SAY PANAG-BANTAYAN—PANARALAN YA EDISYON Setyembre 2017
Walad sayan isyu iray aaralen ya artikulo parad Oktubre 23 anggad Nobyembre 26, 2017.
Paaligwasen so Panangontrol ed Sarili
Panon ya makatulong iray alimbawa ed Biblia pian nawalaan tan nipanengneng tayo iyan kualidad? Akin ya kaukolan iyan paaligwasen na saray Kristiano?
Aligen so Inkamaabagey nen Jehova
Aminsan, nen nampakabat so Dios ed si Moises et imbaga toy mismon ngaran to tan saray kualidad to. Sakey ed saray kualidad ya unonan binitla to et say inkamaabagey. Antoy labay ya ibaga na sayan kualidad, tan akin ya nepeg mon naamtaan itan?
ISTORYAY BILAY
Apribilehyoan Ak ya Mikimey ed Maespiritual ya Lalaki
Inistorya nen David Sinclair iray makapaliket ya eksperiensya tan pribilehyo to legan ya manlilingkor a kaiba iray matoor ya agagi diad 61 ya taon to ed Brooklyn Bethel.
“Say Salita na Dios Tayo et Mansiansia ya Anggad Angga”
Say Biblia so siansia nin sankasaliwan ya libro kalabas na nilasus ya taon kayarin akompleto itan, anggano manguuman so lenguahe tan sistema na politika, tan wala ray kontra ed panagpatalos na Biblia.
“Say Salita na Dios et . . . Makapanyari”
Dakel so akapanggawa na baleg a pananguman lapud panaaral day Salita na Dios. Antoy kaukolan tayon gawaen pian ontan so epekto ed sikatayo na Salita na Dios?
‘Manpakpel Ka tan Igapom Lay Kimey’
Akin ya kaukolan tayoy pakpel, tan panon tayon nawalaan na pakpel?
