1, 2. Anto so pressure ed saray kabataan natan, tan antoy nagawaan da pian nasarag da itan?

“SAY amtak matalino ka. Akin balet et manisia kad Dios ey?” so inkuan na kabataan ed kaklase ton Tasi diad Britain. Oniay insulat na sakey ya brother ed Germany: “Ibabaga na saray teacher ko ya is-istorya labat so karga na Biblia nipaakar ed impamalsa. Tan baliwala ed sikara ya manisiad ebolusyon iray estudyante.” Imbaga na sister ed France: “Nabibigla iray teacher ed eskuelaan mi ta wala ni ray estudyante ya manisia ed Biblia.”

² No sakey kan kabataan ya manlilingkor ed si Jehova odino manaaral nipaakar ed Sikato, kasin napre-pressure kan manisia met lad papanisiaan na karaklan, singa say ebolusyon, imbes ya manisia ed Amalsa? No ontan, wala ray nagawaan mo pian napansiansiam ya mabiskeg so pananisiam. Say sakey et usar moy inter na Dios ya abilidad mon mannonot. Satan so “manprotekta ed sika” pian agka naimpluensyaan na saray pilosopiya na mundo.—Basaen so Proverbio 2:10-12.

3. Antoy aralen tayo ed sayan artikulo?

³ Say tuan pananisia et base ed suston kakabatan nipaakar ed Dios. (1 Tim. 2:4) Kanian no aaralen moy Salita na Dios tan saray  base ed Biblian publikasyon, agmo labat paparlasan iratan. Usar moy abilidad mon mannonot pian ‘natalosan moy kabaliksan’ na babasaen mo. (Mat. 13:23) Aralen tayo no panon ya makatulong itan pian napabiskeg moy pananisiam ed Biblia tan ed Dios ya Amalsa. Dakel so “makakombinsin ebidensya” ed saratan ya topic.—Heb. 11:1, paimanod leksab.

4. Akin ya kaukolan so pananisia balanglan manisia kad Dios odino ed ebolusyon? Antoy kaukolan tayon gawaen?

⁴ Kasin wala lay angibaga ed sika ya manisia rad ebolusyon lapud base kuno itan ed science, balet say panisia ed Dios et base ed pananisia? Ontan so opinyon na dakel a totoo. Balet, importantin tandaan tayo: Balanglan manisia so sakey ed Dios odino ebolusyon, kaukolan so pananisia. Akin? Anggapod sikatayo so akanengneng ed Dios tan agtayo met anengneng ya amalsa na bengatla. (Juan 1:18) Tan anggapoy too—balanglan scientist o andi—ya akanengneng na sakey a bengatlan mabilay ya nan-evolve. Singa bilang, anggapoy anggan sakey ed sikatayon akanengneng na uleg a nagmaliw ya leon. (Job 38:1, 4) Kanian nepeg tayon aralen a maong iray ebidensya tan usarey abilidad tayon mannonot pian dugay konklusyon tayo. Oniay insulat nen apostol Pablo nipaakar ed impamalsa: “Saray agnanengneng a kualidad [na Dios], salanti, say andi-anggaan a pakapanyari tan inka-Dios to, et sankanengneng manlapu la nen pinalsa so mundo, lapud naaamtaan iratan ed panamegley na saray pinalsa, kanian anggapoy nibaraan da.”—Roma 1:20.

5. Bilang lingkor na Dios, anto ran tulong so inter ed sikatayo pian nausar tayoy abilidad tayon mannonot?

⁵ No imbagam ya “naaamtaan” odino “natatalosan” moy sakey a bengatla, malinew ed sika iray bengatlan nayarin agtampol nanengneng odino naimano. (Heb. 11:3) Kanian saray makatalos ya totoo et uusaren day isip da, aliwa labat ya say mata tan layag da. Amayamay so intarya na organisasyon nen Jehova ya makatulong ed sikatayo. Natulongan itayo na sarayan in-research ya maong a publikasyon pian ‘nanengneng’  tayoy Amalsa panamegley na mata na pananisia. (Heb. 11:27) Kaiba ed saratan so video ya The Wonders of Creation Reveal God’s Glory, saray brosyur ya Pinalsa Kasi Bilay? tan The Origin of Life—Five Questions Worth Asking, tan say libron Is There a Creator Who Cares About You? Makakaawat tayo met na makaibangat iran impormasyon diad saray magasin tayo. Mabetbet ed magasin ya Onliing! iray interbyu ed saray scientist tan arum ni, no akin ya manisia la ra natan ed Dios. Nabasa ed saray artikulon “Wala Kasi Nandesinyo?” iray alimbawa na makapakelkelaw iran desinyo ya nanengneng tayod palsa. Kaslakan ya sasalien na saray scientist ya aligen so balibalin desinyo na saratan.

6. Antoy nitulong ed arum na saray publikasyon tayo, tan panon kan atulongan na saratan?

⁶ Oniay imbaga na brother ed U.S. ya mantaon na 19 nipaakar ed duaran brosyur tayo: “Mausausar iraya. Aminpigapigak ya inaral irayan brosyur.” Insulat na sister ed France: “Panbiliban ko iramay artikulon ‘Wala Kasi Nandesinyo?’ Anggano sarag na saray matatalinon engineer ya aligen iray desinyo na palsa, agda napantayan so inkakomplikado na saratan.” Oniay imbaga na ateng na 15 so taon ton taga South Africa: “Say unaan ya babasaen na marikit mi ed Onliing! et say artikulon ‘Interbyu.’” Sika ey? Kasin uusaren mo irayan itatarya nen Jehova? Makatulong iratan pian say pananisiam et ombiskeg ya singa kiew ya aralem so lamot to. Bilang resulta, nasarag mo ray singa bagyon palson bangat.​—Jer. 17:5-8.

7. Akin ya labay na Dios ya usaren moy pakayarim a mankatunongan?

⁷ Mauges kasi mantepet nipaakar ed ibabaga na Biblia? Andi! Labay nen Jehova ya usaren moy ‘pakayarim a mankatunongan’ pian paneknekan no antoy tua. Agto labay ya manisia ka met la ta manisia ray arum. Kanian usar moy abilidad mon mannonot pian naamtaan moy suston kakabatan. Satan ya kakabatan so magmaliw ya malet a pundasyon na tuan pananisia. (Basaen so Roma 12:1, 2; 1 Timoteo 2:4.) Say sakey a paraan pian nawalaan kay ontan ya kakabatan et panamegley na study project.

8, 9. (a) Anto ray balibalin study project? (b) Antoy marakep ya resulta nen inisip a maong na arum iray aaralen da?

⁸ Say pinili na arum ya study project et nipaakar ed saray propesiya na Biblia odino no kasin duga so ibabaga na Biblia nipaakar ed history, archaeology, tan science. Say sakey ed saray balibalin propesiya ya aralen et say Genesis 3:15. Satan ya propesiya so angipaamta ed manunan tema na Biblia—say kiyalangon na inkasoberano na Dios tan say pamasanto ed ngaran to panamegley na Panarian. Diad satan ya bersikulo et simbolikon impaamta nen Jehova no panon ton solusyonan so amin ya kairapan na too ya ginmapod Eden. Panon mon aralen so Genesis 3:15? Say sakey a paraan et manggawa kay time line. Sarag mon isulat ditan iray tekston mangipapanengneng no panon ya kalkalnan impaamta na Dios iray indibidual tan uksoyan ya abitla ed satan ya bersikulo, tan saray tekston man-prueba ed pakasumpal na satan ya propesiya. Legan mon naaaralan ya mansusuportaan irayan teksto, seguradon nakombinse ka ya saray propeta tan angisulat ed Biblia et ‘inggiya na masanton espiritu.’—2 Ped. 1:21.

⁹ Imbaga na sakey ya brother ed Germany a say tema ya Panarian et susuportaan na amin ya libro ed Biblia. Intuloy to: “Tua itan anggano manga 40 ya lalaki so angisulat ed Biblia. Tan dakel ed sikara so nambilay ed nanduruman panaon tan agda personal ya kabat so sakey tan sakey.” Apaseseg so sakey a sister ed Australia ed samay inaral  tayod Panag-bantayan ya Disyembre 15, 2013 nipaakar ed kabaliksan na Paskua. Satan ya selebrasyon et mikonektaan ed Genesis 3:15 tan say isabi na Mesias. “Lapud satan ya inaral tayo et atalosan kon talagan makapadinayew si Jehova,” so insulat to. “Panbiliban koy pankonektaan na sayan uksoyan ed saray Israelita tan say impakasumpal to ed si Jesus. Tinmunda ak tan inisip ko ya talagan makapakelkelaw iman ya propesiyan inlitrato na pangdem ed Paskua!” Akin ya ontan so alikna na sister? Inisip ton maong so binasa to tan ‘atalosan toy kabaliksan na satan.’ Kanian binmiskeg so pananisia to tan mas inmapit ed si Jehova.—Mat. 13:23.

10. Akin ya makapabiskeg na pananisia so inkamatua na saray angisulat ed Biblia?

¹⁰ Say sananey nin makapabiskeg na pananisian ikonsidera et say pakpel tan inkamatua na saray lalakin angisulat ed Biblia. Ipapasirayew na dakel ya managsulat nensaman iray lider da tan say impanuley da. Balet duma iray propeta nen Jehova ta lanang ya tua so ibabaga ra. Agda inyamot iray kakapuyan na kabaleyan da, pati saray arari da. (2 Awa. 16:9, 10; 24:18-22) Imbaga da met iray mismon lingo ra tan lingo na arum nin lingkor na Dios. (2 Sam. 12:1-14; Mar. 14:50) “Mataltalag so ontan ya inkamatua,” so inkuan na kabataan ya brother ed Britain. Tan inyarum to: “Lalo tayon manmatalek ya say Biblia et talagan nanlapud si Jehova.”

11. Panon ya mas naapresya na saray kabataan iray prinsipyo ed Biblia?

¹¹ Lapud saray makaibangat ya prinsipyon karga na Biblia, dakel so akombinse ya nanlapu itan ed Dios. (Basaen so Salmo 19:7-11.) Oniay insulat na kabataan ya sister ed Japan: “Nen inyaplika na pamilya mi iray bangat na Biblia, talagan maliket kami. Walay deen, pankakasakey, tan aroan mi.” Saray prinsipyo na Biblia et proteksion pian agtayo makapibiang ed palson panagdayew tan saray anito ya mangaaripen ed dakel a totoo. (Sal. 115:3-8) Kasin say bangat ya anggapoy Dios et walay epekto tod totoo? Say ontan ya bangat a singa say ebolusyon et pagmamaliwen ton dios so palsa. Ompapaway laingen ya makapanyari so palsa anta si Jehova labat so walaan na ontan ya pakapanyari. Saramay manisia ya anggapoy Dios et singa da ibabagan sikatayoy akauley ed arapen tayo. Balet anggapo met so niiter dan maong ya arapen.—Sal. 146:3, 4.

12, 13. Anto so epektibon paraan pian nipaliwawam ed saray kaklasem, teacher mo, tan arum ni so nipaakar ed impamalsa tan Biblia?

¹² Panon mon nipaliwaway papanisiaan mo nipaakar ed impamalsa tan Biblia? Unona, agmo iisipen ya antam lay papanisiaan na arum. Wala ray mangibabagan manisia rad ebolusyon balet ta manisia met iran walay Dios. Iisipen da ya inusar na Dios so ebolusyon pian gawaen so nanduruman klase na bilay. Ibabaga na arum ya manisia rad ebolusyon ta imposiblin ibangat itan ed eskuelaan no aliwan tua. Tan wala ray agla manisia ed Dios ta adismaya rad relihyon. Kanian no ipaliwawam so nanlapuan na bilay, mas maong no mantepet ka ni. Amtaen mo ni no antoy papanisiaan na katongtong mo. No makatunongan ka tan ondengel ka, nayarin mas ondengel so katongtong mo.—Tito 3:2.

¹³ No walay mantepet ed sika ya singa aatakien toy papanisiaan mon walay amalsa, sarag mon ipawil ed sikatoy tepet. Sarag mon paipaliwawa ed sikato no panon ya ginmapo so bilay ya anggapoy Amalsa. Pian mantultuloy so bilay, kaukolan itan ya ondakel odino mamawala na kapara to. Imbaga na sakey ya professor ed chemistry ya pian  nagawa itan, kaukolan so (1) manprotektan baog, (2) abilidad ya mangala tan manproseso na enerhiya, (3) impormasyon ed genes, tan (4) abilidad ya nakopya itan ya impormasyon. Inyarum to: “Talagan makapakelkelaw so inkakomplikado na anggan say sankasimplian ya bilay.”

14. Antoy gawaen mo no agka akaparaan ya mangipaliwawa ed ebolusyon o impamalsa?

¹⁴ No agka akaparaan ya ipaliwawa so nipaakar ed ebolusyon o impamalsa, sarag mon aligen so simplin panagkatunongan nen Pablo. Insulat to: “Kada abung et walay nanggawa, balet say nanggawa na amin a bengatla et say Dios.” (Heb. 3:4) Satan ya panagrason et duga tan epektibo! Saray komplikadon desinyo et seguradon ginawa na mautek ya persona. Sarag mo met so mangusar na matukoy ya publikasyon. Inusar na sakey a sister so duaran brosyur ya abitla niman diad impitongtong tod sakey a kabataan ya agmanisia ed Dios balet ta manisia ed ebolusyon. Kayari na masulok a sakey simba, oniay imbaga na kabataan, “Natan et manisia ak lad Dios.” Nigapo so panangiyaral na Biblia, tan sikatoy nagmaliw ya agi tayo.

15, 16. Panon mon i-adjust so paraan na pangipaliwawam ed Biblia, tan antoy gagalam?

¹⁵ Nayarin ontan met so pankatunongan mo no say katongtong mo et manisian-andi ed Biblia. Amtaen mo no anton talagay papanisiaan to tan no anto ray topic ya labay to. (Pro. 18:13) No sikatoy interesado ed science, nayarin labay toy ondengel no say ibagam et saray punton man-prueba ya duga so ibabaga na Biblia nipaakar ed science. Ondengel met so arum no ipanengneng mo ray propesiya tan history ed Biblia ya talagan agawa. Odino sarag mon ipaimano iray makaibangat ya prinsipyo, singa saramay kabiangan na Sermon ed Palandey.

¹⁶ Tandaan, say gagalam et pian nasabi puso da, aliwan pian midebati. Kanian dengel kan maong. Magalang ya mantepet, mauyamo, tan marespeton mitongtong, lalo la no mas maedad so katongtong mo. Diad ontan, mas respetoen day ibabagam. Napansin da met ya ninonot mon maong iray papanisiaan mo. Atan so agnagagawaan na dakel ya kabataan. Siempre, agmo met lilingwanan ya agmo kaukolan ya ebatan iramay aliwan makatunongan odino say labay da labat et balawen so papanisiaan mo.—Pro. 26:4.

17, 18. (a) Antoy makatulong pian nipapusom so katuaan? (b) Anton tepet so naebatan diad onsublay ya artikulo?

¹⁷ Aliwa labat ya saray manunan bangat na Biblia so kaukolan mon aralen pian ombiskeg so pananisiam. Aral mon maong so Salita na Dios, ya singa ka mankokotkot na kayamanan. (Pro. 2:3-6) Usar mo ray gamit ed panag-research ya singa say Watchtower Library on DVD, Watchtower ONLINE YA LIBRARYA, ontan met ed Watch Tower Publications Index odino say Giya ed Pan-research na Saray Tasi nen Jehova. Sakey ni, gawam ya goal so pambasa ed interon Biblia. Sarag mon salien itan ya sakey taon. Epektibo itan ya paraan pian napabiskeg moy pananisiam. Oniay imbaga na sakey a manangasikaso na sirkito ya ginawa to nen kabataan ni: “Say sakey ya akatulong pian nakombinse ak ya Salita na Dios so Biblia et say tuloytuloy ya impanbasak ed satan. Aramay istorya ed Biblia ya naaralan ko nen ugaw ak ni et apruebaan ko ya tua. Ditan ginmapo so inyaligwas kod espiritual.”

¹⁸ Atateng, baleg so nagawaan yo pian onaligwas ed espiritual iray anak yo. Panon yo ran natulongan pian ombiskeg so pananisia ra? Aralen tayo itan diad onsublay ya artikulo.