal a  pankaukolan. Anggan sanen ipapaalagey la nen Noe so biong, ya nayarin asabi toy 40 odino 50 taon, agto pinaulyanan so espiritualidad to. Tan intultuloy ton pinabiskeg itan diad loob na 350 a taon ni kayari na Delap. (Gen. 9:28) Talagan maabig ya alimbawa na pananisia tan katutulok!

9, 10. (a) Panon tayon naalig so pananisia tan inkamatulok nen Noe? (b) Antoy ipapaseguro na Dios ed amin ya manguunor ed saray ganggan to?

⁹ No panon tayon naalig so pananisia tan inkamatulok nen Noe. Nagawaan tayo itan no suportaan tayoy inkatunong na Dios, no agtayo magmaliw a kabiangan na mundo nen Satanas, tan no iyuna tayo so Panarian. (Mat. 6:33; Juan 15:19) No ontan so gawaen tayo, seguradon busolen itayo na mundo. Singa bilang, lapud uunoren tayo ray ganggan na Dios nipaakar ed sekso tan panangasawa, negatibo so ibabaga na arum nipaakar ed sikatayo. (Basaen so Malaquias 3:17, 18.) Balet singa si Noe, say tatakotan tayo et si Jehova, aliwan saray totoo. Amta tayon sikato labat so makapangiter na bilay ya andi-anggaan.​—Luc. 12:4, 5.

¹⁰ Sika balet ey? Kasin mantultuloy kan ‘manakar a kaibay Dios,’ anggano elekan o balawen ka na arum odino no nasusubok so panagmatalek mod Dios ya itarya to ray pankaukolan mo lapud irap na bilay? No aligen moy pananisia tan inkamatulok nen Noe, makapanmatalek ka ya asikasoen ka nen Jehova.​—Fil. 4:6, 7.

11. Anto ray mairap ya subok ed si Daniel tan say taloran kakaiba to nen wala rad Babilonia? (Nengnengen so litratod gapo na artikulo.)

¹¹ Saray subok ed si Daniel. Si Daniel et sakey ya bihag ed Babilonia, say syudad ya napnoy idolatriya tan espiritismo. Sakey ni, abebbebay pakanengneng na saray taga Babilonia ed saray Judio, ya balbalawen da ra tan si Jehova a Dios da. (Sal. 137:1, 3) Seguradon asakitan so liknaan na saray matoor ya Judio a singa si Daniel! Ontan met, sikato tan say taloran kakaiba to ya si Hananias, Misael, tan Azarias et nagmaliw ya sentro na atension ta ipapasal iran manlingkor ed ari. Anggan say naakan da et ipaparaan. Nagmaliw ni ingen ya isyu no antoy kanen tan inumen da, ta aglabay nen Daniel ya “dutakan so sarili to ed saray kakanen na ari.”​—Dan. 1:5-8, 14-17.

12. (a) Anto ray maabig a kualidad ya impatnag nen Daniel? (b) Antoy impangipasen nen Jehova ed si Daniel?

¹² Say sakey nin agnaliklikas ya subok ed si Daniel et nayarin say makapadinayew iran abilidad to, ya nanresultad impakaawat toy espisyal iran pribilehyo. (Dan. 1:19, 20) Balet imbes ya magmaliw ya malastog tan ipasoot toy opinyon to, sikatoy nansiansian mapaabeba tan lanang ton ipapaarap so dayew ed si Jehova. (Dan. 2:30) Diad tua, kabataan ni si Daniel nen sikatoy binitla nen Jehova a maong ya alimbawa na inkatunong, a kaiba nen Noe tan Job. Talagan walay kompiyansa na Dios ed si Daniel! Sikatoy nansiansian matoor tan matulok anggad sampot na bilay to. Nayarin ngalngali 100 lay taon to nen pinaseguroan na anghel na Dios: “O Daniel, sikan pinabpabli a too.”​—Dan. 10:11.

13. Panon ya nayarin akatulong si Daniel ed saray kapara ton Judio?

¹³ Naawat nen Daniel so pabor na Dios kanian sikatoy inikdan na atagey ya posisyon ed empiryo na Babilonia tan Medo-Persia. (Dan. 1:21; 6:1, 2) Nayarin inmaneobra nen Jehova iya pian natulongan nen Daniel iray kapara ton Judio, a singa met ed si Jose nen walad Ehipto, ontan met ed si Ester tan Mardokeo diad Persia. * (Dan. 2:48) Seguradon apaseseg iray bihag ya Judio, kaibay Ezequiel, nen anengneng dan tinulongan ira nen Jehova panamegley nen Daniel!

14, 15. (a) Panon a miparad situasyon nen Daniel so situasyon tayo? (b) Antoy naaralan na saray atateng natan ed atateng nen Daniel?

 ¹⁴ No panon tayon naalig so pananisia tan inkamatulok nen Daniel. Natan et singa tayo dayo ed sayan mundo ya napnoy imoralidad tan idolatriya ya iimpluensyaan na Makapanyarin Babilonia, say sankamundoan ya empiryo na palson relihyon tan “ayaman na saray demonyo.” (Apo. 18:2) Kanian, ipapasen da itayon duma, tan babalawen da tayo ni ingen. (Mar. 13:13) Singa si Daniel, nepeg tayon onapit ed si Jehova a Dios tayo. No mapaabeba tayon ontulok ed si Jehova tan manmatalek tayod sikato, mabmabli itayod sikato.​—Ag. 2:7.

¹⁵ Makaaral iray atateng ed alimbawa na atateng nen Daniel. Panon? Anggano dakdakel so mauges ed Juda legan na impanugaw nen Daniel, sikatoy binmaleg ya walaan na panangaro ed Dios. Siempre, aglabat itan basta agawa. Imbes, talagan maong so impangipasal ed sikato na atateng to. (Pro. 22:6) Anggan say ngaran nen Daniel, a mankabaliksan ya “Say Dios so Ukom Ko,” et mangipapanengneng ya matakot ed Dios iray ateng to. (Dan. 1:6, paimanod leksab) Kanian atateng, agkayo onsusuko. Anosan yon bangatan iray anak yo. (Efe. 6:4) Ontan met, manpikasi kayon kaiba ra tan ipikasi yo ra. No pansagpotan yon ipurek so katuaan ed puso ra, bendisyonan kayo nen Jehova.​—Sal. 37:5.

16, 17. Anto ran mandumaan a subok so dinalan nen Job?

¹⁶ Saray subok ed si Job. Baleg iran pananguman so agawad bilay nen Job. Antis ya asubok, sikato so “sankayamanan ed amin a taga Bukig.” (Job 1:3) Sikatoy mayamyaman, kabkabat, tan rerespetoen ya maong. (Job 29:7-16) Balet anggano ontan so kipapasen nen Job, aliwan atagtagey so pakanengneng tod sarili to odino agto inisip ya agto kaukolan so Dios. Diad tua, sikatoy tinawag nen Jehova ya ‘lingkor ko,’ tan inkuan to ni: “Sikatoy maptek a too a walaay integridad, tatakotan toy Dios tan aarawian toy kaugsan.”​—Job 1:8.

¹⁷ Diad antiktikey a panaon, anguma-uman so bilay nen Job. Inmirap a maong so bilay to tan naermenan a maong ya anggad labay to lay ompatey. Amta tayon say rason et say managpauges ya si Satanas, ya inakusaan toy Job ya mandadayew labat ed Dios lapud sarilin pankaabigan to. (Basaen so Job 1:9, 10.) Agpinaandin tampol nen Jehova itan  ya mauge-uges ya akusasyon. Imbes, inikdan toy pankanawnawa si Job ya pruebaan so katooran to, ya sikatoy mandadayew ed Dios lapud tua tan agmakasarili so panangaro to.

18. (a) Antoy pandinayewan mo nipaakar ed katooran nen Job? (b) Antoy naaralan tayo nipaakar ed si Jehova diad impideneng tod si Job?

¹⁸ Angusar si Satanas na nantutumbokan ya mauges iran pakana sumpad si Job, kanian say amta nen Job et nanlapu iratan ed Dios. (Job 1:13-21) Insan sinmabi so taloran palson managligliwa nen Job tan ansasakit iray imbaga dad sikato, a pinapaway dan sikatoy dudusaen na Dios! (Job 2:11; 22:1, 5-10) Balet, pinansiansia nen Job so katooran to. Tua, nayarin wala ray imbaga ton agla ninonot, balet tinalosan nen Jehova so sakit ya nalilikna nen Job. (Job 6:1-3) Anengneng na Dios no panon ya nansiansian matoor iyan maer-ermen a laki anggano pinairap ya maong nen Satanas tan aminpigapiga ton ininsulto. Nen alampasan nen Job iratan ya subok, dinoble nen Jehova iray datin walad sikato, tan nambilay ni na 140 ya taon. (Sant. 5:11) Legan na satan a panaon, intultuloy toy nandayew ed si Jehova diad interon puso to. Panon tayon amta? Abaybayag lan inatey si Job nen insulat nen Ezequiel iray salita ed pinagkateman teksto tayo.

19, 20. (a) Panon tayon naalig so pananisia tan inkamatulok nen Job? (b) Panon tayon nipatnag so panangabagey ed arum a singa gagawaen na Dios?

¹⁹ No panon tayon naalig so pananisia tan inkamatulok nen Job. Antokaman so situasyon tayo, komon ta lanang tayon iyuna ed bilay tayo si Jehova, ya sigpot a manmatalek tan ontulok ed sikato diad interon puso. Diad tua et mas dakel so rason tayon gawaen itan nen say si Job! Dakel lay amta tayo nipaakar ed si Satanas tan saray pakana to. (2 Cor. 2:11) Diad tulong na libron Job, amta tayo no akin ya aabuloyan na Dios so paniirap. Diad propesiya nen Daniel, atalosan tayo ya say Panarian na Dios et sakey a gobierno ya uleyan nen Kristo Jesus. (Dan. 7:13, 14) Tan amta tayo ya asingger lan ekalen na Panarian so amin ya paniirap.

²⁰ Naaralan tayod eksperiensya nen Job ya kaukolan tayon ipatnag so panangabagey ed agagi tayo ya ondadalan ed saray subok. Singa si Job, say arum et nayarin makapansalita na agla ninonot. (Ecl. 7:7) Balet imbes ya husgaan ira, nepeg tayon talosan so nalilikna ra. No ontan so gawaen tayo, aaligen tayo so maaro tan mapangasin Ama tayo, si Jehova.​—Sal. 103:8.

21. Antoy ipapanonot ed sikatayo na 1 Pedro 5:10 nipaakar ed agawad bilay nen Noe, Daniel, tan Job?

²¹ Anggano nambilay si Noe, Daniel, tan Job ed nandudumaan ya panaon tan situasyon, sinungdoan da iray subok. Ipapanonot na saray istorya na bilay da imay insulat nen apostol Pedro: “Kayari na panirap yon magano, say Dios na amin ya agnaparaan a kaabigan, . . . et sumpalen toy pangipapasal tod sikayo. Gawaen to kayon mapekder, gawaen to kayon mabiskeg, iletneg to kayon malet.”​—1 Ped. 5:10.

22. Antoy aralen tayod onsublay ya artikulo?

²² Diad panamegley na saray pinuyanan a salita nen Pedro, papaseguroan itayo nen Jehova ya gawaen ton mapekder tan mabiskeg iray lingkor to. Wala met so kompiyansa to ed saray totoo to natan. Labay tayon amin ya pabiskegen itayo nen Jehova tan mansiansian mapekder ed panaglingkor tayo. Kanian labay tayon aligen so pananisia tan inkamatulok nen Noe, Daniel, tan Job! Naamtaan tayod onsublay ya artikulo ya akapanmatoor ira lapud talagan kabat da si Jehova. Diad tua, ‘atalosan day amin a bengatla’ ya kakaukolanen ed sikara. (Pro. 28:5) Sarag tayo met ya gawaen itan.