NEN kapegleyan na dekada 1930, say tatay tan nanay ko ya si James tan Jessie Sinclair ya taga Scotland et inmalis tan nanayam ed Bronx, diad New York City. Sakey ed saray balon akabat da et si Willie Sneddon ya nanlapu met ed Scotland. Pigaran minuto ni labat iran nankabat, paniistoryaan da lay tungkol ed pamilya da. Agawa itan pigaran taon antis ak ya niyanak.

Inistorya nen nanay kod si Willie ya antis na World War I, nen say baloton pansisigay di tatay tan kuya to et asagi toy sakey ya bomba diad North Sea, sinmabog itan kanian nalner ira. Inkuan nen Willie, “Walad impierno si tatay mo!” Si Willie et sakey ed saray Tasi nen Jehova, tan saya so makapabiglan gapoan na impakaamta nen nanay ko na katuaan ed Biblia.

Ag-agustoan nen nanay ko so imbaga nen Willie ta amta ton maong ya too si tatay to. Pero imbaga ni nen Willie, “Ontan ni kasi naliknam no ibagak ed sika ya si Jesus et linmad impierno?” Anonotan nen nanay ko imay bangat na simbaan, ya ibabaga dan linmad impierno si Jesus tan apaoli diad komatlon agew. Kanian ninonot to, ‘No say impierno et maapoy a pasen ya diman papairapen iray mauges, akin et linma diman si Jesus?’ Dia ginmapo so interes nen nanay ko ed katuaan. Ginapoan toy miaral ed Bronx Congregation tan abautismoan nen 1940.

Diad saman a panaon, agni masyadon ipapaseseg ed saray Kristianon atateng ya iyaralan da na Biblia so ananak da. Nen melag ak ni, si tatay ko so mankokomis ed siak no miaral tan manpulong si nanay ko kada weekend. Kayari pigaran taon, mimiaral kami met la nen tatay ko. Si nanay et makulikulin manpulong tan dakel so iyaaralan to na Biblia. Walay panaon ya paniibaen toy pigaran iyaaralan to ed sakey a grupo ta nan-aasinggeran labat so panaayaman da. Mimila ak ed si nanay ya manpulong no bakasyon mid eskuelaan. Kanian, dakel so naaralan ko ed Biblia tan no panon ya ibangat itan ed arum.

Aminen ko ya nen ugaw ak, agko masyadon aapresyaen so katuaan. Agko itan inikdan na importansia. Balet nen manga 12 so taon ko, nagmaliw ak ya manangipalapag tan manlapud saman et regular ak lan mibibiang ed  ministeryo. Tan nen 16 so taon ko, indedikak so bilay ko ed si Jehova, tan abautismoan ak nen Hulyo 24, 1954, diad sakey ya kombension ed Toronto, Canada.

Wala ray agagi ed kongregasyon mi ya bethelite tan datin bethelite. Baleg so impluensya da ed siak. Pandinayewan koy inkadunong dan manpaliwawa tan manbangat na katuaan ed Biblia. Anggano labay na saray teacher kod eskuelaan ya manaral ak ed unibersidad, say labay ko et manlingkor ed Bethel. Kanian, nan-submit ak na application ed Bethel diad samay kombension ed Toronto. Nan-submit ak lamet nen 1955 diad kombension ed Yankee Stadium, New York City. Ag-abayag, nen 17 so taon ko, naimbitaan ak ya manlingkor ed Brooklyn Bethel nen Setyembre 19, 1955. Nen komaduan agew ko ed Bethel, nantrabaho ak ed Bindery diad 117 Adams Street. Insan niyasain ak ya man-operate na makina ya mantitipon na 32 pahina ya seksion na libro pian niparaan parad onsublay a makina ya mandadait na saray libro.

Kayari sakey bulan kod Bindery, niyasain ak ed Magazine Department lapud amtak so man-type. Diad saman, ita-type na saray agagi ed stencil (melag iran metal plate) iray address na saray balon subscriber na The Watchtower tan Awake! Kayari pigaran bulan, niyalis ak ed Shipping Department. Tinepetan ak na department overseer ya si Klaus Jensen no labay koy mangiba ed driver na trak ya mangitutulor na saray kahon na literatura diad pier pian nipawit ed nanduruman lugar ed interon mundo. Aawiten met ed post office iray magasin ya akakargad saray sako pian nipawit ed saray kongregasyon ed interon United States. Inisip nen Brother Jensen ya maong ed siak so pisikal a trabaho. Say belat ko et manga 57 kilo tan mapmabeng ak.  Saray impanbiahe mi paonlad pier tan post office et akatulong pian ombiskeg so laman ko. Talagan amta nen Brother Jensen no antoy maong ed siak!

Say Magazine Department met so mangirerekord na saray request na kongregasyon parad magasin. Kanian naamtaan ko iray lenguahe na magasin tayo ya iyiimprinta ed Brooklyn tan ipapawit ed arum nin parte na mundo. Anggapon balot so ideyak nipaakar ed saray dakel ya lenguahe, balet makapaliket ta nilibo manayan magasin so ipapawit ed ararawin lugar. Agko ni amta ed saman ya onsabi panaon et napribilehyoan ak ya ombisita ed dakel ed saratan ya lugar.

Nen 1961, niyasain ak ed Treasurer’s Office ya say overseer et si Grant Suiter. Kayari pigaran taon ko ditan, tinawag ak ed opisina nen Nathan Knorr, ya mangidadaulo ed sankamundoan ya kimey tayo ed saman a panaon. Imbaga to ya sakey ed saray brother ya mantratrabaho ed opisina to et sakey bulan ya manaral ed Kingdom Ministry School, tan kayari to et iyasain ed Service Department. Siak so onsalat ed trabaho to tan nakaibak ditan si Don Adams. Nibanbana ya si Don imay akaawat na application kod Bethel nen 1955 ya kombension. Duara nin brother so asabian kon mantratrabaho ed satan ya opisina, si Robert Wallen tan Charles Molohan. Sankakaiba kamin apat ed trabaho diad masulok ya 50 taon. Talagan makapaliket so manlingkor ya kaiba irayan matoor tan maespiritual ya lalaki!​—Sal. 133:1.

Manlapud 1970, niyasain ak ya ombiahe na pigaran simba kada sakey o duaran taon pian ombisita ed pigaran branch office na Watch Tower Society, ya say tawag nensaman et zone visit. Bibisitaen ko ray pamilyan Bethel tan saray misionero ed interon  mundo, papasesegen ko ra ed espiritual, tan itse-tsek ko iray rekord na branch office. Talagan makapaliket ya nakabat so arum ed saray nan-graduate ed inmuunan klase na Gilead School tan matoor nin manlilingkor ed arum ya bansa! Baleg a pribilehyo tan makapaliket so ombisita ed masulok ya 90 bansa lapud satan ya asainmin ko.

Amin ya membro na pamilyan Bethel ed Brooklyn et akaasain ed saray kongregasyon diad New York City. Akaasain ak ed Bronx. Say unaan ya kongregasyon ditan et inmaligwas tan apaldua. Amay sankaunaan ya kongregasyon et tinawag ya Upper Bronx Congregation, tan ditan ak inmatendi.

Diad kapegleyan na dekada 1960, sakey ya pamilyan Latvian ya nagmaliw ya Tasi ed south Bronx so inmalis tan nanayam ed teritorya na satan ya kongregasyon. Say panguloan ya anak a bii ya si Livija et nampayunir ka-graduate tod high school. Kayari pigaran bulan, inmalis ed Massachusetts ta baleg so pankaukolan ditan parad saray manangipalapag na Panarian. Ginapoan koy nansulat ed sikato tan ibabagak iray balibalin nagagawa ed kongregasyon mi, tan babalesen toy sulat ko tan ibabaga to met ed siak iray balibalin eksperiensya tod ministeryo diad Boston.

Kalabas na pigaran taon, aturo bilang espisyal payunir si Livija. Labay ton naaruman so nagagawaan to parad panaglingkor ed si Jehova, kanian nan-aplay ya manlingkor ed Bethel tan atawag nen 1971. Singa aya la so tanda ya nanlapud si Jehova! Nen Oktubre 27, 1973, nankasal kami tan pribilehyo mi ya si Brother Knorr so nampaliwawa ed kasal mi. Ibabaga na Proverbio 18:22: “Samay akaromog na maong ya asawan bii et akaromog na maong a bengatla, tan makakaawat na pabor nen Jehova.” Kanian malikeliket kami nen Livija ya manlilingkor a sankaiba ed Bethel diad masulok lan 40 taon. Tan anggad natan et onsusuporta kamid sakey a kongregasyon ed parehon lugar diad Bronx.

Talagan makapaliket so pikimey ed si Brother Knorr. Sikatoy makulin komikimey parad katuaan tan aapresyaen ton maong iray misionero ed interon mundo. Dakel ed sarayan misionero so unonan Tasi ed bansan angibakian ed sikara. Makapaermen ta nen 1976, nansakit na kanser si Brother Knorr. Aminsan, lapud wala labat lad dukolan, kinerew tod siak ya ibasak ed sikato iray materyal ya ipaparaan ya iyimprinta. Impatawag tod siak si Frederick Franz pian narengel to met so pambasak. Naamtaan ko ya makapuy lay mata nen Brother Franz, kanian ipapanaon nen Brother Knorr so pangibasa ed sikato na saratan ya materyal.

Inatey si Brother Knorr nen 1977, balet aligliwa iramay makankabat tan mangaaro ed sikato lapud nansiansian matoor anggad sampot na bilay to diad dalin. (Apo. 2:10) Si Brother Franz so sinmalat ya angidaulo ed kimey tayo.

 Diad saman a panaon et siak so secretary nen Milton Henschel, ya pigay taon ya akaiba nen Brother Knorr ed trabaho. Balet imbaga nen Brother Henschel ya say manuna lan asainmin kod Bethel et asistian si Brother Franz ed antokaman ya nakaukolan to. Regular kon ibabasa ed sikato iray materyal antis ya iyimprinta. Maong so memorya nen Brother Franz tan makapadinayew so abilidad ton man-concentrate ed samay ibabasa ed sikato. Makapaliket so ontulong ed sikato ed ontan a paraan ya anggad anampot so bilay to diad dalin nen Disyembre 1992!

Agangganon linmabas so 61 taon ya impanlingkor kod Bethel. Saray ateng ko et inatey ya matoor ed si Jehova, tan tatalaranan ko so panaon ya nanengneng ko lamet ira diad balon mundo. (Juan 5:28, 29) Anggapoy antokaman a walad sayan daan ya sistema na mundo so makapipara ed alay abig a pribilehyon mikimey ed saray matoor a lalaki tan bibii parad totoo na Dios diad interon mundo. Nibaga mi nen Livija ya legan na saray taon ya panlilingkor mi bilang full-time, “say liket ya iiter nen Jehova so biskeg [mi].”​—Neh. 8:10.

Talagan ag-akadepende ed too so organisasyon nen Jehova, tan tuloytuloy ni so kimey ya panangipulong na katuaan nipaakar ed Panarian. Makapaliket tan sakey a pribilehyo so mikimey ed saray agagin mabiskeg ed espiritual tan matoor diad dakel ya taon. Maslak ed saray alanaan ya akaibak ed trabaho et anggapo la ra dia ed dalin. Balet malikeliket ak ta akaibak irayan matoor tan maespiritual ya agagi diad panaglingkor ed si Jehova.